„მიუხედავად იმისა, რომ ბოლო წლებში ბევრი კარგი საქმე გაკეთდა, ჯერ კიდევ არსებობს პრობლემები, რომლებსაც მოგვარება სჭირდება“, – ამის შესახებ დედაქალაქის მერმა, კახა კალაძემ მედიასთან ისაუბრა.

თბილისის მერმა ირაკლი კობახიძეს პრემიერ-მინისტრის თანამდებობაზე დამტკიცება მიულოცა და წარმატებები უსურვა.

„ირაკლი არის ძალიან კომპეტენტური ადამიანი, ძლიერი პოლიტიკოსი. მინდა წარმატებები ვუსურვო მას პრემიერ-მინისტრის თანამდებობაზე. დარწმუნებული ვარ, იქნება წარმატებული პრემიერი.

გუშინ, მან პარლამენტში ისაუბრა იმ გამოწვევებზე, სირთულეებზე, რომელიც დასაძლევი გვაქვს. მიუხედავად იმისა, რომ ბოლო წლების განმავლობაში ბევრი კარგი საქმე გაკეთდა, ცხადია ჯერ კიდევ არსებობს პრობლემები, რომლებსაც მოგვარება სჭირდება. იმ კომპეტენციით და შემართებით, რომელიც ირაკლი კობახიძეს გააჩნია, ერთიანი ძალისხმევით, ყველა ერთად შევძლებთ ამ პრობლემების გადალახვას“, – აღნიშნა კახა კალაძემ.

ჩემი ახალი სტატუსიდან გამომდინარე, აუცილებლად მომიწევს გამყოფ ხაზთან ჩასვლა, ეს სტატუსთან არის არსებითად დაკავშირებული, – ამის შესახებ პრემიერ-მინისტრმა ირაკლი კობახიძემ განაცხადა.

კობახიძის თქმით, აპირებს, ჩევიდეს საოკუპაციო ხაზთან.

„მომიწევს ადგილზე ვითარების გაცნობა. დღეს გვქონდა საუბარი საპარლამენტო განხილვის დროს იმ საჭიროებებზე, რომლებიც აქვს გამყოფ ხაზთან მცხოვრებ მოსახლეობას. ბუნებრივია, ამით უნდა დავინტერესდეთ და, მათ შორის, ადგილზე ვიზიტიც იქნება მნიშვნელოვანი, რომ მათ წინაშე არსებული პრობლემები გადაიჭრას“, – განაცხადა კობახიძემ.

საქართველოს პრეზიდენტმა, სალომე ზურაბიშვილმა პრემიერ-მინისტრის თანამდებობაზე ირაკლი კობახიძის დანიშვნის შესახებ განკარგულებას ხელი მოაწერა.

ინფორმაციას საქართველოს პრეზიდენტის ადმინისტრაცია ავრცელებს.

„საქართველოს პრეზიდენტმა ხელი მოაწერა პრემიერ-მინისტრის თანამდებობაზე ირაკლი კობახიძის დანიშვნის შესახებ განკარგულებას, რათა სტიქიასთან საბრძოლველად არ შეიქმნას დაბრკოლება, დროულად გამოიცეს შესაბამისი აქტები და მოხდეს რეაგირება”, – აღნიშნულია პრეზიდენტის ადმინისტრაციის განცხადებაში.

საქართველოს პარლამენტმა მთავრობის განახლებულ შემადგენლობას ნდობა გამოუცხადა. ირაკლი კობახიძის ხელმძღვანელობით მინისტრთა კაბინეტი 84 ხმით, 10-ის წინააღმდეგ დამტკიცდა.

პრემიერ-მინისტრმა ირაკლი კობახიძემ ის მიზეზები დაასახელა, რის გამოც, მისი აზრით, პრეზიდენტი სალომე ზურაბიშვილი მთავრობისგან საგარეო ვიზიტებზე თანხმობას არ იმსახურებს.

როგორც ირაკლი კობახიძემ აღნიშნა, მთავრობისთვის მნიშვნელოვანია, რომ სალომე ზურაბიშვილმა სახელმწიფოს ინტერესები არ დააზიანოს.

