როგორც კი ბრიუსელიდან იმედიანი განცხადება კეთდება საქართველოს ევროინტეგრაციაზე, რადიკალური ოპოზიცია პოლიტიკურ კრუნჩხვებში ვარდება, მაგრამ ეს კრუნჩხვებიც განსხვავებულია, – განაცხადა „ხალხის ძალის“ ერთ-ერთმა ლიდერმა, გურამ მაჭარაშვილმა ევროპული საბჭოს პრეზიდენტის, შარლ მიშელის განცხადების კომენტირებისას.

„ვაშაძე ისეთ კრუნჩხვებში ვარდება, რომ შემდეგ ზღაპრებს ჰყვება, ქარის წისქვილებს ებრძვის და თავის ზღაპრებს ისე ჰყვება, რომ მისი პარტიაც არ იჯერებს და გამოღვიძებულს ეუბნებიან, შენი პარტია ჩამოიშალა და „ნაცმოძრაობაში“ დაბრუნდიო. „ნაცმოძრაობის“ ფორმალურმა თავმჯდომარემ, მევენახე ხაბეიშვილმა გადაწყვიტა, რომ ბევრი ღვინო დაწუროს, მაგრამ მას ფანტაზიებში გვარამიამ ჩაუსვარა, რადგან უთხრა, ღვინოზე რა განცხადებები გაქვს გაკეთებული, გაგახსენდესო“, – განაცხადა გურამ მაჭარაშვილმა.

არავითარი განსაკუთრებული ინტერესი არ გვქონდა, რომ პარტიების ფინანსების კონტროლის ფუნქცია ერთი უწყებიდან მეორეში გადასულიყო – ევროკომისიის რეკომენდაციებს გავყევით, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა, რითაც პარტიების ფინანსების კონტროლის ფუნქციის აუდიტის სამსახურიდან ანტიკორუფციულ ბიუროში გადატანას გამოეხმაურა.

მისი თქმით, ქართულ პოლიტიკაში შავი ფულის კონტროლი რთულია, ამას ვერ ახერხებდა აუდიტის სამსახური და სავარაუდოდ, იგივე პრაქტიკა გაგრძელდება ანტიკორუფციულ სამსახურშიც.

„თავის დროზე ევროკავშირის რეკომენდაცია იყო, ანტიკორუფციულ სამსახურში მომხდარიყო ანტიკორუფციული ფუნქციების თავმოყრა, ერთ-ერთი ასეთი ფუნქციაა პარტიების ფინანსების კონტროლი, სწორედ ამის გამო, ევროკავშირის რეკომენდაციების შესაბამისად გადავიდა ეს ფუნქცია აუდიტის სამსახურიდან ანტიკორუფციულ სამსახურში. ეს იყო ევროკომისიის რეკომენდაცია, რომ მომხდარიყო ანტიკორუფციული ფუნქციების თავმოყრა ახალ სამსახურში. ჩვენ საერთოდ არ ვაპირებდით ამ ფუნქციის სადმე გადატანას.

კონსტიტუციასთან თავსებადობა იყო ეჭვქვეშ, როცა აუდიტის სამსახურში იყო ეს ფუნქცია, რადგან მითითებულია კონსტიტუციაში, რომ სახელმწიფო სახსრებს მეთვალყურეობს აუდიტის სამსახური და არა პარტიულს სახსრებს. ამიტომ კონსტიტუციასთან თავსებადობის საკითხი იდგა, რაზეც ვენეციის კომისიაც საუბრობდა თავის დროზე, რომ ეს ფუნქცია აუდიტიდან სადღაც სხვაგან წასულიყო, ამას დაემატა ევროკავშირის რეკომენდაცია, რომ მომხდარიყო ფუნქციების თავმოყრა ახალ სამსახურში, ჩვენ გავყევით ევროკომისიის რეკომენდაციას, არავითარი განსაკუთრებული ინტერესი არ გვქონდა, რომ ეს ფუნქცია ერთი უწყებიდან მეორეში გადასულიყო. აუდიტის სამსახურზე პრეტენზიები ნაკლებად იყო, მე არ მახსენდება პრეტენზიები, მიუხედავად იმისა, რომ დაუჯარიმებია არაერთი პარტია, მგონი, ჩვენც შეგვეხო რამდენიმე ჯარიმა ამ წლების განმავლობაში, შემოწირულებების და ხარჯების გამო, არის ხოლმე მათ შორის, ტექნიკური და არატექნიკური ხარვეზები. თუმცა, პრეტენზიები დიდად არ ყოფილა აუდიტის სამსახურის მიმართ. საერთო პრობლემა რაც იკვეთებოდა (რაც აუდიტის სამსახურის ბრალი არ იყო) იყო ის, რომ საქართველოში ვერ ხერხდებოდა შავი ფულის კონტროლი, როგორც არჩევნების დროს, ისე, ზოგადად, პოლიტიკაში. არიან ოლიგარქები, რომლებიც ღიად აფინანსებენ პოლიტიკურ პარტიებს, აღიარება აქვთ ამასთან დაკავშირებით გაკეთებული, მაგრამ ეს ფული არსად ჩანს, ერთი მხრივ, აუდიტის სამსახურის საქმიანობა არ იყო პრეტენზიების საგანი, მაგრამ მისი საქმიანობით, არა მისი ბრალეულობით, წარმატებულად ვერ ხერხდებოდა პოლიტიკური ფულის კონტროლი. მგონია, რომ იგივე პრაქტიკა გაგრძელდება ანტიკორუფციული სამსახურის შემთხვევაშიც, ძალიან რთულია შავი ფულის კონტროლი ქართულ პოლიტიკაში”, – განაცხადა კობახიძემ.

