წესდებაში ცვლილება შესაძლოა, იყოს ივანიშვილის მცდელობა, არაფორმალური მმართველობის მექანიზმების ფორმალიზება მოახდინოს – არ გამოვრიცხავ კაბინეტის სხვადასხვა ფიგურებით მორიგი ჟონგლიორობა ვიხილოთ, – ამის შესახებ პარლამენტში „ნაციონალური მოძრაობის“ ფრაქციის თავმჯდომარე თინა ბოკუჩავამ განაცხადა, რითაც გამოეხმაურა „ქართული ოცნების“ წესდებაში ცვლილებას, რომლის გათვალისწინებით, პარტიის პოლიტიკური საბჭო პრემიერ-მინისტრის კანდიდატურას პარტიის საპატიო თავმჯდომარის წარდგინებით დაამტკიცებს.

ბოკუჩავას თქმით, არაფორმალური მმართველობის მექანიზმების ამგვარად ფორმალიზება ვერ მოხდება და ეს ღიმილისმომგვრელია.

“სიმართლე გითხრათ, ღიმილისმომგვრელია ამ საკითხის ამგვარად ფორმალიზება, რადგან რახანია საზოგადოებამ კარგად იცის ქვეყნის გარეთ და შიგნით, რომ ყველა მნიშვნელოვან პოლიტიკურ გადაწყვეტილებას, მათ შორის, პრემიერის დანიშვნისა თუ გათავისუფლებასთან დაკავშირებით, როგორც ეს კონკრეტულად ღარიბაშვილის მაგალითზე გვაქვს ნანახი, ერთპიროვნულად იღებს ბიძინა ივანიშვილი. შესაძლებელია და არ გამოვრიცხავ, რომ არაფორმალური მმართველობის მექანიზმების ფორმალიზების მცდელობა უკავშირდებოდეს ივანიშვილის სურვილს, რომ აღარ იყოს აღქმული როგორც ქვეყნის მთავარი ოლიგარქი და მისი ოლიგარქიული მმართველობის მექანიზმების ფორმალიზება მოხდეს, თუმცა, ბუნებრივია, ამას ვერ მოახდენს, რადგან საქართველოს კონსტიტუცია არ ითვალისწინებს ერთპიროვნულ მმართველობას, ხოლო ივანიშვილის პირობებში, ეს ქვეყანა ყოველთვის მართული იქნება ერთი პირის ნება-სურვილით, იქნება ეს პრემიერის დანიშვნა, გადაყენება, გათავისუფლება, მნიშვნელოვანი სასამართლო თუ საპარლამენტო გადაწყვეტილებები, საგამოძიებო მიმდინარეობა თუ სხვა მნიშვნელოვანი საკითხები, ყველა ამ გადაწყვეტილებას იღებს ივანიშვილი და ეს კარგად იცის ყველამ ქვეყნის შიგნით და გარეთ. არ გამოვრიცხავ და შესაძლებელია მორიგი გადათამაშება და კაბინეტის სხვადასხვა ფიგურებით მორიგი ჟონგლიორობა ვიხილოთ, მაგრამ ვფიქრობ, ამას არანაირი არსებითი მნიშვნელობა არ აქვს. მთავარი არის, რომ მისი რუსული, ოლიგარქიული, არაევროპული სტილის მმართველობა დასრულდეს არჩევნების შედეგად და ჩვენ გვყავდეს კოალიციური მთავრობა, რომელიც ანგარიშვალდებული იქნება ხალხთან და შეძლებს ქვეყნის ევროკავშირში შეყვანას,“ – განაცხადა ბოკუჩავამ.

გიორგი გახარიას პარტიის ინიციატივა მატრაკვეცობაა, რადგან როცა საკონსტიტუციო ცვლილებები განხორციელდა, გახარია ჩვენთან იყო და მაშინ არც წინააღმდეგი იყო, არც ხმა ამოუღია, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.

ზარქუამ კომენტარი გააკეთა პარტიის „საქართველოსთვის“ ინიციატივაზე, კონსტიტუციაში პრეზიდენტის არჩევის წესთან დაკავშირებით ცვლილება განხორციელდეს და საქართველოს მომავალი პრეზიდენტი, საარჩევნო კოლეგიის ნაცვლად, კვლავ პირდაპირი წესით საქართველოს მოქალაქეებმა აირჩიონ.

ირაკლი ზარქუას თქმით, გახარიას პარტიას ახლა თემები ამოეწურა და სისულელეებს იგონებენ.

„ახლა რატომ გაახსენდა, რომ პრეზიდენტი, რომელსაც წარმომადგენლობითი ფუნქცია აქვს, ქვეყნის მასშტაბით უნდა ავირჩიოთ? ეს რა ლოგიკაა, მანამდე სად იყვნენ ან ახლა რა არგუმენტები აქვთ? უბრალოდ, არ აქვთ თემები, არ იციან, რაზე ილაპარაკონ. ისინი ვერ ისაუბრებენ ეკონომიკაზე, მშვიდობაზე, ევროინტეგრაციაზე, ამიტომ იგონებენ ამ სისულელეებს“, – აღნიშნა ირაკლი ზარქუამ.

