შეერთებულმა შტატებმა მეორე დარტყმა განახორციელა იემენში ჰუსიტების პოზიციებზე. აშშ-ს პრეზიდენტმა ჯო ბაიდენმა თქვა, რომ გააგრძელებს სამხედრო დარტყმებს, თუ ჰუსიტები არ შეწყვეტენ კომერციული გემების დაბომბვას.

ბაიდენმა ეს ნაბიჯი წინასაარჩევნო კამპანიის პერიოდში გადადგა, რომელიც მისთვის ჯერჯერობით არც თუ ისე კარგად მიდის – რეიტინგებში დონალდ ტრამპი ლიდერობს. აშშ-ს კონგრესმა ჯერ კიდევ არ დაამტკიცა სამხედრო დახმარება უკრაინისა და ისრაელისთვის, რაც ასევე ასუსტებს ბაიდენის პოლიტიკურ პოზიციებს.

ჰუსიტების პოზიციებზე სამხედრო დარტყმები მნიშვნელოვანი სიმბოლური ნაბიჯია. ეს ნიშნავს ვაშინგტონის მიმდინარე პოლიტიკური შეხედულების შეცვლას რონალდ რეიგანის სტილის უფრო მკაცრი კურსისკენ. ამერიკამ „რკინის მუშტი“ აჩვენა თავისუფალი სამყაროს ყველა მტერს და ეს დემონსტრაციულად გაკეთდა. ტელეკომპანია CNN-ის ვებგვერდზე გამოქვეყნდა სტატია, სადაც დეტალურად არის აღწერილი, თუ რა ტიპის იარაღები იქნა გამოყენებული დარტყმისთვის.

https://edition.cnn.com/2024/01/12/middleeast/weapons-us-uk-using-to-strike-yemens-houthis-intl-hnk-ml/index.html

ეს არის რაკეტები Tomahawk Land Attack Missiles (TLAM), რომლებიც გაშვებულია გემებიდან და წყალქვეშა ნავებიდან და ატარებენ 1000 ფუნტის სამხედრო ტვირთს.

USS Florida არის ბირთვული მართვადი რაკეტების მქონე წყალქვეშა ნავი. ამ ნავს შეუძლია 154 Tomahawk საკრუიზო რაკეტის გადატანა. ეს არის უზარმაზარი დამრტყმელი ძალა, რომელიც შეერთებულმა შტატებმა პირველად აჩვენა 2011 წელს ლიბიაში სამხედრო ობიექტებზე თავდასხმების დროს.

დიდმა ბრიტანეთმა განახორციელა დარტყმები Typhoon თვითმფრინავით, რომელმაც ჩამოაგდო 500 ფუნტიანი ბომბი იემენის სამხედრო ობიექტებზე.

აშშ-ს სამხედრო ძალის დემონსტრირება გაფრთხილებაა, პირველ რიგში, ირანისთვის, რომელიც მხარს უჭერს ახლო აღმოსავლეთში მის „პროქსი“-ძალებს. თუმცა, ბაიდენის ადმინისტრაციის მიერ სამხედრო ძალის გამოყენება ასევე ნიშანია სხვა ავტორიტარული სახელმწიფოებისთვის, რომლებიც ცდილობენ შეასუსტონ აშშ-ს პოზიციები მსოფლიო ასპარეზზე.

შეერთებულ შტატებში ჰუსიტების ბაზებზე დარტყმებს მხარი რესპუბლიკური პარტიის წარმომადგენლებმა დაუჭირეს. აშშ-ს საპრეზიდენტო კანდიდატებმა ნიკი ჰეილიმ და რონ დესანტისმა გააკრიტიკეს ჯო ბაიდენი იმის გამო, რომ ეს დარტყმები ადრე არ განახორციელა. მხოლოდ დონალდ ტრამპმა ისაუბრა ჯო ბაიდენის ქმედებებზე კრიტიკულად და თქვა, რომ ბაიდენი ხელს უწყობს ომს ახლო აღმოსავლეთში. პარადოქსულია, მაგრამ პრეზიდენტის ქმედებები, რომელიც წარმოადგენს დემოკრატიულ პარტიას, შეესაბამება რესპუბლიკელების პოლიტიკურ შეხედულებებს.

