Home Blog Page 1692

“ნოემბერში გრიპის ვირუსის ცირკულირება ქვეყანაში 3-4-ჯერ ნაკლებია, ვიდრე ეს იყო 2022-2023 წლის სეზონზე” – ივანე ჩხაიძე

იმუნიზაციის ტექნიკურ მრჩეველთა ეროვნული ჯგუფის ხელმძღვანელის, იაშვილის სახელობის ბავშვთა ცენტრალური საავადმყოფოს სამედიცინო დირექტორის, ივანე ჩხაიძეს განცხადებით, ახლა, ნოემბერში გრიპის ვირუსის ცირკულირება ქვეყანაში 3-4-ჯერ ნაკლებია, ვიდრე ეს იყო 2022-2023 წლის სეზონზე.

მისივე თქმით, ეს იმას არ ნიშნავს, რომ წელს გრიპის შემთხვევები არ დაიწყებს მატებას. ჩხაიძის ვარაუდით, შემთხვევათა მატების პიკი გადაიწევს.

როგორც მან აღნიშნა, გრიპის ვირუსის მატება მოსალოდნელია დეკემბერ-იანვარ-თებერვლის განმავლობაში.

„47-ე კვირა გამოირჩევა იმ თვალსაზრისით, რომ აღარ არის გრიპის ვირუსი. ლაბორატორიულად დადასტურებულ შემთხვევებს შორის წამყვანი არც გრიპი, არც კორონავირუსი არ არის. ბოლო კვირის განმავლობაში ძირითადად ქვეყანაში ცირკულირებდა რინოვირუსი, პარაგრიპის ვირუსი, ე.წ. ძველი კორონავირუსი, რომელსაც ძირითადად გაციების მსგავსი სიმპტომების გამოწვევა შეუძლია. შესაბამისად, ბოლო კვირა გამოირჩეოდა შედარებით მსუბუქად მიმდინარე ვირუსებით სიჭარბით, განსხვავებით მაგალითად, წინა ორი კვირისაგან, როდესაც გრიპის ვირუსიც ფიქსირდებოდა, ორი კვირის წინ კორონავირუსის ხვედრითი წილი დადასტურებულ შემთხვევებში 3%-ი იყო. ეს იმას ნიშნავს, რომ წლევანდელი, 2023-2024 წლის სეზონი გარკვეულწილად განსხვავდება 2022-2023 წლის სეზონისაგან, პირველ რიგში, იმით, რომ ძალიან ცოტაა გრიპის ვირუსის შემთხვევები. მაგალითად: თუ ახლა 2023-2024 წლის განმავლობაში ინციდენტობა, ანუ 100 000-ზე დადასტურებული შემთხვევების რაოდენობა იყო 12 000 ათასი ბოლო კვირას, ანალოგიურ პერიოდში, ერთი წლით ადრე, ამ შემთხვევების რაოდენობა 47 000-ს აღწევდა, ანუ 3-4-ჯერ ნაკლებია ახლა, ნოემბერში გრიპის ვირუსის ცირკულირება, ვიდრე ეს იყო 2022-2023 წლის სეზონზე. რა თქმა უნდა, ეს იმას არ ნიშნავს, რომ წელს გრიპის შემთხვევები არ დაიწყებს მატებას, უბრალოდ, სავარაუდოდ, გადაიწევს შემთხვევათა მატების პიკი და ალბათ, აციების კვალდაკვალ, რომელიც საქართველოში მოსალოდნელია ამ დღეების მანძილზე გრიპის და გრიპის მაგვარი დაავადების შემთხვევებიც მოიმატებს, დეკემბერი და იანვარი, ისე, როგორც გვქონდა სტატისტიკის მიხედვით ბოლო ათწლეულების განმავლობაში იქნება გრიპის შემთხვევების უფრო მეტი რაოდენობა და მაქსიმუმს, ალბათ, სწორედ ამ პერიოდში ველოდებით (დეკემბერ-იანვარ-თებერვლის განმავლობაში)“,- აღნიშნა ჩხაიძემ.

გარდა ამისა, მან ქვეყანაში არსებულ სეზონური გრიპის საწინააღმდეგო ვაქცინაზეც ისაუბრა და აღნიშნა, რომ საქართველოში რისკი ჯგუფებისთვის გრიპის საწინააღმდეგო ვაქცინის 200 000 დოზა არის შემოტანილი.

„ჩემთვის სეზონური გრიპის საწინააღმდეგო ვაქცინით აცრილთა ზუსტი რაოდენობა ცნობილი არ არის, მაგრამ საქართველოში 200 000 დოზა არის შემოტანილი რისკჯგუფებისთვის. ჩვენ ყოველთვის ვამბობთ, რომ აცრებისთვის იდეალური პერიოდი ოქტომბერი და ნოემბრის დასაწყისია, თუმცა ახლა, თუ გავითვალისწინებთ გრიპის შემთხვევები ძალიან ცოტაა, ნოემბრის ბოლოსაც ვაქცინაციის ჩატარება ითვლება უკვე დროულად, ვინაიდან ვაქცინაციის ჩატარებიდან ორი კვირის შემდეგ იწყება მაქსიმალური დაცულობა ორგანიზმის, ეს ორი კვირა, საბედნიეროდ, ახლა გვაქვს. ყველა იმ ადამიანს, ვინც რისკი ჯგუფს მიეკუთვნება, ეს არის 60 წელს გადაცილებული მოსახლეობა, დიაბეტის მქონე, ქრონიკული დაავადების მქონე პირები, ორსულები, კიდევ ერთხელ უნდა შევახსენოთ, რომ გრიპის საწინააღმდეგო ვაქცინაცია არის ერთადერთი რეალური შესაძლებლობა გრიპის პრევენციის თვალსაზრისით.

ქვეყანაში ორი ტიპის ვაქცინა არის შემოსული: ფრანგული და ჰოლანდიური, რომელიმეს სანდოობაში ეჭვის შეტანა, მსუბუქად რომ ვთქვათ, არის ნაკლები ინფორმირებულობა, ვინაიდან ორივეს ვაქცინა ერთი ტიპის არის, ოთხი ტიპის გრიპის ვირუსის წინააღმდეგ გვიცავს. ორივე ვაქცინა ევროპული სერტიფიკატის მქონეა, ორივე ვაქცინა რეკომენდებულია სხვადასხვა საერთაშორისო სტრუქტურების, მათ შორის ჯანმრთელობის მსოფლიო ორგანიზაციის მიერ. ასე რომ, ასეთი ემოციური შეფასება, რომ რახან უფასოა, არის ნაკლებად ხარისხიანი, აბსოლუტურად არასწორი ინფორმაციაა“, – განაცხადა ივანე ჩხაიძემ.

