არსებული ურთიერთობების ამაღლება სტრატეგიული პარტნიორობის პატივსაცემ დონეზე წარმოადგენს მნიშვნელოვან ეტაპს და გზას უკვალავს ჩინეთსა და საქართველოს უფრო ნაყოფიერი თანამშრომლობისკენ, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჩინეთი-საქართველოს ბიზნესფორუმზე სიტყვით გამოსვლისას განაცხადა.

მთავრობის მეთაურმა ჩინეთის პრეზიდენტს და პრემიერს განსაკუთრებული სტუმართმოყვარეობისა და თბილი მიღებისთვის მადლობა გადაუხადა.

„ბატონო თავმჯდომარე, თქვენო აღმატებულებავ ბატონო ელჩო, ძვირფასო მეგობრებო, ქალბატონებო და ბატონებო, უპირველეს ყოვლისა, უაღრესად მადლობელი ვარ პრეზიდენტ სი ძინპინის, რომ მოგვიწვია მე და ჩემი დელეგაცია ჩინეთის სახალხო რესპუბლიკაში და ზაფხულის მსოფლიო საუნივერსიტეტო თამაშების გახსნის ცერემონიაზე ჩენგდუში. გასულ კვირას დიდი პატივი იყო პრეზიდენტ სისთან, სამაგალითო პოლიტიკოსთან, ბრძენ და მასშტაბური ხედვის მქონე ეროვნულ ლიდერთან შეხვედრა. მინდა გულწრფელი მადლობა გადავუხადო პრეზიდენტ სის და პრემიერ ლის განსაკუთრებული სტუმართმოყვარეობისა და თბილი მიღებისთვის. არსებული ურთიერთობების ამაღლება სტრატეგიული პარტნიორობის პატივსაცემ დონეზე წარმოადგენს მნიშვნელოვან ეტაპს და გზას უკვალავს ჩინეთსა და საქართველოს უფრო ნაყოფიერი თანამშრომლობისკენ. საქართველოს მთავრობისა და ქართველი ხალხის სახელით, უზომოდ მოხარული ვარ თქვენს შესანიშნავ ქვეყანაში ასეთი პროდუქტიული და მეგობრული ვიზიტის გამო. ასევე პატივია დღეს ვესწრებოდე ამ ღირებულ ბიზნეს ფორუმს, წარმოვადგენდე ჩვენს ქვეყანას – საქართველოს და სიტყვით მივმართავდე გამორჩეულ ოფიციალურ პირებს, ისევე როგორც ჩინეთისა და საქართველოს ბიზნესის წარმომადგენლებს”, – განაცხადა ირაკლი ღარიბაშვილმა.

მინდა, ხელმოცარულ ოპოზიციას მოვუწოდო, რომ უპასუხისმგებლო ქმედებებისგან თავი შეიკავონ, ეს წარმატებული ვერასდროს იქნება, მოსახლეობის უმრავლესობა დესტრუქციულ პოლიტიკას მხარს არ დაუჭერს, – ამის შესახებ ვიცე-პრემიერმა ლევან დავითაშვილმა ბათუმის პორტში გამართულ აქციაზე კომენტირებისას განაცხადა.

როგორც ლევან დავითაშვილმა აღნიშნა, საქართველოს მთავრობა იქნება თანმიმდევრული, რომ უზრუნველყოფილი იყოს სტაბილური გარემო ეკონომიკური განვითარებისთვის და ამ ეკონომიკურ განვითარებაში ერთ-ერთი მნიშვნელოვანი როლი აქვს ტურიზმს.

„არ შეიძლება, რომ ამ საკითხზე არ გაკეთდეს ძალიან მკაფიო განმარტება, საქართველოს ხელისუფლება ყველა საერთაშორისო შეთანხმებებს იცავს ძალიან მკაფიოდ, ამაზე ჩვენმა სტრატეგიულმა პარტნიორებმა განაცხადეს, რომ საქართველოში სანქციების გვერდის ავლის არცერთი ფაქტი არ ფიქსირდება. ეს გემი საქართველოში შემოვიდა და გადამოწმდა. მჭიდრო თანამშრომლობა არსებობს საზღვაო სააგენტოსა და საბაჟო სტრუქტურებს შორის, არც გემის მფლობელი და არც გემი სანქციებში არ იმყოფება, ეს ერთი, მკაფიო არის, რომ ჩვენ ეს დავიცვათ. ძალიან მნიშვნელოვანია, რომ ჩვენ თანმიმდევრული ვიყოთ განცხადებებსა და პოლიტიკაში, თანმიმდევრულობა ნიშნავს იმას, რომ ჩვენ მივესალმებით საქართველოში ტურიზმის განვითარებას“, – განაცხადა დავითაშვილმა.