„გირჩის“ წევრის, იაგო ხვიჩიას განცხადებით, ევროკავშირის ცხრა რეკომენდაციის შესრულებასთან დაკავშირებით ნებისმიერ პროცესში მიიღებენ მონაწილეობას.

ამასთან, ხვიჩიას თქმით, მთავარია დეპოლარიზაცია, რომელიც მიიღწევა მხოლოდ მაშინ, თუ მიხეილ სააკაშვილს ქვეყნის პოლიტიკაში ღიად ჩართვის საშუალება მიეცემა.

„პარლამენტში ერთხელ უკვე ვნახეთ, როგორ სრულდებოდა 12 პუნქტი, თუმცა ახლა პოლიტიკაში ბიძინა ივანიშვილია, რომელიც ცხრა პუნქტის შესრულებას თავის ხელს დაატყობს თუ არა, არ ვიცით, მაგრამ ჩვენ ნებისმიერ პროცესში მივიღებთ მონაწილეობას, რადგან, ვაითუ, ბატონმა ბიძინამაც გადაწყვიტოს ამ პროცესში ჩართულობა და ჩვენ რომ იქ არ ვიყოთ, მხოლოდ დანარჩენი ოპოზიციის იმედად ხეირიანს ვერაფერს მივიღებთ. შესაბამისად, ყველაფერში ჩავერთვებით. ვიდრე ჩვენ ვერ მოვახერხებთ იმას, რომ ქართული პოლიტიკის ორ მთავარ მოთამაშეს – ბატონ ბიძინას და სააკაშვილს არ შევარიგებთ, მანამდე ასეთი პროექტების მიმართ დიდი წარმატების იმედი არ უნდა გვქონდეს, რადგან ჩვენ გვითხრეს, მთავარი დეპოლარიზაცია არისო. მისი შესრულება ახალი რეგულირებებით, შეზღუდვებით, სააკაშვილის საავადმყოფიდან ციხეში გადაყვანით და ა.შ. არ გამოვა. გამოსავალს მხოლოდ შერიგებაში ვხედავთ. შერიგებაა ის, რომ ამ ქვეყანაში საკუთარი თავი ორივემ უნდა დაინახოს და ორივეს ჰქონდეს პოლიტიკური მუშაობის საშუალება, რადგან, მოგეხსენებათ, რომ ორივეს პოლიტიკაში ყოფნა უნდათ ან უწევთ. აქედან გამომდინარე, მგონია, რომ ბატონი ბიძინა უნდა მოიქცეს, როგორც ჭეშმარიტი ქველმოქმედი და მიხეილ სააკაშვილს სულის შემძვრელი სიკეთით და ქველმოქმედებით უპასუხოს. ეს იქნება ნაბიჯი დეპოლარიზაციისკენ. საბოლოო ჯამში, სიკეთე და ქველმოქმედება აისახება იმაში, რომ მიხეილ სააკაშვილს მიეცეს საშუალება, ქვეყნის პოლიტიკაში ჩაერთოს ღიად, არა „ვივამედიდან“, არამედ როგორც პოლიტიკოსს შეეფერება. მესმის, ასეთი ნაბიჯების გადადგმა ერთ დღეში არ მოხდება, მაგრამ თუ გვინდა დეპოლარიზაცია და პოლიტიკური ცხოვრების თავის ჩარჩოებში მოქცევა, როგორც ბატონი ბიძინა დაბრუნდა პოლიტიკაში, ჩემი აზრით, ასევე უნდა დაბრუნდეს პოლიტიკაში სააკაშვილიც. დანარჩენი პოლიტიკური ძალები კი, რომლებიც ხან „ქართული ოცნების“ სახელით ლაპარაკობენ, ხან – „ნაცების“, ამ ორმა ლიდერმა უნდა შეიწოვონ. ბიძინა ივანიშვილი თუ მართლა სერიოზულად ბრუნდება, ეს დაბრუნება წინა დაბრუნებასავით არ უნდა იყოს, რომ შემდეგ ისევ მოუგვარებელი საკითხები დარჩეს და კაცს პენსიიდან უკან დაბრუნება უწევს“, – განაცხადა იაგო ხვიჩიამ.

პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძე შობის აღნიშვნის თარიღთან დაკავშირებულ აზრთა სხვადასხვაობას გამოეხმაურა.

პოლიტიკოსი მიიჩნევს, რომ 7 იანვარს შობის აღნიშვნა პოლიტიკური კონტექსტის მატარებელი არ უნდა იყოს.

