ეს ხალხი მარტოებს გვტოვებს პირისპირ რუსეთთან მხოლოდ იმიტომ, რომ გაიხანგრძლივოს ივანიშვილმა ძალაუფლება, – ამის შესახებ “ევროპული საქართველოს” თავმჯდომარემ, გიგა ბოკერიამ განაცხადა, რითაც „ქართული ოცნების“ თავმჯდომარის ირაკლი კობახიძის მიერ მოსამართლეების სანქციებზე გაკეთებულ განცხადებას გამოეხმაურა.

მისი თქმით, კობახიძე ფაქტობრივად აანონსებს, რომ ქვეყნის მომავლისა და ეროვნული ინტერესების ხარჯზე კიდევ უფრო ღრმა იზოლაციაში მოახვედრებს ქვეყანას.

„ეს განცხადება უბრალოდ სასაცილო იქნებოდა, კობახიძე ივანიშვილის მარიონეტი და მთავარი სპიკერი, რომ არ იყოს და ეს ხალხი რომ არ აკონტროლებდეს საქართველოს ბედს.

ეს ხალხი მარტოებს გვტოვებს პირისპირ რუსეთთან მხოლოდ იმიტომ, რომ გაიხანგრძლივოს ივანიშვილმა ძალაუფლება, ეს არის ამ განცხადების შინაარსი”, – განაცხადა გიგა ბოკერიამ.

მოცემულობაში, როცა სააკაშვილი გიზის ციხეში და გინდა, ლეგიტიმური არჩევნები ჩაატარო, ეს არ გამოვა, – ამის შესახებ „ნაციონალური მოძრაობის“ წევრმა, პეტრე ცისკარიშვილმა განაცხადა.

მისივე თქმით, ასეთ თამაშის წესებს დასავლელი პარტნიორები არ მიიღებენ.

„ჩვენ, პრაქტიკულად, შევდივართ საარჩევნო ფაზაში. სულ რამდენიმე თვეში საარჩევნო კამპანია იქნება გახსნილი საქართველოში და იმ მოცემულობაში, როცა მთავარი ოპოზიციური მოთამაშე, მესამე პრეზიდენტი მიხეილ სააკაშვილი გიზის ციხეში და გინდა, ლეგიტიმური არჩევნები ჩაატარო, ეს, უბრალოდ, არ გამოვა. ასეთი თამაშის წესებს ჩვენი დასავლელი პარტნიორები არ მიიღებენ“, – განაცხადა პეტრე ცისკარიშვილმა.

ამასთან, პეტრე ცისკარიშვილის განცხადებით, დრო აჩვენებს, მოახდენს თუ არა გავლენას საქართველოს ხელისუფლებაზე ევროდეპუტატების მიმართვა, მხარი დაუჭიროს სააკაშვილის გადაყვანას ევროკავშირის ერთ-ერთ წევრ ქვეყანაში.

„დრო გვაჩვენებს. იზრდება საერთაშორისო წნეხი. ამერიკელმა ელჩებმა, ვისაც კი საქართველოში უმუშავია, დაახლოებით ერთი კვირის წინ დაწერეს ღია წერილი, სადაც ყველა ერთხმად მოითხოვს სააკაშვილის გათავისუფლებას. წინააღმდეგ შემთხვევაში, ამ რეჟიმს, მის წარმომადგენლებს, ადამიანებს, რომლებიც სააკაშვილის უფლებებს ლახავენ, არა მხოლოდ სანქციები ემუქრებათ, არამედ პირდაპირ „მაგნიტსკის აქტის“ ამოქმედება. შეუძლიათ, ჩახედონ „მაგნიტსკის აქტს“, რომელიც ამოქმედებულია მსოფლიოში ბევრი პოლიტიკური მოთამაშის მიმართ, რომლებმაც უხეშად დაარღვიეს ადამიანის უფლებები. განსაკუთრებით აფრიკის კონტინენტიდან, ისევე, როგორც ჩეჩნეთის რესპუბლიკის წარმომადგენლებზე. „მაგნიტსკის აქტი“ აშშ-ის მიერ მიღებული კანონია, რომელიც ასეთი ბოროტმოქმედების პირდაპირ სანქცირებას ითვალისწინებს და ამ აქტზეა საუბარი. ასევე, რეზოლუციების მიღების შემდეგ, რომელიც ევროპარლამენტმა ბოლო თვეების განმავლობაში მიიღო, უკვე არსებობს რამდენიმე ათეული ევროპარლამენტის მიერ ხელმოწერილი კონკრეტული მიმართვა, რომ მესამე პრეზიდენტი უნდა იყოს გათავისუფლებული“, – განაცხადა პეტრე ცისკარიშვილმა.

საქართველოს პრემიერ-მინისტრის ირაკლი ღარიბაშვილის ხელმძღვანელობით, მთავრობის ადმინისტრაციაში ინვესტორთა საბჭოს სხდომა გაიმართა.