ავტორიტარული რეჟიმების დამშვიდების პოლიტიკა და მათთან შეთანხმების მიღწევის მცდელობები სამხედრო კონფლიქტების ესკალაციის თავიდან ასაცილებლად ჩაიშალა. შეერთებული შტატები იძულებული არიან მოიხსნან „ხავერდოვანი ხელთათმანები“ და გამოიყენონ „რკინის მუშტები“. ავღანეთიდან ამერიკული ჯარის წარუმატებელი გაყვანის შემდეგ აშშ-ს სამხედრო პრესტიჟი ძალიან დაზარალდა. ავტორიტეტის აღსადგენად, აშშ იძულებულია აჩვენოს სამხედრო ძალა მსოფლიოს. წინააღმდეგ შემთხვევაში, ამერიკა დაკარგავს თავის ეკონომიკურ უზენაესობას საერთაშორისო ასპარეზზე. ნათქვამია, რომ მსოფლიო დოლარის სისტემის არსებობას აშშ-ს საზღვაო ძალები განაპირობებს.

1980 წელს რონალდ რეიგანმა მოიგო არჩევნები ამერიკის დიდების დაბრუნების ლოზუნგით. მისი კონკურენტი ჯიმი კარტერი დამარცხდა ირანში ამერიკელი მძევლების კრიზისის გამო. ამჯერადაც, ამერიკის საგარეო პოლიტიკის რადიკალურად შეცვლის მიზეზი ირანია, რომელიც მხარს უჭერს ჰამასს, ჰუსიტებს და სხვა „პროქსი“-ძალებს ახლო აღმოსავლეთში აშშ-ის პოზიციების შესუსტების მიზნით. მიუხედავად იმისა, თუ ვინ გახდება აშშ-ს შემდეგი პრეზიდენტი, ამერიკის „რკინის მუშტის“ საგარეო პოლიტიკა უცვლელი დარჩება.

ავთანდილ წულაძე –პოლიტოლოგი, პოლიტოლოგიის დოქტორი

გიორგი გახარია დაიმალა მას შემდეგ, როდესაც როგორც პრემიერ-მინისტრმა ყველაზე უფრო მძიმე ვითარებაში უღალატა ქვეყანას და სახელმწიფო ინტერესებს, – ამის შესახებ საპროცედურო საკითხთა და წესების კომიტეტის თავმჯდომარემ, ირაკლი ქადაგიშვილმა „ქრონიკასთან“ განაცხადა.

„ახლა, გახარიას ხან პრეზიდენტის არჩევნების მოთხოვნა და ასევე სხვა განცხადებები ემსახურება ერთ რამეს, რომ რამენაირად პოლიტიკის ზედაპირზე იტივტივოს. მის ტივტივში ხელის შეწყობას ჩვენ არ ვაპირებთ“, – აღნიშნა ირაკლი ქადაგიშვილმა.

გიორგი გახარიას მხრიდან ბიძინა ივანიშვილის დებატებში გამოწვევა „ქართული ოცნების“ თავმჯდომარისთვის აბსურდული განცხადებაა. ირაკლი კობახიძე გიორგი გახარიას წარსულ საქმიანობას და 2021 წლის არჩევნებზე განცდილ მარცხს ახსენებს და ურჩევს, რომ დებატები ჯერ მოვალეებთან გამართოს.

საქართველოს პრემიერ-მინისტრის ირაკლი ღარიბაშვილის ხელმძღვანელობით მთავრობის ადმინისტრაციაში ეკონომიკური საბჭოს სხდომა გაიმართა.

