“ჩვენი გადაწყვეტილება არის მკაფიო, რომ არავითარ გაერთიანებას არ ვაპირებთ”- აცხადებს პარტია “საქართველოსთვის” წევრი მიხეილ დაუშვილი .

მისივე თქმით, მისთვის არ არის დამაჯერებელი განაცხადი იმის თაობაზე, რომ “ქართული ოცნების” დამარცხების ფორმულა არის “ნაციონალური მოძრაობისა” და “სტრატეგია აღმაშენებლის” გაერთიანება.

“ვინ გაერთიანდება, როგორ, ეს მათი საქმეა, რა იქნება პროდუქტიული და რა კონტრპროდუქტიული, ამას გვაჩვენებს საბოლოო ჯამში არჩევნები. მე არ მჯერა, რომ ეს არის “ოცნების” დამარცხების ფორმულა. ზოგადად, არ მინდა სიღრმეებში წავიდე – გამოეყო, დაბრუნდა, მერე კიდევ გამოეყო, მერე კიდევ დაბრუნდა, ხან ლანძღავდა, ეს არსებითი არ არის. ჩვენი გადაწყვეტილება არის მკაფიო, რომ არავითარ გაერთიანებას არ ვაპირებთ”, – განაცხადა დაუშვილმა.

ამასთან, დაუშვილი გამოეხმაურა ეკა ბესელიას განცხადებას იმის თაობაზე, რომ “ქართული ოცნების” ყოფილი წევრები შესაძლოა, გაერთიანდნენ და კონსულტაციები მიმდინარეობს გიორგი გახარიასთანაც. დაუშვილი აცხადებს, რომ მსგავსი კონსულტაციების შესახებ მას ინფორმაცია არ აქვს.

“მე ამ კონსულტაციების შესახებ ინფორმაცია არ გამაჩნია. მე არ ვიცი, ვინ ყოფილი წევრები რა გაერთიანებას გეგმავენ, შეიძლება ვიღაცები ვიღაცებთან რაღაც გაერთიანებებზე ან თანამშრომლობაზე საუბრობენ, მაგრამ მე ამის შესახებ ინფორმაცია არ მაქვს,”- განაცხადა დაუშვილმა.

„ერთიანი ნაციონალური მოძრაობის“ თავმჯდომარე ლევან ხაბეიშვილი, პარტიის ლიდერებთან ერთად, თბილისში პენსიონერებს შეხვდა.

შეხვედრაზე საუბარი შეეხო პარტიის ახალ ინიციატივებს, რომელიც საპენსიო ასაკის 60 წლამდე დაწევასა და მინიმალური პენსიის გაზრდას 400 ლარის ოდენობამდე გულისხმობს. ასევე, საუბარი შეეხო საპენსიო სესხების განულებას. ამის შესახებ ინფორმაციას „ნაციონალური მოძრაობა“ ავრცელებს.

მაღივე ცნობით, ამ კამპანიის ფარგლებში „ერთიანმა ნაციონალურმა მოძრაობამ“ რამდენიმე დღის წინ, „ლიბერთი ბანკთან“ აქციაც გამართა.

პარტიის თავმჯდომარის განცხადებით, ისინი გაგრძელებენ მუშაობას პენსიონერებისთვის, რომლებმაც დაიმსახურეს ღირსეული, ბედნიერი სიბერე.

„მინიმალური პენსია ანუ 295- ლარიანი პენსია, სწრაფად უნდა გახდეს 400 ლარი. ყველა ის დანამატი, რომელიც არის, უნდა შენარჩუნდეს, ოღონდ არა 70 წლის ზემოთ, არამედ უკვე 65 წლის ზემოთ. ასევე, მაღალმთიანებისთვის მნიშვნელოვანია, რომ ის დანამატები იყოს შენარჩუნებული და ეს ნიშნავს, რომ მინიმალური პენსია იქნება 400 ლარი და საბოლოო ჯამში, 65 წლის ზემოთ და მაღალმთიან რეგიონებში 600 ლარამდე. ამ თემებთან დაკავშირებით გვქონდა შეხვედრა თბილისელ პენსიონერებთან, ასევე ვისაუბრეთ საპენსიო სესხების განულებაზე და ასეთი არის 400 ათასამდე ადამიანი, რომელმაც აიღეს სესხი 1000-1500, მაქსიმუმ 2000 ლარი და ახდევინებენ 4000-4500 და 5000 ლარს. ფაქტობრივად, სამჯერ უფრო მეტს, ვიდრე იღებენ სესხს და ეს კანონის სახელით ძარცვა აუცილებლად უნდა დავასრულოთ. ჩვენ გავაგრძელებთ მუშაობას, შრომას ჩვენი პენსიონერებისთვის, რომლებმაც დაიმსახურეს ღირსეული, ბედნიერი სიბერე.“ – განაცხადა ლევან ხაბეიშვილმა.

გლობალური ომის პარტია ეს ის პოლიტიკური, ფინანსური თუ ოლიგარქიული ძალაა, რომელიც არა მხოლოდ საქართველოზე, არამედ ძალიან ბევრ ქვეყანაზე ახდენს ძალიან დიდ გავლენას და რომელსაც ძალიან ბევრი ქვეყნის მთავრობა ემორჩილება“, – ამის შესახებ „ხალხის ძალის“ ერთ-ერთმა ლიდერმა სოზარ სუბარმა მედიასთან ისაუბრა.