“თვალსა და ხელს შუა გვეცლება ისრაელ-ჰამასის ომის ძირითადად პროგნოზირებული მიზანი – ირანი” – დავით ქართველიშვილი

ყველაზე მნიშვნელოვანია ეს „მეტამორფოზი“ – ირანის მიმართ ომის გაჩაღების პერსპექტივიდან დაწყებული, ირანის როგორც რეგიონული „მშვიდობისმყოფელის“ დაჯილდოებით დასრულებული, – ამის შესახებ „ხალხის ძალის“ წევრი, ანალიტიკოსი დავით ქართველიშვილი სოციალურ ქსელში წერს.

ქართველიშვილი ახლო აღმოსავლეთში მიმდინარე პროცესებზე ამერიკის გავლენაზე წერს და აცხადებს, რომ ამერიკის მხრიდან თხოვნის შემდეგ ისრაელმა ლიბანში „ჰესბოლას“ ლოკაციებზე თავდასხმაც კი შეწყვიტა.

„დასასრულს უახლოვდება „ჰამას-ისრაელის“ ომის მეორე თვე. მით უფრო რთულია იმის პროგნოზირება, რით დასრულდება იგი. არანაკლებად ძნელია იმის გაანალიზებაც, რამ (ვინ) გამოიწვია ეს ომი. თუ პირველი დღეებიდან ომის გაჩაღების ერთ-ერთ მიზეზად სახელდებოდა მასში ირანის ჩათრევა, აქედან გამომდინარე რეგიონული აყირავების შედეგებით – ამჟამად ჩვენს თვალწინ ვითარდება სულ სხვა სურათი.

ორი დღის წინ გამომცემლობა SHARQ Analytics-მა ირანის ცენტრალური ბანკის ხელმძღვანელის მოჰამად რეზე ფარზინის ინფორმაციაზე დაყრდნობით გვაცნობა, რომ „ყადაღა მოეხსნა“ კიდევ ერთ სოლიდურ დასანქცირებულ ირანულ თანხას. ეს არის უკვე მეორე მსგავსი გადაწყვეტილება. მანამდე 6 მილიარდი დოლარი დაუბრუნდა ირანს სამხრეთ კორეიდან, კატარის შუამდგომლობით ირანელი და ამერიკელი პატიმრების გაცვლითი პროგრამის სანაცვლოდ.

ეს ინფორმაცია მით უმეტეს ცოტა ალოგიკურად ჟღერს ჯერ კიდევ თვე ნახევრის წინ ამერიკელების მიერ ისრაელ-ირანის შეტაკების ლამის პროვოცირების ფონზე. ამის შესახებ ნაწილობრივ პასუხს გვაწვდის ირანის სახელისუფლებო საინფორმაციო სააგენტო IRNA: 22-23 ნოემბერს ლიბანში შედგა ირანის საგარეო მინისტრ ჰოსეინ ამირ აბდოლახიანის შეხვედრა “ჰეზბოლას” ლიდერ ჰასან ნასრალასთან.

მოლაპარაკებების შედეგები გასაიდუმლოებულია, თუმცა ფაქტი ჯიუტია – ისრაელსა და “ჰეზბოლას” შორის მას შემდეგ შეტაკებებს ადგილი აღარ აქვს. გარდა ამისა, გუშინწინ ისრაელის მე-13 ტელეარხმა გააჟღერა აშშ-ს პრეზიდენტის თხოვნა ისრაელის პრემიერის მიმართ “თავი შეიკავონ სამხრეთ ლიბანში განთავსებული „ჰესბოლას“ ობიექტებზე თავდასხმისაგან„. თავის მხრივ ლიბანის მედიასაშუალებებიც ადასტურებენ – უკანასკნელ თვე ნახევარში პირველად სამხრეთ ლიბანში მშვიდობა და სიწყნარეა, ადგილობრივი შიიტური და ქრისტიანული სოფლების მოსახლეობა დაუბრუნდა თავის კერებს.

ამ ინფორმაციაში ყველაზე მნიშვნელოვანია ეს „მეტამორფოზი“ – ირანის მიმართ ომის გაჩაღების პერსპექტივიდან დაწყებული, ირანის როგორც რეგიონული „მშვიდობისმყოფელის“ დაჯილდოებით დასრულებული. ასე რომ, თვალსა და ხელს შუა გვეცლება ამ ომის ძირითადად პროგნოზირებული მიზანი – ირანი. რაც შეეხება ირანულ სანქცირებულ ფინანსებზე „ყადაღის“ მოხსნას – პირველ რიგში ეს ფაქტი ჯო ბაიდენის მკაცრი კრიტიკის საგანი გახდა, როგორც რესპუბლიკელების, ასევე დემოკრატების მხრიდან“, – წერს ქართველიშვილი.

გომი-საჩხერე-ჭიათურა-ზესტაფონის გზის ცალკეულ მონაკვეთზე მისაბმელიანი და ნახევრადმისაბმელიანი ავტოტრანსპორტის მოძრაობა აკრძალულია

ინტენსიური თოვის და დაბალი ტემპერატურის გამო, შიდასახელმწიფოებრივი მნიშვნელობის გომი-საჩხერე-ჭიათურა-ზესტაფონის საავტომობილო გზის კმ1-კმ40 მონაკვეთზე, აკრძალულია მისაბმელიანი და ნახევრადმისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის გადაადგილება თავისუფალია.

ინფორმაციას საავტომობილო გზების დეპარტამენტი ავრცელებს.

მეუღლისა და ორი პირის მიმართ დამამძიმებელ გარემოებებში ჩადენილი განზრახ მკვლელობის მცდელობის  ფაქტებზე, ერთ პირს ბრალდება წარედგინა

საქართველოს პროკურატურამ მეუღლისა და ორი პირის მიმართ დამამძიმებელ გარემოებებში ჩადენილი განზრახ მკვლელობის მცდელობის და მეუღლის მიმართ იძულების ფაქტებზე, ერთ პირს ბრალდება წარუდგინა.