განცხადებების მიუხედავად, რა თქმა უნდა, გავაგრძელებთ წარმატებული არაღიარების პოლიტიკის საქმეს, – ასე გამოეხმაურა „ქართული ოცნების“ თავმჯდომარე ირაკლი კობახიძე რუსეთის ფედერაციის საბჭოს საგარეო საქმეთა კომიტეტის თავმჯდომარის, გრიგორი კარასინის განცხადებას აფხაზეთისა და სამხრეთ ოსეთის ე.წ.სუვერენიტეტის აღიარებაზე.

კობახიძის თქმით, საქართველოსთვის პრინციპულად მნიშვნელოვანია წარმატებული არაღიარების პოლიტიკის წარმოება.

„ასეთი განცხადებები ჩვენ მოგვისმენია. ჩვენთვის მთავარი არის, რომ საქართველო, მთელი ამ წლების განმავლობაში წარმატებით ახორციელებს არაღიარების პოლიტიკას და სწორედ ჩვენი ხელისუფლების არაღიარების პოლიტიკის შედეგია ის, რომ არცერთი ერთეულით არ გაზრდილა იმ ქვეყნების რაოდენობა, რომლებსაც აღიარებული აქვთ ე.წ. დამოუკიდებლობა. ჩვენ, განცხადებების მიუხედავად, რა თქმა უნდა, გავაგრძელებთ წარმატებული არაღიარების პოლიტიკის საქმეს. ჩვენ ასეთი განცხადებები მოგვისმენია, მაგრამ ჩვენი პოლიტიკა არაღიარების კუთხით ყველაფრის მიუხედავად წარმატებული იყო“, – განაცხადა კობახიძემ.

კითხვაზე, იმ ფონზე, როდესაც ჩინეთთან სტრატეგიულ პარტნიორობაზე იყო საუბარი, რატომ შემოიტანეს ეს თემა რუსეთიდან, კობახიძე ასე პასუხობს:

„არ ვიცი, მე არ მინდა საერთოდ ამ თემას ჩავუღრმავდე. რა თქმა უნდა, ჩინეთთან სტრატეგიული პარტნიორობა არის ძალიან დიდი მიღწევა და რა თქმა უნდა, ყველაფერი გაკეთდება იმისთვის, რომ თანამშრომლობა კიდევ უფრო გაღრმავდეს ჩინეთთან ყველა მიმართულებით. ეს არის ძალიან მნიშვნელოვანი. რა თქმა უნდა, ჩვენთვის პრინციპულად მნიშვნელოვანია წარმატებული არაღიარების პოლიტიკის წარმოება. ორივე მიმართულებით ძალიან აქტიურები ვიქნებით და რა თქმა უნდა, ვერავითარი განცხადებები ამაში ხელს ვერ შეგვიშლის“, – განაცხადა კობახიძემ.