მისი თქმით, გლობალური ომის პარტიას სააკაშვილის ციხიდან გამოყვანა უნდა იმიტომ, რომ ამით კიდევ ერთი მცირედი დაზიანება მიაყენოს საქართველოს, თუმცა როგორც ნიკა გვარამიას შემთხვევაში ვერანაირ შედეგს ვერ მიაღწიეს მისი გამოშვებით, ისე ვერანაირ შედეგს ვერ მიაღწევენ სააკაშვილის შემთხვევაშიც.

„ზოგადად, აკერმანებთან, როგორც ჩანს, საქართველოს მეგობრული ურთიერთობა არ გამოგვდის. ერთი აკერმანი იყო და საქართველოში რევოლუციის მოწყობას გეგმავდა და მეორე, ამ შემთხვევაში კომპანია „აკერმანია“ და პრაქტიკულად, საქართველოს დასანქცირების მცდელობებში იქნა მხილებული FARA-ს კანონის მეშვეობით. ძალიან სამარცხვინოა, რომ ყოფილი პრეზიდენტი და მისი ოჯახი მილიონებს ხარჯავენ იმასთან დაკავშირებით, რომ საქართველოზე ცრუ ინფორმაციები გავრცელდეს, ევროპარლამენტმა საქართველოს მიმართ აბსოლუტურად მტრული რეზოლუციები მიიღოს და ა.შ. მაგრამ, ეს ყველაფერი გადაფარა იმან, რომ ეს ადამიანები ცდილობენ საქართველოს მიმართ სანქციები გავრცელდეს, რომელიც, ჩვენი ქვეყნისთვის ძალიან მძიმე შედეგების მომტანი იქნება. ეს არის ღალატი საქართველოს წინააღმდეგ, სხვას ამას, ვერაფერს დავარქმევ.

რაც შეეხება თანხას, რომელიც ამ ყველაფერშია დახარჯული (ოფიციალურად, მილიონზე ოდნავ მეტზეა ლაპარაკი), შეუძლებელია ამ თანხით ამდენი აქტივობის დაფინანსება მოხერხდეს. ჯერ მარტო რამდენიმე ათეული წერილი დაიბეჭდა საერთაშორისო პრესაში, CNN-ზე ინტერვიუ და სიუჟეტი იყო, „როიტერსში“ მასალები გამოქვეყნდა და ა.შ. ამ ყველაფერს გაცილებით მეტი ფული სჭირდება. ორი რამ არის რაც ამ მილიონზე ცოტა მეტის უკან დგას – პირველი: სავარაუდოდ, გაცილებით დიდი თანხაა გადახდილი და მეორე: ეს არის თემა, რომელსაც არც ორი და არც ოცი მილიონი არ ეყოფოდა, გაცილებით დიდი მოთამაშეების ინტერესები რომ არ იდგეს ამის უკან.

„აკერმანი“ ამ შემთხვევაში, არის ერთი პატარა ნაწილი, რაც არის საქართველოს წინააღმდეგ არის გაჩაღებული გლობალური ომის პარტიის მიერ. გლობალური ომის პარტია ეს ის პოლიტიკური, ფინანსური თუ ოლიგარქიული ძალაა, რომელიც არა მხოლოდ საქართველოზე, არამედ ძალიან ბევრ ქვეყანაზე ახდენს ძალიან დიდ გავლენას და რომელსაც ძალიან ბევრი ქვეყნის მთავრობა ემორჩილება. მათ ვერ აუტანიათ, რომ დღეს საქართველოს ხელისუფლება არ არის მათი პირდაპირი გავლენის ქვეშ. ამიტომაც არის, რომ მიუხედავად არაერთი მარცხისა, მიუხედავად იმისა, თუ რა გადაწყვეტილება მიიღო ადამიანის უფლებათა ევროპულმა სასამართლომ, მიუხედავად იმისა, რომ საქართველოში ხალხი ქუჩაში ვერ გამოიყვანეს და არ გამოუვიდათ მცდელობა, რომ რევოლუცია მოეწყოთ, მიუხედავად იმისა, რომ ამდენი სტატიაა გამოქვეყნებული, თუ რეზოლუციაა ევროპარლამენტის მიერ მიღებული, ესეც ვერ ახდენს სასურველ შედეგს და საქართველო ძალიან მტკიცედ მიუყვება ომის არდაშვების გზას, მაინც ეს მცდელობები არ ჩერდება, არ იკლებს და სულ უფრო და უფრო ბრუნებს იღებს. ეს სწორედ იმის გამო ხდება, რომ ამ კამპანიების უკან დგას ძალიან დიდი ძალა და ამ ძალას ჩვენ ვეძახით გლობალური ომის პარტიას.

სააკაშვილი ძალიან პატარა ჭანჭიკია ამ გლობალური ომის პარტიის ხელში, რომლის გამოყვანა უნდათ იმიტომ, რომ ამით კიდევ ერთი მცირედი დაზიანება მიაყენონ ქვეყანას, თუმცა როგორც ნიკა გვარამიას შემთხვევაში ვერანაირ შედეგს ვერ მიაღწიეს მისი გამოშვებით, ისე ვერანაირ შედეგს ვერ მიაღწევენ, მართლა რომ მოხდეს სააკაშვილის გათავისუფლება, თუმცა იმედი მაქვს, რომ ეს არ მოხდება და ამ ნაბიჯს არ გადადგამს სალომე ზურაბიშვილი“, – განაცხადა სოზარ სუბარმა.