ინფორმაციას პროკურატურა ავრცელებს.

„შინაგან საქმეთა სამინისტროს მიერ ჩატარებული გამოძიებით დადგინდა, რომ თბილისში, ზღვის უბნის დასახლებაში, უცხო ქვეყნის მოქალაქე ქ.ვ.-მ მეუღლეს ლ.წ.-ს, ძალის გამოყენებით მის ავტომანქანაში ჩაჯდომა აიძულა. აღნიშნულ ფაქტს გ.მ. და ს.ბ. შეესწრნენ, რომლებიც დაზარალებულს დაეხმარნენ, რის გამოც, ბრალდებული მოკვლის მიზნით, მეუღლისა და მათი მიმართულებით, ავტომანქანით სწრაფი სიჩქარით გაემართა. ბრალდებულის მეუღლემ გადახტომა და გაქცევა მოახერხა, ხოლო გ.მ.-მ და ს.ბ.-მ ავტომანქანის დაჯახების შედეგად, ჯანმრთელობის მძიმე დაზიანებები მიიღეს, რის შემდგომაც ბრალდებული მეუღლეს გამოეკიდა და ძირს დაგდებულს ბასრი საგანი რამდენჯერმე მოუქნია, თუმცა ადგილზე შეკრებილმა ადამიანებმა შეძლეს მისთვის ხელის შეშლა, რის გამოც ქ.ვ.-მ განზრახვა სისრულეში ვერ მოიყვანა.

სამართალდამცველებმა ბრალდებული შემთხვევის ადგილზე დააკავეს. მას ბრალდება საქართველოს სისხლის სამართლის კოდექსის 11 პრიმა, 150-ე მუხლის პირველი ნაწილით (გენდერის ნიშნით შეუწყნარებლობის მოტივით, ოჯახის ერთი წევრის მიერ ოჯახის სხვა წევრის მიმართ იძულება) და 11 პრიმა, 19, 109-ე მუხლის „კ“ და ,,ლ“ ქვეპუნქტებით (გენდერის ნიშნით შეუწყნარებლობის მოტივით, ოჯახის ერთი წევრის მიერ ოჯახის სხვა წევრის და ორი პირის განზრახ მკვლელობის მცდელობა) წარედგინა, რაც სასჯელის სახედ და ზომად 16-დან 20 წლამდე თავისუფლების აღკვეთას ითვალისწინებს.

პროკურატურის შუამდგომლობის საფუძველზე, თბილისის საქალაქო სასამართლომ ბრალდებულს აღკვეთის ღონისძიების სახით პატიმრობა უკვე შეუფარდა“,- ნათქვამია ინფორმაციაში.

„სიგიჟე და ბოდვაა იმის ფიქრი, რომ არჩევნებში ჯო ბაიდენი დონალდ ტრამპზე გაიმარჯვებს“

აშშ-ის გაზეთ The Hill-ში, რომელიც ამერიკელი კანონმდებლების საქმიანობას აშუქებს, გამოაქვეყნა სტატია სათაურით „სიგიჟე და ბოდვაა იმის ფიქრი, რომ არჩევნებში ჯო ბაიდენი დონალდ ტრამპზე გაიმარჯვებს“ (ავტორი – დენიელ თომას-სტეფი).

პუბლიკაცია ეხება აშშ-ის პრეზიდენტის თანაპარტიელის, დემოკრატი-კონგრესმენის დინ ფილიპის განცხადებას, რომლის თანახმად, სამწუხაროდ, ჯო ბაიდენმა ამერიკელების ნდობა დაკარგა და, როგორც ჩანს, დიდი ალბათობით, 2024 წლის ნოემბრის საპრეზიდენტო არჩევნებში რესპუბლიკელ დონალდ ტრამპზე ვერ გაიმარჯვებს. კანონმდებლის აზრით, სიგიჟე იქნებოდა დღეს ვინმემ იმაზე იფიქროს, რომ ჯო ბაიდენი არჩევნებში დონალდ ტრამპს დაამარცხებს

„მე, როგორც დემოკრატიული პარტიის ხელმძღვანელობის წევრი წარმომადგენელთა პალატაში, ყოველთვის მხარს ვუჭერდი ჯო ბაიდენს. მე მას აგიტაციას ვუწევდი, ხმას ვაძლევდი. მე პრეზიდენტს პატივს ვცემ. მაგრამ განა ვინმეს, ამ მონაცემების წაკითხვისას, შეუძლია ისეთი დასკვნა გააკეთოს, რომ ჯო ბაიდენს დონალდ ტრამპზე გამარჯვების ძალა შესწევს? ეს ხომ სიგიჟე იქნებოდა“, – წერს დინ ფილიპსი X ქსელში (ყოფილ Twitter-ში).

კონგრესმენი იმოწმებს გაზეთ Politico-ში დაბეჭდილ ანალიტიკური სტატიის მონაცემებს, რომელთა თანახმად, აშშ-ში ამას წინათ ჩატარებული 13 სოციოლოგიური გამოკითხვიდან 11-მა ჯო ბაიდენის რეიტინგის დაცემა დაადასტურა.

სხვათა შორის, დინ ფილიპმა განაცხადა, რომ მას განზრახული აქვს საკუთარი თავი 2024 წლის საპრეზიდენტო არჩევნებში დემოკრატიული პარტიის კანდიდატად დაასახელოს, რისთვისაც იგი თანაპარტიელებმა მკვეთრად გააკრიტიკეს.

თავისი გადაწყვეტილების არგუმენტირებისას, დინ ფილიპმა ხაზი გაუსვა ჯო ბაიდენის ისტორიულად დაბალ რეიტინგს და აღნიშნა, რომ ჯო ბაიდენის მდგომარეობა ჯიმი კარტერის მდგომარეობას ჰგავს: 1980 წლის არჩევნებში თეთრი სახლის იმდროინდელი მეთაური მსგავს გარემობებს წააწყდა და უარი თქვა პრეზიდენტობის კანდიდატობაზე.

წყარო

ჟურნალისტის კონსპექტს პარტიის თავმჯდომარე ხელს აწერდეს, მსგავსი რამ თუ მენახოს, რა საცოდაობაა -ეკა ხერხეულიძე

მსგავსი რამ თუ მენახოს, ჟურნალისტის კონსპექტს თავმჯდომარე ხელს აწერდეს, რა საცოდაობაა, – ამის შესახებ „ნაციონალური მოძრაობის“ წევრი ეკა ხერხეულიძე სოციალურ ქსელში წერს.

