ჩვენ ძალიან ბევრი პროექტი გვაქვს 2024 წელს დაგეგმილი. ჯამში, ინფრასტრუქტურაზე თითქმის 6,7 მილიარდი ლარი დაიხარჯება, – ამის შესახებ საქართველოს პრემიერ-მინისტრმა ირაკლი ღარიბაშვილმა, მთავრობის სხდომაზე განაცხადა.

მისი თქმით, ძალიან მნიშვნელოვანი პროექტებია დაგეგმილი და საჭიროა აქტიური, ეფექტური მუშაობა და დროული გადაწყვეტილებები.

„ჩვენ ძალიან ბევრი პროექტი გვაქვს 2024 წელს დაგეგმილი. ჯამში თითქმის 6,7 მილიარდი ლარი დაიხარჯება ინფრასტრუქტურაზე მთლიანად. აქედან მნიშვნელოვანი ნაწილი არის ირაკლი ქარსელაძის (რეგიონული განვითარებისა და ინფრასტრუქტურის) სამინისტროს ბიუჯეტი და ყველა სამინისტროს ჩადებული აქვს ეს ხარჯები, ამიტომ, ძალიან მნიშვნელოვანი პროექტები გვაქვს, საჭიროა მაგარი, აქტიური, ეფექტური მუშაობა, დროული გადაწყვეტილებები და ვფიქრობ, ყველაფერი იქნება ძალიან კარგად“, – განაცხადა პრემიერმა.

მელიამ თავი დაიტოვა პარტიის მიღმა – ჩვენი ამოცანაა ივანიშვილის რეჟიმის დამარცხება და როცა ამდენ დროს აკარგვინებს ადამიანი ოპოზიციონერებს, რომ ისაუბრონ გაუთავებლად მის წასვლა-არ წასვლაზე, როცა ადამიანი წასულია, მგონი ცხადია უკვე, ვის მიზნებს ემსახურება,- ამის შესახებ ფრაქცია „ნაციონალური მოძრაობა- გაერთიანებული ოპოზიცია- ძალა ერთობაშიას“ თავმჯდომარე თინა ბოკუჩავამ განაცხადა.

მისი თქმით, სავარაუდოდ, მელიას უახლოეს მომავალში სხვა პარტიაში ან პლატფორმაზე იხილავენ.

„მან არ გამოიყენა ერთობის მანიფესტზე ხელმოწერის შესაძლებლობა და პრეზიდენტი სააკაშვილის სიტყვებით რომ ვთქვათ, თავი დაიტოვა პარტიის მიღმა, სავარაუდოდ, უახლოეს მომავალში მას ვიხილავთ ან სხვა პოლიტიკურ პარტიაში ან სხვა პლატფორმაზე და ეს მისი არჩევანია. ბუნებრივია, მე იმედი მაქვს, საბოლოო ჯამში, ყველა პროდასავლელი ჩაერთვება ივანიშვილის წინააღმდეგ ბრძოლაში. დღეს ეს არის მთავარი ამოცანაა და ამით უნდა იხელმძღვანელოს ყველა პოლიტიკოსმა, რომელიც თავს რეჟიმის მოწინააღმდეგედ მოიაზრებს.

ეს პოლიტიკური გადაწყვეტილება [პარტიიდან გასვლის თაობაზე] თავად ნიკა მელიამ მიიღო, როცა მან პრეზიდენტი სააკაშვილის შემოთავაზებაზე უარი თქვა და ხელი არ მოაწერა ერთობის დოკუმენტს, რომელიც იქნებოდა შანსი მისი რეინტეგრაციისთვის პარტიაში, რომელსაც დიდი ხანია მძიმე ბრალდებებს უყენებს.

10 წუთია ვპასუხობ კითხვას, რომელიც ვფიქრობ, არ არის საზოგადოებისთვის საინტერესო, ჩვენი ამოცანაა ივანიშვილის რეჟიმის დამარცხება და როცა ამდენ დროს აკარგვინებს ადამიანი ოპოზიციონერებს, რომ ისაუბრონ უსაგნოდ და უსაზღვროდ და გაუთავებლად მის წასვლა-არ წასვლაზე მაშინ, როცა ადამიანი წასულია და ამას თავად ამბობს, მგონი, ცხადია უკვე, ვის მიზნებს ემსახურება,“ – განაცხადა ბოკუჩავამ.

