ერთხელ კარგი იყო, რომ არჩევნების გზით შევცვალეთ ხელისუფლება, მითუმეტეს, ის ხელისუფლება ახლა რომ ოპოზიციაშია, მაგრამ ახლა გველოდება დიდი ეროვნული ამოცანა – მეორედ, არჩევნების გზით საქართველოს ისტორიაში უნდა შევძლოთ შევცვალოთ ხელისუფლება, – განაცხადა საპარლამენტო პოლიტიკური ჯგუფის „მოქალაქეების“ თავმჯდომარე ალეკო ელისაშვილმა პლენარულ სხდომაზე საქართველოს პრეზიდენტის ყოველწლიური მოხსენებით გამოსვლის შემდეგ.

როგორც ალექსანდრე ელისაშვილმა აღნიშნა, ოპოზიციას ხელისუფლების შეცვლაში ხელს უშლის ერთმანეთის მუდმივი კრიტიკა.

„ამაში გვაფერხებს ერთმანეთის გაუთავებელი ლანძღვა და ამიტომ ხალხს აქვს განცდა, რომ ესენი რომ მოვიდნენ ხელისუფლებაში კიდევ უფრო დააქცევენ ამ ქვეყანასო. ამიტომ, ჩვენ თავში ძალა უნდა მოვიკრიბოთ. ყველას გვგონია, რომ მარტო მისი პარტია შეცვლის ყველაფერს ქვეყანაში, მაგრამ ეს ასე არ არის. ჩვენი ამბიციები უნდა „დავამიწოთ“ და ერთობის კონტურები შევქმნათ. სხვანაირად ეს ცვლილება არ გამოვა. სხვანაირად ვეხმარებით „ქართულ ოცნებას“, რომ უკუნითი უკუნისამდე იყოს ხელისუფლებაში“, – განაცხადა ალექსანდრე ელისაშვილმა.

არც ეროვნული თვითმყოფადობა, არც სახელმწიფო სუვერენიტეტი და არც ტერიტორიული მთლიანობა დღეს სალომე ზურაბიშვილისგან არ მოგვისმენია. არ სტკივა და იმიტომ! – იმიტომ, რომ ეს არ არის მისი ქვეყანა, ეს არ არის მისი სამშობლო, უბრალოდ შეუძლებელია ადამიანს ორი სამშობლო ჰქონდეს, – ამის შესახებ საპარლამენტო პოლიტიკური ჯგუფის „ხალხის ძალა“ თავმჯდომარემ, სოზარ სუბარმა პარლამენტის სხდომაზე სიტყვით გამოსვლისას განაცხადა.

მისივე თქმით, საქართველოს პრეზიდენტი, სალომე ზურაბიშვილი პარლამენტის ტრიბუნიდან არ აჟღერებს საკითხებს, რომლებიც ყველაზე მტკივნეულია ქვეყნისთვის და ლაპარაკობს იმაზე, რაც „მის დამკვეთებს, პატრონებს სჭირდებათ“.

„ჩვენი მიზანია ჩვენი ქვეყანა საბოლოო გამარჯვებამდე მივიყვანოთ“, „ჩვენ გვაქვს შესაძლებლობა ბოლომდე დავიცვათ ჩვენი ეროვნული თვითმყოფადობა“, „სრულად აღვადგინოთ სახელმწიფოს სუვერენიტეტი და ქვეყნის ტერიტორიული მთლიანობა“, „საქართველო 2030 წლამდე მაღალშემოსავლიანი ქვეყნების რიგში ჩავაყენოთ და ევროკავშირში გავაწევრიანოთ“. ეს სიტყვები დაახლოებით ერთი თვის წინ ითქვა „ქართული ოცნების“ ყრილობაზე და ეს სიტყვები ეკუთვნის ბიძინა ივანიშვილს, რომელიც პოლიტიკაში დაბრუნდა. არცერთი ამ სიტყვათაგანი, არც ეროვნული თვითმყოფადობა, არც სახელმწიფო სუვერენიტეტი და არც ტერიტორიული მთლიანობა დღეს არ მოგვისმენია სალომე ზურაბიშვილისგან. არ სტკივა და იმიტომ! იმიტომ, რომ ეს არ არის მისი ქვეყანა, ეს არ არის მისი სამშობლო, უბრალოდ შეუძლებელია ადამიანს ორი სამშობლო ჰქონდეს და როდესაც ადამიანი ასეთი არჩევანის წინაშე დგება, ის სამწუხაროდ ერთ-ერთს ირჩევს და მან ეს არჩევანი გააკეთა. გააკეთა ეს არჩევანი მაშინ, როდესაც ეს ყველაზე მეტად სჭირდებოდა რადიკალურ ოპოზიციას. ეს არჩევანი გააკეთა მაშინ, როდესაც მისი ორივე შვილი სრულიად მოულოდნელად დააწინაურეს და მაღალ თანამდებობებზე გადაიყვანეს იქ, სადაც არავინ არ ელოდა და არავითარი დამსახურება იქ არ უძღოდათ. დღეს, როდესაც ის ლაპარაკობს ელიტურ კორუფციაზე, კორუფცია ამას ჰქვია და სხვას არაფერს. როდესაც ის ამ ტრიბუნიდან არ აჟღერებს საკითხებს, რომლებიც ყველაზე მტკივნეულია ქვეყნისთვის და ლაპარაკობს იმაზე, რაც მის დამკვეთებს, პატრონებს სჭირდებათ, აი, ეგ არის ქვეყნის ინტერესების არ მსახურება და ეს არის ქვეყნის ინტერესების ღალატი, როდესაც ის არ ლაპარაკობს იმ საფრთხეზე, რომელიც საქართველოს აქვს ომში ჩართვასთან დაკავშირებით“, – განაცხადა სოზარ სუბარმა.