„ნაციონალური მოძრაობის“ თავმჯდომარემ, ლევან ხაბეიშვილმა ფურცელს, რომელზეც ეწერა, რომ ნიკა მელია პარტიის წევრი აღარ არის, გუშინ პირდაპირ ეთერში მოაწერა ხელი და განაცხადა, რომ ნიკა მელია არ წარმოადგენს „ნაციონალურ მოძრაობას“, აღარ არის პარტიის წევრი.

მისივე თქმით, თუ ნიკა მელია რიტორიკას შეცვლის, შეუძლია, დაწეროს განცხადება პარტიაში გაწევრიანებაზე და მას ხელმეორედ მიიღებენ.

თიბისის ბიზნეს დაჯილდოებაში გამარჯვების შემდეგ რესტორანმა „სადგურმა“ ბიზნესი გააფართოვა

ლუდის ბაღი და რესტორანი “სადგური“, რომელიც ძველ გერმანულ სოფელ ასურეთში მდებარეობს,  თიბისის ბიზნეს დაჯილდოების 2022 წლის გამარჯვებულია ნომინაციაში „რეგიონის  განვითარებისთვის“.  აღებული ჯილდოს დახმარებით კომპანიამ რესტორნის ტერიტორიაზე არსებული 300 კვმ დარბაზისთვის აპარატურა შეიძინა, რითაც თავისი საქმიანობა კიდევ უფრო გააფართოვა.

კომპანიის ისტორიასა და ამ ისტორიით სოფელში დაწყებულ ახალ ცხოვრებაზე „სადგურის“ დამფუძნებელი, გიორგი ბარათაშვილი გვიამბობს:

„2016 წელს, როცა პირველად მოვხვდი ძველ გერმანულ სოფელ ასურეთში, ძალიან მომხიბლა მისმა არქიტექტურამ და გამორჩეულმა, სრულიად უცხო განწყობამ. მივხვდი, რომ ამ ადგილს, თავისი ისტორიით, უნიკალური ეთნოგრაფიითა და კულტურით, განსაკუთრებული ტურისტული პოტენციალი ჰქონდა.

აქ თითქმის ხელუხლებლადაა შემორჩენილი გერმანელების მიერ 19-საუკუნეში აშენებული სახლები, ინფრასტრუქტურა, ღვინისა და გასტრონომიული კულტურა. სწორედ ამიტომ, გადავწყვიტეთ ასურეთში შეგვეძინა ფართი და დაგვეწყო გასტრონომიული ბიზნესი.

2020 წელს შევისყიდეთ გერმანელების მიერ 1933 წელს აშენებული სამანქანო და სატრაქტორო სადგურის შენობა თავისი ეზოთი და ადმინისტრაციული ნაგებობით და დავიწყეთ ბიზნესის დაგეგმვა.

მოვახდინეთ შენობის მთლიანი რეკონსტრუქცია და 2022 წელს გავხსენით ლუდის ბაღი, ეგრეთწოდებული გერმანული „ბიერგართენი“ და რესტორანი, რომელსაც „სადგური“ დავარქვით.

გერმანელების წასვლის შემდეგ ამ ტერიტორიაზე ქართველები, ძირითადად რაჭველები დასახლდნენ. ასე შეიქმნა უნიკალური, რაჭულ-გერმანული კულინარიული და ღვინის კულტურა.

ადგილობრივებისგან მოვიძიეთ ძველი გერმანული რეცეპტები, რომლებიც საინტერესო იმითაა, რომ ეს გერმანული კერძები რაჭული კულინარიული ელემენტებითაა გამდიდრებული. ჩვენი მენიუ ძირითადად ასეთი კერძებისგან შედგება. აღვადგინეთ ასევე გერმანული ძეხვეულის კულტურა, ნედლი სოსისები, რომლებსაც ადგილობრივები გვიმზადებენ.

განსაკუთრებული ადგილი ამ მენიუში რა თქმა უნდა, ღვინოს უკავია, რომელიც ასევე გერმანული მემკვიდრეობის ძალიან მნიშვნელოვანი ნაწილია. გერმანელებს აქ მოჰყავდათ ყურძნის  უნიკალური ჯიში, „შალა“. შემორჩენილია მათ მიერ საგანგებოდ აშენებული მარნები და სარდაფები თავისი კასრებით, ჩანებით, ტექნოლოგიით. რაჭველებმა ეს მემკვიდრეობა თავისებურად გააგრძელეს, არ შეუწყვეტიათ ღვინის წარმოება. სულ მალე კი ამ საქმეს ჩვენც მივყოფთ ხელს და ჩამოვასხამთ  ჩვენს ღვინოს – „ასურეთულ შალას“, „სადგურის“ ლოგოთი.

იმ დროს, როცა სადგური გავხსენით, სოფელში არ არსებობდა სხვა საკვები ობიექტი. თუმცა სულ რამდენიმე თვეში მივხვდით, რომ ჩვენი აქ დამკვიდრების შემდეგ ასურეთში ცხოვრება სულ სხვანაირად აჩქეფდა.  ჩამოდიოდა და გვსტუმრობდა უამრავი ტურისტი, მოთხოვნა ძალიან გაიზარდა, ამიტომ რესტორანს დავამატეთ კიდევ ერთი ღია სივრცე და ასევე დახურული სივრცე კორპორაციული და კერძო ღონისძიებებისთვის.

მალევე სოფელში გაჩნდა სხვა საკვები ობიექტებიც, სასტუმროც, შენდება ცხენების ფერმა, აიწია უძრავი ქონების ფასმაც. დავასაქმეთ ადგილობრივი მოსახლეობა, მათგან ვყიდულობთ ნედლეულსაც. ეს ყველაფერი, ცხადია,  დადებითად აისახა სოფლის ეკონომიკაზეც.

სწორედ ამიტომ, როცა 2022 წელს გამოცხადდა ბიზნეს დაჯილდოება, განაცხადი შევიტანეთ ნომინაციაში „რეგიონის განვითარებისთვის“.

ჯილდოს დახმარებით ჩვენი დარბაზისთვის შევიძინეთ  საპრეზენტაციო და მუსიკალური გაფორმებისთვის საჭირო აპარატურა, რომლის წყალობითაც დღეს აქ უკვე  შესაძლებელია სრულყოფილი ღონისძიებების ჩატარება, იქნება ეს გამოფენა, პრეზენტაცია, ქორწილი, კორპორაციული წვეულება ტუ ფესტივალი. რამდენიმე ასეთი ღონისძიება უკვე შედგა.

