იაპონიამ ფუკუშიმას განადგურებული ატომური ელექტროსადგურიდან წყნარ ოკეანეში გაწმენდილი რადიოაქტიური წყლის გაშვება დაიწყო.

იაპონიის მთავრობამ ხელი გეგმას ხელი 2 წლის წინ მოაწერა, გასულ თვეში კი ატომური ენერგიის საერთაშორისო სააგენტოდან თანხმობა მიიღო და რადიოაქტიური წყლის გაშვება დღეიდან დაიწყო.

იაპონიის მთავრობის ქმედების საპასუხოდ, ჩინეთმა იაპონიიდან ყველა სახის ზღვის პროდუქტების იმპორტზე აკრძალვა დააწესა.

“ჩინეთი ძალიან შეშფოთებულია რადიოაქტიური დაბინძურების რისკის გამო, რომელიც იაპონურმა საკვებმა და სოფლის მეურნეობის პროდუქტებმა შეიძლება გამოიწვიოს”, – ნათქვამია ჩინეთის საბაჟო ბიუროს განცხადებაში.

იაპონიამ ჩინეთს წყლის პროდუქტების იმპორტზე დაწესებული აკრძალვის დაუყოვნებლივ გაუქმება მოსთხოვა და მოუწოდა, წყლის გამოყოფის გავლენის შესახებ მეცნიერებაზე დაფუძნებით იმსჯელოს.

აღსანიშნავია, რომ 2022 წელს იაპონიამ ჩინეთში 600 მილიონი აშშ დოლარის ღირებულების ზღვის პროდუქტების ექსპორტი განახორციელა, რაც ჩინეთს იაპონიის უდიდეს საექსპორტო ბაზრად აქცევს, მეორე ადგილზეა ჰონკონგი.

ფუკუშიმას დაიჩის ქარხანა 2011 წლის მარტში მას შემდეგ განადგურდა, რაც 9 მაგნიტუდის მიწისძვრამ ცუნამის ძლიერი ტალღები წარმოქმნა და სამ რეაქტორში დნობა გამოიწვია.

წყნარ ოკეანეში, პირველ ეტაპზე, 7 800 კუბური მეტრი გაწმენდილი რადიოაქტიური წყლის გაშვება განხორციელდება და პროცესი, დაახლოებით, 17 დღის განმავლობაში გაგრძელდება.

TEPCO-ის (ტოკიოს ელექტროენერგიის კომპანია) ანალიზის შდეგების მიხედვით, ყოველ ლიტრ წყალში ტრიტიუმის კონცენტრაცია, დაახლოებით, 63 ბეკერელია (რადიოაქტიურობის ერთეული), რაც ჯანდაცვის მსოფლიო ორგანიზაციის მიერ სასმელ წყალზე დაწესებული ლიმიტზე (10 000 ბეკერელი ლიტრზე) ნაკლებია. განცხადება გაავრცელა ატომური ენერგიის საერთაშორისო სააგენტომაც, რომელშიც ნათქვამია, რომ მის მიერ ადგილზე ჩატარებულმა დამოუკიდებელმა ანალიზმა დაადასტურა, რომ ტრიტიუმის კონცენტრაცია ზღვარზე ბევრად დაბალია. მიუხედავად ამისა, იაპონიის მთავრობის გეგმას ეწინააღმდეგებიან იაპონელი მეთევზეების ჯგუფები, რომლებიც წლების განმავლობაში ზარალდებიან რადიაციის შიშით გამოწვეული რეპუტაციული ზიანისგან.

იაპონიის გარემოს დაცვის მინისტრმა განაცხადა, რომ წყლის გაშვების ზონაში მუდმივ მონიტორინგს ჩაატარებენ და შედეგებს ყოველკვირეულად გამოაქვეყნებენ. რადიოაქტიური წყლის გაშვებას, საერთო ჯამში, დაახლოებით 30 წელი დასჭირდება.

გერმანიის საგარეო საქმეთა მინისტრი ანალენა ბერბოკი კერძო სამხედრო კომპანია „ვაგნერის“ ხელმძღვანელის ევგენი პრიგოჟინის სავარაუდო გარდაცვალებას გამოეხმაურა.

„უნდა გვეშინოდეს, რომ რუსეთი, „ვაგნერით“ თუ მის გარეშე, გააგრძელებს თავის ცინიკურ თამაშს არა მხოლოდ უკრაინაში, არამედ უპირველეს ყოვლისა აფრიკაში. არ უნდა დაგვავიწყდეს, რომ პრიგოჟინი და „ვაგნერი“ პასუხისმგებელნი აფრიკელი და უკრაინელი ხალხის წინაშე“, – აცხადებს ბერბოკი.

23 აგვისტოს ცნობილი გახდა, რომ რუსეთში, ტვერის ოლქში ბიზნეს-ჯეტი ჩამოვარდა, რომლის მგზავრების ჩამონათვალშიც, ევგენი პრიგოჟინი იყო. ამასთან, როგორც რუსული მედია წერს, ბორტზე შესაძლოა ყოფილიყო „ვაგნერის“ მეთაური დმიტრი უტკინი, რომელსაც პრიგოჟინის „მარჯვენა ხელს“ უწოდებენ და ასევე, „ვაგნერის“ სხვა მეთაურებიც.

როგორც რუსული გამოცემა TASS რუსეთის ფედერაციის საგანგებო სიტუაციების სამინისტროზე დაყრდნობით წერს, წინასწარი ინფორმაციით, ბორტზე 3 პილოტი და 7 მგზავრი იმყოფებოდა და ათივე მათგანი დაღუპულია.

უკრაინის პრეზიდენტი ვოლოდიმირ ზელენსკი უკრაინელებს დამოუკიდებლობის დღეს ულოცავს.

„ძლიერი ადამიანების დღესასწაული, ღირსეული ხალხის დღესასწაული“, – აღნიშნავს ზელენსკი უკრაინის პრეზიდენტის ადმინისტრაციის მიერ გავრცელებულ განცხადებაში.

უკრაინის პრეზიდენტმა შეაქო ყველა მოქალაქის წვლილი ამ ომში და განაცხადა, რომ „დიდ ომში არ არსებობს პატარა საქმეები“.

მან მადლობა გადაუხადა ყველა უკრაინელს ფრონტის ხაზზე, მოხალისეებთან და მათ უკან მყოფ ოჯახებთან ერთად; ასევე მედიკოსებს, რომელთაც ათასობით სიცოცხლე გადაარჩინეს.

აშშ-ის ყოფილი პრეზიდენტი დონალდ ტრამპი მიიჩნევს, რომ თეთრი სახლის ლიდერს, ჯო ბაიდენს უკრაინაში მიმდინარე ომის გამკლავებასთან დაკავშირებით საკმარისი კომპეტენცია არ გააჩნია.

ყოფილმა პრეზიდენტმა კიდევ ერთხელ აღნიშნა, რომ მისი პრეზიდენტობის შემთხვევაში მსგავსი კრიზისის წინაშე საერთაშორისო საზოგადოება საერთოდ არ დადგებოდა.