მოსახლეობამ მელიას სახელმწიფო როგორ უნდა ანდოს, საკუთარ პარტიაში მოუწყვეს რევოლუცია, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.

ზარქუას შეფასებით, გვარამია და მელია ახლა ახალგაზრდებს ამოეფარნენ.

„გვარამია და მელია ამოფარებული არიან დემოკრატიას, მედიამანტიას და ახლა ახალგაზრდებს ამოეფარნენ. ვინ არის ახალი სახე, გვარამია? – რაც არ უნდა დაიმალოს და ახალგაზრდებს ამოეფაროს, ჰგონია, საზოგადოებას ავიწყდება ვინ და რა იყო? გვარამია ჩვეულებრივი ზონდერ პროკურორი იყო, იმ რეჟიმის ერთ-ერთი შემოქმედი და ახლა უნდა, სააკაშვილზე გადაიტანის ისრები. გვარამია, ადეიშვილი და სხვა ზონდერები იყვნენ ამ ქსელის აქტორები. მელია არის ახალი სახე, დეკანოიძე თუ გიჟი ჯაფარა? – ყველანი კარგად ნაცნობი სახეები არიან საზოგადოებისთვის, მათი საგმირო საქმეებიც ცნობილია. რაც შეეხება მელიას, მელია იყო მთავარი ოპოზიციური პარტიის თავმჯდომარე და ხაბემ ჩამოაგდო. ხაბეს ჩამოგდებული ლიდერი არ გაიშვას. 7 ნომერი უნდა, 9 თუ 15, რა მნიშვნელობა აქვს, რა ნომერს წაიღებს? – ხაბემ ჩამოაგდო. მის ადგილზე საერთოდ დავიმალებოდი, სხვა სექტორში გადავიდოდი. რა დროს მელიას პოლიტიკაა, ხაბემ ჩამოაგდო და მორჩა. მნიშვნელობა არ აქვს, ხაბემ რა და როგორ იკადრა. ლიდერი ერქვა და ჩამოაგდეს. გგონიათ, ხაბე მართავს? – ისიც ერთ-ერთი ქვეშევრდომია, მაგრამ ჩამოაგდო და მოსახლეობამ მელიას სახელმწიფო როგორ უნდა ანდოს, საკუთარ პარტიაში მოუწყვეს რევოლუცია“, – განაცხადა ირაკლი ზარქუა.

მელია და გვარამია თუ წარსულთან არ ითანამშრომლებენ, ე.ი. მათთან არავინ ითანამშრომლებს, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.

როგორც გურამ მაჭარაშვილმა აღნიშნა, „ნაცმოძრაობის“ ფილიალებში ახალი ვერაფერი იქნება.

„მელია და გვარამია თუ წარსულთან არ ითანამშრომლებენ, ე.ი. მათთან არავინ ითანამშრომლებს, რადგან ორივე იმ წარსულს წარმოადგენენ, რასაც თავადვე „ნაცმოძრაობა“ დაარქვეს. „ნაცმოძრაობის“ ფილიალებში ახალი ვერაფერი იქნება, სწორედ „ნაცმოძრაობის“ ფილიალებია გვარამიას თუ მელიას ახალი გაერთიანებები. საზოგადოება მათგან სიახლეს არ უნდა ელოდებოდეს“, – აცხადებს გურამ მაჭარაშვილი.

ზურაბიშვილი იქცა ოპოზიციის რიგით წევრად – გადადგება და ოპოზიციის ლიდერობაზე ექნება პრეტენზია თუ დარჩება და რევოლუციური სცენარების განვითარებისთვის მოემზადება, ძნელი გამოსაცნობია,- ამის შესახებ ჟურნალისტებთან პარლამენტის ადამიანის უფლებათა კომიტეტის თავმჯდომარე მიხეილ სარჯველაძემ განაცხადა, რითაც სალომე ზურაბიშვილისა და პოლიტიკოსების შეხვედრებს გამოეხმაურა.

