შავით თეთრზე წერია, რომ მისამართი უნდა გაასწოროთ, გზები არ უნდა აგერიოთ, თუ ვინმე აპირებს პარტიიდან გასვლას და სხვა პარტიის გაკეთებას, მოუწევს კონკრეტული ბედის გაზიარება, – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა მიხეილ სააკაშვილის ფეისბუქპოსტის კომენტირებისას განაცხადა.

როგორც ხაბეიშვილმა აღნიშნა, დარწმუნებულია, რომ მიხეილ სააკაშვილის განცხადება მიემართება მათ, ვინც სხვადასხვა ეთერს და დროს იყენებენ იმისთვის, რომ ლანძღონ „ნაციონალური მოძრაობა“.

„პოლიტიკურ პროცესებში ჩართულია სააკაშვილი. ჩვენ კომუნიკაცია გვაქვს ყველა თემაზე, რომელიც ეხება საქართველოს მოქალაქეს, მათ ინტერესებს. ცხადია, უყურებს პრეზიდენტი სააკაშვილი სხვადასხვა პოლიტიკური ლიდერის განცხადებებს, მათ შორის იმ ადამიანების, რომლებიც რამდენიმე კვირის ან თვის წინ „ნაციონალური მოძრაობის“ სახელით საუბრობდნენ და დღეს მათი პირადი პოზიცია აბსოლუტურად აცდენილია ჩვენი ქვეყნის მოქალაქის ინტერესებს. გარკვეული ადამიანების ინტერესი არის აბსოლუტურად სხვა, ჩვენდა სამწუხაროდ. ამიტომ, მე მგონი, ამას ის ადამიანები მიიღებენ, ვინც სხვადასხვა ეთერს და დროს იყენებენ იმისთვის, რომ ლანძღონ „ნაციონალური მოძრაობა“. ყველა ჯერზე ხედავს პრეზიდენტი სააკაშვილი, კონკრეტული ადამიანები ლანძღავენ მარტო „ნაციონალურ მოძრაობას“. მანდ შავით თეთრზე წერია, რომ მისამართი უნდა გაასწოროთ, ჩვენთვის დასამარცხებელი მთავარი მტერი არის ბიძინა ივანიშვილი, „რუსული ოცნება“ და, შესაბამისად, გზები არ უნდა აგერიოთ, ვინმე თუ აპირებს პარტიიდან გასვლას და სხვა პარტიის გაკეთებას, მოგიწევთ კონკრეტული ბედის გაზიარება. არ მინდა, მე სახელის და გვარების დასახელება, არ არის ჩემს ინტერესში“, – განაცხადა ლევან ხაბეიშვილმა ტელეკომპანია „ფორმულას“ ეთერში.

მისივე თქმით, პარტიის შიგნით ძალიან ჯანსაღი სიტუაციაა.

„არსებობს სამდივნო, პოლიტიკური საბჭო, უამრავი ახალი ადამიანია. ძალიან ცუდია, რომ კონკრეტული ადამიანები ბიძინა ივანიშვილთან და „რუსულ ოცნებასთან“ ბრძოლის ნაცვლად სხვა გეზს იღებენ. შესაბამისად, მე დარწმუნებული ვარ, რომ ეს ეხება ამას. პოლიტიკა არის საჯარო, თუ ვინმეს უნდა ბიძინა ივანიშვილის წინააღმდეგ ბრძოლა, ჩვენი კარი არის ღია“, – აღნიშნა ხაბეიშვილმა.

