ჩვენს ევროპელ კოლეგებს არ აქვთ მოლოდინი, რომ „ქართული ოცნების“, ივანიშვილის რეჟიმის პირობებში რაიმე სასიკეთო ცვლილება მოხდება, – ამის შესახებ პარტია „ერთიანი ნაციონალური მოძრაობის“ საერთაშორისო მდივანმა, ზურაბ ჭიაბერაშვილმა ევროკავშირის წარმომადგენლობის ოფისში შეხვედრის დასრულების შემდეგ განაცხადა.

ზურაბ ჭიაბერაშვილის განცხადებით, შეხვედრაზე უკლებლივ ყველა ოპოზიციური პარტიისგან ხაზგასმული იყო არჩევნების სამართლიან და თავისუფალ გარემოში ჩატარების საჭიროებაზე.

„ნაციონალური მოძრაობის“ ხედვა არის, რომ 9 ნაბიჯის გადადგმა ევროკავშირის წევრობისკენ დაიწყება არჩევნებში ჩვენი გამარჯვების შემდეგ. 2024 წლის არჩევნები არის გადამწყვეტი იმისათვის, რომ ქვეყანაში ჩვენი მოქალაქეების და თითოეული ადამიანის ცხოვრება გაუმჯობესდეს და ღირსეული და მაღალანაზღაურებადი სამუშაო ადგილები შეიქმნას.

სწორედ ამ კონტექსტში უკლებლივ ყველა ოპოზიციური პარტიისგან იყო ხაზგასმული არჩევნების სამართლიან და თავისუფალ გარემოში ჩატარებაზე, რასაც გამოხმაურება ჰქონდა ჩვენი ევროპელი კოლეგებისგან. „ნაციონალური მოძრაობა“ ამ 9 პუნქტს მხოლოდ ამ კონტექსტში განიხილავს, რომ ეს 9 ნაბიჯი არის საშუალება იმისა, რომ ჩვენი მოქალაქეების ცხოვრება შეიცვალოს უკეთესობისკენ და ამას ჩვენ გავაკეთებთ არჩევნებში გამარჯვების შემდეგ“, – განაცხადა ზურაბ ჭიაბერაშვილმა.

ინფორმაციისთვის, ევროკავშირის წარმომადგენლობის ოფისში, ევროკომისიის წარმომადგენელთან „ქართული ოცნებისა” და ოპოზიციის წარმომადგენლების შეხვედრა გაიმართა.

თბილისის მერმა კახა კალაძემ მედიასთან შესაბამისი კითხვის საპასუხოდ განაცხადა, რომ პრემიერ-მინისტრად თავისი კანდიდატურის დაყენება 2025 წლამდე ვერ მოხდება, რადგან არჩეული  მერია და ბევრი მნიშვნელოვანი პროექტია დასასრულებელი.

მისივე განმარტებით, აღნიშნული თანამდებობა დედაქალაქში მცხოვრებლების წინაშე დიდ პასუხისმგებლობას აკისრებს.

„არაფერია გამორიცხული, ყველაფერი წინაა, თუმცა როგორც იცით,  2025 წლამდე მერობის უფლებამოსილება მაქვს, რაც უდიდესი პასუხისმგებლობაა, ვემსახურო ამ ქალაქში მცხოვრებ ადამიანებს.  ბევრი პროექტი გვაქვს დაწყებული, სხვადასხვა რეფორმა არის განსახორციელებელი. დედაქალაქთან დაკავშირებით სამომავლოდ საკმაოდ ამბიციური გეგმები გვაქვს,“- აღნიშნა კახა კალაძემ.

მახსოვს, პარლამენტიც ფარსი იყო და ვინაიდან პარლმენტში ვართ, ყველაფერი უნდა გავაკეთოთ, რათა ამომრჩეველს გავაგებინოთ ის განსხვავებები, რაც ოპოზიციასა და „ქართულ ოცნებას“ შორის არის, – ამის შესახებ ოპოზიციონერმა დეპუტატმა, თეონა აქუბარდიამ საქართველოს პირველ არხს განუცხადა.

მისივე თქმით, არავინ არის მიამიტი, რომ სჯეროდეს, „ქართული ოცნება“ ცხრა რეკომენდაციას შეასრულებს.

„პოლიტიკა კომპრომისების ხელოვნებაა და საკუთარი პოზიციები უნდა გავახმოვანოთ. პარლამენტში მუშაობა ნიშნავს ყველა შესაძლო გზის გამოყენებას, მათ შორის ლაპარაკის ხარჯზე, რათა საკუთარი იდეების გატანა მოხდეს“, – განაცხადა თეონა აქუბარდიამ.

