ყველამ იცის, რომ სალომე ზურაბიშვილი კოლექტიური „ნაცმოძრაობის“ იმედით არღვევს კონსტიტუციას. ეს იმედი რომ არ ჰქონოდა, რა თქმა უნდა, ასეთ რისკზე არ წავიდოდა, – ამის შესახებ „ქართული ოცნების“ თავმჯდომარემ და საპარლამენტო უმრავლესობის ლიდერმა გადაცემაში „იმედი LIVE“ განაცხადა. ირაკლი კობახიძემ მმართველი გუნდის მიერ პრეზიდენტის იმპიჩმენტის პროცედურის ინიცირების მიზეზი კიდევ ერთხელ განმარტა.

„მიზანი არის მარტივი – ჩვენ უნდა დავიცვათ საქართველოს კონსტიტუცია. რა თქმა უნდა, ეს არის ჩვენი პასუხისმგებლობა ქვეყნის ძირითადი კანონის წინაშე, რომ მაქსიმალური პატივისცემა გამოვავლინოთ ამ დოკუმენტის მიმართ. როდესაც ასე უხეშად ირღვევა საქართველოს კონსტიტუცია, ამის რეაგირების გარეშე დატოვება იქნებოდა უპასუხისმგებლო ნაბიჯი მმართველი გუნდის მხრიდან. აქედან გამომდინარე, ჩვენი ერთადერთი მოტივაცია არის სწორედ ეს, რომ უზრუნველვყოთ საქართველოს კონსტიტუციის დაცვა“, – განაცხადა კობახიძემ.

„ჩინეთ-საქართველოს ურთიერთობის განვითარების შესაძლებლობები“ – ამ სახელწოდებით თბილისში ჩინეთის საელჩოს, სტრატეგიული ანალიზის ცენტრისა და ორგანიზაცია „ჯეოქეისის“ თანამშრომლობით კონფერენცია გაიმართა. შეხვედრის მიზანი ჩინეთ-საქართველოს შორის სამომავლო თანამშრომლობის ახალი შესაძლებლობების აღმოჩენა და სხვადასხვა სფეროში ორმხრივი თანამშრომლობის ხელშეწყობა იყო.

კონფერენციაზე გამომსვლელებმა იმსჯელეს ჩინეთსა და საქართველოს შორის ურთიერთობების დამყარების ახალ გზებთან დაკავშირებით. კონფერენციაზე არაერთხელ აღინიშნა, რომ გლობალური გამოწვევების ფონზე, რომელიც არის რუსეთსა და უკრაინას შორის მიმდინარე ომიდან გამომდინარე, მნიშვნელოვანი როლი უკავია ახალი ურთიერთობების ჩამოყალიბებასა და შუა დერეფნის განვითარებას, საქართველოს კი ამ მხრივ  სასიცოცხლოდ მნიშვნელოვანი როლი აქვს.

ჩინეთის ელჩმა კონფერენციაზე აღნიშნა, რომ საქართველოს ასევე,  მნიშვნელოვანი როლი აქვს ჩინეთსა და ევროპას შორის ლოჯისტიკური ურთიერთობების გამყარებაში.

“ლოჯისტიკური შესაძლებლობების დივერსიფიკაცია ჩინეთსა და ევროპას შორის ძალიან მნიშვნელოვანია „სარტყლისა და გზის“ ინიციატივისთვის, შუა დერეფანი მნიშვნელოვანია ჩინეთ-ევროპის ლოჯისტიკისთვის, რადგან ჩვენ არ გვაქვს სხვა არჩევანი, მხოლოდ ჩრდილოეთის ხაზი.

ეს ნიშნავს, რომ ტრანსპორტირების უსაფრთხოება ჩინეთსა და ევროკავშირს შორის არ არის ისეთი, როგორიც უნდა იყოს. ასე რომ, შუა დერეფანი, შესაძლოა, იყოს ძალიან მნიშვნელოვანი. შუა დერეფანი არ არის მხოლოდ ლოგისტიკა, ჩვენ გვსურს, სარგებელი მივიღოთ ტურიზმიდანაც. როგორც ჩინეთში ვამბობთ, თუ გინდათ, გამდიდრეთ, პირველ რიგში, ააშენეთ გზები. ასე რომ, შუა დერეფანი მნიშვნელოვანია საქართველოს სამომავლო კეთილდღეობისთვის“, – განაცხადა ჟურნალისტებთან საუბარში ჩინეთის ელჩმა.

