თუ დასავლეთიდან დაფინანსება ამა თუ იმ ფორმით არ მოვა, ეს უკრაინისთვის კატასტროფა იქნება, – წერს ცენტრალურ და აღმოსავლეთ ევროპაში ბრიტანული გაზეთი The Guardian-ის კორესპონდენტი, შონ უოკერი სტატიაში სათაურით უკრაინელები მიიჩნევენ, რომ მათ შეუძლიათ გამარჯვება, მაგრამ გარღვევა 2024 წელს შორეულ პერსპექტივად გამოიყურება.

გაზეთი The Guardian-ი წერს, რომ რუსული ჯარების უკრაინის მიწიდან განდევნის პერსპექტივა უფრო შორეულად გამოიყურება, ვიდრე ოდესმე.

კონტრშეტევის მიუხედავად, უკრაინის თითქმის 20% რუსეთის კონტროლის ქვეშ რჩება. ანალიტიკოსთა უმეტესობა მიიჩნევს, რომ ფრონტის ხაზი ახლა ისეა გამყარებული, რომ მნიშვნელოვანი გარღვევა რთული წარმოსადგენია.

“ეს პირველი შემთხვევაა ომის პირველი დღეების შემდეგ, როდესაც ჰორიზონტზე დიდი ოპტიმიზმი არ იგრძნობოდა”, – განაცხადა გაზეთ The Guardian-ის კორესპონდენტმა.

“[უკრაინელებს შორის] განწყობის გაუარესება სექტემბერში დაიწყო და მას შემდეგ უფრო პესიმისტური გახდა. გესმით, რომ ადამიანები ამბობენ, რომ მათ არ სჯერათ, რომ ომს მოიგებენ ისე, როგორც ადრე სჯეროდათ. ზოგი აკეთებს დასკვნას, რომ ეს ნიშნავს, რომ უნდა იბრძოლონ კიდევ უფრო ძლიერად, ზოგი კი ჩუმად სვამს კითხვას, ნიშნავს თუ არა ეს, რომ დროა იფიქრონ იმაზე, არის თუ არა რაიმე გზა ომის დასასრულებლად”, – აღნიშნავს შონ უოკერი.

გაზეთი The Guardian-ი წერს, რომ ამ პესიმიზმის მთავარი მიზეზი არის იმის განცდა, რომ კონტრშეტევა ჩაფლავდა.

“მიუხედავად იმისა, რომ ანალიტიკოსების უმეტესობა ამბობს, რომ უკრაინული ძალები შთამბეჭდავად მოერგნენ ახალ იარაღს, კიევსა და აშშ-ს შორის იყო უთანხმოება იმის თაობაზე, მოეხდინათ თუ არა ძალების ერთ ადგილას კონცენტრირება თუ მათი გაშლა რუსეთის სისუსტეების გამოსავლენად. ამერიკელი ოფიციალური პირები მიიჩნევენ, რომ უკრაინული ძალები ძალიან “თხლად” იყო გაშლილი და მნიშვნელოვანი გარღვევა არ მომხდარა”, – ნათქვამია სტატიაში.

“მცირე ნიშანია იმისა, რომ რომელიმე მხარე უახლოეს მომავალში დიდ წინსვლას მიაღწევს. რუსეთმა ააშენა წარმოუდგენლად მკვრივი თავდაცვითი სიმაგრეები, რაც თითქმის შეუძლებელს ხდის უკრაინის წინსვლას. მაგრამ სიმაგრეები ასევე აჩერებს რუსებს, რადგან მათ უნდა გაიარონ მათ მიერ დანაღმული ველები”, – განმარტავს ბრიტანული გაზეთის კორესპონდენტი.

შონ უოკერი აღნიშნავს, რომ მიუხედავად ასეთი მნიშვნელოვანი წარუმატებლობისა, “ბევრი მიიჩნევს, რომ ეს მათი ბრძოლაა და მათ უნდა იბრძოლონ”.

უკრაინის პრეზიდენტის ოფისის ხელმძღვანელის ანდრეი ერმაკის განცხადებით, მას შემდეგ, რაც უკრაინის პრეზიდენტ ვოლოდიმირ ზელენსკისა და უნგრეთის პრემიერ-მინისტრ ვიქტორ ორბანს შორის მცირე საუბარი შედგა არგენტინაში, უნგრეთის საგარეო საქმეთა მინისტრ პიტერ სიარტოსთან ერთად მუშაობს იმაზე, რომ უახლოეს მომავალში ორი ქვეყნის პრეზიდენტების შეხვედრა შედგეს.