საბჭოს სხდომაზე, რომელიც მთავრობის მეთაურმა გახსნა, მისასალმებელი სიტყვით გამოვიდნენ გაერთიანებული სამეფოს ელჩი საქართველოში მარკ კლეიტონი და ევროპის რეკონსტრუქციისა და განვითარების ბანკის (EBRD) რეგიონული დირექტორი კავკასიაში კატარინა ბიორლინ ჰანსენი.

ინვესტორთა საბჭოს მდივანმა გიორგი ჩერქეზიშვილმა სხდომის მონაწილეებს საბჭოს საქმიანობისა და წინა სხდომაზე მიღებული გადაწყვეტილებების აღსრულების შესახებ მიაწოდა ინფორმაცია.

სხდომაზე ასევე განიხილეს ქვეყნის საინვესტიციო პერსპექტივები და არსებული გამოწვევების გადაჭრის გზებზე იმსჯელეს. საუბარი შეეხო მიმდინარე და დაგეგმილ მსხვილ ეკონომიკურ პროექტებს, რომლებზეც პრემიერ-მინისტრის დავალებით მთავრობის ეკონომიკური გუნდი მუშაობს.

როგორც პრემიერ-მინისტრმა აღნიშნა, საქართველოს მთავრობა აქტიურად მუშაობს საინვესტიციო გარემოს გასაუმჯობესებლად და მიესალმებიან ამ მიმართულებით პარტნიორების მხარდაჭერას. ირაკლი ღარიბაშვილის თქმით, მთავრობას საქართველოს ეკონომიკის გაძლიერების კუთხით მნიშვნელოვანი პროგრესი აქვს და მიღწეული მაჩვენებლები ისტორიულია.

სხდომის მონაწილეებმა იმსჯელეს საერთაშორისო ვაჭრობის ხელშეწყობისა და საქართველოში განახლებადი ენერგიის სექტორის განვითარების სტიმულირების საკითხებზე.

განსახილველ საკითხებს შორის იყო აგრეთვე ევროკავშირში ინტეგრაციის გზაზე მიმდინარე რეფორმებში ინვესტორთა საბჭოს ჩართულობა.

ევროპარლამენტარების კოლექტიური წერილი და რადასთვის მიმართვა ერთსა და იმავე პროპაგანდისტულ ტრენდში ზის, უბრალოდ, გასათვალისწინებელია, რომ სააკაშვილი ავად აღარ არის, დემენცია აღარ სჭირს, – ამის შესახებ პარლამენტის პირველი ვიცე-სპიკერმა, გია ვოლსკიმ განაცხადა.

ვოლსკის თქმით, პროპაგანდისტული ხაზი, რაშიც არაერთი მილიონი დაიხარჯა, სერიოზული საფრთხის ქვეშ დადგა.

ამასთან, როგორც საპარალმენტო უმრავლესობის წევრმა აღნიშნა, დღეს „ნაციონალურ მოძრაობაში“ სააკაშვილის პოლიტიკური ლიდერობა არ სჭირდებათ.

„სააკაშვილმა გამოჯანმრთელება დაიწყო. უფრო მეტიც, მან უარი თქვა მისთვის განკუთვნილ როლზე, ყოფილიყო მძევალი სტრატეგიისა, რასაც რევოლუციური პროცესის განვითარება ჰქვია. როგორც „ქვინის“ ცნობილ სიმღერაშია, სააკაშვილი გამოიჭრა, თავისუფლება მოითხოვა, პოლიტიკურ ასპარეზზე გაიჭრა. მას იმ წუთშივე მიუთითეს, რომ მისი ადგილია სარეცელზე, სადაც მომაკვდავი და მოწამლული პრეზიდენტის როლი უნდა ითამაშოს, რათა სახელმწიფოს ამით უფრო მეტი ზიანი მიაყენოს. დღეს „ნაციონალურ მოძრაობაში“ მისი პოლიტიკური ლიდერობა არ სჭირდებათ. ის პროპაგანდისტული ხაზი, რაშიც არაერთი მილიონი დაიხარჯა, საკმაოდ სერიოზული საფრთხის ქვეშ დადგა. სახელმწიფო დახატეს, როგორც ურჩხული, რომელიც მესამე პრეზიდენტს აწამებს და ეს პიარული სვლა არ უნდა იყოს დღის წესრიგიდან მოხსნილი. აქედან გამომდინარეობს პათოსი, რომელიც ჩამოყალიბებულია ამ განცხადებაში. შესაძლოა, არის გარკვეული ემოციაც ზოგიერთის მხრიდან, მაგრამ პრაგმატული პოლიტიკა ყოველგვარ ემოციას და პიარულ დამოკიდებულებას სჭარბობს“, – განაცხადა ვოლსკიმ.

