კარგი იქნება, თუ მედვედევის პროვოკაციას ძალიან მშვიდად შევხვდებით და გავაგრძელებთ პოლიტიკურ კურსს, რომელიც რუსეთის ფედერაციას ამ პროვოკაციების განხორციელების საშუალებას არ აძლევს, ამის შესახებ ირაკლი ქადაგიშვილი აცხადებს.

მისი თქმით, საქართველოს ხელისუფლებისთვის ნებისმიერი სახის მუქარა და შანტაჟი მიუღებელია.

„ეს არის მუქარა და შანტაჟი. ჩვენთვის ნებისმიერი სახის მუქარა, შანტაჟი მიუღებელია და აფხაზეთთან, ასევე ცხინვალთან მიმართებით ჩვენს პოლიტიკას გავაგრძელებთ. მხოლოდ და მხოლოდ მშვიდობიანი ინტეგრაციისა და მშვიდობიანი დაახლოების გზით გაგრძელდება საქართველოს პოლიტიკა ამ ორ რეგიონთან დაკავშირებით. რაც შეეხება საქართველოს, როგორც დამოუკიდებელი სახელმწიფოს არჩევანს, ეს არჩევანი საქართველოს დიდი ხანია, გაკეთებული აქვს და ჩვენ ამ არჩევანის ერთგული ვართ. კიდევ ერთხელ ვხედავთ, რა მძიმე მემკვიდრეობა აქვს საქართველოს ოკუპაციიდან გამომდინარე. მედვედევის განცხადებით კიდევ ერთხელ ვრწმუნდებით, რომ ერთადერთი სწორი გზაა საქართველოს ხელისუფლების პოლიტიკა, რომელიც მიზნად ისახავს, ქვეყანას მაქსიმალურად ააცილოს ასეთი ტიპის პროვოკაციები და შანტაჟი.

საქართველოს მხრიდან კონკრეტული ნაბიჯია ის პოლიტიკა, რომელსაც ათი წლის განმავლობაში ვატარებთ და რუსეთის ფედერაციას არ ვაძლევთ საშუალებას, ამ განცხადებაში გაჟღერებული მუქარა განახორციელოს და რეალობად აქციოს. ეს არის კონკრეტული შედეგი და შანტაჟის ენით გამოთქმულ საფრთხეებს საქართველოს შემდგომშიც ავაცილებთ. კარგი იქნება, თუ მედვედევის პროვოკაციას ძალიან მშვიდად შევხვდებით და გავაგრძელებთ პოლიტიკურ კურსს, რომელიც რუსეთის ფედერაციას ამ პროვოკაციების განხორციელების საშუალებას არ აძლევს“, – განაცხადა ირაკლი ქადაგიშვილმა.

ცნობისთვის, რუსეთის უშიშროების საბჭოს თავმჯდომარის მოადგილემ, დიმიტრი მედვედევმა განაცხადა: „აფხაზეთსა და სამხრეთ ოსეთში რუსეთთან შეერთების იდეა კვლავ პოპულარულია, ის შეიძლება, განხორციელდეს, თუ ამის საფუძვლიანი მიზეზი იარსებებს“.

კალაძე აგრძელებს თბილისის აოხრების კვირეულს და დღეს სხდომამდე ერთი დღით ადრე შემოიტანეს „ლაგუნა ვერეს“ და აბრეშუმის ფაბრიკის ცათამბჯენების პროექტი, რომელიც პირადად ივანიშვილმა გაყიდა და მიჰყიდა სანქცირებულ რუს ოლიგარქთან დაკავშირებულ ადამიანებს, – ამის შესახებ „ლელოს“ ერთ-ერთმა ლიდერმა საბა ბუაძემ “ლაგუნა ვერესა” და ყოფილი აბრეშუმის ფაბრიკის ტერიტორიაზე 50- სართულიანი ცათამბჯენების მშენებლობის პროექტთან დაკავშირებით განაცხადა.