როგორც მან აღნიშნა, მათ შეცდომა დაუშვეს, როდესაც ქართველ ხალხს უთხრეს, რომ სალომე ზურაბიშვილი იქნება გამაერთიანებელი ქვეყნის, „ჩვენი დღევანდელობის და ქვეყნის იმ წარსულის, რომელიც ევროპაში ერთი საუკუნის წინ გაიქცა“.

„კარგად გვახსოვს მისი განცხადებები, როდესაც საქართველოდან სპეციალური თვითმფრინავით ჯარისკაცების, მოხალისეების გაგზავნაზე ლაპარაკი იყო. მოხალისეების გაგზავნა პირდაპირ ნიშნავდა საქართველოს ომში ჩართვას და ერთი წუთით არ უთქვამს, რომ ეს საქართველოს სახელმწიფოს არ უნდა გაეკეთებინა, პირიქით, იმათ წისქვილზე ასხამდა წყალს, ვინც ამბობდა, რომ საქართველომ უნდა გაგზავნოს ჯარისკაცები. იგივე მისი მოწოდებები სანქციებთან დაკავშირებით. ეს აბსოლუტურად ქვეყნის ინტერესების საწინააღმდეგო იყო. რატომ? – იმიტომ, რომ მას ეს ქვეყანა არ სტკივა. როგორც მან თქვა ერთხელ, უფრო მაღლა დგას, ვიდრე ქართველი ხალხი, რომელსაც ის ვითომ წარმოადგენს, მაგრამ ვის წარმოადგენს სინამდვილეში, ჩვენ ძალიან კარგად ვიცით. ძალიან კარგად ვიცით, როგორ გაიმარჯვა მან და ძალიან კარგად ვიცით, მისი პოლიტიკური წონა, რომელიც ძალიან კარგად გამოჩნდა მაშინ, როდესაც ის დამოუკიდებლად იყრიდა კენჭს და ეს იყო მაშინ, როცა მისი პოპულარობა პიკში იყო. როდესაც „ქაჯები მიდიან-მოდიან“ რაღაც ფრაზები, რომ ისროლა და უცებ რომ ეგონა, რომ მთელი საქართველო მის გვერდით იდგა, მაშინ ის 2%-ს ვერ გასცდა. მთელს საქართველოში ვერცერთ საკრებულოში ერთი წევრი ვერ გაიყვანა. ეს არის მისი პოლიტიკური წონა. მიუხედავად ამისა, ჩვენ შეცდომა დავუშვით, ქართველ ხალხს ვუთხარით, რომ ეს ადამიანი იქნება გამაერთიანებელი ქვეყნის ჩვენი დღევანდელობის და ქვეყნის იმ წარსულის, რომელიც ევროპაში გაიქცა ერთი საუკუნის წინ. გაიქცნენ, ჩვენ მათ პატივს ვცემთ, თუმცა ჩვენს წინაპრებს ეს სამშობლო არ დაუტოვებიათ. ჩვენი წინაპრები აქ დარჩნენ, ბევრი მათგანი დაიხვრიტა, ბევრი მათგანი გაციმბირდა, ბევრმა მათგანმა იბრძოლა ქვეყნისთვის და ქართული კულტურა შექმნეს. ივანე ჯავახიშვილი იყო, რომელიც კათედრაზე გარდაიცვალა, როცა ლექციას კითხულობდა. გალაკტიონ ტაბიძე იყო, რომლის მეუღლე გადაასახლეს და ამ ადამიანებმა იბრძოლეს და ამ ადამიანებმა საქართველო შეინარჩუნეს. მე ძალიან დიდ პატივს ვცემ იმ ემიგრაციასაც, რომელიც უცხოეთში წავიდა, მაგრამ მე ვერ მივიღებ სიტყვა დეფიტიზმს ჩვენს ქვეყანასთან და ჩვენს მოქალაქეებთან დაკავშირებით, დეფიტიზმის ხსენებას სალომე ზურაბიშვილისგან, იმიტომ, რომ ჩვენი წინაპრები არ გაქცეულან. ჩვენმა წინაპრებმა იბრძოლეს და საქართველო აქ შეინარჩუნეს და არა პარიზში, გერმანიაში და სხვაგან.

