12 პრიორიტეტის შესრულებისთვის მძიმე მუშაობა ბრიუსელში ხალხის გასაბედნიერებლად კი არა, არამედ საქართველოს მოქალაქეების ცხოვრების გასაუმჯობესებლად არის საჭირო. ამის შესახებ ევროკავშირის უმაღლესმა წარმომადგენელმა ჯოზეფ ბორელმა თბილისში განაცხადა.

“საქართველოს შემთხვევაში არის ევროკომისიის მოსაზრებაში დაფიქსირებული 12 პრიორიტეტი, რომელიც უნდა შესრულდეს. ამ 12 პრიორიტეტის შესრულებისთვის მძიმე მუშაობა ბრიუსელის დასაკმაყოფილებლად, ბრიუსელში ან ევროკავშირის წევრ ქვეყნებში ხალხის გასაბედნიერებლად არ არის საჭირო.

საბოლოო ჯამში, ეს საჭირო არის საქართველოს მოქალაქეების ცხოვრების გასაუმჯობესებლად, ქართველი ხალხის დიდი უმრავლესობის ევროპული მოლოდინების დასაკმაყოფილებლად. ბევრი ევროპულ დროშას ვხედავ ამ ქალაქის ქუჩებში და თქვენ იცით, რომ ქართველი ხალხის 80% მხარს უჭერს ევროკავშირში წევრობას.

მინდა მადლიერება გამოვხატო ყველა იმ ადამიანისადმი, ვინც საქართველოს ევროპულ მომავალს იცავს. [ევროკავშირში] გაწევრიანება ეროვნული ამოცანაა, ყველა მოქმედი პირი ერთად უნდა მუშაობდეს, კონსტრუქციულად, ერთიანად. ერთიანობა ისეა მნიშვნელოვანი, როგორც არასდროს”, – განაცხადა ბორელმა.

კანდიდატის სტატუსს დამსახურება სჭირდება და საქართველოს ამ მხრივ ჯერ კიდევ ბევრი სამუშაო აქვს გასაკეთებელი. ამის შესახებ ევროკავშირის უმაღლესმა წარმომადგენელმა, ჯოზეფ ბორელმა თბილისში განაცხადა.

ევროკავშირის უმაღლესი წარმომადგენლი აღნიშნავს, რომ ევროკავშირში გაწევრიანების განაცხადი სერიოზული ვალდებულებაა და კანდიდატის სტატუსი არ არის ისეთი რამ, რაზეც ქვეყნებს ავტომატურად ენიჭებათ უფლება.

ამასთან, ბორელის თქმით, საქართველოსთვის ევროკავშირის კარი ღიაა და მხარს უჭერს ქვეყანას ევროკავშირის გზაზე.

“პირველ რიგში, მინდა აღვნიშნო, რომ საქართველო მნიშვნელოვანი პარტნიორია ევროკავშირისთვის.. და ახლა გადამწყვეტი მნიშვნელობის მქონე მომენტია თქვენი მომავლისთვის, ვინაიდან, რამდენიმე კვირაში, ევროკავშირი ევროკავშირისკენ საქართველოს გზასთან დაკავშირებით შემდეგ ნაბიჯებს განიხილავს და პირველად ისტორიაში საქართველოს შესხებ, როგორც გაფართოების პროცესში მონაწილე ქვეყანაზე, ანგარიშს წარადგენს.

და ასეთ მნიშვნელოვან მომენტში მინდა ძალიან ნათელი ვიყო: ევროკავშირის კარი ღიაა საქართველოსთვის და ევროკავშირი ერთგულია მხარი დაუჭიროს საქართველოს ევროკავშირის წევრობისკენ გზაზე – კარი ღიაა და გვინდა ამ გზაზე მხარი დაგიჭიროთ…

მაგრამ ასევე უნდა ვთქვა, რომ ევროკავშირში გაწევრიანების განაცხადი, ასევე, სერიოზული ვალდებულებაა. და კანდიდატის სტატუსი არ არის ისეთი რამ, რაზეც ქვეყნებს ავტომატურად შეიძლება უფლება ჰქონდეთ. მას დამსახურება სჭირდება სერიოზული რეფორმებითა და ევროპული ღირებულებებისადმი ერთგულებით და სიმართლე რომ გითხრათ, ამ მხრივ ჯერ კიდევ ბევრი სამუშაო არის გასაკეთებელი”, – განაცხადა ბორელმა.