მისი განცხადებით, ახლა პრეზიდენტი სამომავლო პოლიტიკური კარიერის შემზადებას ცდილობს.

„პრეზიდენტი ცდილობს ოპოზიციის ფლანგზე გახდეს მათი მხარდამჭერი, ლიდერი და შეიმზადოს სამომავლო პოლიტიკური კარიერა, ესაა მისი მოტივაცია. როგორ გადაწყვეტს და რა ტაქტიკური ხერხები ექნება, გადადგება და ოპოზიციის ლიდერობაზე ექნება პრეტენზია თუ დარჩება და შემდეგ რევოლუციური სცენარების განვითარებისთვის მოემზადება, ეს წინასწარ ძნელი გამოსაცნობია. სამწუხაროდ, ის დიდი ხანია იქცა ერთ-ერთ რიგით წევრად და ამით ყველაზე მეტად დააზიანა პრეზიდენტის ინსტიტუტი, რადგან გადადგა ისეთი ნაბიჯები, რაც ამ ინსტიტუტისთვის არათავსებადია. აქვს ამბიცია და ამბობს, რომ უნდა იყოს ერის გამაერთიანებელი და სინამდვილეში ყველაფერს აკეთებს, რომ გააღრმაოს პოლარიზაცია,“- განაცხადა სარჯველაძემ.

სარჯველაძე, ასევე, ოპოზიციურ ფლანგზე შესაძლო გაერთიანებებს გამოეხმაურა და აღნიშნა, რომ „მექანიკური“ და „უპრინციპო“ გაერთიანებები წარმატების საწინდარი ვერ გახდება.

„შეცდომას უშვებს ოპოზიცია, როცა უპრინციპო და ამორფული გაერთიანებების გზით აპირებს საზოგადოების ინტერესის გაღვივებას. საზოგადოების ანტიპათია მატულობს ასეთი ტიპის გაერთიანებების მიმართ. ნუ ექნება ნურავის დიდი მოლოდინი და ამბიცია, რომ ოპოზიციისთვის რაიმე სერიოზული წარმატების საწინდარი შეიძლება გახდეს სრულიად მექანიკური, გაუაზრებელი გაერთიანებები,“ – განაცხადა სარჯველაძემ.

„გვარამია რომელი ახალი სახეა? მთელი ამ წლების განმავლობაში თუ რაიმე სიბინძურე შეიძლება ადამიანმა მოიფიქრო, იკადრო, დააბრალო, ყველაფერი გააკეთა“, – ასე უპასუხა თბილისის მერმა კახა კალაძემ ჟურნალისტის კითხვას იმასთან დაკავშირებით, რომ ნიკა გვარამია სავარაუდოდ პარტიას ქმნის, რომელსაც „ახალი“ ერქმევა.

„მე „ძველს“ მივუმატებდი, ალბათ ეს იქნებოდა უფრო სწორი. გვარამია რომელი ახალი სახეა? მთელი ამ წლების განმავლობაში თუ რაიმე სიბინძურე შეიძლება ადამიანმა მოიფიქრო, იკადრო, დააბრალო, ყველაფერი გააკეთა. გვახსოვს ყველას, რა განცხადებებს აკეთებდა თუნდაც სალომე ზურაბიშვილთან მიმართებაში, როგორ მოიხსენიებდა მას? გვახსოვს ის სიუჟეტები, სადაც ისეთი რამეები იკადრა, ისეთებს გვაბრალებდა, პირადად მე, ჩემს ოჯახს; გვახსოვს, როდესაც გენერალური პროკურორი იყო, რას კადრულობდა ეს ადამიანი? ყველა, ვინც დღეს წარმოადგენს რადიკალურ ოპოზიციას, არიან „ნაციონალური მოძრაობის“ წიაღში აღმოცენებული ადამიანები. დღეს შეიძლება მათ  თავიანთმა პატრონებმა უთხრეს, რომ „ნაციონალური მოძრაობა“ ძალიან გაფუჭებული პარტიაა რეპუტაციული თვალსაზრისით, ძალიან დამძიმებულია თავისი წარსულით, იმ ბოროტებით, რომელიც  მან ჩაიდინა მართვის დროს. ამ ყველაფერს პარტია თავისით ხომ არ აკეთებდა, ესენი იყვნენ კონკრეტული ადამიანები, რომლებიც მაშინ პარტიის წარმომადგენლები იყვნენ, სხვადასხვა თანამდებობას იკავებდნენ. ცხადია, ესენი არიან  ის ადამიანები, რომლებიც იმ ბოროტებას ჩადიოდნენ ცხრა წლის განმავლობაში, რომელიც უმძიმესი იყო  ჩვენი ქვეყნისთვის. დღეს უნდათ, ეს ადამიანები წარმოაჩინონ ახალ სახეებად. შეიძლება დაარქვან „ლელო“, „გახარიები“, „დროა“, აგერ „ახალი“ დაურქმევიათ… მცდელობა არის ერთი: საზოგადოება შეიყვანონ შეცდომაში, უთხრან, რომ „ნაციონალური მოძრაობა“ არის წარსული და ახალი  სახეებით, ახალი ენერგიით უნდა ჩამოყალიბდეს ახალი პარტია. ვინ არიან სინამდვილეში ეს ადამიანები? ისევ ისინი, ვინც წარმოადგენდა „ნაციონალურ მოძრაობას“ სხვადასხვა სახით. ეს არის სამწუხარო რეალობა“, – განაცხადა კახა კალაძემ.

რაც შეეხება კითხვას, რა შანსი ექნება აღნიშნულ პარტიას 2024 წლის არჩევნებში, კახა კალაძე პასუხობს, რომ საზოგადოება ყველაფერს კარგად ხედავს და შესაბამის ადგილს მიუჩენს.

„ქვეყნის მოსახლეობა ძალიან კარგად ხედავს და აფასებს არსებულ სიტუაციას. როდესაც ვამბობდით, რომ არის ზეწოლა ხელისუფლებაზე, მითითებები იმასთან დაკავშირებით, რომ გაიხსნას მეორე ფრონტი, შევუერთდეთ სანქციებს, რომელიც დამაზიანებელი იქნებოდა, პირველ რიგში, ჩვენი ხალხისთვის, ეკონომიკისთვის. ზუსტად ეგ უნდოდათ, რომ ეს ნაბიჯი გადაგვედგა და შემდეგ მოსახლეობა დაპირისპირებოდა ხელისუფლებას, იმიტომ, რომ როდესაც შენ ხარ ხელისუფალი, გაქვს უდიდესი პასუხისმგებლობა, გაატარო სწორი პოლიტიკა, რომელიც პირველ რიგში სჭირდება  შენს ქვეყანას და შენს ხალხს. ზუსტად ამიტომ აგირჩია ხალხმა. ჩვენ რომ გადაგვედგა არასწორი ნაბიჯი, ხალხს ექნებოდა ლეგიტიმური უფლება, დაპირისპირებოდა ხელისუფლებას. ზუსტად ეგ იყო გათვლა. იმის თქმა მინდა, რომ საზოგადოება კარგად ხედავს, ვინ არიან ეს ადამიანები, რომელნიც დღეს რადიკალურ ოპოზიციას წარმოადგენენ და „ახლებად“ მოაქვთ თავი. რომელი ახალია გვარამია, უსუფაშვილი, სამადაშვილი, ხაზარაძე და ასე შემდეგ. ეს სია უსასრულოა და შეგვიძლია გავაგრძელოთ. ხალხი კარგად ხედავს, ვინ რას წარმოადგენს, ვის ემსახურებიან. ერთი რამ ცხადია, რომ ამ ქვეყანას არ ემსახურებიან და არ აქვთ სურვილი, გაატარონ ამ ქვეყნის ინტერესი და დაიცვან ის. თავიანთი ქმედებიდან გამომდინარე ჩანს ეს ყველაფერი. მათ ჰყავთ თავისი პატრონი, აქვთ თავიანთი ინტერესი და ეს ინტერესები აცდენილია სახელმწიფო ინტერესს. ხალხი, საზოგადოება მათ მიუჩენს შესაბამის ადგილს 2024 წლოის საპარლამენტო არჩევნებზე“, – განაცხადა კახა კალაძემ.