30 კილომეტრში არის სამხედრო ბაზა ახალგორთან, ბევრად უფრო ახლოს არის და ბევრად უფრო საშიშია ჩვენი ქვეყნისთვის, ვიდრე ის ბაზა, რომელიც შეიძლება მომავალში აშენდეს ან არ აშენდეს. ახალგორზე რა ვთქვათ იქნებ ამაზეც გვითხრათ ორი სიტყვა, როგორ გავაერთიანოთ ჩვენი ქვეყანა, როგორ დაველაპარაკოთ ჩვენს ოს და აფხაზ ძმებს, როგორ წარმოუდგენია მათთან ლაპარაკის გარეშე ქვეყნის ტერიტორიული მთლიანობის აღდგენა. ამაზე მას არც ერთი სიტყვა არ უთქვამს. ლაპარაკობს სამაგიეროდ იმაზე, რომ თურმე 19 აპრილის შეთანხმება დარღვეული იყო“, – აღნიშნა სოზარ სუბარმა.

„მთავარი არხის“ დამფუძნებელი, ნიკა გვარამია ჟურნალისტებტან საუბრის დროს აცხადებს, რომ სალომე ზურაბიშვილის მოწოდებას იზიარებს.

„სალომე ზურაბიშვილის მოწოდებას აბსოლუტურად ვიზიარებ და მგონია, რომ ეს არის არა მთავარი გამოსავალი, არამედ ერთადერთი გამოსავალი. გასაგებია, რომ შესაძლოა, ციფრების ჯამი სხვადასხვანაირად გადალაგდეს, მაგრამ საარჩევნო შედეგები ყოველთვის მშრალი სოციოლოგია და წინასწარი მათემატიკა არაა, ეს ყოველთვის არის ემოციური დამოკიდებულება ადამიანების ნიჰილისტურ განწყობებზე, უბრალოდ არჩევნებზე არ მივლენ, მათ სჭირდებათ ძალის გამოსხივება და იმედის ჩასახვა. წინასწარ ვერ გავაკეთებ განცხადებას, ვიდრე არ ვიქნები მიწვეული ამ შეხვედრაზე, თუმცა ჩემთვის ნებისმიერი ფორმატი არის მისაღები და საჭირო, რომელიც ემსახურება გაერთიანებას, კონსოლიდაციას ძალების, რომელიც ემსახურება ხელისუფლების ცვლილებას, რომელიც დღეს გვყავს, მაგრამ ნებისმიერ შემთხვევაში, როცა სალომე ზურაბიშვილთან მე მივალ აუცილებლად მიხეილ სააკაშვილის შეწყალებაზეც დაველაპარაკები“, – განაცხადა ნიკა გვარამიამ.

საქართველოს პრეზიდენტმა, სალომე ზურაბიშვილმა დღეს პარლამენტში სიტყვით გამოსვლისას განაცხადა: „ქვეყანას სჭირდება დამშვიდება, დაცულობა, ამიტომ, ამ ტრიბუნიდან გთავაზობთ არსებული ჩიხიდან გამოსვლის ფორმულას და გზას, შევქმნათ მომავლის ქარტია „ერთობის პლატფორმა ევროპისთვის“.

პრეზიდენტის გამოსვლაში შეჯამებული იყო რადიკალური ოპოზიციის გზავნილები. სალომე ზურაბიშვილი დამოუკიდებელი ინსტიტუტის პოლიტიკური და პარტიული მიზნებისთვის გამოყენებას განაგრძობს, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.

ქადაგიშვილის თქმით, რადიკალური ოპოზიცია ახლა კიდევ უფრო რადიკალური გახდება.