ამასთან, როგორც საქართველოში ჩინეთის ელჩმა აღნიშნა, კონფერენცია, რომელიც დღეს თბილისში იმართება, ეხება „ერთი სარტყელისა და ერთი გზის“ ინიციატივის მეათე წლისთავს, ჩინეთის მოდერნიზაციას და ახალ შესაძლებლობებს ჩინეთისა და საქართველოს ურთიერთობებში.

„ეს ძალზეც მნიშვნელოვანია, რადგან სულ რაღაც ერთი თვის წინ ჩინეთმა და საქართველომ გამოაქვეყნეს შეთანხმება სტრატეგიული პარტნიორობის შესახებ. ეს ნიშნავს, რომ ორმხრივი ურთიერთობები ახალ ეტაპამდე გაიზარდა. ეს ნიშნავს მეტ ინვესტიციებს, კონტაქტებს, განსაკუთრებით ეს ეხება შუა დერეფანს, „ერთ გზას და ერთ სარტყელს“, რომელიც გაძლიერდა ახალ დონემდე. ჩემი აზრით, ეს მნიშვნელოვანია არა მხოლოდ ჩინეთისთვის, არამედ საქართველოსთვისაც“, – განაცხადა ელჩმა.

როგორც ჭოუ ციენმა განმარტა, ჩინურ კომპანიებს არ აქვთ პრობლემა, ჩაერთონ ანაკლიის პორტის მშენებლობაში ან სხვა პროექტებში.

„ზოგადად რომ ვთქვათ, ყველა ინფრასტრუქტურული პროექტის, „სარტყელისა და გზის“ და „შუა დერეფნის“ მიმართ ჩვენ, ჩინეთის კომპანიებსა და ჩინურ საწარმოებს გვაქვს ინტერესები. ჩვენ თუ გვაქვს კარგი პირობები, ჩინურ კომპანიებს არ აქვთ პრობლემა, ჩაერთონ ანაკლიის პორტის მშენებლობაში ან სხვა პროექტებში“, – აღნიშნა ჭოუ ციენმა.

ელჩმა განაცხადა რომ, ჩინეთი მხარს უჭერს საქართველოს ტერიტორიულ მთლიანობას, ხოლო სტრატეგიული პარტნიორობის შეთანხმების ტექსტის შესახებ „ზოგიერთებს“ საზოგადოება „მიზანმიმართულად შეჰყავთ შეცდომაში“.

„ზოგიერთებს მიზანმიმართულად შეჰყავთ საზოგადოება შეცდომაში დოკუმენტთან დაკავშირებით. ჩვენ ყოველთვის ვუჭერდით მხარს საქართველოს ტერიტორიულ მთლიანობას და ეს ორი ქვეყნის მთავრობას შორის გაფორმებულ არაერთ შეთანხმებაშია გამეორებული. 

იყო კითხვები, თუ რატომ შეუერთდა საქართველო „გლობალური უსაფრთხოების ინიციატივას“. იმიტომ, რომ ამ ძალიან მნიშვნელოვანი ინიციატივის მნიშვნელოვანი ნაწილი ეხება გაეროს ქარტიისა და პრინციპების პატივისცემას. ეს ნიშნავს, რომ ჩინეთი პატივს სცემს ყველა ქვეყნის სუვერენიტეტსა და ტერიტორიულ მთლიანობას. ეს ჩინეთის პოლიტიკის უმნიშვნელოვანესი პრინციპია. და ამიტომაც დაუჭირა მას საქართველომ მხარი. ასე რომ, ხალხს, რომელიც ამბობს, რომ შეთანხმების ტექსტში აფხაზეთი და სამხრეთი ოსეთი ნახსენები არ არის, მიზანმიმართულად შეჰყავთ საზოგადოება შეცდომაში“, – განაცხადა ჭოუ ციენმა.

ჟურნალისტების დამაზუსტებელ კითხვაზე, ჩინეთი აღიარებს თუ არა, რომ ეს ტერიტორიები ოკუპირებულია, განაცხადა: „ჩინეთი ყოველთვის აღიარებდა საქართველოს ტერიტორიულ მთლიანობასა და სუვერენიტეტს ისე, როგორც ამას გაერო აღიარებს“.

შეგახსენებთ, რომ საქართველომ და ჩინეთმა სტრატეგიული პარტნიორობა 2023 წლის ზაფხულში დაამყარეს, პრემიერ-მინისტრ ირაკლი ღარიბაშვილის ჩინეთში ვიზიტისას.