„ნაცების“ პატრონები გადმოინაცვლებენ, გვარამიას პლატფორმას დააფინანსებენ და ჩემს „ხაბეს“ რადიკალიზმში ეს ჩაენაცვლება – ჩემი „ხაბე“ ყველამ გაწირა და ეს არ არის სწორი ფორმატი. „ხაბე“, გამაგრდი! – ამის შესახებ „ქართული ოცნების” დეპუტატმა, ირაკლი ზარქუამ ჟურნალისტებთან საუბრისას განაცხადა.

მან „ერთიანი ნაციონალური მოძრაობის“ თავმჯდომარის პოსტზე ლევან ხაბეიშვილის ყოფნა შეაფასა და აღნიშნა, რომ „ხაბეიშვილი რა ბედოვლათიც მანამდე იყო, ის არის ახლაც“.

როგორც ზარქუა აღნიშნავს, „სტრატეგია აღმაშენებლის“ ლიდერი გიორგი ვაშაძე პოპულისტია და რუსეთიდან გასულ კომპანიებთან დაკავშირებით გაკეთებული განცხადებებით „თავის მრევლს აბოლებს“.

მისივე თქმით, „გამარჯვების კოალიცია“, რომლის შემადგენლობაშიც „ერთიანი ნაციონალური მოძრაობა“ და „სტრატეგია აღმაშენებელი“ შედის, ლუზერების გაერთიანებით, „ჩიხუახუა” ორი“ გამოდის.

„დღეს „ნაცებს“ წლისთავი აქვთ. ჩემს ბაჯაღლო „ხაბეს“ თავისი პარტიის ხელისუფლებაში მოსვლის შემდეგ, რამეთუ მელია ჩამოაგდო, გააერთიანა მთელი „სანაცეთი“ ჩვენი ქვეყნის, ძლევამოსილი არმიით შემდეგ შეუტია და დაიხსნა თავისი ბელადი, შემდეგ დაიმორჩილა ბუნების ძალები და ახლა ერთიანი ძალებით უტევს არჩევნებს, რომ უნდა გაიმარჯვოს. “შუტკა”! რა უნდა გაეკეთებინა?! რაც იყო ბედოვლათი მანამდე, ის არის ახლაც. იმდენად სამარცხვინო შედეგებით არის, რომ უკვე მათი ტელევიზიებიც კი ემიჯნება. “მთავარი არხის” ხელმძღვანელი ვინც არის ამბობდა, ჩემს გარემოცვაში ყველა დასცინისო. ეს მიიღეს. მე კი არ დავცინი, ოქროს გული აქვს, მაგას ვენაცვალე, მაგრამ პოლიტიკურად ღირსეული თავმჯდომარეა, აი, ამ პარტიის. აბა, თქვენ იცით, ერთმანეთს მოუწყვეთ კიდე რევოლუციები, დაიყავით! ვაშაძე დაისვი თავზე, პოპულისტი. ახლა ახალი რაღაც მოიფიქრეს. ევროინტეგრაციაში ხელი მოეცარათ, ვერაფერს შვრებიან, ბელადიც ვერ დაიხსნეს და რა ქნეს? მოიფიქრეს, ახლა რუსეთიდან რაც გავიდა კომპანიები, ისინი არც ერთი არ შემოსულაო. ბიჭო, BMW-ს ცენტი აქ არის, „მერსედესის“ ცენტრი აქ არის, „ტოიოტას“ ცენტრი აქ არის, H&M აქ არის, მთელი ბრენდები აქ არის და დუბლირებულად ვინ შემოვიდოდა აქ?! გიჟია გეუბნებით და „აბოლებს“ ახლა თავის მრევლს შიგნით. სამუშაო ადგილები მეტი უნდა შეგვექმნაო. ვინ ამბობს ამას? – ლუზერი ვაშაძე. ახლა ამ ლუზერების გაერთიანებით „ჩიხუახუა” ორი“ გამოდიან ესენი. როგორც მივხვდი, მათმა პატრონებმა ხელი ჩაიქნიეს „ნაცებზე“. არ გამოდის არაფერი და ახლა, ჩემი აზრით, ამათი პატრონები გადმოინაცვლებენ და გვარამიას პლატფორმას დააფინანსებენ და ეს ჩაენაცვლება რადიკალიზმში ჩემს „ხაბეს“. რა უნდა ვქნა, არ ვიცი. სად დავასაქმოთ ეს კაცი?! ჩემი „ხაბე“ ყველამ გაწირა და ეს არ არის სწორი ფორმატი. „ხაბე“, გამაგრდი!“ – განაცხადა ზარქუამ.