„პრეზიდენტის გამოსვლაში შეჯამებულად იყო მოყვანილი რადიკალური ოპოზიციის, „ნაციონალური მოძრაობის“ გზავნილები. ყველა გზავნილში რადიკალური „ნაციონალური მოძრაობის“ და მიხეილ სააკაშვილის გზავნილები იყო გაერთიანებული. სამართლიანობაზე, დემოკრატიაზე, კორუფციაზე, ეკონომიკაზე როცა საუბრობდა, ერთხელაც არ დაეყრდნო ევროპული და მსოფლიოს ავტორიტეტული ორგანიზაციების დასკვნებს, რომელთა მიხედვითაც, საქართველო აღიარებული, ლიდერი ქვეყანაა სამართლიანობის, ღია მმართველობის თუ ღია და გამჭვირვალე ბიუჯეტის კუთხით არა მარტო კანდიდატ ქვეყნებთან, არამედ ევროკავშირის ბევრ ქვეყანასთან შედარებით. სალომე ზურაბიშვილის გზავნილები ოპოზიციური თემის აქტუალიზაცია იყო. დასასრულიც ვნახეთ, მან კონსტიტუციური უფლებამოსილებების გვერდზე გადადებით გამოაცხადა, რომ ევროპული ფასეულობები ჩამოვწეროთ, რა არისო. წაიკითხოს საქართველოს კონსტიტუცია, იქ წერია ევროპული ფასეულობები. ახალი პოლიტიკური პლატფორმის ჩამოყალიბების საკითხი დააანონსა. პრეზიდენტი როგორც არღვევდა კონსტიტუციას, ისე აგრძელებს კონსტიტუციის დარღვევას და დამოუკიდებელი, ნეიტრალური პრეზიდენტის ინსტიტუტის პოლიტიკური და პარტიული მიზნებისთვის გამოყენებას. სამწუხარო ფაქტია, მაგრამ რეალობაა. პრეზიდენტის გამოსვლით რაც ვიხილეთ, ეს იყო მცდელობა, ნაჯახით გაეჩეხა საქართველო შუაზე. პრეზიდენტმა დღეს ეს გააკეთა, საქართველოს ნაჯახით შუაზე გადაჭრა გადაწყვიტა. რადიკალური ოპოზიცია ახლა კიდევ უფრო რადიკალური გახდება. მან საქართველოში რადიკალიზმს საწვავი ჩაუსხა“, – განაცხადა ირაკლი ქადაგიშვილმა.

წარმოუდგენელ ამბავთან გვაქვს საქმე, როდესაც მცდელობაა, საქართველოს დაჰბრალდეს რუსეთში ტერაქტების მოწყობა. ამის ერთადერთი მიზანია, საქართველო ჩაბმული იყოს ომში, – ამის შესახებ ფრაქცია „ქართული ოცნების“ თავმჯდომარე მამუკა მდინარაძემ განაცხადა.

მდინარაძის თქმით, საქართველო არის შემდგარი სახელმწიფო, რომელსაც ძლიერი სპეცსამსახურები ჰყავს.

„ტრანსნაციონალური დანაშაული როცა იხსნება და ამაში რომელიმე ქვეყნის მმართველი პარტიის წარმომადგენლის როლი იკვეთება, ჩვენი მეგობარი თუ არამეგობარი ქვეყნის, უდავოა, რომ განმარტებები უნდა გაკეთდეს. წარმოუდგენელ ამბავთან გვაქვს საქმე, როდესაც მცდელობაა, საქართველოს დაჰბრალდეს რუსეთში ტერაქტების მოწყობა. ამის ერთადერთი მიზანია, საქართველო ჩაბმული იყოს ომში და გამოცხადდეს მხარედ. ამისთვის იყო არა მხოლოდ მოწოდებები, დაძალებებიც კი, ხან მთავრობის ნებართვით მოხალისეების თვითმფრინავების გაშვებას გვთხოვდნენ, პირდაპირი მოწოდებებიც გვახსოვს როგორც ქვეყნის შიგნით, ასევე უკრაინის კონკრეტული მაღალჩინოსნების მხრიდან. ახლა ტერაქტების მოწყობის გზით ცდილობენ, რაღაცნაირად ჩაითრიონ საქართველო ამ ამბავში. კიდევ კარგი, საქართველოს სახელმწიფო არის შემდგარი და ჰყავს ძლიერი სპეცსამსახურები. უდიდესი მადლობა მათ, ამ სპეცსამსახურებმა შექმნეს პრეცედენტი, რომ ასეთი ვითომ კარგად ორგანიზებული დანაშაულებიც კი იხსნება“, – განაცხადა მამუკა მდინარაძემ.