წელს მოვაწყვეთ გერმანული ფესტივალიც „ოქტობერფესტი“, რომელსაც ჩვენ „ოქროსფერფესტი“ დავარქვით. მთელი ფესტივალის განმავლობაში, ამ აპარატურის დახმარებით, უკრავდა ცოცხალი მუსიკა.

ამ ფესტივალით საფუძველი ჩაეყარა ახალ, საფესტივალო მიმართულებას, რომელიც ყოველწლიურად კიდევ უფრო დაიხვეწება და  მასშტაბს შეიძენს. ეს ამ აპარატურის გარეშე ვერ მოხდებოდა.

ბიზნეს დაჯილდოებაში გამარჯვება ჩვენნაირი დამწყები ბიზნესებისთვის იმის დასტურია, რომ სწორ გზაზე ვდგავართ. ამ გამარჯვების შემდეგ გაგვიცნო კიდევ უფრო მეტმა ადამიანმა, სამჯერ გაიზარდა სტუმრების რაოდენობა და შესაბამისად გაიზარდა ჩვენი პასუხისმგებლობაც – კიდევ უფრო გავლამაზდეთ, დავხვეწოთ ჩვენი რესტორანი და უფრო მეტი ადამიანი დავაინტერესოთ ამ რეგიონით, რომელშიც უკვე სულ სხვანაირად ჩქეფს სიცოცხლე.“

R

“მივმართავთ „ოცნების“ ბოსებს, მოგვაწოდონ ინფორმაცია სააკაშვილის სტატუსზე” – ბექა ლილუაშვილი

მივმართავთ „ოცნების“ ბოსებს, მოგვაწოდონ ინფორმაცია სააკაშვილის სტატუსზე – თუ მის ჯანმრთელობას საფრთხე არ ემუქრება, რატომ არ არის გადაყვანილი საპატიმროში?! – ამის შესახებ პარტია „საქართველოსთვის“ წევრმა ბექა ლილუაშვილმა პარლამენტში გამართულ ბრიფინგზე განაცხადა.

ლილუაშვილი აცხადებს, რომ “ქართული ოცნება” და “ნაციონალური მოძრაობა” თანამშრომლობს და არ გამორიცხავს, მიხეილ სააკაშვილი ციხიდანაც გამოუშვან.

ამასთან, ლილუაშვილი აცხადებს, რომ რუსთავის საკრებულოში “არქის” პროექტის დამტკიცება “ნაციონალური მოძრაობის” მხარდაჭერით კიდევ ერთი მაგალითია მათი თანამშრომლობის და საერთო ბიზნესინტერესების.

“მივმართავთ “ოცნების” ბოსებს, გაგვაგებინონ მიხეილ სააკაშვილის სტატუსთან დაკავშირებული ინფორმაცია, საერთოდ მოგვაწოდონ ინფორმაცია მისი ჯანმრთელობის მდგომარეობაზე, რადგან თუ მის ჯანმრთელობას საფრთხე არ ემუქრება, რატომ არ არის გადაყვანილი საპატიმრო დაწესებულებაში?! მთელი ქვეყანა ხედავს, როგორ ნებადართულ საარჩევნო კამპანიას ახორციელებს სააკაშვილი სასამართლოების საფარქვეშ. გარდა ამისა, არავის უკვირს რეკლამირება, რასაც სააკაშვილს უწევს კობახიძე, მდინარაძე. გაგვაგებინონ, რა ფორმატი აქვთ თანამშრომლობის და რას ითვალისწინებს ეს ფორმატი დამატებით, გარდა ბიზნესში და პოლიტიკაში არაერთგზის თანამშრომლობისა, გვითხრან რას ითვალისწინებს ეს შეთანხმება “ნაცმოძრაობასთან”, სააკაშვილთან მიმართებით. არ გამიკვირდება ახალი წელი მიულოცოს ამ ადამიანმა მოქალაქეებს პირდაპირი ეთერით საავადმყოფოდან, ამის ნებაც მისცენ და არც ის გამიკვირდება, რომ 2024 წლის არჩევნების შიშმა “ქოცებს” გამოაშვებინოს ეს კაცი ციხიდან. გვითხრან რას ითვალისწინებს კიდევ მათი თანამშრომლობა კეზერაშვილთან “ქოლ -ცენტების” საქმეში, პარლამენტში თუ სხვადასხვა მუნიციპალიტეტის საკრებულოებში. გასაგებია, ერთად ფულის კეთება მათ უყვართ და აგვიხსნან, კოჰაბიტაციის პიკში ეს ითვალისწინებს თუ არა სააკაშვილის ციხიდან გამოშვებას მომავალში.

ის, რაც რუსთავის საკრებულოში მოხდა, მკაფიოს ხდის მათ კოჰაბიტაციას. “არქის” სამშენებლო პროექტის დამტკიცება “ქართული ოცნების” მიერ “ნაცმოძრაობის” მხარდაჭერით არის კლასიკური მაგალითი ფულის შოვნაზე დახამების და დარწმუნებული ვარ, ეს პროცესები განპირობებული იყო იმით, რომ მეტი დაეფასებინა ფულად განზომილებაში “ნაცების” წარმომადგენლებს ამ გადაწყვეტილების მიღება და ჩახტომოდნენ წილში “ოცნების” კორუფციულ გარიგებას. ესაა კლასიკური მაგალითი როგორ მიიღეს ერთობლივად გადაწყვეტილება რუსთაველების ხარჯზე და მათი ქალაქის იერსახის ხარჯზე “ოცნებამ” და “ნაცმოძრაობამ”. როგორც ჩანს “ქოლ -ცენტრების” ფულთან ერთად დეველოპერული სექტორიდან მიღებული ფული სჭირდებათ არჩევნების დასაფინანსებლად “ოცნების” მხარეს,”- განაცხადა ლილუაშვილმა.

“არსებობს დიდი რისკი იმისა, რომ ვოლოდიმირ ზელენსკი ყურდღების მიღმა დარჩეს“ – რას წერს The Globe and Mail-ი

კანადის გაზეთ The Globe and Mail-ში გამოქვეყნებულია სტატია სათაურით „უკრაინის ომისაგან დასავლეთის დაღლის გამო არსებობს დიდი რისკი იმისა, რომ ვოლოდიმირ ზელენსკი ყურდღების მიღმა დარჩეს“ (ავტორი – კონრად იაკაბუსკი).