შეთანხმების პირველსავე პუნქტში წერია, რომ მხარეები ადასტურებენ პატივისცემას „ყველა ქვეყნის სუვერენიტეტის, დამოუკიდებლობისა და ტერიტორიული მთლიანობისადმი“.

ამას მოსდევს ჩანაწერი, რომლის თანახმადაც „საქართველო მტკიცედ ემხრობა ერთიანი ჩინეთის პრინციპს“, – ანუ აღიარებს, რომ ტაივანი, – რომელიც 1949 წლიდან კონტინენტური ჩინეთისგან დამოუკიდებლად იმართება, – ჩინეთის განუყოფელი ნაწილია და მიანიშნებს, რომ ემხრობა ჩინეთის გაერთიანებას.

ჯერ იყო მელიას დაჯგუფება, შემდეგ ხაბეიშვილის და პრაქტიკულად „ნაცმოძრაობის“ ერთიანობის მითი გაქრა. ახლა ამ ნანგრევებზე ყველა ცდილობს, საკუთარი სარგებელი მიიღოს, მათ შორის ამომრჩევლის თვალსაზრისით, – ამის შესახებ პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ განაცხადა.

მიხეილ სარჯველაძე საქართველოს ყოფილი პრეზიდენტის, მიხეილ სააკაშვილის გუშინდელ ფეისბუქპოსტს გამოეხმაურა.

„დაპირისპირება და კონფრონტაცია ორ პოლიტიკურ დაჯგუფებას შორის კონფლიქტით არ დასრულდებოდა. ამას მოჰყვება გაგრძელება და ეს უკვე გამომჟღავნდა სააკაშვილის სტატუსში“, – განაცხადა მიხეილ სარჯველაძემ.

მიხეილ სააკაშვილმა სოციალური ქსელის მეშვეობით „ნაციონალური მოძრაობის“ წევრებს მიმართა: „მე ზღვა გადმოლახული მაქვს, თქვენ შორის ვიმყოფები და თქვენთან ერთად ვიბრძვი საქართველოს გადასარჩენად. ამ გზაზე ყველა პატრიოტთან უნდა გავაერთიანოთ სათითაოდ ძალები, მაგრამ პარტიამ უნდა შეინარჩუნოს ერთიანობა და სიმტკიცე. მივესალმები დებატებსაც და მუდმივ შიდა განახლებასაც. ამ ყველაფერს არაფერი აქვს საერთო ბოკერიას გზასთან“. ამასთან, მიხეილ სააკაშვილმა დაწერა, რომ „ვინც დაადგება ბოკერიას გზას, განულდება და დაამთავრებს, როგორც ბოკერია“.

ფრაქცია „ქართული ოცნების“ თავმჯდომარის, მამუკა მდინარაძის განცხადებით, „ნაციონალურ მოძრაობაში“ არა გაჯანსაღების, არამედ დაშლის პროცესი მიმდინარეობს.

ამასთან, მდინარაძის თქმით, პარტიაში მყოფი ადამიანები თავიანთი პატრონების დავალებების შესაბამისად მოქმედებენ და როგორც დააჯგუფებენ, ისე გადალაგდებიან.

„ვინ ეკითხებათ, ვინ ვისკენ იქნება? რასაც დაავალებენ, იმას გააკეთებენ. არცერთ მათ ტელევიზიას არ ეკითხება, ვისკენ იქნება, ისევე, როგორც ე.წ. პოლიტიკოსებს. მათ როგორც დააჯგუფებენ პატრონები, ისე გადალაგდებიან. ჩოხატაურში ჩავარდნენ და ერთი თავისიანს ლობირებდა, მეორე – თავისიანს და გაწევ-გამოწევა იყო. ისინი ამას გაჯანსაღების პროცესად ფუთავენ და ამაზე ვიმსჯელოთ? კი არ გაჯანსაღდნენ, დაიშალნენ, ჩამოიშალნენ და ერთმანეთის ნაძარცვ ფულებს ვერ იყოფენ. საინტერესოა, რომ მათ ერთი პატრონი ჰყავთ და საარჩევნოდ ის დაალაგებთ, დავალებებს მისცემენ და ასე იმოქმედებენ. მათ არავინ ეკითხებათ, საით იქნებიან. რომ დაავალონ, გახარია, ხაბეიშვილი, ვაშაძე ერთად იქნებიან“, – აღნიშნა მამუკა მდინარაძემ.