საქართველოს ყოფილმა პრეზიდენტმა, მიხეილ სააკაშვილმა სოციალურ ქსელში პოსტი გამოაქვეყნა, რომლითაც „ნაციონალური მოძრაობის“ წევრებს მიმართა. როგორც სააკაშვილი წერს, ვინც დაადგება ბოკერიას გზას, განულდება. ყოფილი პრეზიდენტის პოსტს გამოეხმაურა „ევროპული საქართველოს“ თავმჯდომარე გიგა ბოკერია, რომელმაც განაცხადა: „შავრაზმელობა, პოპულიზმი, ფარისევლობა, ბელადომანია როცა ავტომატურად მისაღები ხდება დიდი ოპოზიციური ძალისთვის, ეს არის კატასტროფა ჩვენი პოლიტიკური ცხოვრებისთვის, რაც უნდა შეიცვალოს. ამ თვალსაზრისით ჩვენი გზები გაყოფილია და ვერასდროს შეერთდება“.

ჩვენ ნათლად ვნახეთ, რომ ქართველი ხალხი საკუთარ თავს ევროპასთან ერთად ხედავს. ამის შესახებ აშშ-ის სახელმწიფო დეპარტამენტის პრესსპიკერმა ვედანტ პატელმა ბრიფინგზე განაცხადა.

სახელმწიფო დეპარტამენტის სპიკერი მოუწოდებს მთავრობას და ყველა მხარეს, იმუშაონ საჭირო რეფორმების განხორციელებისთვის, ევროკავშირის კანდიდატის სტატუსის მისაღწევად.

“ქართველი ხალხი ძალიან მკაფიო იყო. ჩვენც რაც ნათლად ვნახეთ არის ის, რომ ქართველი ხალხი საკუთარ თავს ევროპასთან ერთად ხედავს და ევროკავშირმა საქართველოს ნათელი საგზაო რუკა მისცა, რათა კანდიდატის სტატუსს მიაღწიოს. საქართველოს მთავრობას და ყველა მონაწილე მხარეს მოვუწოდებთ, რომ გაერთიანდნენ და ამ მიზნისთვის იმუშაონ, განსაკუთრებით საჭირო რეფორმების განხორციელებისთვის ევროკავშირის კანდიდატის სტატუსის მისაღწევად. გაერთიანებული საქართველოს საჭიროება ასე აუცილებელი არასდროს ყოფილა,” – განაცხადა პატელმა.

საქართველოს კანდიდატის სტატუსის შესახებ გადაწყვეტილება პოლიტიკური საკითხია და ჩვენ ვითხოვთ ევროკავშირისგან ამ პოლიტიკურ ვალდებულებას, გადაწყვეტილებას, რომელიც შემოდგომაზე უნდა გაკეთდეს, – ამის შესახებ უნგრეთის საგარეო საქმეთა მინისტრმა, პიტერ სიიარტომ საქართველოს საგარეო საქმეთა მინისტრთან, ილია დარჩიაშვილთან გამართულ ერთობლივ პრესკონფერენციაზე განაცხადა.

როგორც სიიარტომ აღნიშნა, საქართველომ შემოდგომაზე უნდა მიიღოს კანდიდატის სტატუსი. მისივე თქმით, საქართველომ ამისთვის ყველაფერი გააკეთა.

„ჩვენ დიდ მნიშვნელობას ვანიჭებთ კავკასიის რეგიონთან თანამშრომლობას, რისი დასტურიც არის ის ფაქტი, რომ 11-12 ოქტომბერს თბილისში, საქართველოსა და უნგრეთის მთავრობის წევრების მონაწილეობით, ერთობლივი სამიტი გაიმართება. სამიტის ფარგლებში ხელი მოეწერება საინვესტიციო პროგრამას, ასევე სტიპენდიის გახანგრძლივების შესახებ შეთანხმებას. ჩვენ შეხვედრაზე ასევე განვიხილეთ საქართველოსთვის ევროკავშირის კანდიდატი ქვეყნის სტატუსის მინიჭების საკითხი. ვთვლით, რომ საქართველომ შემოდგომაზე უნდა მიიღოს კანდიდატის სტატუსი. საქართველომ ყველაფერი გააკეთა ამისთვის. საქართველოს კანდიდატის სტატუსის შესახებ გადაწყვეტილება პოლიტიკური საკითხია და ჩვენ ვითხოვთ ევროკავშირისგან ამ პოლიტიკურ ვალდებულებას, პოლიტიკურ გადაწყვეტილებას, რომელიც შემოდგომაზე უნდა გაკეთდეს“, – განაცხადა პიტერ სიიარტომ.

