უკრაინის ბევრ ოლქში საჰაერო განგაში წუხანდელი ღამის შემდეგ მეორედ გამოცხადდა. რუსებმა ღამით უკრაინის ტერიტორიაზე Shahed-ის დრონები გაუშვეს, ასევე არსებობს ბალისტიკური დარტყმის საფრთხე, – ინფორმაციას უკრაინული მედია ავრცელებს.

მათივე ინფორმაციით, ლვოვში ძლიერი აფეთქებების ხმა ისმის.

პოდოლსკის რაიონში საწყობების ტერიტორიაზე ხანძარი დაფიქსირდა, არიან დაშავებულები. ადგილზე მობილიზებულია სასწრაფო დახმარების სამსახურები.

აფეთქებების ხმები ისმოდა კიევშიც.

დედაქალაქის მერის, ვიტალი კლიჩკოს განცხადებით, პოდოლსკის რაიონში საწყობი იწვის. “ყველა შესაბამისი სამსახური ადგილზეა”, – აღნიშნა მერმა.

კიევის საქალაქო-სამხედრო ადმინისტრაციაში განმარტავენ, რომ ნამსხვრევების ჩამოვარდნა დაფიქსირდა კიევის პოდოლსკისა და სვიატოშინსკის რაიონებში. ამასთან, უკრაინული მედიის ინფორმაციით, დნიპროში ქალაქის ერთ-ერთი სავაჭრო ცენტრი იწვის.

რუსმა სამხედროებმა სუმის ოლქის ქალაქ კონოტოპზე სარაკეტო დარტყმა განახორციელეს, რის შედეგადაც დაზიანდა საცხოვრებელი კორპუსი და დაშავდა სამი ადამიანი. ინფორმაციას სუმის რეგიონული სამხედრო ადმინისტრაცია ავრცელებს.

მათივე ცნობით, სარაკეტო იერიშის შედეგად ცეცხლი გაუჩნდა ავტომანქანებსაც.

ამასთან, კიევში, ზაპოროჟიესა და დნეპრში საჰაერო იერიშები განხორციელდა. კიევის ადგილობრივი ხელისუფლება მოსახლეობას სახლში დარჩენისკენ მოუწოდებს.

უკრაინული მედიის ცნობით, დნეპრში ცეცხლი გაუჩნდა ერთ-ერთ სავაჭრო ცენტრსაც.

კოლორადოს შემდეგ, აშშ-ის ყოფილ პრეზიდენტ დონალდ ტრამპს 2024 წლის პრაიმერიზში მონაწილეობა მეინის შტატმაც აუკრძალა. ინფორმაციას ამის შესახებ „როიტერი“ ავრცელებს.

მედიის ცნობით, მეინის სახელმწიფო მდივანმა, დემოკრატმა შენა ბელოუსმა დაასკვნა, რომ ტრამპმა მოახდინა აჯანყების პროვოცირება, როდესაც მან გაავრცელა ცრუ ინფორმაცია 2020 წლის არჩევნების გაყალბების შესახებ. დონალდ ტრამპის მოწოდების შემდეგ მისი მხარდამჭერები კაპიტოლიუმში შეიჭრნენ და იმ პროცესის ჩაშლა სცადეს, რომელზეც საპრეზიდენტო არჩევნების შედეგები უნდა დამოწმებულიყო.

„აშშ-ს კონსტიტუცია ჩვენი მთავრობის საფუძვლებზე თავდასხმას არ მოითმენს“, – წერს ბელოუსი 34-გვერდიან განჩინებაში.

საპასუხოდ, ტრამპის ადვოკატებმა განაცხადეს, რომ სწრაფად გააპროტესტებენ „საშინელ“ გადაწყვეტილებას.

აშშ-ის ყოფილ პრეზიდენტს, დონალდ ტრამპს აშშ-ის კოლორადოს შტატის უზენაესმა სასამართლომ შტატის 2024 წლის პრაიმერიზში მონაწილეობა 20 დეკემბერს აუკრძალა.

გერმანია ელის, რომ ევროკავშირი უნგრეთის წინააღმდეგობის მიუხედავადაც დაამტკიცებს უკრაინის მხარდამჭერ პაკეტს. ამის შესახებ გერმანიის საგარეო საქმეთა სამინისტროს ოფიციალურმა წარმომადგენელმა, კრისტიან ვაგნერმა სამთავრობო პრესკონფერენციაზე განაცხადა.

მან აღნიშნა, რომ კანცლერ ოლაფ შოლცის კოალიციური მთავრობა 2024 წელს უკრაინას 8 მილიარდი ევროს ღირებულების სამხედრო დახმარებას მიაწვდის, ასევე, ბერლინი “აქტიურ კამპანიას” გააგრძელებს, რათა მომავალი წლის დასაწყისში ევროკავშირის 50 მილიარდი ევროს ოდენობის მხარდაჭერის პაკეტი იქნას დამტკიცებული.

“ევროკავშირის ნებისმიერ შემთხვევაში გააგრძელებს უკრაინის დახმარებას… ევროკავშირი-26 [ევროკავშირის 26 წევრი, უნგრეთის გარდა], რა თქმა უნდა, ასევე, შეძლებს მოქმედებას. მაგრამ არ მინდა ახლა იმაზე ფიქრი, როგორ იქნებოდა შესაძლებელი ასეთი მხარდაჭერის ორგანიზება. ეს ასევე მოითხოვს ბრიუსელში შემდგომ კონსულტაციებს”, – განაცხადა ვაგნერმა.