მისივე თქმით, ტურიზმი ქვეყნის ეკონომიკის ზრდის ერთ-ერთი მნიშვნელოვანი ნაწილია და მოსახლეობის შემოსავლებსა და კეთილდღეობაზე პირდაპირ აისახება.

„უპასუხისმგებლო აქციები დაორგანიზებულია უპასუხისმგებლო ოპოზიციის მხრიდან და ეს არის სუფთა პოლიტიზებული აქცია. სამწუხაროდ, ჩვენი ქვეყნის მოსახლეობის შეცდომაში შეყვანით ისინი ახერხებენ, დესტრუქციული ქმედებები მოახდინონ ქვეყანაში და ხელი შეუშალონ არა მხოლოდ ტურიზმის განვითარებას, სტაბილურობის უზრუნველყოფას, რაც პირდაპირ ეკონომიკურ კეთილდღეობას უშლის ხელს, ჩვენი მოსახლეობისა და მთლიანად ქვეყნის ინტერესების წინააღმდეგ არის მიმართული. ჩვენ ამას არ დავუშვებთ, რადგან ეს არის ყოვლად მიუღებელი, ეს თითოეული ჩვენი მოქალაქის წინააღმდეგ გადადგმული ნაბიჯია. კიდევ ერთხელ მინდა, ხელმოცარულ ოპოზიციას მოვუწოდო, რომ მსგავსი უპასუხისმგებლო ქმედებებისგან თავი შეიკავონ, ეს წარმატებული ვერასდროს იქნება. ჩვენი ქვეყნის მოსახლეობის უმრავლესობა დესტრუქციულ პოლიტიკას მხარს არ დაუჭერს. ჩვენ ვიქნებით თანმიმდევრული, რომ საქართველოში უზრუნველვყოთ სტაბილური გარემო ეკონომიკური განვითარებისთვის და ამ ეკონომიკურ განვითარებაში ერთ-ერთი მნიშვნელოვანი როლი აქვს, მათ შორის, ტურიზმს. ეს ყველაფერი, რაც ახლა ხდება, არის ჩვენი ქვეყნის მოსახლეობის წინააღმდეგ მიმართული ნაბიჯები, ხოლო ის, თუ რას აკეთებს საქართველოს ხელისუფლება, ჩვენ ვართ პასუხისმგებლიანი როგორც საერთაშორისო საზოგადოებასთან, ისე ჩვენი ქვეყნის მოქალაქეებთან“, – განაცხადა დავითაშვილმა.

დღეს გამოქვეყნებულ ერთობლივ კომუნიკეში ხაზგასმულია ხალხთა შორის, კულტურული, მჭიდრო დაახლოება, მათ შორის, უმაღლესი განათლებისა და მეცნიერების კუთხით მჭიდრო თანამშრომლობა, – ამის შესახებ განათლებისა და მეცნიერების მინისტრმა გიორგი ამილახვარმა ჩინეთში განაცხადა, სადაც პრემიერ-მინისტრთან ერთად იმყოფება.

მისი თქმით, აქტიურად გაგრძელდება მუშაობა ერთობლივი პროგრამების შემუშავებისათვის ქართულ და ჩინურ უნივერსიტეტებს შორის.