მან ამ პროექტს ბიძინა ივანიშვილისა და კახა კალაძის ერთობლივი კორუფციული პროექტი უწოდა და განაცხადა, რომ ის უარყოფითად აისახება თბილისელების ყოველდღიურ ცხოვრებაზე, რადგან ის მნიშვნელოვან სატრანსპორტო კვანძთან სწორედ იმ ადგილას შენდება, რომელიც 2015 წლის 13 ივნისის სტიქიის დროს ყველაზე მეტად დაიტბორა.

ბუაძემ თბილისის მერიასა და საკრებულოს ამ პროექტის განხილვის გადადების მოთხოვნით მიმართა, იქამდე, სანამ სპეციალისტები საკითხს არ შეისწავლიან.

„ეს არის პროექტი, რომლის განხორციელებაც კატასტროფული იქნება ჩვენი ქალაქისთვის, რომელსაც არანაირი თვალსაზრისით არ გააჩნია მიზანშეწონილობა. როგორც სატრანსპორტო თვალსაზრისით, ისე ურბანული თვალსაზრისით და რაც მთავარია, უსაფრთხოების თვალსაზრისით ორი 50-სართულიანი ცათამბჯენის მშენებლობა აბრეშუმის ფაბრიკისა და “ლაგუნა ვერეს” ტერიტორიაზე იქნება გამანადგურებელი დარტყმა თბილისისთვის, თბილისის ისტორიული იერსახისთვის, ყველაზე მნიშვნელოვანი სატრანსპორტო კვანძისთვის, რომელიც გმირთა მოედანზე მდებარეობს და რაც ყველაზე მთავარია, ეს არის ტერიტორია, რომელიც 2015 წლის 13 ივნისის სტიქიის დროს ყველაზე მეტად დაიტბორა – მდინარე ვერეს ერთ-ერთი ყველაზე პრობლემური კალაპოტია და აქ სპეციალისტებმა თქვეს, რომ აბსოლუტურად არანაირი მსგავსი მშენებლობის განხორციელება არ შეიძლებოდა, მაგრამ კალაძემ, ამ ყველაფრის მიუხედავად, ივანიშვილის სურვილების დასაკმაყოფილებლად და ერთობლივი დიდი კორუფციული სქემის მოსამსახურებლად, გადაწყვიტა, რომ შემოეტანა ეს პროექტი, რომელიც თავისი მოცულობით 150 ათას კვადრატულ მეტრს აღემატება. ჩვენ მივმართავთ თბილისის მერიას და საკრებულოს, რომ გადაიდოს ამ პროექტის განხილვა იქამდე, სანამ სპეციალისტები ჯერ კიდევ მუშაობენ ამ ტერიტორიის შესწავლაზე. ურბანისტები, ხელოვნებათმცოდნეები და ტრანსპორტის სპეციალისტები ახლა მუშაობენ სწორედ ამ დიდი ტერიტორიის შესწავლაზე და იქამდე, სანამ ჩვენ არ გვექნება კვლევის სრული სურათი, აუცილებელია გადაიდოს ეს პროექტი, რომელიც ისედაც ძალიან ბევრ პრობლემას შეიცავს და არის ივანიშვილისა და კალაძის ერთობლივი კორუფციული მმართველობის კიდევ ერთი სახე-ხატი ჩვენს ქალაქში, რომელიც ჩვენი კეთილდღეობისა და ჩვენი ყოველდღიური ცხოვრების მნიშვნელოვნად გაუარესების ხარჯზე ხორციელდება“, – განაცხადა საბა ბუაძემ.

არ დავუშვებთ საქართველოს უკრაინიზაციას – ბევრი სახელმწიფო ხედავს ინტერესს უკრაინის ომში, რასაც ეწირება უკრაინის სახელმწიფო, – ასე პასუხობს საპარლამენტო უმრავლესობის დეპუტატი, “ხალხის ძალის” წევრი გურამ მაჭარაშვილი დიმიტრი მედვედევის განცხადებას.