გთვაზობთ პუბლიკაციის ტექსტს მცირე შემოკლებით:

გასულ კვირას აშშ-ის თავდაცვის მინისტრმა ლოიდ ოსტინმა კიევში მოულოდნელი ვიზიტი განახორციელა, რათა უკრაინელები გაემხნევებინა და ეთქვა, რომ ამერიკას და მსოფლიოს უკრაინის ომი ახსოვთ და არ დავიწყებიათ. მისტერ ლოიდი დაბეჯითებით ცდილობდა დაერწმუნებინა პრეზიდენტი ზელენსკი, რომ ამერიკა მას ძველებურად მხარს უჭერს და რომ დახმარებას გააგრძელებს.

გასაგებია თეთრი სახლისა და პენტაგონის ძალისხმევა, მაგრამ იმ პირობებში, როცა უკრაინისათვის განკუთვნილი მნიშვნელოვანი დახმარების პაკეტის დამტკიცება კონგრესში სერიოზულ დაბრკოლებას აწყდება, ხოლო დასავლეთში „უკრაინის ომის გამო დაღლილობა მატულობს“, აშშ-ის თავდაცვის უწყების ხელმძღვანელის სიტყვები რაღაც არადამაჯერებლად ჟღერს.

ისრაელზე „ჰამასის“ თავდასხმის შემდეგ უკრაინის თემატიკა საერთაშორისო პრესის პირველ გვერდზე იშვიათად თუ შუქდება იმდენად, რამდენადაც მთელი მსოფლიოს ყურადღება უკვე ღაზას კონფლიქტს აქვს მონოპოლიზებული. რუსეთის შეჭრა უკრაინაში და „ჰამასის“ ისრაელზე თავდასხმას ერთმანეთთან ბევრი საერთო აქვთ: მათ მობილიზება გაუკეთეს აშშ-ის დაუძინებელ მტრებს – ირანისა და ჩრდილოეთ კორეის ჩათვლით და ეს ხდება ისეთ სიტუაციაში, როცა ამერიკას, ისრაელ-პალესტინის კონფლიქტის გამო, პოლიტიკური ჟანგბადის ნაკლებობა აქვს და სუნთქვა უძნელდება…

ეს კარგი ამბავია ვლადიმერ პუტინისათვის და ცუდი – ვოლოდიმირ ზელენსკისათვის. საკმაოდ ცუდი და არასასიამოვნოა, რომ რუსეთის მიერ ოკუპირებული ტერიტორიების დაბრუნების იმედით დაწყებული კონტრშეტევა, პრაქტიკულად ძალიან მცირე შედეგებით დასრულდა. ვოლოდიმირ ზელენსკის ოდესღაც უდაო ლიდერობა დრეს უკვე საეჭვო ხდება საკუთარი მთავრობისთვისაც კი… თვით პოლონეთიც კი, რომელიც რუსეთის დაუძინებელი მტერია, ისიც კი ყოყმანობს უკრაინისადმი მხარდაჭერაში. სულ ცოტა ხნის წინათ დასავლეთის ბევრი ქვეყნის ლიდერმა, როგორც ჩანს, დაიჯერეს პრეზიდენტ ზელენსკის განცხადება, რომ უკრაინის არმია რუსეთზე გაიმარჯვებდა… ახლა კი დასვლეთის მოთმინების ფიალა ევსება. ისეთი სიტუაციაა, რომ არ ჩანს, ომის სასწორი ვის მხარეზე გადაიხრება. კონფლიქტი ისეთ სახეს იძენს, რომელიც ძალების გამოფიტვისკენაა მიმართული. გაურკვეველი სიტუაცია აყოვნებს ამერიკის დახმარების გარანტიებსა: ვაშინგტონელი პოლიტიკოსები და კანონმდებლები ბოლომდე არ არ არიან დარწმუნებულნი, რომ 61 მილიარდი დოლარის დახმარების ახალი პაკეტი უკრაინის გამარჯვებას უზრუნველყოფს, ამიტომ მათი ყურადღება ისრაელისკენაა მიპყრობილი. უკრაინის ბედი ჯერ-ჯერობით გაურკვეველია.

და რაც კიდევ უფრო უარესია ვოლოდიმირ ზელენსკისათვის, ესაა ვარაუდები აშშ-ის პრეზიდენტად რესპუბლიკელი დონალდ ტრამპის არჩევის თაობაზე 2024 წელს. ამერიკელი რესპუბლიკელები უკრაინელებს და უკრაინის პრეზიდენტს არ სწყალობენ. ამიტომაც ბევრი ექსპერტი ომის საკითხის მოგვარებას გადაუდებლად მიიჩნევს. ზოგიერთები ღიად მოუწოდებენ ვოლოდიმირ ზელენსკის, რომ სანამ დროა და სიტუაცია კიდევ უფრო არ გაუარესებულა, სანამ ვლადიმერ პუტინის თაყვანისმცემელს დონალდ ტრამპს თეთრი სახლის ოვალური კაბინეტის სავარძელი არ დაუკავებია, ისარგებლოს მომენტით და მოლაპარაკება დაიწყოს ცეცხლის შეწყვეტის თაობაზე.

ანუ, როგორც საგარეოპოლიტიკური ექსპერტები რიჩარდ ჰაასი და ჩარლზ კუპჩანი წერენ „ფორინ პოლისში“ (Foreign Policy), „აშშ-მა და მისმა ევროპელმა მოკავშირეებმა კონსულტაციები უნდა დაიწყოს რუსეთთან და თავიანთი შემტევი აცენტი ახლა თავდაცვაზე უნდა გადაიტანონ. რასაკვირველია, კიევი უარს არ იტყვის ტერიტორიული მთლიანობის აღდგენაზე და კრემლის პარსუხიმგებლობაზე აგრესიის გამო, მაგრამ უკრაინამ იმავდროულად უნდა აღიაროს, რომ მისი პრიორიტეტები დროებით იცვლება – რუსეთის მიერ ოკუპირებული ტერიტორიების გათავისუფლების ნაცვლად, კიევი იწყებს იმ ტერიტორიის ეკონომიკურ აღდგენას  (ქვეყნის 80%), რომელსაც ჯერ კიდევ თვითონ აკონტროლებს.