„სტრატეგიული თანამშრომლობის ეტაპზე ღრმავდება განათლების და მეცნიერების კუთხით თანამშრომლობა. დღეს გამოქვეყნებულ ერთობლივ კომუნიკეში ხაზგასმულია ხალხთა შორის, კულტურული, მჭიდრო დაახლოება, მათ შორის, უმაღლესი განათლებისა და მეცნიერების კუთხით მჭიდრო თანამშრომლობა. ქართული და ჩინური ენების სწავლების გაძლიერების მიმართულებით, როგორც საქართველოში, ისე ჩინეთში. ასევე, კვლევით ინსტიტუტებს შორის ერთობლივი კვლევების დაგეგმვა. ბუნებრივია, ჩვენ აქტიურად გავაგრძელებთ და დავიწყებთ მუშაობას ერთობლივი პროგრამების შემუშავებისათვის როგორც ქართულ, ასევე ჩინეთის უნივერსიტეტებს შორის, რაც ბუნებრივია, მეტ შესაძლებლობებს მისცემს ჩვენს ახალგაზრდებს, რომელთა რიგებშიც ჩინური ენით დაინტერესება წლიდან წლამდე იზრდება, რომ გააგრძელონ სწავლა ჩინეთის წამყვან უნივერსიტეტებში. ეს არის ის ძირითადი საკითხები, რომლის ფარგლებშიც ჩვენ ჩინეთის მხარესთან აქტიურად გავაგრძელებთ მუშაობას”, – განაცხადა გიორგი ამილახვარმა.

მინდა, მოვუწოდო იმ ხალხს, ვინც თავისი ქმედებებით თუ განცხადებებით ხელს უშლის ჩვენს ქვეყანაში ტურიზმის განვითარებას, გაუგებარია, რა განსხვავებაა თვითმფრინავით თუ გემით ჩამოსულ ვიზიტორებს შორის, ეს არის პირდაპირი, მიზანმიმართული პროვოკაცია, რომ ჩვენს ქვეყანას ამ მიმართულებით ხელი შეეშალოს, ტურიზმი არ განვითარდეს და მოხდეს დესტრუქცია, – ამის შესახებ საგარეო საქმეთა მინისტრმა, ილია დარჩიაშვილმა განაცხადა.

დარჩიაშვილი ყველას მოუწოდებს, მოერიდონ ქვეყნის დაზიანებას.

„ჩვენი ქვეყანა ეკონომიკურად ვითარდება, ტურიზმი ვითარდება და გაუგებარია მსგავსი ტიპის გამოხატული აგრესია კონკრეტული ადამიანების მისამართით. მეორე მხრივ, საქართველო, როგორც არაერთხელ ითქვა, შესაბამისობაშია ყველა საერთაშორისო სტანდარტთან. არცერთი შემთხვევა არ არსებობს, რომ ჩვენს ქვეყანაში შემოსულიყოს მსგავსი სატრანსპორტო საშუალებით ან თვითმფრინავის საშუალებით რომელიმე სანქცირებული ავიაკომპანია ან ბორტი. შესაბამისად, საქართველო საერთაშორისო რეგულაციების მიმართულებით ასრულებს თავის ვალდებულებებს, ეს მომავალშიც გაგრძელდება. ერთადერთ რამეს ემსახურება გამოხატული დამოკიდებულება საქართველოში ჩამოსული ვიზიტორების წინააღმდეგ, რომ ეს წინააღმდეგობაში მოდის ქვეყნის ტურიზმის განვითარებასთან, მოვუწოდებ ყველას, თავი შეიკავონ მსგავსი გამოხატულებისგან“, – განაცხადა დარჩიაშვილმა.

ბათუმის ნავსადგურში საპროტესტო აქცია მიმდინარეობს. დემონსტრანტები ნავსადგურში საკრუიზო ლაინერის Astoria Grande, გაჩერებას აპროტესტებენ, რომელზეც რუსეთის მოქალაქეები იმყოფებიან. ლაინერი ნავსადგურში დილის 06:00 საათისთვის შევიდა. მას აქციის მონაწილეები პროტესტით დახვდნენ. შსს-მ აქციის 9 მონაწილე დააკავა.

ბათუმში რაც ხდება, ეს ჩემთვის არის კიდევ ერთი დემონსტრირება ორმაგი სტანდარტის – მაშინ გამოვიდნენ და ლარსზე დადგნენ, რომელიც მათმა ბელადმა გახსნა რუსებისთვის, – ასე ეხმიანება სოჭიდან შემოსულ გემთან დაკავშირებით ბათუმში გამართულ საპროტესტო აქციას ირაკლი ზარქუა.

მისი თქმით, “ხელმოცარული ოპოზიცია მიხვდა, რომ პულსი არ ესინჯება რეიტინგში” და ამიტომ მიმართავს მსგავს ნაბიჯებს.