ცნობისთვის, ევროკავშირის ლიდერები უნგრეთის პოზიციისთვის გვერდის ავლის საშუალებას ეძებდნენ მას შემდეგ, რაც დეკემბრის შუა რიცხვებში უკრაინისთვის 50 მილიარდი ევროს დახმარების გამოყოფის შესახებ მოლაპარაკებები ჩაიშალა. მას შემდეგ შემოთავაზებულ იქნა სარეზერვო ვარიანტი, რომლის მეშვეობითაც წევრი სახელმწიფოები უკრაინისთვის სახსრების გადაცემას ევროკავშირის საბიუჯეტო პროცესის მიღმა შეძლებენ.

თუ დასავლეთიდან დაფინანსება ამა თუ იმ ფორმით არ მოვა, ეს უკრაინისთვის კატასტროფა იქნება, – წერს ცენტრალურ და აღმოსავლეთ ევროპაში ბრიტანული გაზეთი The Guardian-ის კორესპონდენტი, შონ უოკერი სტატიაში სათაურით უკრაინელები მიიჩნევენ, რომ მათ შეუძლიათ გამარჯვება, მაგრამ გარღვევა 2024 წელს შორეულ პერსპექტივად გამოიყურება.

გაზეთი The Guardian-ი წერს, რომ რუსული ჯარების უკრაინის მიწიდან განდევნის პერსპექტივა უფრო შორეულად გამოიყურება, ვიდრე ოდესმე.

კონტრშეტევის მიუხედავად, უკრაინის თითქმის 20% რუსეთის კონტროლის ქვეშ რჩება. ანალიტიკოსთა უმეტესობა მიიჩნევს, რომ ფრონტის ხაზი ახლა ისეა გამყარებული, რომ მნიშვნელოვანი გარღვევა რთული წარმოსადგენია.

“ეს პირველი შემთხვევაა ომის პირველი დღეების შემდეგ, როდესაც ჰორიზონტზე დიდი ოპტიმიზმი არ იგრძნობოდა”, – განაცხადა გაზეთ The Guardian-ის კორესპონდენტმა.

“[უკრაინელებს შორის] განწყობის გაუარესება სექტემბერში დაიწყო და მას შემდეგ უფრო პესიმისტური გახდა. გესმით, რომ ადამიანები ამბობენ, რომ მათ არ სჯერათ, რომ ომს მოიგებენ ისე, როგორც ადრე სჯეროდათ. ზოგი აკეთებს დასკვნას, რომ ეს ნიშნავს, რომ უნდა იბრძოლონ კიდევ უფრო ძლიერად, ზოგი კი ჩუმად სვამს კითხვას, ნიშნავს თუ არა ეს, რომ დროა იფიქრონ იმაზე, არის თუ არა რაიმე გზა ომის დასასრულებლად”, – აღნიშნავს შონ უოკერი.

გაზეთი The Guardian-ი წერს, რომ ამ პესიმიზმის მთავარი მიზეზი არის იმის განცდა, რომ კონტრშეტევა ჩაფლავდა.

“მიუხედავად იმისა, რომ ანალიტიკოსების უმეტესობა ამბობს, რომ უკრაინული ძალები შთამბეჭდავად მოერგნენ ახალ იარაღს, კიევსა და აშშ-ს შორის იყო უთანხმოება იმის თაობაზე, მოეხდინათ თუ არა ძალების ერთ ადგილას კონცენტრირება თუ მათი გაშლა რუსეთის სისუსტეების გამოსავლენად. ამერიკელი ოფიციალური პირები მიიჩნევენ, რომ უკრაინული ძალები ძალიან “თხლად” იყო გაშლილი და მნიშვნელოვანი გარღვევა არ მომხდარა”, – ნათქვამია სტატიაში.

“მცირე ნიშანია იმისა, რომ რომელიმე მხარე უახლოეს მომავალში დიდ წინსვლას მიაღწევს. რუსეთმა ააშენა წარმოუდგენლად მკვრივი თავდაცვითი სიმაგრეები, რაც თითქმის შეუძლებელს ხდის უკრაინის წინსვლას. მაგრამ სიმაგრეები ასევე აჩერებს რუსებს, რადგან მათ უნდა გაიარონ მათ მიერ დანაღმული ველები”, – განმარტავს ბრიტანული გაზეთის კორესპონდენტი.

შონ უოკერი აღნიშნავს, რომ მიუხედავად ასეთი მნიშვნელოვანი წარუმატებლობისა, “ბევრი მიიჩნევს, რომ ეს მათი ბრძოლაა და მათ უნდა იბრძოლონ”.

უკრაინის პრეზიდენტის ოფისის ხელმძღვანელის ანდრეი ერმაკის განცხადებით, მას შემდეგ, რაც უკრაინის პრეზიდენტ ვოლოდიმირ ზელენსკისა და უნგრეთის პრემიერ-მინისტრ ვიქტორ ორბანს შორის მცირე საუბარი შედგა არგენტინაში, უნგრეთის საგარეო საქმეთა მინისტრ პიტერ სიარტოსთან ერთად მუშაობს იმაზე, რომ უახლოეს მომავალში ორი ქვეყნის პრეზიდენტების შეხვედრა შედგეს.

„პროდუქტიული სატელეფონო ზარი მქონდა უნგრეთის საგარეო საქმეთა მინისტრ პიტერ სიარტოსთან. ვმუშაობთ იმაზე, რომ ორი ლიდერი ერთმანეთს უახლოეს მომავალში შეხვდეს“, – წერს ერმაკი.