1 მლნ 366 ათასი დასაქმებულია დღეს ქვეყანაში. ეს ოფიციალურად არის საქსტატის მიერ გამოქვეყნებული ინფორმაცია. ასევე რეკორდულია დასაქმების დონეც. ეს მოიტანა ბოლო წლებში ჩვენი მთავრობის მიერ გადადგმულმა სწორმა პოლიტიკამ, იმ ნაბიჯებმა, რომელიც ჩვენ გადავდგით, – ამის შესახებ საქართველოს პრემიერ-მინისტრმა ირაკლი ღარიბაშვილმა, მთავრობის სხდომაზე განაცხადა.

პრემიერის თქმით, დღეს რომ ყოფილიყო წინა ხელისუფლება არც მშვიდობა იქნებოდა და არც ეკონომიკური ზრდა.

„რაც შეეხება ზოგადად, მიმდინარე ეკონომიკურ ვითარებას, იცით, რომ ჩვენ წელს 7%-იანი ეკონომიკური ზრდა გვაქვს. ახლაც ძალიან კარგი ტენდენციებია და მნიშვნელოვანია, რომ შევინარჩუნოთ ეს პოზიტიური დინამიკა. მინდა გამოვეხმაურო საქსტატის მიერ წინა კვირას გავრცელებულ ინფორმაციას, ეს ეხება ეკონომიკურ აქტივობას და დასაქმების საკითხებს. წელს, ყველა კვარტალში გაიზარდა დასაქმებულთა რაოდენობა. მესამე კვარტალშიც გაიზარდა, მეორეშიც, პირველშიც. მნიშვნელოვანი ზრდა გვქონდა და რეკორდულ მაჩვენებელს მიაღწია დასაქმებულთა რაოდენობამ ქვეყანაში. 1 მლნ 366 ათასი დასაქმებულია დღეს ქვეყანაში. ეს ოფიციალურად არის საქსტატის მიერ გამოქვეყნებული ინფორმაცია. ასევე რეკორდულია დასაქმების დონეც. ეს მოიტანა ბოლო წლებში ჩვენი მთავრობის მიერ გადადგმულმა სწორმა პოლიტიკამ, იმ ნაბიჯებმა, რომელიც ჩვენ გადავდგით, იმ მშვიდობის პოლიტიკამ, რომელიც ჩვენ გვაქვს, თორემ დღეს რომ ყოფილიყო წინა ხელისუფლება და წინა მთავრობა, დღეს არც მშვიდობა იქნებოდა, არც ეკონომიკური ზრდა, არაფერი არ იქნებოდა. ქვეყანას ისინი მეორედ და საბოლოოდ დააქცევდნენ და გაანადგურებდნენ, როგორც მათ ერთხელ უკვე დაანგრიეს ეს ქვეყანა, ამიტომ, ჩვენ ვინარჩუნებთ მშვიდობიან პოლიტიკას, მაღალ ეკონომიკურ ზრდას და განვითარების მაღალ ტემპს “, – განაცხადა პრემიერმა.

ეს არის შეტევა 2024 წლის საპარლამენტო არჩევნებსა და მის ადმინისტრირებაზე. არაფერი უნდოდა იმის გარკვევას, რომ მოქალაქე, რომელიც არჩევნებზე პირადობის მოწმობით მივა, ერთ საარჩევნო უბანზე იმ შემთხვევაში მისცემს ხმას, თუ ელექტრონულ მანქანაში მისი სახელი და გვარი, მისი პირადი ნომერი იქნება დარეგისტრირებული,- ამის შესახებ პარლამენტის ვიცე-სპიკერმა, არჩილ თალაკვაძემ ISFED-ის მიერ საარჩევნო ელექტრონული აპარატების შეფასების დოკუმენტთან დაკავშირებით განაცხადა.

თალაკვაძის თქმით, მოქალაქე საარჩევნო უბანზე მეორედ თუ მივა და იმავე პირადობის მოწმობას აჩვენებს, ელექტრონული მანქანა მას ხმის მიცემის საშუალებას არ მისცემს.

„ერთ უბანზე ხმის მიცემის შემდეგ თუ სხვა უბანზე მივა და ხმის მიცემას ხელმეორედ შეეცდება, ელექტრონული მანქანა არც ამის საშუალებას იძლევა, რადგან სხვა საარჩევნო უბანზე მისი სახელი და გვარი არ არის რეგისტრირებული. ამის გარკვევა უმარტივესია, ვიდრე ანგარიშს გამოაქვეყნებ და დეზინფორმაციას გაავრცელებ. რა თქმა უნდა, ავტორიტეტისა და მაღალი რეპუტაციის მქონე ორგანიზაცია ასეთ ნიუანსებს უნდა ამოწმებდეს. შეიძლება, საქმე გაცილებით უარეს ამბავთან გვაქვს, როცა მათ ეს გადამოწმებულიც აქვთ, იციან კიდეც, მაგრამ დეზინფორმაციას შეგნებულად ავრცელებენ. შეიძლება, ეს იმ შავი კამპანიის ნაწილი იყოს, რასაც ბოლო თვეების განმავლობაში ცესკო-სა და ელექტრონული სისტემის წინააღმდეგ ვხედავთ. საერთაშორისო დამკვირვებლებმა თქვეს, რომ ეს არის საიმედო სისტემა, რვა-ცხრა არჩევნებზე იმუშავა, აჩვენა, რომ საიმედოა და ნდობას იმსახურებს, რის შემდეგაც გააქტიურდა ასეთი სახის საინფორმაციო ხაზი. შეიძლება, ეს იყოს ამ ხაზის ნაწილიც“, – განაცხადა არჩილ თალაკვაძემ.