“ბოდიშს გიხდით, მაგრამ სახმელეთო საზღვარზე რომ ეპატიჟებოდა მათი ლიდერი, როცა ჯერ კიდევ ბოლი ასდიოდა ჩვენს დაბომბილ სახლებს, ჩვენი ბიჭების ცხედრები რომ ისევ ბრძოლის ველზე იყო დაყრილი, ეს როგორ არის?! გემით შემოვა თუ ლარსის ხეობით ავტომობილი, რა განსხვავებაა? თუ ჰგონიათ, ვინც ლარსიდან შემოდის ლ, ყველა ისე ფიქრობს, როგორც ჩვენ გვაწყობს?! როგორ უნდა გააპროტესტოს “ნაციონალურმა მოძრაობამ” ლაინერით შემოსული რუსი, თუნდაც, ის გაუგებარი ქალბატონი, რომ ვერ გაურკვევია რა როგორ არის? ასეთი ბევრი იქნება იქ, სადაც სახმელეთოდ შემოდიან, მაშინ იქ დადგნენ სააკაშვილი და მაშინდელი “ენჯეოშნიკები” რომ ეპატიჟებოდნენ რუსებს, აი ქალბატონი “ლაკა”, რუსული ფულით რომ ფინანსდება, ახლა რომ ვაშაძე გაემიჯნა. ვაშაძე რომ გაგემიჯნება და ხაბეიშვილს რომ მიანიჭებს უპირატესობას, წარმოიდგინე რა პოლიტიკოსი ხარ, შემირცხვენია ასეთი პოლიტიკოსი. კიდევ მიტინგების ფასიანი წამყვანი რომ არის მშვილდაძე, გახსოვთ მათი განცხადებები რუსეთთან დაკავშირებით, შემოვიდნენ ფული უნდა დახარჯონო, ახლა არ მოსწონთ? ეს არის ორმაგი სტანდარტი. გამოდით და ლარსზე დადექით მაშინ და ყველა მანქანა, ვინც შემოვა გადაამოწმეთ, კითხვა დაუსვით, აღიარებენ თუ არა, რომ აფხაზეთი საქართველოა, ამიტომ ხართ უსახურები და ამიტომ მოგისროლა ქართველმა ხალხმა შეგნებულად პოლიტიკურ სანაგვეზე. ლარსს იმიტომ გერ ირჩევენ, რომ ლარსი მათმა ბელადმა გახსნა რუსებისთვის,” – განაცხადა ზარქუამ.

“როდესაც შენ ხარ მიზეზზე, რომ პროვოკაცია მოაწყო, ეს არის მარტივად გასაშიფრი. როდესაც შენ არც გქონია და არც გაქვს პრობლემა, რომ სახმელეთო გზით თავისუფლად გადაადგილდებიან რუსეთის მოქალაქეები, მათ შორის ეთნიკურად ქართველები, საქართველოში, რატომ გახდა პრობლემა გემითა და თვითმფრინავით შემოსვლა?” – ამის შესახებ მედიასთან “ხალხის ძალის” ერთ-ერთმა ლიდერმა ბათუმში ჩატარებული საპროტესტო აქციის შესახებ საუბრისას განაცხადა.

მისი თქმით, თუკი რუსეთიდან მოქალაქეები შემოდიან საჰაერო და სახმელეთო გზით, მაშინ სრულიად ნათელია, რატომ გახდა გემით მათი შემოსვლა პრობლემა – ეს არის პროვოკაცია ოპოზიციის მხრიდან.

„გაჟღერებულია, რომ რადიკალურ ოპოზიციას სურს პროვოკაციების მოწყობა, რასაც, სამწუხაროდ, ზოგიერთი უცხოელი პოლიტიკოსის განმარტებებიც ხელს უწყობს. როდესაც საუბარია იმაზე, რომ სახმელეთო გზით შემოდიან როგორც რუსეთის, ისე საქართველოს მოქალაქეები, ისინი შეიძლება, შემოვიდნენ თვითმფრინავითა და გემითაც. რა განსხვავებაა ავტომობილითა და თვითმფრინავით, თუ გემით შემომსვლელებს შორის, ეს უნდა ახსნან. რადგან როდესაც შენ ხარ მიზეზზე, რომ პროვოკაცია მოაწყო, ეს არის მარტივად გასაშიფრი. როდესაც შენ არც გქონია და არც გაქვს პრობლემა, რომ სახმელეთო გზით თავისუფლად გადაადგილდებიან რუსეთის მოქალაქეები, მათ შორის ეთნიკურად ქართველები, საქართველოში, რატომ გახდა პრობლემა გემითა და თვითმფრინავით შემოსვლა? ეს სულაც არაა გაუგებარი, ეს არის სრულიად გასაგები, რადგან ემსახურება პროვოკაციას, რომელიც არ გამოუვათ”, – განაცხადა გურამ მაჭარაშვილმა.