დაცვის მხარე არ ვყოფილვარ და საქმეს ისე არ ვიცნობ, რომ რაიმე მქონდეს, სტრასბურგმა გადაწყვეტილება მიიღო და „ქოცი“ არ ვარ, რომ გადაწყვეტილება არ მომეწონა და ვთქვა, სტრასბურგის სასამართლო გლობალური ძალების გავლენის ქვეშაა, დაცვის მხარეს ველოდები, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მისი თქმით, ნიკა მელია პოლიტპატიმარი იყო და ბევრი იბრძოლა რეჟიმის მხილებისთვის.

„რასაც იტყვის, ის იქნება არგუმენტი. ევროპის საბჭოს პრეზიდენტი ჩამოვიდა და მელიას ლამის გირაო გადაუხადა. პოზიცია არ შემიცვლია და პოზიციას ქარი საითაც უბერავს, ისე არ ვიცვლი და ვფიქრობ, რომ პოლიტპატიმარი იყო და ბევრი იბრძოლა რეჟიმის მხილებისთვის. ვინაიდან სარჩელი მაშინ შეიტანეს, როცა ნიკა მელია ჯერ კიდევ პატიმრობაში იყო, ალბათ დაცვის მხარეს პროცესის ბოლომდე მიყვანის ინტერესი არ ჰქონდა“, – განაცხადა მანჯგალაძემ.

ადამიანის უფლებათა ევროპულმა სასამართლომ საქმეზე „ნიკა მელია საქართველოს წინააღმდეგ“ გადაწყვეტილება გამოაქვეყნა. სტრასბურგის სასამართლოს გადაწყვეტილების მიხედვით, ნიკა მელიას დაკავების საქმეზე ადამიანის უფლებათა კონვენციის მუხლების დარღვევას ადგილი არ ჰქონია.

“ოცნება” ცრუობს, რომ გახარია მელიას გამო გადადგა, ერთადერთი მიზეზი, იყო ის, რომ არსებობდა საფრთხე ადამიანების სიცოცხლისა და ჯანმრთელობისთვის – არავინ დაშავდა, რადგან ბევრი აქტორი იყო ჩართული, რამაც სიტუაციაზე გავლენა მოახდინა , – ამის შესახებ განცხადება პარტია “საქართველოსთვის” დეპუტატმა მიხეილ დაუშვილმა გააკეთა.

როგორც მან აღნიშნა, უნდა დაეკავებინათ თუ არა მელია, ამაზე კითხვა არასდროს ჰქონიათ და დაკავება კანონიერი იყო, თუმცა შეუთანხმებლობა მდგომარეობდა დაკავების ფორმებში. დაუშვილი მეტ დეტალზე არ საუბრობს და აცხადებს, რომ მოვა დრო, როცა ყველაფერზე ისაუბრებენ.

“3 რამ არის მნიშვნელოვანი. სტრასბურგის ყველაზე ავტორიტეტულმა, დამოუკიდებელმა სასამართლომ კიდევ ერთხელ დაადასტურა, რასაც ჩვენ ამდენი ხანია ვამბობთ, რომ 2019 წლის 20 ივნისს იყო ძალადობრივი შტურმი სახელმწიფო ინსტიტუტზე და იქ ჩადენილი იყო კონკრეტული, უმძიმესი დანაშაული. ჩვენ ყოველთვის ვამბობდით, რომ მელია, რა თქმა უნდა, იყო დასაკავებელი. ცხადია, ეს დაკავება იყო კანონიერი, რაც კიდევ ერთხელ დაადასტურა სტრასბურგის სასამართლომ. ეს უმძიმესი დანაშაული, ბატონი მელია და სახელმწიფო ინსტიტუტზე შტურმი, ფაქტობრივად, გადატრიალების მცდელობა, რომ არის ამნისტირებული, ამაზე პასუხისმგებლობა ეკისრება ერთადერთ “ქართულ ოცნებას”, რადგან მათ არ გაითვალისწინეს, რა ფორმით და რა მოცემულობით უნდა მომხდარიყო მელიას დაკავება. არასდროს კითხვა არ დასმულა დაკავება იყო თუ არა სწორი, რა თქმა უნდა, დაკავება იყო კანონიერი.