რუსეთის ფედერაციის საბჭოს საგარეო საქმეთა კომიტეტის თავმჯდომარის, გრიგორი კარასინის განცხადებით, რუსეთი ყველაფერს აკეთებს იმისთვის, რომ „სამხრეთ ოსეთის და აფხაზეთის სუვერენიტეტი სხვა ქვეყნებმაც აღიარონ, მათ შორის ინდოეთმა და ჩინეთმა“. აღნიშნული განცხადება კარასინმა Sputnik Южная Осетия-სთვის მიცემულ ინტერვიუში გააკეთა. მისივე თქმით, ეს რთული საკითხია, რადგან ამ იდეასთან დაკავშირებით დასავლეთს ნეგატიური დამოკიდებულება აქვს, მაგრამ ადრე თუ გვიან ეს აღიარება მოხდება.

„რუსეთი სამხრეთ ოსეთის და აფხაზეთის საერთაშორისო აღიარების წინ წაწევისკენ მიმართულ მუშაობას გააგრძელებს“, – განაცხადა კარასინმა.

ევროკავშირის წევრობის კანდიდატის სტატუსი აუცილებლად იქნება – საქართველო გაცილებით უფრო მძლავრ პოზიციაზე დგას! – ეს განცხადება პარლამენტის პირველმა ვიცე-სპიკერმა გია ვოლსკიმ გააკეთა.

ვოლსკის თქმით, ვერავინ, ვერც ერთმა საერთაშორისო კომისიამ ვერ დაადასტურა, რომ არსებობს რუსეთისათვის ხელშეწყობის რაღაც მექანიზმი.

მისივე შეფასებით, არანაირი საფუძველი არა აქვს იმაზე საუბარს, თითქოს საქართველომ რუსეთთან ის ურთიერთობა ააწყო, რომელიც მას ევროპულ გზაზე ხელს შეუშლის.

„ეს არის დემაგოგიური და თავს მოხვეული საინფორმაციო შეტევა საზოგადოებაზე, რათა როგორმე ხალხი დაარწმუნონ, რომ აუცილებელია რევოლუცია. რევოლუციის აუცილებლობა კი რადიკალურ ოპოზიციაში განპირობებულია იმით, რომ მათ არჩევნებში პერსპექტივა არ გააჩნიათ”, – განაცხადა გია ვოლსკიმ.

რაც შეეხება უშუალოდ სტატუსის მიღებას, მისი თქმით, რადიკალური ოპოზიციის მთავარი ამოცანაა, საქართველომ კანდიდატის სტატუსი ვერ მიიღოს.

„პერსპექტივაში 2030 წელს გაფართოების რეალურ შანსს ხედავენ, იმიტომ, რომ როგორც მაკრონი ამბობს, დღეს ამ 27 წევრშიც კი არ არის სინქრონიზაცია. ეს იმას არ ნიშნავს, რომ ჩვენ ვალდებულებებზე უარი უნდა ვთქვათ, პირიქით, არსებობს ასოცირების ხელშეკრულება და არსებობს ზედმიწევნით შესრულებული რეკომენდაციები. როგორც ჩანს, ევროკავშირის წევრ ქვეყნებში არსებობს ამ თემასთან დაკავშირებით გარკვეული აზრთა სხვადასხვაობა და არ არსებობს კონსენსუსი, ვინაიდან ათეული წლებია კანდიდატის სტატუსით იმყოფებიან მოლოდინის რეჟიმში გარკვეული ქვეყნები, მათ შორის ყველაზე დიდი ხანი თურქეთი და ყველა დანარჩენი სხვა.

ნიკა გვარამია სხვაზე უფრო მეტად არის ამ საკითხებში ჩახედული, ან უფრო საღად მსჯელობს, ვინაიდან მან პირველმა დაინახა ის, რომ ამ თემით მანიპულირება არის უაზრო და უადგილო, აქედან გამომდინარე, მარტივ ფორმულირებას სთავაზობს თავის მომხრეებს, (ის რადიკალური ოპოზიციის ერთ-ერთი ლიდერია), რომ იარონ ერთი გზით, პრიმიტიული ფორმულით – საქართველომ არ უნდა მიიღოს კანდიდატის სტატუსი და ხალხის აღქმაში კანდიდატის სტატუსის არმიღება უნდა დაუკავშირდეს ხელისუფლებას, საქართველოს ხელისუფლებას უნდა დაბრალდეს ის, რომ სტატუსს ვერ მიიღებს, ანუ ყველამ უნდა იმუშაოს იმისთვის, რომ საქართველომ სტატუსი ვერ მიიღოს, ეს არის მთავარი ამოცანა“, – განაცხადა გია ვოლსკიმ.