მაჭარაშვილი მედვედევის განცხადების საპასუხოდ სხვა სახელმწიფოების “ინტერესებზე” საუბრობს და აცხადებს, რომ უკრაინის ომს ბევრი სახელმწიფო თავის ინტერესებიდან გამომდინარე იყენებს.

„ცალსახად შემიძლია გითხრათ, რომ ვერც რუსეთის და ვერც სხვა სახელმწიფოს თანამდებობის პირის განცხადება ვერ შეცვლის იმ პოზიციას, რომ ჩვენ არ დავუშვებთ საქართველოს უკრაინიზაციას. პირდაპირ შეიძლება ითქვას, რომ ბევრი სახელმწიფო თავის ინტერესს ხედავს უკრაინის ომში, რასაც ეწირება სამწუხაროდ უკრაინის სახელმწიფო, უკრაინელი ხალხი, უკრაინის ეკონომიკა, მომავალი და ა.შ.

ბუნებრივია, საქართველოს უკრაინიზაციას ჩვენ არ დავუშვებთ, როგორი მაპროვოცირებელი, შეურაცხმყოფელი განცხადებებიც არ უნდა გააკეთონ, მედვედევი იქნება ეს, რუსეთის ფედერაციის სხვა თანამდებობის პირი თუ სხვა სახელმწიფოს ნებისმიერი თანამდებობის პირი. ჩვენ ბუნებრივია ამას დავგმობთ, შესაბამის პასუხს გავცემთ, მაგრამ არ ავყვებით პროვოცირებას, რასაც ჰქვია ნებისმიერი ფაქტი თუ განცხადება, რომ საქართველოში მოხდეს უკრაინიზაცია. ამას ჩვენ არ დავუშვებთ,”- განაცხადა მაჭარაშვილმა.

რუსეთის ფედერაციის უშიშროების საბჭოს თავმჯდომარის მოადგილის, დიმიტრი მედვედევის განცხადებით, აფხაზეთისა და სამხრეთ ოსეთის რუსეთთან შეერთების იდეა შეიძლება განხორციელდეს, თუ დასავლეთი საქართველოში სიტუაციის გამწვავებას გააგრძელებს.

„აფხაზეთისა და სამხრეთ ოსეთის რუსეთთან შეერთების იდეა ჯერ კიდევ პოპულარულია და სრულიად შესაძლებელია, განხორციელდეს, თუ ამის საფუძვლიანი მიზეზები იარსებებს“, – განაცხადა მედვედევმა.

მისივე თქმით, თუ მათი შეშფოთება რეალურ ფორმას მიიღებს, არ დააყოვნებენ.

“ისევ მიდის საუბარი საქართველოს ნატო-ში შესაძლო გაწევრიანებაზე. ამ ქვეყანაში რუსოფობიის აფეთქებები დაიწყო. ჩვენ არ გვჭირდება 2008 წლის ისტორიის გამეორება. მზად ვართ დავსხდეთ მოლაპარაკებების მაგიდასთან, გაერო-ს წესდების სულისკვეთებით, პრობლემების გადასაჭრელად. მაგრამ თუ ჩვენი შეშფოთება რეალურ ფორმას მიიღებს, არ დავაყოვნებთ,”- განაცხადა მედვედევმა.

განცხადება გაკეთდა, რა ფორმატის შეხვედრა იყო ათენში და რამ განაპირობა მათ შორის, მოლდოვის და უკრაინის მიწვევა და რატომ არ იყო აუცილებლობა და არც ლოგიკა, რის გამოც შეიძლება საქართველო ყოფილიყო იქ მოწვეული, – ამის შესახებ ადამიანის უფლებათა კომიტეტის თავმჯდომარე მიხეილ სარჯველაძემ განაცხადა, რითაც გამოეხმაურა ათენის სამიტს, რომელიც 21 აგვისტოს გაიმართა და ევროკავშირის კანდიდატი და პოტენციური კანდიდატი 8 ქვეყნის ლიდერები ესწრებოდნენ.