44 ევროპარლამენტარისგან შემდგარი ჯგუფი საქართველოს ხელისუფლებას მოუწოდებს, მხარი დაუჭირონ მიხეილ სააკაშვილის გადაყვანას ევროკავშირის რომელიმე ქვეყანაში, სადაც ის საჭირო სამედიცინო დახმარებას მიიღებს.

გარდა ამისა, სააკაშვილის შეწყალებისა და სამკურნალოდ გადაყვანის საკითხზე უკრაინის რადამ სალომე ზურაბიშვილისა და ევროკავშირის ქვეყნების პარლამენტების სახელზე დადგენილების პროექტი მოამზადა.

უკრაინის უმაღლესი რადა საქართველოს პრეზიდენტს, სალომე ზურაბიშვილს და ევროკავშირის წევრი ქვეყნების პარლამენტებს ჰუმანიტარული აქტის განხორციელებისა და საქართველოს ყოფილი პრეზიდენტის, უკრაინის მოქალაქე მიხეილ სააკაშვილის შეწყალების თხოვნით მიმართავს.

უკრაინის სახალხო დეპუტატის, იაროსლავ ჟელეზნიაკის განცხადებით, შესაბამისი მიმართვის მიღებას მხარი 285-მა დეპუტატმა დაუჭირა.

რეზოლუციის ტექსტში მითითებულია, რომ მისი მიღება გამოწვეულია სააკაშვილის ჯანმრთელობის კრიტიკული მდგომარეობით და მისი სიცოცხლისა და ჯანმრთელობის შენარჩუნების აუცილებლობით. ამიტომ, პარლამენტი მოუწოდებს საქართველოს პრეზიდენტს, რომ უზენაესი რადას ადამიანის უფლებათა კომისარს, დიმიტრი ლუბინეცს მიეცა სააკაშვილთან წვდომის საშუალება.

უმაღლესი რადა ზურაბიშვილს ასევე მიმართავს მიხეილ სააკაშვილის მძიმე ფიზიკური მდგომარეობის გამო, „ჰუმანიტარული აქტის განხორციელების და შეწყალების“ მოთხოვნით.

გარდა ამისა, რადა მოუწოდებს ევროკავშირის წევრი ქვეყნების პარლამენტებს, მიიღონ შესაბამისი გადაწყვეტილებები და რეზოლუციები საქართველოს პრეზიდენტის მიერ სააკაშვილის შეწყალების აუცილებლობის შესახებ.

სააკაშვილი გამოცოცხლდა, ქართულ პოლიტიკაში მოვიდა და საზღვარგარეთ რა უნდა? ეს კითხვა მაქვს ევროპარლამენტარებთანაც, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

გურამ მაჭარაშვილი გამოეხმაურა 44 ევროდეპუტატის განცხადებას, რითიც საქართველოს ხელისუფლებას მოუწოდებენ, მხარი დაუჭიროს მიხეილ სააკაშვილის გადაყვანას ევროკავშირის ერთ-ერთ წევრ ქვეყანაში, სადაც მას შეუძლია, მიიღოს შესაბამისი სამედიცინო დახმარება.

„ევროპარლამენტარი, რომელიც სტრასბურგის სასამართლოს განცხადების შემდეგ სააკაშვილის ციხიდან გამოშვებას მაინც ითხოვს, იმას ემსახურება, რომ გლობალური „ომის პარტია“ „ლოკალური ომის“ პარტიის საშუალებით ქვეყანაში ცდილობს არეულობას და მეორე ფრონტს. სამწუხაროდ, რადიკალურ ოპოზიციას სურს ქვეყანაში ომი მეორე ფრონტი. სააკაშვილი გამოცოცხლდა, ქართულ პოლიტიკაში მოვიდა და როცა ამბობს, რომ უკვე ქართულ პოლიტიკაშია, მაშინ საზღვარგარეთ რა უნდა? უცხოეთში წასვლა რატომ უნდა? ეს კითხვა მაქვს ევროპარლამენტარებთანაც.

სტრასბურგის გადაწყვეტილებაა, რომ ამ ადამიანმა უნდა იკვებოს, სასჯელი მოიხადოს. ამ გადაწყვეტილებას როცა თავზე გადაახევ ყველა მოსამართლეს, რომელმაც თქვა, რომ პატიმარი სააკაშვილი საქართველოდან არ უნდა წავიდეს, ციხიდან არ უნდა გავიდეს და მაინც ითხოვ, ციხიდან გავიდეს, ეს ნიშნავს, რომ მათი მიზანია არა სააკაშვილის ჯანმრთელობაზე ზრუნვა, არამედ როგორმე გამოაცოცხლონ პოლარიზება. ამას ემსახურებოდა გვარამიას გათავისუფლებაც“, – განაცხადა გურამ მაჭარაშვილმა.