ამასთან, მამუკა მდინარაძეს კითხვა დაუსვეს უკრაინის საელჩოს განცხადებაზე, სადაც აღნიშნულია, რომ იმედოვნებენ, ქართული მხარე საქმის პოლიტიზებისგან თავს შეიკავებს, რაზეც მამუკა მდინარაძემ განაცხადა:

„რას ნიშნავს, პოლიტიზება არ მოხდეს, საერთოდ კომენტარი არ გავაკეთოთ? ანუ არ გავახმაუროთ ამბავი? გამოიკვეთა კონკრეტული ადამიანები, რომლებთან დაკავშირებითაც აუცილებლად უნდა გაკეთდეს განმარტებები. ქვეყანა იყო უდიდესი რისკის, საფრთხის ქვეშ, დაჰბრალებოდა რუსეთში ტერაქტების მოწყობა. არავინ ახსენებს ასაფეთქებელი მოწყობილობების იმ ნაწილს, რომელიც საქართველოში დარჩა და აქ რა იგეგმებოდა. ამაზე კიდევ ცალკე კითხვის ნიშნებია, რა იგეგმებოდა საქართველოში ასაფეთქებელი მოწყობილობებით. ეს დამატებით გამოძიებას საჭიროებს, გარკვეული მინიშნება ალბათ არის ამასთან დაკავშირებით. საქართველო, უნდა დაფიქსირებულიყო, როგორც კონფლიქტის მხარე, ტერაქტების მომწყობი და ხმა არ ამოვიღოთ, ამას გვთავაზობენ?“, – განაცხადა მამუკა მდინარაძემ.

ამასთან, მდინარაძის თქმით, სუს-ის მიერ გავრცელებულ ინფორმაციასთან დაკავშირებით წარმოუდგენელ არგუმენტებს ისმენს ოპოზიციის მხრიდან.

„ამავდროულად, ჩვენ ოპოზიციისგან წარმოუდგენელი არგუმენტები გვესმის, ალბათ რუსეთის სპეცსამსახურებიდან მიიღეს ინფორმაციაო. ასეთი სისულელე რატომ უნდა თქვა. რუსეთის სპეცსამსახურებს რომ ინფორმაცია ჰქონოდა, რატომ მისცემდნენ ინფორმაციას ქართულ სპეცსამსახურებს, გადავიდოდა საზღვარზე და შემდეგ გახსნიდნენ საქმეს, მიიწერდნენ. ბევრ ისეთ ამბავს გამოაცხადებდნენ, რაც აწყობთ. სისულელეს იგონებენ, ოღონდ სიტყვა რუსული ახსენონ და მესიჯბოქსში ჩაჯდნენ. მათი ლოგიკით, რა კარგი ხალხი ყოფილან რუსეთის სპეცსამსახურების წარმომადგენლები, რომ ზრუნავენ, საქართველოს არ დაჰბრალდეს რუსეთში ტერაქტის მოწყობა, „ნაცების“ ლოგიკა ასეთი გამოვიდა, ასეთი სიგიჟეები არ უნდა ილაპარაკონ“, – აღნიშნა მამუკა მდინარაძემ.

სახელმწიფო უსაფრთხოების სამსახურმა 5 თებერვალს გაავრცელა განცხადება, რომელშიც აღნიშნულია, რომ „სუს-ის კონტრტერორისტულმა ცენტრმა ოპერატიულ-სამძებრო და საგამოძიებო მოქმედებების შედეგად ამოიღო რამდენიმე ერთეული ასაფეთქებელი მოწყობილობა და დიდი რაოდენობით ასაფეთქებელი ნივთიერება, რომელთა გადაადგილებასაც ორგანიზებას უწევდა უკრაინის მოქალაქე ანდრეი შარაშიძე“.

სუს-ის განცხადებით, „საქმის დეტალები იძლევა ეჭვის საფუძველს, რომ საქართველოს ტერიტორიის გამოყენება, საქართველოს მოქალაქეების მრავლად ჩართვა ემსახურებოდა იმ მოსაზრების შექმნას, რომ ტერორისტული აქტები საქართველოს დაჰბრალებოდა“.

სუს-ის ინფორმაციასთან დაკავშირებით განცხადება გაავრცელა უკრაინის საელჩომ, სადაც აღნიშნულია: „ვამოწმებთ სუს-ის ბრიფინგზე გავრცელებულ ინფორმაციას, ვარკვევთ ყველა გარემოებას, ვიმედოვნებთ, ქართული მხარე საქმის პოლიტიზებისგან თავს შეიკავებს.