ეს პირველი შემთხვევა არ არის, როცა რიჩარდ ჰაასი და ჩარლზ კუპჩანი ცდილობენ რუსეთი და უკრაინა მოლაპარაკების მაგიდასთან მიიყვანონ. საქმე იმაშია, რომ ისინი ორივე რამდენიმე თვის წინათ შეხვდნენ რუსეთის საგარეო საქმეთა მინისტრს სერგეი ლავროვს დიპლომატიური კომპრომისების მისაღწევად ცეცხლის შეწყვეტის თაობაზე. შესაბამისად, მათი პუბლიკაცია „ფორინ პოლისში“ ყურადღებით იქნა წაკითხული ვაშინგტონის პოლიტიკურ აუდიტორიაში, მათ შორის ჯო ბაიდენის ადმინისტრაციაშიც.

„რეალობა ისეთია, რომ ცხელი საველე ომი დიპლომატიური ომით უნდა შეიცვალოს, ყირიმისა და დონბასის გასათავისუფლებლად. უკრაინამ უნდა გააცნობიეროს, რომ ეს ისეთი ომია, რომელშიც კიევი ვერ გაიმარჯვებს. უფრო უარესი – არის დიდი რისკი იმისა, რომ გავა მცირე დრო და უკრაინა დასავლეთის მხარდაჭერასაც დაკარგავს“.

ეს არგუმენტი, როგორც ჩანს, ეხმიანება იმას, რასაც ბევრი დასავლელი ოფიციალური პირი კერძო საუბრებში აღიარებს, მაგრამ ხმამაღლა და საჯაროდ ვერ ლაპარაკობენ. ვოლოდიმირ ზელენსკი ამას გრძნობს და შეშფოთებულია: როგორც მან თქვა ბრიტანელ საგარეო საქმეთა მინისტრთან – დევიდ კემერონთან გამართულ შეხვედრაზე ამ რამდენიმე დღის წინათ. „ჩვენ ნამდვილად არ გვაწყობს ყურადღების გადატანა [ისრაელზე]“.

მოკლედ, ფსონები უკრაინაში ძველებურად ისევ ისეთი მაღალია, როგორც 21 თვის წინათ, ომის დაწყების დღეებში იყო, მაგრამ რადგანაც ჩიხური სიტუაციის იგნორირება სულ უფრო რთულდება, ხოლო აშშ-ის საპრეზიდენტო არჩევნები სულ უფრო ახლოვდება, თუ ვოლოდიმირ ზელენსკი [რაიმე კომპრომისულ] ნაბიჯს არ გადადგამს რუსეთისაკენ, უეცრად იგი ძალიან მარტო დარჩება.

წყარო

თავმჯდომარედ კი არა, ნაცნობადაც ვერ ვიგუებ -მურთაზ ზოდელავა ლევან ხაბეიშვილზე

ხაბეიშვილმა „ფორმულას“ ეთერში რაც გააკეთა, მაგას ჰქვია საჯაროდ კიკუს პოზაში ჩადგომა, – წერს „ნაციონალური მოძრაობის“ პოლიტიკური საბჭოს ყოფილი წევრი, მურთაზ ზოდელავა სოციალურ ქსელში.

ზოდელავას თქმით, „კვიპროსის კლუბის“ თბილისის საკონსულოდ ქცეულ ტელევიზიაში, ლევან ხაბეიშვილმა გააკეთა ის, რაც ვერ შეძლო ვერც პარტიის ოფისში და ვერც ყრილობაზე.

„ხაბეიშვილმა ახლა ფორმულას ეთერში რაც გააკეთა მაგას ჰქვია საჯაროდ კიკუს პოზაში ჩადგომა. თავმჯდომარედ კი არა ნაცნობადაც ვერ ვიგუებ. პოლიტიკურ სივრცეში რაც ვერ ქნა, ვერც ოფისში, ვერც ყრილობაზე, ის გააკეთა (თუ ვერც გააკეთა, მგონი ისე დაიშალნენ ეგეც ვერ გაარკვიეს) კვიპროსის კლუბის თბილისის საკონსულოდ ქცეულ სატელევიზიო სტუდიაში“, – წერს ზოდელავა Facebook-ზე.

„ნაციონალური მოძრაობის“ თავმჯდომარემ, ლევან ხაბეიშვილმა „ფორმულას“ პირდაპირ ეთერში ხელი მოაწერა ფურცელზე, სადაც ეწერა, რომ ნიკა მელია პარტიის წევრი აღარ არის და განაცხადა, რომ მელია არ წარმოადგენს  “ნაციონალურ მოძრაობას”

https://www.facebook.com/murtaz.zodelava.77/posts/pfbid0VFQvUYbBw3AtyYhWEasC6oqDudAeqMvqqavsAtfBYnGSa9NdArJ9UvHp3xtUspaxl

“აფხაზეთი უფრო დამოუკიდებელია, ვიდრე სომხეთი და საქართველო” – ბჟანია

სოხუმის დე ფაქტო ლიდერი ასლან ბჟანია სომხეთის პრემიერ-მინისტრის ნიკოლ ფაშინიანის განცხადებას გამოეხმაურა, რომელმაც განაცხადა, რომ ცალსახად მხარს უჭერს საქართველოს ერთიანობას და ტერიტორიულ მთლიანობას. ინფორმაციას „ეხო კავკაზა“ ავრცელებს.

„სომხეთის რესპუბლიკის დღევანდელი ხელისუფლება დასავლეთის გავლენის ქვეშ აკეთებს განცხადებებს, რომლებიც აფხაზეთის მიერ აღებულ კურსს ეწინააღმდეგება. აფხაზეთმა აირჩია დამოუკიდებელი ქვეყნის განვითარების კურსი. ბოლო განცხადებაში სომხეთის პრემიერ-მინისტრმა ნიკოლ ფაშინიანმა ცალმხრივად მხარი დაუჭირა საქართველოს ერთიანობას, სუვერენიტეტს, ტერიტორიულ მთლიანობას და დემოკრატიას, რაც აფხაზეთის სუვერენიტეტის ფაქტს ძირეულად ეწინააღმდეგება. ამიტომ, გვსურს შევახსენოთ პრემიერ-მინისტრს ფაშინიანს, რომ აფხაზეთში პატივისცემით ეპყრობიან მთელ სომეხ ხალხს, რომლის ნაწილმა წარსულის ტრაგიკული მოვლენების დროს თავი აფხაზეთს შეაფარა.

