როდესაც ჩემი მეგობარი ხარ, ძალიან დიდ ბიჭებთან ჩხუბობ და მათთან შედარებით, სამწუხაროდ, ძალიან სუსტი ვარ, ისეთი ძალა არა მაქვს და ზუსტად ვიცი, რომ ღმერთმა კარგად გამყოფოს, შენ აუცილებლად გადარჩები, შენ შეიძლება გაიმარჯვო კიდეც, მოერიო, მხარს კიდევ უფრო დიდი ბიჭები გიმაგრებენ, მაგრამ მე თუ ამ ჩხუბში შემოგყევი და ცენტრში აღმოვჩნდი, აუცილებლად მომკლავენ, გადარჩენის შანსი არა მაქვს, მაშინ მე გეტყვი: – თუ ძმა ხარ, ნუ გამწირავ და რაც შემეძლება გვერდით დაგიდგები, – ეს განცხადება პარლამენტის ტრიბუნიდან ფრაქცია „ქართული ოცნების“ თავმჯდომარემ, მამუკა მდინარაძემ უკრაინაზე საუბრისას გააკეთა.

მისივე თქმით, საქართველომ გარისკა და ყველა პოლიტიკურ პლატფორმაზე, მათ შორის ომისთვის რუსეთის ჰააგაში გასამართლებაზე, უკრაინას მხარი დაუჭირა.

„აქ ჩვენმა კოლეგამ გვითხრა: – ყოველთვის, როცა ქართულ ტრადიციებზე საუბრობთ, გავიწყდებათ, რომ მეგობარს ჩხუბში დახმარება სჭირდებაო – ბიჭურ ამბებზე გადავიდა…

რაღაც პროპორცია რომ ავიღოთ – ოთხ კაცს რომ ეპატიჟებიან ომში, სადაც ერთმანეთში 42 და 144 იბრძვის და მხარს ათასზე მეტი უჭერს, ამ პროპორციით ოთხ კაცს რომ ეპატიჟები: – მოდი და მოკვდი აქო, თუ ეს გარანტირებულ სიკვდილს და განადგურებას იწვევს, მე ყველაფერს გავაკეთებ, მორალურად, ფიზიკურად მხარს დაგიჭერ, მაგრამ ცენტრში ბრძოლაში არ შემოვდივარ იმიტომ, რომ ეს ოთხი ადამიანი – ჩემი 4 მილიონიანი მოსახლეობა ფიზიკურ განადგურებას გადავარჩინო.

გავრისკეთ და ყველა პოლიტიკურ პლატფორმაზე, მათ შორის ამ ომისთვის რუსეთი ჰააგაში რომ უნდა გასამართლდეს, მხარი დავუჭირეთ. საქართველო 400-ზე მეტ დოკუმენტს შეუერთდა, ხოლო ჰუმანიტარული დახმარების მიხედვით, სამეულშია.

დამნაშავე, კრიმინალი სააკაშვილის გამო ის ელჩი გამოუშვეს, რომელსაც დაბომბვის დროსაც არ დაუტოვებია კიევი“, – განაცხადა მამუკა მდინარაძემ პარლამენტის პლენარულ სხდომაზე.

ვინმე მეხინკლე მაინც გაგვეშვა, რომ იქ კარგი ხინკალი მოეხვია და ამით მაინც წარმოგვეჩინა ჩვენი ქვეყანა, – ამის შესახებ „მოქალაქეების“ ლიდერმა ალეკო ელისაშვილმა ნატო-ს ვილნიუსის სამიტზე საუბრისას განაცხადა.

მისი თქმით, ნატოს ლიდერებმა „ქართული ოცნებისგან“ ღია სიგნალი მიიღეს, რომ საქართველოს არ უნდა ნატო და „შესაბამისად, სადაც არ გვინდა, იქ არ დაგვიძახეს და ეს არის სამარცხვინო ლაქა „ქართული ოცნების“.