„პროდუქტიული სატელეფონო ზარი მქონდა უნგრეთის საგარეო საქმეთა მინისტრ პიტერ სიარტოსთან. ვმუშაობთ იმაზე, რომ ორი ლიდერი ერთმანეთს უახლოეს მომავალში შეხვდეს“, – წერს ერმაკი.

ლიეტუვის პრეზიდენტმა, გიტანას ნაუსედამ განაცხადა, რომ რუსეთს მოლაპარაკების ინიციატივის იმიტირტება შეუძლია, რათა მიმდინარე ომში დრო მოიგოს.

ლიეტუვის პრეზიდენტმა აღნიშნა, რომ ეს ნაბიჯი კრემლის ტაქტიკური ხრიკების ნაწილია.

“რუსეთი გამოიყენებს ამ დროს, რათა ფეხზე დადგეს და კვლავ ახალი ძალით დაარტყას [უკრაინას]”, – განაცხადა ლიეტუვის პრეზიდენტმა.

“უკრაინამ უნდა თქვას საბოლოო სიტყვა მოლაპარაკებების დაწყებაზე. ქვეყანას, რომელმაც ამხელა მსხვერპლი გაიღო, აქვს უფლება, თავად გადაწყვიტოს უნდა დაიწყოს თუ არა მოლაპარაკებები და რა პირობებით. სხვას არავის აქვს გადამწყვეტი ხმა ამ მხრივ”, – დასძინა ნაუსედამ.

ისრაელის თავდაცვის ძალების (IDF) განცხადებით, 7 ოქტომბრის შემდეგ, ქვეყანამ 500-ზე მეტი ჯარისკაცი და რეზერვისტი დაკარგა, მათგან 167 უშუალოდ ღაზას სექტორში მიმდინარე სახმელეთო ოპერაციის ფარგლებში.

IDF-ში აცხადებენ, რომ დაღუპული სამხედროების უმეტესობა 7 ოქტომბერს, ისრაელის სამხრეთ ნაწილში „ჰამასის“ მიერ განხორციელებული ტერორისტული თავდასხმის დროს დაიღუპა.

„7 ოქტომბერს, სულ მცირე 274 სამხედრო და 38 ადგილობრივი უსაფრთხოების ოფიცერი ემსხვერპლა თავდასხმას. ხოლო ღაზას სექტორში სახმელეთო ოპერაციას, ბოლო მონაცემებით, 167 ჯარისკაცი შეეწირა“, – აღნიშნულია ინფორმაციაში.

ამასთან, ისრაელის თავდაცვის ძალებში აღნიშნავენ, რომ კიდევ 9 ჯარისკაცი ემსხვერპლა თავდასხმებს, რომლებზეც პასუხისმგებლობა „ჰეზბოლას“ და პალესტინის ისლამური ჯიჰადის ტერორისტულ დაჯგუფებებს ეკისრებათ, ხოლო ორი სამხედრო დასავლეთ სანაპიროზე მომხდარი ტერაქტის შედეგად დაიღუპა.

ამასთან, IDF-ში აღნიშნავენ, რომ ჩამონათვალში არ შედის 57 პოლიციელი, რომლებიც ასევე დაიღუპნენ 7 ოქტომბრის თავდასხმის შედეგად.

უკრაინის პრეზიდენტმა, ვოლოდიმირ ზელენსკიმ განაცხადა, რომ ევროპისა და აშშ-ის უსაფრთხოება რუსეთისთვის გაცემულ ძალისმიერ პასუხზეა დამოკიდებული.

“მადლობას ვუხდი ჯო ბაიდენს, კონგრესს, ამერიკელ ხალხს გუშინ გამოცხადებული 250 მილიონი დოლარის სამხედრო დახმარების პაკეტისთვის. საჰაერო თავდაცვის დამატებითი რაკეტები და კომპონენტები, ტანკსაწინააღმდეგო იარაღი, საბრძოლო მასალა და სხვა აღჭურვილობა დაფარავს უკრაინის საჭიროებებს”, – აღნიშნა ვოლოდიმირ ზელენსკიმ.

“თავისუფლებისა და უსაფრთხოების დასაცავად არა მხოლოდ უკრაინასა და ევროპაში, არამედ შეერთებულ შტატებშიც, ჩვენ უნდა გავაგრძელოთ რუსეთის მიმდინარე აგრესიაზე ძლიერი და მტკიცე პასუხის გაცემა”, – დასძინა უკრაინის პრეზიდენტმა.