პირადობის მოწმობის გამოყენებით საქართველოსა და სომხეთს შორის გადაადგილებაა შესანიშნავი შესაძლებლობაა ორი მეგობარი ერისთვის, რომ უპრობლემოდ შეძლონ მოგზაურობა, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელ „ტვიტერში“ წერს.

როგორც პაპუაშვილი წერს, ახალი სისტემა ჩაანაცვლებს პასპორტით მოგზაურობის სისტემას, რაც უფრო მეტ თავისუფლებას მიანიჭებს მოქალაქეებს.

„სასიხარულო სიახლე. დღეიდან საქართველოსა და სომხეთის მოქალაქეებს ორ ქვეყანას შორის გადაადგილება პირადობის მოწმობის გამოყენებით შეეძლებათ. ახალი სისტემა ჩაანაცვლებს პასპორტით მოგზაურობის სისტემას, რაც მეტ მოქნილობას და თავისუფლებას მიანიჭებს მოქალაქეებს. ეს არის შესანიშნავი შესაძლებლობა ორი მეგობარი ერისთვის, რათა უპრობლემოდ შეძლონ მოგზაურობა“, – წერს პაპუაშვილი.

ძალაში შევიდა შეთანხმება, რომლის მიხედვითაც, საქართველოსა და სომხეთს შორის მიმოსვლა ბიომეტრიული პირადობის მოწმობით არის შესაძლებელი.

ევროკავშირის სამედიცინო მისიის პრეზიდენტ მიხეილ სააკაშვილთან შესვლასთან დაკავშირებით ევროკავშირის ელჩს მადლობა გადავუხადე, ის პირადად იყო ჩართული ამ საქმეში, – ამის შესახებ „ნაციონალური მოძრაობის” თავმჯდომარემ, ლევან ხაბეიშვილმა ევროკავშირის ელჩთან, პაველ ჰერჩინსკითან შეხვედრის შემდეგ განაცხადა.

ხაბეიშვილის თქმით, ევროკავშირის ელჩთან შეხვედრაზე საუბრის თემა ასევე იყო ევროკავშირის წევრობის კანდიდატის სტატუსი და ის, თუ რა სჭირდება საქართველოს კანდიდატის სტატუსის მისაღებად.

ამასთან, ხაბეიშვილის თქმით, ელჩი საქმის კურსში ჩააყენა იმ ინციდენტების შესახებ, რომელსაც ადგილი ჰქონდა მოსახლეობასთან შეხვედრისას.

„მინდა მადლობა გადავუხადო პოლონეთის საელჩოს და იმ ადამიანებს, რომლებმაც უზრუნველყვეს, 4 თვის დაგვიანებით, ევროკავშირის სამედიცინო მისიის შესვლა მიხეილ სააკაშვილთან. ცხადია, შეხვედრაზე ასევე ვისაუბრეთ კანდიდატის სტატუსზე და იმაზე, თუ რა სჭირდება ჩვენს ქვეყანას კანდიდატის სტატუსის მისაღებად. ჩვენ გავაგრძელებთ პენსიონერებზე ზურნვას, მათთან შეხვედრებს. ხვალ, მარტვილში „კაგებეშნიკის“ ოჯახში გაზრდილ, ირაკლი კობახიძის დაორგანიზებულ ტუტუშკებს ველოდები. დარწმუნებული ვარ, იქაც მოვარდებიან პენსიონერებთან და აუცილებლად ესვრიან ქვებს. ჩვენ არ გვაშინებს, არც ფიზიკური დაპირისპირება, არც ჩვენი ქვეყნისთვის ბრძოლა. საპენსიო რეფორმასთან დაკავშირებით ყველა სოფელში და ქალაქში გვექნება შეხვედრები. ველოდებით ტიტუშკებს ქვებიანად. კარგად იცოდნენ, რომ არავის ეშინია, მათავრია რომელიმე მოსული პენსიონერი არ დაშავდეს.

მოდი პირდაპირ ვთქვათ, რომ ქვების სროლით ევროკავშირში არ გველოდებიან. დღევანდელ შეხვედრაზე ასევე საუბარი გვქონდა მიშა მშვილდაძის ცემაზე, რომელიც სუს-მა დაგეგმა და უზრუნველყო. საუბარი გვქონდა ზურა ჯაფარიძის ცემაზეც. ასევე საუბარი ლევან ბერძენიშვილის ცემის ფაქტზე. ევროკავშირის ელჩი ყველაფერის შესახებ საქმის კურსში ჩავაყენეთ”, – განაცხადა ხაბეიშვილმა.

ოჯახს შესთავაზეს, მოეწვიათ ნებისმიერი ექიმი, რომელიც სააკაშვილის ჯანმრთელობის მდგომარეობას დააკვირდებოდა, – ამის შესახებ პარტია „ქართული ოცნების“ თავმჯდომარე ირაკლი კობახიძემ პოლონელი ექიმების საქართველოში ჩამოსვლასთან დაკავშირებით განაცხადა.

კობახიძის განცხადებით, სააკაშვილთან დაკავშირებით ერთადერთი პრობლემაა ის, რომ სათანადო კალორაჟის საკვებს არ იღებს. მისივე თქმით, ამ კუთხით პასუხისმგებლობა აქვს სააკაშვილის ოჯახს.