არასერიოზული იქნება, რომ პატიმრობაში და საავადმყოფოში მყოფი ადამიანის განცხადებებზე სერიოზული პოლიტიკური მსჯელობა გავმართოთ. მით უმეტეს, როდესაც სააკაშვილი ხან ამბობს, რომ პოლიტიკიდან გავიდა, ხან ბრუნდება, როგორც პრემიერ-მინისტრობის კანდიდატი, – ამის შესახებ პარლამენტის ვიცე-სპიკერმა, არჩილ თალაკვაძემ მიხეილ სააკაშვილის Facebook-პოსტის შეფასებისას განაცხადა.

თალაკვაძის თქმით, მიხეილ სააკაშვილის მხრიდან ბევრი ურთიერთგამომრიცხავი განცხადება გვაქვს მოსმენილი.

„ამიტომ არასერიოზული იქნება, რომ ახლა საავადმყოფოში მყოფი ადამიანის რაღაც პოლიტიკურ განცხადებებზე მსჯელობა გავმართოთ. რა თქმა უნდა, მეორე მხრივ, სადავოა, სააკაშვილის გზა ჯობია თუ ბოკერიასი. მე თუ მკითხავთ, საქართველოსთვის ის გზა ჯობია, რომელსაც ახლა მიჰყვება ქვეყანა. ესაა გზა, სადაც ადამიანის უფლებები დაცულია, სადაც სახელმწიფო, პირველ რიგში, თავის მოქალაქეს ანიჭებს პრიორიტეტს, სადაც საქართველოს ხელისუფლება იცავს ეროვნულ ინტერესებს და სადაც საქართველოს აქვს რეალური წარმატებები ევროინტეგრაციის მიმართულებით. მეორეა, რომ დღეს ბევრი საწინააღმდეგო პროპაგანდის გავრცელებას ცდილობს, მაგრამ დარწმუნებული ვარ, დრო ყველაფერს წერტილს დაუსვამს და, საბოლოო ჯამში, შეფასებები ობიექტური იქნება და ის ასახავს სიმართლეს. ეს სიმპტომი, რაც შიდაპარტიული რღვევის ნაწილია, უფრო სერიოზულ კომენტარს, არ მგონია, იმსახურებდეს. უკვე არასერიოზულად მიმაჩნია, რომ თანმიმდევრული მსჯელობა და ანალიზი გავმართოთ იმ ადამიანზე, ვინც ბევრი ასეთი ურთიერთგამომრიცხავი განცხადება გააკეთა. ის არის პატიმრობაში, ისაა პაციენტი, მკურნალობს, ამიტომ სჯობს, ექიმებს საშუალება მივცეთ, მის ჯანმრთელობაზე იზრუნოს“, – განაცხადა თალაკვაძემ.

საქართველოს ყოფილმა პრეზიდენტმა, მიხეილ სააკაშვილმა სოციალურ ქსელში პოსტი გამოაქვეყნა, რომლითაც „ნაციონალური მოძრაობის“ წევრებს მიმართა. მისი თქმით, ვინც დაადგება ბოკერიას გზას, განულდება. ამას გამოეხმაურა თავად „ევროპული საქართველოს“ თავმჯდომარეც. გიგა ბოკერიას თქმით, როცა შავრაზმელობა, პოპულიზმი, ფარისევლობა, ბელადომანია ავტომატურად მისაღები ხდება დიდი ოპოზიციური ძალისთვის, ეს არის კატასტროფა ჩვენი პოლიტიკური ცხოვრებისთვის.