მე ერთ რამეს გეტყვით, “ოცნება” ცრუობს, როცა ამბობს, რომ გახარია მელიას გამო გადადგა. ერთადერთი მიზეზი, რის გამოც ეს მოხდა, იყო ის, რომ იქ არსებობდა საფრთხე ადამიანების დაზიანების, ადამიანების სიცოცხლის და ჯანმრთელობისთვის კონკრეტული საფრთხეები არსებობდა,” – განაცხადა დაუშვილმა.

ჟურნალისტის კითხვაზე იმასთან დაკავშირებით, რომ ნიკა მელიას დაკავებისას არავინ დაზიანებულა, დაუშვილი პასუხობს:

“ბევრი რამ შეიცვალა და ბევრი აქტორი იყო ჩართული, რამაც საბოლოო ჯამში იმ სიტუაციაზე გავლენა მოახდინა”.

არც კი გრცხვენიათ, რომ სვამთ კითხვებს, თუ საიდან მოიტანა ფული პრემიერმა – გასაკვირია, უფრო კომფორტულად რომ არ იმგზავრა და თვითმფრინავი უფრო ძვირი არ დაჯდა, – ასე უპასუხა “გირჩის” დეპუტატმა იაგო ხვიჩიამ ირაკლი ღარიბაშვილის აშშ-ში კერძო ვიზიტთან დაკავშირებით დასმულ კითხვას.

როგორც ხვიჩიამ აღნიშნა, “პრემიერი იაფიანი თვითმფრინავით გაფრენილა და ჩვენს გამო წვალებაშია”.

„არ მესმის, რატომ იწვალა და აშშ-ში თბილისიდან პირდაპირ ჩარტერით რატომ არ გაფრინდა? ქართველმა ხალხმა უნდა დავუფასოთ, რომ ჩვენი პრემიერი და მისი შვილი წვალობენ – პირდაპირ ჩარტერით კი არ მიფრინავს, ჩვენს გამო წვალებაშია”, – განაცხადა იაგო ხვიჩიამ.

„ევროკავშირის უმაღლესი წარმომადგენლის ვიზიტი ცალსახად შესძენს ახალ იმპულსს ერთი მხრივ, საქართვლო-ევროკავშირის ურთიერთობებს, ხოლო მეორე მხრივ, ექნება მნიშვნელოვანი გავლენა შესაბამის გადაწყვეტილებებზე”- ამის შესახებ, საგარეო საქმეთა მინისტრმა, ილია დარჩიაშვილმა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის საქართველოში ვიზიტის შეფასებისას განაცხადა თბილისის საერთაშორისო აეროპორტში, სადაც უმაღლესი წარმომადგენლის დახვედრის ოფიციალური ცერემონია გაიმართა.

მინისტრის თქმით, ოქტომბერში საქართველო ელოდება ევროკავშირის შესაბამის ანგარიშს, რომელსაც დეკემბერში მოყვება ევროპული საბჭოს შესაბამისი გადაწყვეტილება. დარჩიაშვილის განცხადებით, აღნიშნულ ვიზიტს განსაკუთრებული დატვირთვა აქვს. მისი თქმით, ვიზიტის ფარგლებში, ქართული მხარე დეტალურად გააცნობს ევროკავშირის უმაღლეს წარმომადგენელს საქართველოს მიერ 12 რეკომენდაციის შესრულების კუთხით არსებულ პროგრესს.

„ჩვენ გვექნება შესაძლებლობა ჯოზეფ ბორელს დეტალურად ვესაუბროთ იმ უზარმაზარი სამუშაოს შესახებ, რომელიც შეეხება საქართველოს მიერ 12 რეკომენდაციის შესრულებას. ვფიქრობ, რომ ძალიან საინტერესო შეხვედრები იქნება უმაღლეს დონეზე. „ – განაცხადა ილია დარჩიაშვილმა. ამასთან, როგორც მინისტრმა აღნიშნა, ჯოზეფ ბორელის ვიზიტი ევროკავშირის მხრიდან სპეციალური გზავნილია და მიუთითებს იმ ფაქტზე, რომ რეგიონში ევროკავშირისთვის მშვიდობა და უსაფრთხოება მაღალ პრიორიტეტს წარმოადგენს. „აქცენტი გაკეთდება დღეს რეგიონში უსაფრთხოების კუთხით არსებულ სიტუაციაზე. ბორელის ვიზიტი სპეციალური გზავნილია და მიუთითებს იმ ფაქტზე, რომ ჩვენს რეგიონში მშვიდობა და უსაფრთხოება ევროკავშირისთვის მაღალ პრიორიტეტს წარმოადგენს.” – აღნიშნა დარჩიაშვილმა.