„საკითხი თავისი შინაარსით საკმაოდ რთულია. არ შეიძლება ასე პრიმიტიულად ვინმეს შეფასებების, ან განწყობების დონეზე გადასაწყვეტი იყოს შობის აღნიშვნის თარიღი. თუ ვინმე მიაკუთვნებს კონკრეტულ კონფესიას საკუთარ თავს, ალბათ გარკვეული ავტორიტეტის გათვალისწინებით, უნდა ჰქონდეს ამ ინსტიტუციის ნდობა. აბსოლუტურად არ მაქვს განცდა, რომ 7 იანვარს შობის აღნიშვნა რაიმე პოლიტიკური კონტექსტის მატარებელი შეიძლება იყოს. მიზანი არის ის, რომ რამენაირად მიზეზები მონახონ, არგუმენტები, მათ მიერ წინასწარ გამოცხადებული არარსებული ფაქტის, არარსებული შეხედულების ტირაჟირებისთვის. ამ შემთხვევაში, უნდათ დააბრალონ ხელისუფლებას რომელიმე მიმართულებით სვლა, რომელსაც თვითონ აცხადებენ სასურველად მათი პიარული სტრატეგიის გათვალისწინებით“, – აღნიშნა სარჯველაძემ.

გჯერათ, რომ „ხაბეს“, „ჭიჭეს“ და სამადაშვილს, ბრიუსელში რომ დარბოდნენ და სტატუსის წინააღმდეგ იბრძოდნენ, ახლა სამუშაო ჯგუფებში მუშაობა უნდათ?! მე და ქართველ ხალხს ამის არ გვჯერა! – ეს განცხადება პარლამენტში „ქართული ოცნების“ დეპუტატმა ირაკლი ზარქუამ გააკეთა.

ზარქუას თქმით, ევროკავშირის რეკომენდაციების შესასრულებლად მუშაობა პარლამენტის კომიტეტებში დაიწყება, ხოლო სამუშაო ჯგუფები იმ შემთხვევაში შეიქმნება, თუკი ამის აუცილებლობა გამოჩნდება.

ზარქუა ოპოზიციას მიმართავს, „კეთილი ინებონ და მონაწილეობა კომიტეტის სხდომებში მიიღონ“.

„რადიკალებს წინა სამუშაო ჯგუფებში შესვლა არ აინტერესებდათ – მათ ქაოსი, დაძაბულობა და არეულობა აინტერესებდათ. ეს იყო მათთვის ამოსავალი, რათა ქვეყანას კანდიდატის სტატუსი არ მიეღო. ჩვენ ქართველ ერთან ერთად ორივე ფეხზე მყარად დავდექით და სტატუსი დამსახურებულად მივიღეთ.

ეს ხელმოცარულები მიხვდნენ რა, რომ ქართველ ხალხთან და ქართულ სახელმწიფოსთან ბრძოლა წააგეს, შეცდომების გამოსყიდვის მცდელობა აქვთ. ცდილობენ ხალხს დაანახონ: – ჩვენ მზად ვართ, მუშაობა გვინდა, სად არის მმართველი პარტია…

5 თებერვალს პარლამენტის საგაზაფხულო სესია იხსნება. რეკომენდაციების შესრულებაზე მუშაობა პარლამენტის კომიტეტებში განახლდება – კეთილი ინებეთ დაესწარით და ჩაერთეთ! მოგეცემათ შანსი, რომ რაღაც ქმედითი გააკეთოთ – შემობრძანდით, დაესწარით კომიტეტებს და თქვენი ინიციატივები წარმოადგინეთ“, – მიმართავს ოპოზიციას ირაკლი ზარქუა.

არ მაქვს ინფორმაცია იმის თაობაზე, რაც საქართველოს ხელისუფლება სანქციებს მიუერთდა, სანქციებს არღვევს, – ამის შესახებ „გირჩის“ წევრმა, იაგო ხვიჩიამ განაცხადა, რითიც გამოეხმაურა „ფაქტ-მეტრის“ დასკვნას, რომლის მიხედვითაც, ირაკლი ღარიბაშვილის განცხადება, რომ სანქციების დარღვევის ერთი ფაქტიც არ დაფიქსირებულა, სიმართლეა.

მისი თქმით, ვიდრე არ დამტკიცდება, რომ ხელისუფლება რაიმე სანქციას უერთდება და არ ასრულებს, იქამდე მათ სანქციის დამრღვევს ვერ უწოდებს.

„ზოგადად, სანქციებთან დაკავშირებით ბოლომდე პირნათელი არათუ ჩვენ, არამედ ყველა სანქციას მიერთებული სხვა ცივილური ქვეყნებიც არ არიან. არ მაქვს ინფორმაცია იმის თაობაზე, რაც საქართველოს ხელისუფლება სანქციებს მიუერთდა, სანქციებს არღვევს. რაღაც სანქციებზე ღიად თქვეს, რომ არ ვუერთდებითო. საქართველოში მთავარი პრობლემა გაჩნდა ის, რომ მედიამ ვერ გაარკვია, „ქოცები“ რომელ სანქციას უერთდებიან და რომელს – არა. თუ რაიმეს არ უერთდებიან, ვერ იტყვი, რომ რაიმე დაარღვიეს, მაგრამ რაიმეს თუ უერთდებიან და არ ასრულებენ, ამის თაობაზე სათანადო ინფორმაცია არ გვაქვს. ვიდრე ეს არ დაუმტკიცდებათ, მანამდე მათ სანქციის დამრღვევს ვერ ვუწოდებ“, – განაცხადა ხვიჩიამ.