მდაბიო საქციელი ვიხილეთ ხაბეიშვილის მხრიდან. წარმოუდგენელია, ადამიანმა, ვინც პარტიაში გასტროლიორად იყო წარმოდგენილი, ხან მიდიოდა, ხან მოდიოდა „ნაციონალური მოძრაობიდან“, ის ადამიანები გარიცხოს, რომლებიც წლების განმავლობაში ამ პარტიის გამარჯვებისთვის და ამ ქვეყნის კეთილდღეობისთვის იბრძოდნენ, – ამის შესახებ „ნაციონალური მოძრაობის“ წევრმა გიორგი პატარაიამ ჟურნალისტებთან განაცხადა.

მისივე თქმით, თავად პარტიიდან წასვლას არ აპირებს.

„სამარცხვინო და მდაბიო საქციელი იყო ლევან ხაბეიშვილის მხრიდან. ანალოგი თუ მოიძებნება, ეს გახლავთ, ალბათ, საბჭოთა კავშირის დროს პოლიტიკური ბიუროს წარმომადგენლებს რომ ადამიანებს პარტიიდან რიცხავდნენ და სასჯელს უწესებდნენ. წარმოუდგენელია, ადამიანმა ვინც პარტიაში გასტროლიორად იყო წარმოდგენილი, ხან მიდიოდა, ხან მოდიოდა და სეირნობდა აქეთ-იქით „ნაციონალური მოძრაობიდან“, ის ადამიანები გარიცხოს, რომლებიც წლების განმავლობაში ამ პარტიის გამარჯვებისთვის, ამ ქვეყნის კეთილდღეობისთვის და პარტიის წარმატებისთვის იბრძოდნენ. სამწუხარო და მდაბიო საქციელია მისი მხრიდან. რაც შეეხება მე მივდივარ თუ არა პარტიიდან, მე ნამდვილად არსად წავსულვარ „ნაციონალური მოძრაობიდან“ არასდროს – უკვე 22 წელია ამ პარტიაში ვარ და არც ახლა ვაპირებ წასვლას. თუ რაიმე გადაწყვეტილებას მიიღებს აღნიშნული პიროვნება, ვიხილავთ. რაც ყველაზე მთავარია, „ნაციონალური მოძრაობის“ ერთ- ერთი ყველაზე დიდი წარმატება იყო, რომ შიდაპარტიულ პროცესებში მუდმივად იყო კამათი, განსხვავებული აზრები და არასდროს არავის მოსვლია აზრად ვინმეს გარიცხვა, გამორიცხვა თუ გაგდება. სამწუხაროა ის ფაქტი, რაც გუშინ „ფორმულას“ ეთერში ვიხილეთ,“- განაცხადა პატარაიამ.

“ნაციონალური მოძრაობის” თავმჯდომარემ, ლევან ხაბეიშვილმა “ფორმულას” პირდაპირ ეთერში ხელი მოაწერა ფურცელზე, სადაც ეწერა, რომ ნიკა მელია პარტიის წევრი აღარ არის და განაცხადა, რომ მელია არ წარმოადგენს „ნაციონალურ მოძრაობას“.

„ნაციონალური მოძრაობის“ წევრის, აკაკი მინაშვილის განცხადებით, „ვარდების რევოლუციის“ 20 წლისთავზე გამართული კონფერენცია და მანიფესტიც არა ერთიანობას, არამედ პარტიის გაყოფას ემსახურებოდა.

მინაშვილის თქმით, ნიკა მელიასთან დაკავშირებით „ნაციონალური მოძრაობის“ თავმჯდომარის, ლევან ხაბეიშვილის ქმედება ძალიან სამწუხაროა.

ამასთან, აკაკი მინაშვილის შეფასებით, ახალი მენეჯმენტის პირობებში „ნაციონალური მოძრაობა“ ზიანდება.