„ორი მიზეზი, რატომაც სალომე ზურაბიშვილი არ იმსახურებს თანხმობას საგარეო ვიზიტებზე. ერთი არის ის, რომ მან შეგნებულად არაერთგზის დაარღვია კონსტიტუცია, ეს არის პირველი მიზეზი, მეორე მიზეზი არის ის, რომ ის მთელი ამ პერიოდის განმავლობაში აწარმოებდა აგიტაციას კანდიდატის სტატუსის წინააღმდეგ. ბოლო დღეების ჩათვლით ვერ ვათქმევინეთ მას, რომ საქართველო კანდიდატის სტატუსს იმსახურებდა. ასეთ ვითარებაში, რა თქმა უნდა, არასწორი იქნება. ჩვენ სახელმწიფო ინტერესებზე ვზრუნავთ. არ გვაინტერესებს სალომე ზურაბიშვილი სად გაემგზავრება და სად არა. ეს არ არის ჩვენთვის ამოსავალი წერტილი. ჩვენთვის მნიშვნელოვანია, რომ სალომე ზურაბიშვილმა სახელმწიფოს ინტერესები არ დააზიანოს“,-განაცხადა კობახიძემ.

მან არ გამორიცხა, რომ სალომე ზურაბიშვილმა ვიზიტი მთავრობის თანხმობის გარეშე კვლავ გააგრძელოს.

„მან არაერთხელ დაარღვია კონსტიტუცია, შეიძლება გააგრძელოს ამ პრაქტიკის მიხედვით მოქმედება. ეს არის მისი საქმე, ამით ის ქვეყანას ვერ დააქცევს. არ იქნება კარგი, ძალიან ცუდი იქნება, თუმცა, ის ამ კუთხით სახელმწიფოს პრობლემებს ვერ შეუქმნის“, – განაცხადა კობახიძემ.

ოპოზიცია არის ძალიან სუსტი, სამწუხაროდ, ოპოზიცია საუბრობს არა ფაქტებით, არამედ ზოგადი წინადადებებით, რაც არ არის საკმარისი იმისთვის, რომ ეფექტური კონტროლი განხორციელდეს მთავრობის საქმიანობაზე სხვადასხვა კუთხით, მათ შორის კორუფცია, ეფექტიანი, შესრულებულის სამუშაოების ხარისხი, – ამის შესახებ პრემიერ-მინისტრმა, ირაკლი კობახიძემ განაცხადა.

კობახიძის თქმით, მთავრობამ თვითონ უნდა განახორციელოს კონტროლი საკუთარ თავსა და უწყებებზე.

„ასეთ ვითარებაში ჩვენ თვითონ უნდა გავაკონტროლოთ საკუთარი საქმიანობა, საკუთარი უწყებების საქმიანობა, ამას ვგულისხმობდი, როცა ვსაუბრობდი თვითკონტროლზე. იქ, სადაც ოპოზიცია არის სუსტი, ჩვენ თვითონ უნდა გავაკონტროლოთ საკუთარი თავი და ჩვენი უწყებების საქმიანობა“, – განაცხადა კობახიძემ.

ირაკლი კობახიძე საქართველოს პრემიერ-მინისტრის თანამდებობაზე პირველი ვიზიტით ბრიუსელში ჩავა. ამის შესახებ კობახიძემ ჟურნალისტებს პარლამენტში გამართული კენჭისყრის შემდეგ განუცხადა, სადაც საქართველოს მთავრობას ირაკლი კობახიძის მეთაურობით ნდობა გამოუცხადეს.

ახალი პრემიერ-მინისტრის ბრიუსელში ვიზიტი 20-21 თებერვალს შედგება.

„პრინციპში, უკვე დაგეგმილია, 20-21 თებერვალს არის დაგეგმილი ვიზიტი ბრიუსელში. ეს ეხება როგორც ევროკავშირს, ასევე ნატო-ს. უკვე არის გაწერილი დღის წესრიგიც. შესაბამისად, პირველი ვიზიტი განხორციელდსება ბრიუსელში“, – აღნიშნა კობახიძემ.