ილია დარჩიაშვილის ინფორმაციით, ჯოზეფ ბორელს შეხვედრები ექნება ყველა მნიშვნელოვან სახელმწიფო წარმომადგენელთან, უმაღლესი თანამდებობის პირებთან.

2023 წლის 7 სექტემბერს ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, ჯოზეფ ბორელი, საქართველოს ეწვია.

ვიზიტის ფარგლებში, ჯოზეფ ბორელი პირველ სამუშაო შეხვედრას გამართავს საქართველოს საგარეო საქმეთა მინისტრ ილია დარჩიაშვილთან როგორც პირისპირ, ისე გაფართოებულ ფორმატში. ევროკავშირის უმაღლესი წარმომადგენელი ასევე შეხვდება საქართველოს პრემიერ-მინისტრ ირაკლი ღარიბაშვილს. შეხვედრის დასრულების შემდეგ გაკეთდება ერთობლივი განცხადებები პრესისთვის. გარდა ამისა, ჯოზეფ ბორელი შეხვედრას გამართავს საქართველოს პარლამენტში, პარლამენტის თავმჯდომარესთან, შალვა პაპუაშვილთან. აგრეთვე, ევროკავშირის უმაღლეს წარმომადგენელს მიიღებს საქართველოს პრეზიდენტი სალომე ზურაბიშვილი. აღსანიშნავია, რომ ვიზიტის ფარგლებში ჯოზეფ ბორელი, ევროკავშირის სადამკვირვებლო მისიის წარმომადგენლებთან ერთად, ეწვევა საოკუპაციო ხაზს და ადგილზე გაეცნობა არსებულ ვითარებას. გარდა ამისა, ჯოზეფ ბორელი შეხვდება სამოქალაქო საზოგადოების წარმომადგენლებსაც.

დღეს დღეს კიდევ უფრო მეტი ლუსტრაცია ხდება იმ მოქმედების, რომელიც მაშინდელმა პრემიერმა, გიორგი გახარიამ ჩაიდინა, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მისი თქმით, დადასტურდა, რომ ტყუილი იყო გიორგი გახარიას განცხადებები, თითქოს უკანონოდ მოხდა ნიკა მელიას დაკავება.

„მრავალი რაიონის, მრავალი მუნიციპალიტეტის საკრებულოებში გახარიას პარტია, რომელიც არის „ნაცმოძრაობასთან“ კოალიციაში, საუბრობს იმაზე, რომ რაღაც სხვა ალიანსები არსებობს. თვითონ არიან კოალიციაში, სხვა ალიანსებზე საუბრობენ. საინტერესოა, საზოგადოებას მელიასთვის გადამდგარი გახარია დღეს რას ეტყვის იმაზე, რაც საერთო ნარატივი იყო მაშინ, თითქოს უკანონო დაკავება იყო მელიასი, სიმართლის მღაღადებელმა გახარიამ ამიტომ მიატოვა საკუთარი გუნდი. ტყუილია მისი განცხადებაც, მისი გადადგომაც, ყველაფერი სპეკულაციური იყო. დღეს კიდევ უფრო მეტი ლუსტრაცია ხდება იმ მოქმედების, რაც მაშინ მაშინდელმა პრემიერმა გახარიამ ჩაიდინა და ალბათ საზოგადოება კიდევ უფრო მეტ სწორ დასკვნას გააკეთებს ამ გადაწყვეტილების შემდეგ“, – აღნიშნა მდინარაძემ.

ადამიანის უფლებათა ევროპულმა სასამართლომ საქმეზე „ნიკა მელია საქართველოს წინააღმდეგ“ გადაწყვეტილება გამოაქვეყნა. გადაწყვეტილების მიხედვით, ნიკა მელიას დაკავების საქმეზე ადამიანის უფლებათა კონვენციის მუხლების დარღვევას ადგილი არ ჰქონია.