„„ვარდების რევოლუციის“ 20 წლის თავზე, როცა „ნაციონალურმა მოძრაობამ“ კონფერენცია გამართა „ვარდების რევოლუციაზე“ და მანიფესტი გამოიტანა, ეს მანიფესტიც და კონფერენციაც, საბოლოო ჯამში, ემსახურებოდა არა ერთიანობას, არამედ პარტიის გაყოფას, იმას, რაც გუშინ დადასტურდა – პარტიიდან ადამიანების გაგდებას, რაც არასწორი, ძალიან მძიმე და სამწუხარო საქციელია. ეს არ მოუტანს პარტიას წარმატებას. ჩემი პოზიცია იგივე რჩება, კრიტიკულად ვიყავი განწყობილი ამ მენეჯმენტის მიმართ და რვა თვის განმავლობაში რა ნაბიჯებიც გადადგეს და რა გზავნილებიც ჰქონდათ, ამან კიდევ უფრო გააღრმავა ჩემი კრიტიკული დამოკიდებულება „ნაციონალური მოძრაობის“ მენეჯმენტის მიმართ. ჯერ ერთი, პარტიიდან გარიცხვა ასე არ ხდება. ადამიანები, ვინც პარტიში ჯერ მოვიდნენ, შემდეგ წავიდნენ, შემდეგ „ნაციონალურ მოძრაობას“ „სიკვდილს“ ეძახდნენ წლების წინ, ვიღაცები მიხეილ სააკაშვილზე შეურაცხმყოფელ განცხადებებს აკეთებდნენ, სინამდვილეში, ის ადამიანები „ნაციონალური მოძრაობიდან“ ვერავის გარიცხავენ. ფორმალურად რა ხდება, როგორ ხდება, რა ცვლილებები შეიტანეს იმ იდუმალ პოლიტსაბჭოზე, რომელიც ჩატარდა 8 თვის წინ, ამაზე მე ვერ მოგახსენებთ, მენეჯმენტს უნდა ჰკითხოთ. მთავარი არის, რომ ახალი მენეჯმენტის პირობებში „ნაციონალური მოძრაობა“ ზიანდება, ეს არის ძალიან დიდი პრობლემა. თუ გვინდა, რომ „ნაციონალურმა მოძრაობამ“ წარმატებას მიაღწიოს, მენეჯმენტში ცვლილებები უნდა განხორციელდეს“, – აღნიშნა აკაკი მინაშვილმა.

„ნაციონალური მოძრაობის“ თავმჯდომარემ, ლევან ხაბეიშვილმა ფურცელს, რომელზეც ეწერა, რომ ნიკა მელია პარტიის წევრი აღარ არის, გუშინ პირდაპირ ეთერში მოაწერა ხელი და განაცხადა, რომ ნიკა მელია არ წარმოადგენს „ნაციონალურ მოძრაობას“, აღარ არის პარტიის წევრი.

დეკემბერში სტატუსს ველოდებით, რითიც საქართველო მნიშვნელოვან ეტაპზე გადადის, რაც ქვეყნის ევროკავშირში გაწევრიანებას გულისხმობს, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

თალაკვაძის თქმით, ევროკომისიის გადაწყვეტილებით კარგად გამოჩნდა, რამდენად შედეგიანი იყო რეკომენდაციების შესასრულებლად მმართველი გუნდის მიერ წარმართული სამუშაო პროცესი.

„რამდენად „ფარსი“ იყო კანდიდატის სტატუსთან დაკავშირებით შექმნილი სამუშაო ჯგუფები, ბოლოს კარგად გამოჩნდა, როცა საქართველოს ევროკომისიამ მწვანე შუქი აუნთო სტატუსის მისაღებად. ეს პირდაპირ ნიშნავს, რომ წარმართული სამუშაო პროცესი შედეგიანი იყო და ჩვენმა ხელისუფლებამ საზოგადოებასა და ევროკავშირთან ერთად შეძლო, ისტორიული გადაწყვეტილებისთვის ვიზა მიეღო. დეკემბერში სტატუსს ველოდებით, რითიც საქართველო მნიშვნელოვან ეტაპზე გადადის, რაც ქვეყნის ევროკავშირში გაწევრიანებას გულისხმობს. გეგმის შესრულების შემდეგ, რა თქმა უნდა, საქართველო მწვანე შუქს მიიღებს გაწევრიანებაზე. სტატუსის მიღების შემდეგ ჩვენი ქვეყნისთვის საგზაო რუკა სწორედ ის გეგმა იქნება, რითიც ევროკავშირში მივალთ და ევროპული ოჯახის წევრები გავხდებით“, – განაცხადა არჩილ თალაკვაძემ.