თბილისის მერის კახა კალაძის განცხადებით, „ქართული ოცნების“ მიერ გადადგმული ნაბიჯების შედეგად, ქვეყანაში მშვიდობა შენარჩუნდა, რასაც ებრძვიან.

თბილისის მერმა „საქსტატის“ მონაცემები შეაფასა, რომლის მიხედვით, ივნისში საქართველოს ეკონომიკა 7,7%-ით გაიზარდა. როგორც კალაძემ აღნიშნა, ვისაც სამშობლო უყვარს, რუსეთის წინააღმდეგ სანქციებთან მიერთებას და ქვეყანაში „მეორე ფრონტს“ არ მოითხოვს.

„ძალიან მნიშვნელოვანია ის, რომ ქვეყანა ეკონომიკურად ვითარდება. შემთხვევითი არ არის ის, რომ მაგალითად, გასულ წელს ორნიშნა ეკონომიკური ზრდა გვქონდა. ეს შედეგი ჩვენ მივიღეთ იმ პოლიტიკური ნაბიჯების შედეგ, რომელიც ქვეყანამ გადადგა, საქართველოში შევინარჩუნეთ მშვიდობა და ზუსტად ამას ებრძვიან. არ უნდათ, რომ ქვეყანა ეკონომიკურად ვითარდებოდეს. შენ თუ შენი სამშობლო გიყვარს, რატომ უნდა მოითხოვო მაგალითად, სანქციებთან მიერთება? რატომ უნდა მოითხოვო „მეორე ფრონტის“ გახსნა ქვეყანაში, მაგრამ ეს ყველაფერი მიზანმიმართულად ხდება. სანქციების მიერთებასთან დაკავშირებით რას მივიღებდით? ეკონომიკური ზრდა კი არ გვექნებოდა, ქვეყანაში ბიზნესი კი არ იქნებოდა განვითარებული, ისევ და ისევ ჩვენი ქვეყნის მოქალაქეებს, გლეხებს დავაზიანებდით, რომელიც 24 სთ-იან რეჟიმში შრომობს. მაგალითად, კახეთში იმისთვის, რომ ყურძენი მოიყვანოს და შემდეგ ღვინო გააკეთოს, ამ პროდუქციის რეალიზება მოახდინოს, თუნდაც რუსულ ბაზარზე. რა არის ამაში ცუდი, რომ ეს თანხები ისევ საქართველოს ეკონომიკაში შემოდის და ისევ ისე გლეხი გაძლიერდება, უფრო მეტ ადამიანს დაასაქმებს, თავის შვილებს, მეგობრებს, ახლობლებს. რატომ არის ეს ცუდი? შესაბამისად, ჩვენ გავაგრძელებთ ამ პოლიტიკის განხორციელებას“,-განაცხადა კალაძემ.

ამასთან, როგორც თბილისის მერმა აღნიშნა, მშენებლობის მიმართულებით კვალიფიციური კადრების დეფიციტია.

„სამშენებლო მიმართულებით არის გარკვეული პრობლემები. არის კვალიფიციური კადრების დეფიციტი. დავიწყეთ მნიშვნელოვანი პროგრამების განხორციელება, ადამიანებს შესაძლებლობას ვაძლევთ, კვალიფიკაცია ყოველგვარი გადასახადის გარეშე აიმაღლონ. მერიას აქვს შესაბამისი პროგრამები. ნებისმიერ ადამიანს შეუძლია სხვადასხვა მიმართულებით კვალიფიკაცია აიმაღლოს და შემდეგ ხელი შევუწყოთ დასაქმებაში. მივესალმებით იმას, რომ ეკონომიკა ვითარდება“,-განახადა კალაძემ.