სხდომაზე მიმდინარე წელს დაგეგმილი პროექტები განიხილეს. საბჭოს წევრებმა 2023 წლის ნაერთი ბიუჯეტის შესრულების მაჩვენებლებზე იმსჯელეს. აღინიშნა, რომ დაგეგმილ მაჩვენებლებთან შედარებით შემოსულობები 102.2%-ით, საგადასახადო შემოსავლები 101.7%-ით, პრივატიზაცია 124.3%-ით, გადასახდელები 100.3%-ით, კაპიტალური ხარჯები კი, 101.2%-ით შესრულდა, ხოლო მშპ-თან მიმართებით ნაერთი ბიუჯეტის დეფიციტმა 2.5% შეადგინა.
როგორც რეგიონული განვითარებისა და ინფრასტრუქტურის მინისტრმა ირაკლი ქარსელაძემ აღნიშნა, საქართველოს რეგიონული განვითარებისა და ინფრასტრუქტურის სამინისტრომ 2023 წლის სახელმწიფო ბიუჯეტი 102.5%-ით ანუ 83.3 მილიონი ლარის გადაჭარბებით შეასრულა და სამინისტროს სახელმწიფო ბიუჯეტის საკასო ხარჯმა 3 434.8 მილიონი ლარი შეადგინა, რაც გეგმაზე (3 351.4 მლნ ლარი) 83.3 მილიონი ლარით მეტია.

ამასთან, მინისტრის თქმით, სამინისტრომ ინფრასტრუქტურული პროექტების განვითარებას წინა წლის ანალოგიურ მაჩვენებელზე 354.4 მილიონი ლარით მეტი ფინანსური რესურსი მოახმარა, რაც სამინისტროს არსებობის ისტორიაში ყველაზე მაღალი მაჩვენებელია.

როგორც ირაკლი ქარსელაძემ აღნიშნა, სამინისტროს დაქვემდებარებაში მყოფმა უწყებებმაც გადააჭარბეს 2023 წლის გეგმებს და ქვეყნის მასშტაბით ინფრასტრუქტურული პროექტების განვითარებას მოახმარეს: საავტომობილო გზების დეპარტამენტმა – 2 018.8 მილიონი ლარი (გეგმის 104%); სსიპ საქართველოს მუნიციპალური განვითარების ფონდმა – 839.0 მილიონი ლარი (გეგმის 100%); შპს ,,საქართველოს გაერთიანებული წყალმომარაგების კომპანიამ“ – 521.1 მილიონი ლარი (გეგმის 100%); შპს ,,მყარი ნარჩენების მართვის კომპანიამ“ – 43.0 მილიონი ლარი (გეგმის 101 %).
საბჭოს წევრებმა იმსჯელეს ციტრუსის ექსპორტის საკითხზე. აღინიშნა, რომ ციტრუსის სეზონზე ქვეყნის გარეთ ამ ეტაპისთვის ექსპორტირებულია 33 800 ტონა, 22 მილიონი აშშ დოლარის ციტრუსი. დღეის მდგომარეობით, მიმდინარეობს მიღება-დახარისხება და ექსპორტირების პროცესი. ამ დროისათვის საწარმოს მიერ გადამუშავებულია 9 900 ტონა არასტანდარტული ციტრუსი. სუბსიდიის თანხამ 2 474 000 ლარი შეადგინა. როგორც საბჭოს სხდომაზე აღინიშნა, პროცესი გრძელდება და დამატებით 3-5 ათასი ტონის გადამუშავება იგეგმება.

განიხილეს სოციალურად დაუცველი ოჯახებისათვის ელექტროენერგიის სუბსიდირების საკითხი. აღინიშნა, რომ 2024 წელს კვლავ გაგრძელდება სოციალურად დაუცველი ოჯახების მონაცემთა ერთიან ბაზაში 150 000-ზე ნაკლები სარეიტინგო ქულის მქონე ოჯახების მოხმარებული ელექტროენერგიის სუბსიდირება.

როგორც დევნილთა, შრომის, ჯანმრთელობისა და სოციალური დაცვის მინისტრმა ზურაბ აზარაშვილმა აღნიშნა, მიუხედავად იმისა, რომ 2023 წლის ბოლოს სემეკის გადაწყვეტილებით საყოფაცხოვრებო მომხმარებლებისთვის ელექტროენერგიის ტარიფი შემცირდა 3,0 თეთრით, სოციალურად დაუცველი ოჯახებისთვის სუბსიდია ძალაში რჩება.
მინისტრის თქმით, 2024 წლის განმავლობაში სოციალურად დაუცველ ოჯახებს, სარეიტინგო ქულების მიხედვით, მოხმარებული ელექტროენერგია 12,5 თეთრამდე დაუფინანსდებათ. აღნიშნული შეღავათით 250 000-მდე ოჯახი ისარგებლებს.