სარჯველაძე გამოეხმაურა, ასევე, საკითხს იმის შესახებ, თუ რატომ არ მიიწვიეს საქართველოს დელეგაცია კიევში, უკრაინის დამოუკიდებლობის დღეზე, ასევე, რატომ არ გავრცელდა ინფორმაცია “მებრძოლი სულის” სწავლების თაობაზე, რომელიც აგვისტოში ჩატარდა. კითხვაზე ხომ არ აჩვენებს ეს ყველაფერი, რომ ხელისუფლებას ქვეყანა საერთაშორისო იზოლაციისკენ მიჰყავს, სარჯველაძე პასუხობს, რომ ამ სამი საკითხის ერთმანეთთან დაკავშირება არის იმის მცდელობა, რომ ხელოვნურად შეიქმნას თემა, თითქოს საქართველოსთვის რაიმე “არაკეთილსასურველი გარემო იქმნება.”

“ქვეყანა, რა თქმა უნდა, თანამშრომლობს და აღრმავებს თანამშრომლობას ევროატლანტიკურ სტრუქტურებთან და ეს არის ყველაზე მნიშვნელოვანი. ინფორმაცია ამის შესახებ გამოქვეყნდა, ინფორმაციის გავრცელების მასშტაბი თუ ვინმესთვის არადამაკმაყოფილებელი იყო, თქვენ შეგეძლოთ ამის თაობაზე პოზიტიურ კონტექსტში გესაუბრათ, მაგრამ ეს არ გააკეთეთ, რადგან ჩასაფრება იყო უფრო მეტად მნიშვნელოვანი. სამწუხაროდ, ცუდად გამოიყურება ეს ყველაფერი, მაგრამ ასეა.

ათენთან დაკავშირებით ითქვა და განცხადებაც გაკეთდა ეს რა ფორმატის შეხვედრა იყო და რამ განაპირობა მათ შორის, მოლდოვის და უკრაინის მიწვევა და რატომ არ იყო აუცილებლობა და არც ლოგიკა არსებობდა, რის გამოც შეიძლება საქართველო ყოფილიყო იქ მოწვეული.

ბოლოს, უკრაინის დამოუკიდებლობის დღესთან დაკავშირებით – პირველ რიგში, რასაკვირველია, ვულოცავ ამ დღეს მთელ უკრაინას. რასაკვირველია, ეს არის ძალიან მნიშვნელოვანი დღე და მით უფრო, დღევანდელობაში მკაფიოდ გამოიკვეთა მნიშვნელობა ამ დღისა. თუ რა განაპირობებს საქართველოს დელეგაციასთან დაკავშირებით მიწვევის საკითხს, პროტოკოლური ურთიერთობები როგორ წარიმართება, მე ინფორმირებული არ ვარ ამ წუთას, მაგრამ ძალიან ვისურვებდი არავინ არსებობდეს არც საქართველოში და არც უკრაინაში, ვინც ძალიან დიდი გულშემატკივარი აღმოჩნდება ქართულ -უკრაინული ურთიერთობების დაზიანების. სამწუხაროდ, დღეს ოპოზიციაში საქართველოში და უკრაინაშიც საკმაოდ მოიპოვებიან პოლიტიკური ძალები, რომლებიც აქტიურად გულშემატკივრობენ, რომ დაძაბული და გართულებული იყოს ურთიერთობა საქართველოსა და უკრაინას შორის. ეს არის გაგრძელება იმ ნაბიჯების, რაც იყო თავის დროზე მიღებული უსაფუძვლოდ ელჩის გაწვევასთან დაკავშირებით და ბევრი სხვა ისეთი გადაწყვეტილება, რომელიც არცთუ მაინც და მაინც მეგობრულად გამოიყურება,” – განაცხადა სარჯველაძემ.