დღეს სომხეთის სათვისტომო აფხაზეთის ადგილობრივ და ცენტრალურ ხელისუფლებაშია წარმოდგენილი, სომხურ ენას და კულტურას მხარს უჭერს სახელმწიფო, სომხეთის სამოციქულო ეკლესია თავისუფლად ფუნქციონირებს.

აფხაზეთში მცხოვრებ სომხებს აქვთ ყველაფერი, რაც ნიკოლ ფაშინიანმა ყარაბაღის სომხებისთვის ვერ უზრუნველყო. მის მიერ გატარებული პოლიტიკის შედეგად ამ ადამიანებმა სახელმწიფოს ნგრევა და მშობლიური მიწიდან განდევნა მიიღეს. უფრო მეტიც, ნიკოლ ფაშინიანის პოლიტიკის შედეგად სომხეთის რესპუბლიკის ტერიტორიული მთლიანობაც დაირღვა.

შესაბამისად, ფაქტობრივი მდგომარეობიდან გამომდინარე, ერთიანობის, სუვერენიტეტის,  ტერიტორიული მთლიანობის და დემოკრატიის პრინციპები უფრო აფხაზეთს შეესაბამება, რომელიც დემოკრატიული სახელმწიფოს მთელ ტერიტორიას აკონტროლებს და რომელიც რუსეთის ფედერაციამ და სხვა ქვეყნებმა აღიარეს.

ამასთანავე, არც სომხეთი, არც მისი პრემიერ-მინისტრის მიერ მხარდაჭერილი საქართველო ამ კლასიფიკაციას არ შეესაბამება. მოვუწოდებთ სომხეთის ხელისუფლებას, რომ ინდოქტრინირებულ რიტორიკაზე უარი თქვას და ფაქტობრივ მდგომარეობას შეეგუოს საკუთარი საგარეო პოლიტიკის გატარებისას“, – განაცხადა ასლან ბჟანიამ.

მანამდე ფაშინიანის სიტყვები სოხუმის დე ფაქტო პარლამენტის სომეხმა წევრებმა აშოტ მინასიანმა, გალუსტ ტრაპიზონიანმა და ლევონ გალუსტიანმა გააკრიტიკეს.

როგორი ამინდია მოსალოდნელი დღეს საქართველოში

27 ნოემბერს ქუთაისში +9 გრადუსი და წვიმაა მოსალოდნელი, ღამით კი +3 გრადუსი იქნება. ოზურგეთშიც წვიმიანი დღეა მოსალოდნელი. დღისით +9 გრადუსი დაფიქსირდება, ღამით კი +3. ბათუმშიც წვიმს. დღისით ჰაერი +10 გრადუსამდე გათბება, ხოლო ღამით +4 გრადუსი დაფიქსირდება.

ფოთშიც ნალექია მოსალოდნელი. დღისით +10 გრადუსი დაფიქსირდება, ღამით კი +5 გრადუსია მოსალოდნელი. წვიმიანი დღეა მოსალოდნელი ზუგდიდში, სადაც დღისით ტემპერატურა +7 გრადუსს მიაღწევს, ღამით კი +3 გრადუსია ნავარაუდევი. +9 გრადუსი და ნალექიანი დღეა მოსალოდნელი სოხუმშიც, ღამით +4 გრადუსი დაფიქსირდება.

მესტიაშია თოვლია მოსალოდნელი. დღისით +2 გრადუსი, ღამით კი -9 გრადუსი დაფიქსირდება. ამბროლაურშიც ნალექიანი დღეა მოსალოდნელი, ჰაერი +5 გრადუსამდე გათბება, ღამით კი 0 გრადუსი დაფიქსირდება.

ჭიათურაში დღისით წვიმა და +6 გრადუსია მოსალოდნელი, ღამით კი +0 გრადუსი. ახალციხეშიც წვიმიანი დღეა მოსალოდნელი. დღისით ჰაერი +5 გრადუსამდე გათბება, ღამით კი ტემპერატურა -5 გრადუსამდე დაიწევს.

ბორჯომშიც ნალექია მოსალოდნელი. დღისით +5, ღამით კი -4 გრადუსი დაფიქსირდება. ბაკურიანში თოვლია მოსალოდნელი, სადაც დღისით +2 გრადუსია მოსალოდნელი, ღამით -9 გრადუსი დაფიქსირდება.

ნალექიანი დღეა მოსალოდნელი გორში. დღისით +9 გრადუსია მოსალოდნელი, ღამის განმავლობაში კი 0 გრადუსი დაფიქსირდება. ცხინვალში დღისით ჰაერს ტემპერატურა +8 გრადუსი იქნება, ღამით კი +1 გრადუსი დაფიქსირდება. იწვიმებს.

გუდაურში თოვლიანი დღე და +3 გრადუსია ნავარაუდევი, ღამით კი ჰაერის ტემპერატურა -10 გრადუსი იქნება. ითოვებს ომალოშიც, სადაც დღისით +3, ღამით კი -10 გრადუსი დაფიქსირდება.

წვიმიანი დღე იქნება ლაგოდეხში, სადაც ჰაერის ტემპერატურა დღის განმავლობაში +18 გრადუსი იქნება, ღამით კი +5 გრადუსი დაფიქსირდება. თელავში დღისით +15 გრადუსი დაფიქსირდება, ღამით კი +3 გრადუსია ნავარაუდევი. მოასლოდნელია ნალექი.

გურჯაანშიც წვიმიანი დღეა. დღისით +17 გრადუსი, ღამით კი +3 გრადუსი დაფიქსირდება. სიღნაღშიც ნალექიანი დღეა. დღისით +18 გრადუსი მოსალოდნელი, ღამით +4 გრადუსი დაფიქსირდება.

წვიმიანი დღე იქნება რუსთავშიც. დღისით +15 გრადუსია მოსალოდნელი, ღამით კი +3 გრადუსი დაფიქსირდება.

თბილისში ჰაერის ტემპერატურა დღისით +14 გრადუსს მიაღწევს, ღამით კი +3 გრადუსი იქნება. მოსალოდნელია ნალექი.

1...1,6911,6921,693...2,714Page 1,692 of 2,714
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი