სალომე ზურაბიშვილის ხედვა, როგორ შეიძლება, მართლმსაჯულებაში ტრადიციული პრობლემა გადაწყდეს, როგორ არის შესაძლებელი, დამარცხდეს კორუფცია, თანხვედრაში მოდის ჩემს ხედვასთან, – ამის შესახებ „ნაციონალური მოძრაობის“ ყოფილმა თავმჯდომარე ნიკა მელიამ სალომე ზურაბიშვილთან შეხვედრის შემდეგ განაცხადა.

„მე რაც მოვისმინე სალომე ზურაბიშვილისგან, მას აქვს ისეთი ხედვა, რომელიც თანხვედრაში მოდის, მაგალითად, ჩემს ხედვასთან, როგორ შეიძლება, მართლმსაჯულებაში ტრადიციული პრობლემა გადაწყდეს, როგორ არის შესაძლებელი, კორუფცია დამარცხდეს, როგორ არის შესაძლებელი, ქვეყანაში დოვლათს ქმნიდეს არა მხოლოდ 100 ადამიანი, არამედ თანაბრად ნაწილდებოდეს საქართველოს მოქალაქეებზე“, – აღნიშნა მელიამ.

მისივე განცხადებით, სალომე ზურაბიშვილის ხედვაა საარჩევნო სისტემის გაჯანსაღება, რომელიც მეტ-ნაკლებად ხელს შეუწყობს სხვადასხვა სუბიექტს, რომ კონკურენტუნარიან გარემოში აღმოჩნდეს.

„დიდი წინააღმდეგობა შეგვხვდება ჩვენ „ქართული ოცნების“ მხრიდან, მაგრამ აქ მხარდაჭერა არსებობს და იარსებებს მაღალი ხარისხის, საერთაშორისო თანამეგობრობის მხრიდან და პოსტარჩევნები, როგორ ვხედავთ უმნიშვნელოვანესი რეფორმების გატარების გზებს. პირველ რიგში, მართლმსაჯულების სისტემაში და ასევე სახელისუფლებო შტოები ერთმანეთისგან როგორ უნდა იყოს დამოუკიდებელი. ეს თუ ვერ მოხერხდა, ნიშნავს, რომ შენ ბიძინა ივანიშვილს, გამარჯვების შემთხვევაში ანაცვლებ. კი არ ამარცხებ კორუფციას, ოლიგარქიულ სისტემას, არამედ უბრალოდ ანაცვლებ. ამ კონკრეტიკაზე იყო საუბარი და სხვა საკითხებთან დაკავშირებითაც, რაზეც ახლა თავს შევიკავებ.

მე მივიღებ მონაწილეობას ყველა იმ პროცესში, რომელიც ემსახურება და მიზნად ისახავს სახელმწიფოდ ჩამოყალიბებას, სადაც სახელები და გვარები გახელისუფლებული ადამიანებისა, ვერ აიგდებენ საქართველოს მოქალაქეებს აბუჩად. იქ, სადაც ეს ინტერესი იქნება ჩადებული, მე ნამდვილად მივიღებ მონაწილეობას ასეთ პროცესში. იქ, სადაც ყველაფერს თავისი სახელი დაერქმევა, სადაც კორუფცია დამარცხდება, იქ, სადაც გამბედავი იქნება ყველა, მათ შორის ოპოზიციაში“, – განაცხადა ნიკა მელიამ.

მგონია, რომ ეს პროცესი უნდა შეჩერდეს და სამივე ნიკა – მელია, გვარამია და მაჭუტაძე, ნაცვლად ახალი პარტიის გაკეთებისა, „ნაცებში“ უნდა დაბრუნდნენ, – ამის შესახებ „გირჩის“ დეპუტატმა, იაგო ხვიჩიამ ჟურნალისტებთან საუბრისას განაცხადა.

ხვიჩიას შეფასებით, „ნაციონალურ მოძრაობაში“ არის პრობლემა, სათანადოდ არ მასპინძლობენ ადამიანებს და „გამოდის, რომ ღვაწლმოსილი „ნაცები“ მათგან გარბიან“.

„მე ვერ გეტყვით, რატომ აირჩიეს “ნაცმოძრაობასთან” დისტანცირება, ჩემი აზრით, იმიტომ, რომ “ნაცმოძრაობა” კარებს არ უღებს, მე ასეთი შთაბეჭდილება მაქვს, თორემ ვერაფრით წარმომიდგენია, როგორ შეიძლება ნიკა გვარამია ასე შეცვლილიყო ციხეში, რომ გარეთ გამოსვლის დროს ეგრევე დაეწყო უარყოფა საკუთარი „ნაცობის“. აქედან გამომდინარე, “ნაცებში” არის პრობლემა, სათანადოდ არ მასპინძლობენ ადამიანებს და გამოდის, რომ ღვაწლმოსილი “ნაცები” მათგან გარბიან. მე მგონია, რომ ეს პროცესი უნდა შეჩერდეს და სამივე ნიკა – მელია, გვარამია და მაჭუტაძე, ნაცვლად ახალი პარტიის გაკეთებისა “ნაცებში” უნდა დაბრუნდნენ.

მე არ გამოვრიცხავ, რომ ჩვენმა პოლიტიკურმა მოთამაშეებმა, სუბიექტებმა საკუთარი თავი წარადგინონ არა ერთი პარტიით, არამედ ერთზე მეტი პარტიით. მაგალითად: მიშას ამ წუთას 5 -ზე მეტი პარტია ჰყავს, “ქოცებს” 2-3 პარტია ჰყავთ. მე მგონია, რომ მათი ტაქტიკა უნდა იყოს “ქოცები” “ქოცებთან”, “ნაცები” “ნაცებთან” და დანარჩენი “გირჩი”, – განაცხადა ხვიჩიამ.

მონაწილეობას არ მივიღებთ იმ ფორმატში, სადაც სააკაშვილის გათავისუფლებას ჩვენი ქვეყნის მომავალს უკავშირებენ, – ამის შესახებ პარტია „საქართველოსთვის“ წევრმა, ანა ბუჩუკურმა განაცხადა.

ბუჩუკურს კითხვა დაუსვეს სალომე ზურაბიშვილის ინიციატივასთან დაკავშირებით, რომელიც მომავლის ქარტია – „ერთობის პლატფორმა ევროპისთვის“ შექმნას გულისხმობს.

„პრეზიდენტის მხრიდან მოულოდნელად გაცხადებული ფორმატი ჩვენთვის მიუღებელია. ამ ფორმატში მონაწილეობას ის პარტიები იღებენ, რომლებიც ქვეყნის ევროპულ მომავალს და თავისუფალი არჩევნების ჩატარებას მიხეილ სააკაშვილის გათავისუფლებას უკავშირებდნენ. კოლექტიურმა „ნაცმოძრაობამ“ გაიმეორა, რომ მათი მხრიდან ეს ფორმატი გამოყენებული იქნება სააკაშვილის გათავისუფლებისთვის. მონაწილეობას არ მივიღებთ იმ ფორმატში, სადაც სააკაშვილის გათავისუფლებას ჩვენი ქვეყნის მომავალს უკავშირებენ. ამ ფორმატში ისეთი ადამიანები იღებენ მონაწილეობას, რომლებიც ღიად ამბობდნენ, რომ საქართველო სტატუსს არ იმსახურებდა, ვიდრე არჩევნები არ ჩატარდება და სააკაშვილის გათავისუფლება არ მოხდება. პრეზიდენტის მიმართ ჩვენი დამოკიდებულება არ იცვლება და ჩვენი მხრიდან მისი მხარდაჭერა გაგრძელდება, მით უმეტეს, როცა საქმე ევროკავშირს ეხება, – განაცხადა ანა ბუჩუკურმა.

რა ბედიც შალვას ფანჩატურს ეწია, ის ეწევა სალომეს ფანჩატურსაც, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.

მისი თქმით, „ქართული ოცნებას“ ეს აწყობს.

„რა ბედიც შალვას ფანჩატურს ეწია, ის ეწევა სალომეს ფანჩატურსაც, რადგან განსხვავებული ღირებულებებისა და მორალის გაერთიანება ხდება. ეს ჩვენ გვაწყობს. რატომ? – არჩევანი მარტივია. რადიკალები ერთი ფანჩატურის ქვეშ გაერთიანდებიან, მეორე მხარეს იქნება „ქართული ოცნება“, რომელიც ეკონომიკის განვითარების და მშვიდობის წინაპირობა იქნება. მოლოდინები თავადაც არ აქვთ, რადგან იციან, რომ შეიკრიბებიან და თუ დასჭირდებათ, ერთმანეთს გალანძღავენ და მერე დაიშლებიან“, – განაცხადა ზარქუამ.

არ მჯერა, რომ პრეზიდენტის იდეიდან რამე გამოვა, რადგან ოპოზიციის ლიდერები ზედმეტად ამბიციურები და ამპარტავნები არიან, – ამის შესახებ პარტია „მოქალაქეების“ ლიდერმა, ალეკო ელისაშვილმა განაცხადა.

მისი თქმით, პრეზიდენტის იდეა არის სწორი და დროული, რათა პროევროპული პარტიების კონტური მოიხაზოს.

„თუ გვინდა, ოქტომბერში ხელისუფლება შეიცვალოს, ვერცერთი ოპოზიციონერი ამას ვერ შეძლებს. შესაბამისად, რაღაც ერთობა აუცილებელია. სწორედ ამას ეხმიანება ინიციატივა. არ მჯერა, რომ აქედან რამე გამოვა, რადგან ოპოზიციის ლიდერები ზედმეტად ამბიციურები და ამპარტავნები არიან. ვნახოთ, ამბიციების მოთოკვას შევძლებთ, თუ არა. აქამდე რომ ვერ შევძელით, ამიტომ ვერ შევძელით ხელისუფლების ცვლილებაც. ამიტომ, სწორი დასკვნებიც უნდა გამოვიტანოთ“, – აღნიშნა ელისაშვილმა.