„ძალიან დამთრგუნველია, როდესაც ფორმალურად მაინც ნატოს მოსურვე ქვეყანა, საქართველო არანაირად არ იყო წარმოდგენილი ნატოს სამიტზე. მე დარწმუნებული ვარ, რომ პრეზიდენტი „ქართულმა ოცნებამ“ არ გაუშვა, ხოლო ღარიბაშვილი არ მიიწვიეს. ვინმე მეხინკლე მაინც გაგვეშვა, რომ იქ კარგი ხინკალი მოეხვია და ამით მაინც წარმოგვეჩინა ჩვენი ქვეყანა. ეს არის „ქართული ოცნების“ პოლიტიკა. იმდენს ითრევენ ფეხს, რომ ნატოს ლიდერებმა ღია სიგნალი მიიღეს, რომ ამ ქვეყანას არ უნდა და ძალით ხომ არ დაგვიწყებენ ხვეწნას. შესაბამისად, სადაც არ გვინდა, იქ არ დაგვიძახეს და ეს არის სამარცხვინო ლაქა „ქართული ოცნების“ და ძალიან დამაზიანებელი ჩვენი ქვეყნისთვის. მართალია, ვერც უკრაინას ვერ უთხრეს სასარგებლო და ხეირიანი, მე გაცილებით მეტი მოლოდინი მქონდა, მაგრამ ეს რუსეთის მუდმივი შიში მაინც მოჰყვება ევროპას შლეიფად“, – განაცხადა ელისაშვილმა.

ნატოს სამიტმა ვილნიუსში დაადასტურა, რომ საქართველო სწორი მიმართულებით მიდის – საქართველოს ნატოსთან თანამშრომლობა ძლიერდება, არ შესუსტებულა. დარწმუნებული ვარ, რომ მომავალში საქართველო აუცილებლად მიიღებს მიწვევას ნატოში, – ამის შესახებ საქართველოს პარლამენტის ვიცე-სპიკერმა, არჩილ თალაკვაძემ ნატოს სამიტთან დაკავშირებით განაცხადა.

მისივე თქმით, საქართველო ნატოსთვის ერთ-ერთ ყველაზე საიმედო პარტნიორად რჩება.

რაც შეეხება უკრაინას, როგორც თალაკვაძე აღნიშნავს, უკრაინასთან დაკავშირებით უფრო მკაფიო და ცხად გეგმას ელოდა, სადაც ვადები და კონკრეტული პროცედურა იქნებოდა დასახელებული.

მისივე თქმით, უკრაინას ნატოს მხრიდან კიდევ უფრო მეტი მხარდაჭერა სჭირდება.

„ნატოს სამიტმა ვილნიუსში დაადასტურა, რომ საქართველო სწორი მიმართულებით მიდის. თუ ჩვენ ავიღებთ შვედეთის მაგალითს და ჩვენი ქვეყანა გახდება ეკონომიკურად კიდევ უფრო ძლიერი, უფრო სტაბილური, უფრო წარმატებული სახელმწიფო, საქართველო იქნება უფრო სასურველი და ძლიერი პარტნიორი ნატოსთვის. ჩვენ ნაბიჯ-ნაბიჯ მივყვებით სწორედ ამ გეგმას და მე დარწმუნებული ვარ, რომ მომავალში საქართველო აუცილებლად მიიღებს მიწვევას ნატოში. რაც შეეხება უკრაინას, როგორც უკრაინასთან მეგობრობის ჯგუფის ხელმძღვანელი, ვიტყოდი, რომ ველოდით უფრო მკაფიო და უფრო ცხად გეგმას უკრაინასთან დაკავშირებით, სადაც ვადები და კონკრეტული პროცედურა იქნებოდა დასახელებული, თუმცა იმედის მომცემია გენერალური მდივნის, სტოლტენბერგის განცხადება, რომ როგორც კი შიგნით კონსულტაციები დასრულდება, უკრაინა ამის შესახებ იქნება ინფორმირებული. უკრაინას სჭირდება კიდევ უფრო მეტი მხარდაჭერა ნატოს მხრიდან და იმედი მაქვს, რომ ვილნიუსის სამიტის მერე მუშაობა ამ მიმართულებით გაგრძელდება,“ – განაცხადა თალაკვაძემ.