ხელისუფლების სახელით მინდა ვთქვა და ვისაც კითხვას დაუსვამთ, აუცილებლად იგივე პასუხს მიიღებთ – კატეგორიულად მიუღებელია ისეთი ტიპის განცხადებები, რომელიც შეუთავსებელია საქართველოს ტერიტორიული მთლიანობის პრინციპთან, – ასე პასუხობს ადამიანის უფლებათა კომიტეტის თავმჯდომარე მიხეილ სარჯველაძე კითხვას, ელოდება თუ არა საგარეო უწყებისგან ოფიციალურ პოზიციას დიმიტრი მედვედევის განცხადებებთან დაკავშირებით.

სარჯველაძის თქმით, ნებისმიერი განცხადება, რომელიც იქნება არათანხვედრაში, შეუთავსებელი საქართველოს ტერიტორიული მთლიანობის პრიორიტეტთან, არის კატეგორიულად მიუღებელი და არალეგიტიმური.

“საქართველოს სუვერენიტეტი, ტერიტორიული მთლიანობა, ერთი მხრივ, აღიარებულია მთელი ცივილიზებული საერთაშორისო თანამეგობრობის მხრიდან და საქართველოს პოზიციაც ამ მიმართულებით არის ურყევი, ერთმნიშვნელოვანი, ცალსახა. ეს ნიშნავს, რომ ნებისმიერი განცხადება, რომელიც იქნება არათანხვედრაში, შეუთავსებელი საქართველოს ტერიტორიული მთლიანობის პრიორიტეტთან, არის კატეგორიულად მიუღებელი და არალეგიტიმური. აქედან გამომდინარე ეს ერთმნიშვნელოვნად არის კატეგორიულად მიუღებელი განცხადება, რომელიც მოვისმინეთ სახელმწიფოს წარმომადგენლისგან, რომელსაც ოკუპირებული აქვს საქართველოს ტერიტორიები. საქართველო ვერასდროს, ვერც ერთ შემთხვევაში შეურიგდება ტერიტორიების ოკუპაციას და გავაგრძელებთ ბრძოლას დეოკუპაციისთვის, ეს ნიშნავს, რომ საქართველო აუცილებლად შეძლებს მშვიდობიანი გზით აღასრულოს ისტორიული სამართლიანობა, დაიბრუნოს ტერიტორიები და მასზე მცხოვრები საქართველოს მოქალაქენი,”- განაცხადა სარჯველაძემ.

კითხვაზე, ელოდება თუ არა საგარეო უწყებისგან ოფიციალური განცხადების გავრცელებას, სარჯველაძე პასუხობს, რომ საქართველოს ხელისუფლების სახელით ამბობს, რომ კატეგორიულად მიუღებელია ასეთი ტიპის განცხადებები, რომელიც შეუთავსებელია საქართველოს ტერიტორიული მთლიანობის პრინციპთან.

“მთლიანად, მთელი საქართველოს ხელისუფლების სახელით მინდა ახლა მაშინ გავაკეთო განცხადება და ყველას სახელით ვთქვა, უკლებლივ ყველასი და ყველასგან, ვისაც შესაძლებლობა მიეცემა და ვისაც კითხვას დაუსვამთ, აუცილებლად იგივე პასუხს მიიღებთ ვინც წარმოადგენს საქართველოს ხელისუფლებას – კატეგორიულად მიუღებელია ასეთი ტიპის განცხადებები, რომელიც შეუთავსებელია საქართველოს ტერიტორიული მთლიანობის პრინციპთან”, – განაცხადა სარჯველაძემ.

მისივე თქმით, ვერავინ გამოკვეთს, რომ ხელისუფლებას მსგავს განცხადებებთან შემრიგებლური დამოკიდებულება აქვს.

“ნუ ცდილობთ ამას, ამით საერთო ეროვნულ ინტერესს აზიანებთ,” – მიმართა ჟურნალისტს სარჯველაძემ.