გვახსოვს შალიკოს ფანჩატური, არ ვიცი რა, მაგრამ დღეს სალომეს რაღაც იქნება. ეს ყველაფერი არაერთხელ გვინახავს, – ამის შესახებ თბილისის მერმა, კახა კალაძემ პრეზიდენტის ადმინისტრაციაში, საქართველოს პრეზიდენტ სალომე ზურაბიშვილსა და ოპოზიციური პარტიების წარმომადგენლებს შორის მიმდინარე კონსულტაციებთან დაკავშირებით განაცხადა.

როგორც მან აღნიშნა, ოპოზიციის წარმომადგენლებს საკუთარი ქვეყნის მიმართ არანაირი სიყვარული არ გააჩნიათ და პოლიტიკაში მომავალი არ აქვთ.

„ეს ფილმი უკვე ნანახი გვაქვს, ამაში სიახლე არაფერია. გვახსოვს შალიკოს ფანჩატური, არ ვიცი რა, მაგრამ დღეს სალომეს რაღაც იქნება. ეს ყველაფერი არაერთხელ გვინახავს. კიდევ ერთხელ ვიმეორებ, ესენი უსამშობლო ადამიანები არიან და ამ ქვეყნის მიმართ არანაირი სიყვარული არ გააჩნიათ. როგორ შეიძლება გიყვარდეს ქვეყანა და ხალხს აკადრებდე იმას, რასაც ცხრა წლის განმავლობაში აკეთებდნენ? შეიძლება სხვა მიმართულებით რაღაც გააკეთონ, მაგრამ ამ ადამიანებს პოლიტიკაში არანაირი მომავალი არ აქვთ, რადგან რადიკალიზმი ყოველთვის განწირულია მარცხისთვის. სალომე ზურაბიშვილი არ იყო, რომ გამოდიოდა და ამბობდა, ქვეყანა არ იმსახურებს სტატუსსო? თუ დაგვავიწყდა? რამეს ხომ არ ვიგონებ, ეს ხომ მისი სიტყვებია?“, – განაცხადა კახა კალაძემ.

მისივე თქმით, ქვეყნის ხელისუფლებამ ევროინტეგრაციის რთულ გზაზე ყველაფერი გააკეთა, თუმცა ამ მიმართულებით გამოწვევები ჯერ კიდევ რჩება.

„საქართველოს ხელისუფლებამ ყველაფერი გააკეთა, შეინარჩუნა მშვიდობა, გაატარა ქვეყნის ინტერესი, დაიცვა ჩვენი ქვეყნის თითოეული მოქალაქე და, რა თქმა უნდა, ღირსებით, თავაწეული და არა ცალ ფეხზე დგომით, მიიღო კანდიდატის სტატუსი. ასე ვაპირებთ გაგრძელებას ევროინტეგრაციის რთულ გზაზე. დარწმუნებული ვარ, უამრავი ხელის შეშლა იქნება. ეს საფრთხეები ჯერ კიდევ არსებობს, არსად წასულა, მაგრამ დავიცავთ ჩვენს სამშობლოს და ამ ქვეყნის ხვალინდელ დღეს. სწორედ ასე გვინდა ევროპაში ინტეგრაცია და ქვეყნის ევროპული მომავალი“, – აღნიშნა დედაქალაქის მერმა.