რაც შეეხება ვილნიუსის სამიტთან დაკავშირებით ოპოზიციის განცხადებებს, როგორც პარლამენტის ვიცე-სპიკერი აღნიშნავს, ე.წ. რადიკალური ოპოზიცია ცდილობს, საქართველო და უკრაინა, ნატოს კონტექსტში, ერთმანეთთან დააპირისპიროს.

„ეს არის ერთი მხრივ, უცოდინარობის და უპასუხისმგებლობის მაგალითი, როდესაც ისინი ცდილობენ, რომ საქართველო და უკრაინა დააპირისპირონ ერთმანეთთან ნატოს კონტექსტში. სინამდვილეში, რა თქმა უნდა, უკრაინა, რომელიც ძალიან მძიმე ომშია საკუთარი ტერიტორიების და თავისუფლების დასაცავად, იმსახურებს და უკრაინას პრიორიტეტულად ეკუთვნის, რა თქმა უნდა, ყურადღება, როგორც ნატოს, ისე ევროკავშირის მხრიდან. საერთაშორისო პარტნიორებს, საერთაშორისო საზოგადოებას გვაქვს მორალური ვალდებულება უკრაინასთან, ამიტომ ამის რაღაცნაირად დაპირისპირება საქართველოსთან არის მავნებლური დამოკიდებულება და პირდაპირ გეტყვით, რომ რადიკალური ოპოზიცია ამით პირდაპირ აზიანებს და პირდაპირ ებრძვის საქართველოს და უკრაინის მეგობრობას საკუთარ მოსახლეობას სთავაზობს აბსოლუტურად უსამართლო დამოკიდებულებას, თითქოს ჩვენ უნდა შეგვშურდეს უკრაინის. არა, პირიქით. საქართველო და საქართველოს ხელისუფლება, რა თქმა უნდა, მიესალმება უკრაინასთან დაკავშირებით პრიორიტეტულ ყურადღებას და გაზრდილ მხარდაჭერას. რაც შეეხება საქართველოსთან მიმართებით რადიკალური ოპოზიციის განცხადებებს, სერიოზული კომენტარი არც კი შეიძლება ამაზე გავაკეთოთ,“ – განაცხადა არჩილ თალაკვაძემ.

ამასთან, ის ტყუილსა და აბსურდს უწოდებს გავრცელებულ ინფორმაციას, რომ საქართველოს პრემიერ-მინისტრი ირაკლი ღარიბაშვილი ნატოს სამიტზე არ მიიწვეს.

„აბსოლუტურად მოკლებულია ლოგიკას, თითქოს პრემიერ-მინისტრი არ მიიწვიეს და მისი კაბინეტის საგარეო საქმეთა მინისტრი მიიწვიეს. ეს უბრალოდ ალოგიკურია და ვინც ეს ვერსია მოიფიქრა, ძალიან ზედაპირული წარმოდგენა აქვს ჩვენს საზოგადოებაზე,“ – აღნიშნა თალაკვაძემ.

შეგახსენებთ, რომ ნატო-ს წევრი ქვეყნების ლიდერების მიერ გამოქვეყნებულ კომუნიკეს მიხედვით, ევროატლანტიკური მისწრაფებების წინსვლისთვის საქართველომ რეფორმებში უნდა მიაღწიოს პროგრესს, მათ შორის საკვანძო დემოკრატიულ რეფორმებში. ამასთან, ნატოს წევრები იმეორებენ 2008 წლის ბუქარესტის სამიტზე მიღებულ გადაწყვეტილებას, რომ საქართველო გახდება ალიანსის წევრი წევრობის სამოქმედო გეგმით, (MAP) როგორც პროცესის განუყოფელი ნაწილით. რაც შეეხება უკრაინასთან დაკავშირებით გაკეთებულ ჩანაწერს, კომუნიკეს მიხედვით, უკრაინის მომავალი ნატოშია. „უკრაინის გზა გასცდა გაწევრიანების სამოქმედო გეგმის საჭიროებას, სულ უფრო მეტად თავსებადია და პოლიტიკურად ინტეგრირებულია ალიანსთან და მიაღწია მნიშვნელოვან პროგრესს რეფორმების გზაზე“, – ნათქვამია კომუნიკეში.