„იუსტიციის სამინისტრო ყოველთვის იყო გახსნილი ამ თვალსაზრისით. ისინი იწვევდნენ, მათ შორის ოჯახის ხაზით ექიმებს. შესთავაზეს ოჯახს, მოეწვიათ ნებისმიერი ექიმი, რომელიც დააკვირდებოდა ჯანმრთელობის მდგომარეობას. აქედან გამომდინარე, ხედავთ, რომ დასამალი არავის არაფერი აქვს. მთავარი პრობლემა მდგომარეობს იმაში, რომ მიხეილ სააკაშვილთან ოჯახს სათანადო კალორაჟის საკვები არ შეაქვს და ამის გამო ის წონაში იკლებს. ეს არის ერთადერთი პრობლემა. შეიტანონ სათანადო კალორაჟის საკვები და ეს პრობლემაც აღარ იქნება. პასუხისმგებლობა აქვს ოჯახს“, – განაცხადა ირაკლი კობახიძემ.

ჩვენ არ ვართ ევროკავშირის წევრი, ჩვენ ვართ საქართველოს ევროკავშირში გაწევრიანების ძლიერი მხარდამჭერები, რადგან ვიცით, რომ ეს არის უმრავლესობის, ქართველების აბსოლუტური უმრავლესობის მკაფიო არჩევანი და სწორედ ამიტომ ვეხმარებით საქართველოს რამდენადაც შეგვიძლია, განახორციელოს რეფორმები, რომლებიც საჭიროა იმისათვის, რომ იყოს შესაბამისი და იყოს მზად საქართველოს ევროკავშირში გაწევრიანების გზაზე შემდეგი მნიშვნელოვანი ნაბიჯისთვის, – ამის შესახებ საქართველოში ევროკავშირის ელჩმა, კელი დეგნანმა განაცხადა, რომელსაც დაუსვეს შეკითხვა, ევროკავშირის წევრის სტატუსის მიღების რა შანსები აქვს საქართველოს მომავალ ზამთარს.

„რაც ახლა ძალიან მნიშვნელოვანია, საქართველოს პოლიტიკურმა ლიდერებმა აჩვენონ, რომ მათ აქვთ გამბედაობა, აქვთ ძალა, რომ გვერდზე გადადონ უთანხმოება და ყურადღება გაამახვილონ იმ სამუშაოს შესრულებაზე, რომელიც უნდა შესრულდეს. ევროპულმა კომისიამ ორიოდე კვირის წინ ცხადყო, რომ თორმეტი რეკომენდაციიდან სამი სრულად შესრულდა, რაც ნამდვილად კარგი ამბავია, კარგი ნამუშევარია, მაგრამ კიდევ ცხრაა, რომელსაც ახლა ფოკუსირება სჭირდება, სჭირდება, რომ საქართველოს ყველა პოლიტიკურმა ლიდერმა, ყველა დაინტერესებულ მხარესთან ერთად, რომელსაც აქვს ინტერესი ამ სფეროებში, ერთად იმუშაოს საქართველოს საუკეთესო ინტერესებისთვის. ეს არის ის, რაც საჭიროა, რაც უნდა დავინახოთ დარჩენილ თვეებში, საქართველოს პოლიტიკური ლიდერების გამბედაობა, რომ გვერდზე გადადონ თავიანთი უთანხმოება და გაერთიანდნენ ამ ქვეყნის გარშემო, ევროპული მომავლის გარშემო“, – აღნიშნა ელჩმა.

მიხეილ სააკაშვილმა უნდა ჭამოს და ყველაფერი იქნება რიგზე და ყველაფერი იქნება ნორმალურად, – ამის შესახებ დედაქალაქის მერმა, კახა კალაძემ განაცხადა.

როგორც კახა კალაძემ აღნიშნა, ადამიანს აქვს კონკრეტული დანაშაულები ჩადენილი, რაზეც უწევს პასუხისგება, ადამიანი, რომ არ ჭამს, ამის გამო ციხიდან ვერ გათავისუფლდება.

„რაც შეეხება მიხეილ სააკაშვილს, თავიდან ბოლომდე მისი შემოტანა, როგორც განუბაჟებელი ბარგის საქართველოში, თავიდან ბოლომდე ყველაფერი იყო დადგმული, გაგრძელებული იმ პიარკამპანიით რაც ხდებოდა ამ თვეების განმავლობაში. დღეში ათჯერ კვდებოდა, უმძიმეს მდგომარეობაში იყო, ეს ყველაფერი მიმართულო იყო ერთი რამისკენ, ერთი მიზანი ჰქონდა ამ ყველაფერს, რომ როგორმე მომხდარიყო მისი დახსნა და გათავისუფლება სასჯელიდან. ადამიანს აქვს კონკრეტული დანაშაულები ჩადენილი, რაზეც უწევს პასუხისგება და არჭამის გამო ციხიდან ადამიანები ვერ გათავისუფლდებიან. მე არავის ცუდად ყოფნა არ გამიხარდება ვინც არ უნდა იყოს. მისმა ოჯახის წევრებმა, მისმა გარემოცვამ უნდა იზრუნოს ამ ადამიანის ჯანმრთელობა, შესაბამისი კალორაჟის საკვები უნდა მიაწოდონ, რომ ის იყოს ჯანმრმთელი.

ყველა პატიმრის ჯანმრთელობის მდგომარეობა განურჩევლად, არ აქვს მნიშვნელობა, ვინ ვინ იყო, ვის რა აქვს გაკეთებული, ჩვენთვის არის ძალიან მნიშვნელოვანი, შესაბამისად, სახელმწიფო ამ მოცემულობაში არის მოწოდების სიმაღლეზე, რაც ძალიან მნიშვნელოვანია“, – განაცხადა კალაძემ.