საქართველოს კულტურის მინისტრის თეა წულუკიანის განცხადებით, ბოლო წლებში სწორედ ირაკლი ღარიბაშვილის ხელმძღვანელობით საქართველოში ჩამოყალიბდა ანტიკორუფციული სააგენტო, ასევე, შემუშავდა არაერთი მექანიზმი, რათა ქვეყანაში კორუფციის რისკები მაქსიმალურად დაზღვეული ყოფილიყო.

წულუკიანის თქმით, ეს მიდგომები უნდა გაგრძელდეს და კორუფციის რისკებთან ბრძოლა უფრო მაღალ ხარისხში უნდა ავიდეს.

„ბიძინა ივანიშვილმა ისაუბრა რისკებზე, ასეთი რისკები ნებისმიერ დროს არსებობს და ყველა მთავრობის, ხელისუფლების ვალია, იმუშაოს ამ რისკების პრევენციაზე, რათა რისკები არ მატერიალიზდეს. თავის დროზე, როდესაც იუსტიციის მინისტრის რანგში კორუფციის წინააღმდეგ ბრძოლის სხვადასხვა უწყებათაშორის სამუშაოს ვუძღვებოდი, მახსოვს, ჩვენ შევიმუშავეთ არაერთი მექანიზმი იმისთვის, რომ ჩვენს ქვეყანაში კორუფციის რისკები ყოფილიყო მაქსიმალურად დაზღვეული. ასევე, ბოლო წლებში სწორედ ირაკლი ღარიბაშვილის ხელმძღვანელობით საქართველოში ჩამოყალიბდა ანტიკორუფციული სააგენტო. ჩვენი ქვეყანა არის ერთ-ერთი მოწინავე, არა მხოლოდ ჩვენს რეგიონში, არამედ ევროპისა და მსოფლიო დონეზე კორუფციასთან ბრძოლის ნიშნით, ყველა რეიტინგი ამას ადასტურებს. რა თქმა უნდა, ეს მიდგომები უნდა გაგრძელდეს, რისკებთან ბრძოლა კიდევ უფრო მაღალ ხარისხში უნდა ავიდეს და აქ  ვერ იქნება ვერანაირი განსხვავებული აზრი ამ თემასთან დაკავშირებით“, – აღნიშნა თეა წულუკიანმა.

საქართველოს პრეზიდენტის დუმილი, რომელიც ილჰამ ალიევისთვის გამარჯვების მილოცვისაგან თავშეკავებას გულისხმობს, ჩვენი სახელმწიფოსთვის დამაზიანებელია, – ამის შესახებ საქართველოს კულტურის მინისტრმა თეა წულუკიანმა განაცხადა.

წულუკიანს კითხვა დაუსვეს, რომლის მიხედვითაც, სალომე ზურაბიშვილს აზერბაიჯანის პრეზიდენტისთვის არჩევნებში გამარჯვება არ მიულოცავს.

თეა წულუკიანის შეფასებით, სალომე ზურაბიშვილისგან მილოცვაზე თავშეკავება „პოლიტიკურად სიბეცეს ნიშნავს“.

„გვინდა, ყველას შევახსენოთ, შევახსენოთ ჩვენს პრეზიდენტს, რომ ბოლო წლებში რეგიონში გაზრდილია გეოპოლიტიკური, უსაფრთხოების რისკები, საქართველოს მთავრობა დღენიადაგ ზრუნავს, რომ ეს რისკები დააზღვიოს. ამ ფონზე, პრეზიდენტი, რომელიც არის მთავარსარდალი, თავს იკავებს, არჩევნებში გამარჯვება მიულოცოს ჩვენს მეზობელ პარტნიორ, მეგობარი სახელმწიფოს მეთაურს. ეს პოლიტიკურად სიბეცეს ნიშნავს, მაგრამ ამას კიდევ არა უშავს, ვფიქრობ, სალომე ზურაბიშვილი აგრძელებს დავალებების შესრულებას ეგრეთ წოდებული პატრონებისგან, ამასთან უნდა გვქონდეს საქმე. მისი მიზანი უნდა იყოს, როგორც პრეზიდენტმა, წინასწარ დააზღვიოს ჩვენი ქვეყნის საფრთხეები, მაქსიმალურად მეგობრული,  პარტნიორული ურთიერთობა იქონიოს ისეთ საუკეთესო მეზობლებთან, რომელთა შორის არის აზერბაიჯანი, თუმცა როგორც ჩანს, მისი მიზანია, მეტი რისკი იყოს ამ ქვეყანაში, გაიზარდოს ეკონომიკური საფრთხეები და ასე შემდეგ. ეს, სულ მცირე, დასანანია. ასევე, გაზიარებული ვერ იქნება ახსნა, რომ ჯერ საბოლოოდ არ არის დადასტურებული გამარჯვება და ამიტომ არ ულოცავს ალიევს. ჩვენ გვახსოვს თუნდაც ერთი მაგალითი, როცა ქალბატონმა სალომემ არჩევნების შედეგების ოფიციალურად დადასტურებამდე მიულოცა მაკრონს, რაც ბუნებრივი და მისასალმებელი იყო“, – განაცხად თეა წულუკიანმა.

საქართველოს ეკონომიკისა და მდგრადი განვითარების მინისტრ ლევან დავითაშვილის განცხადებით, მთავრობის დღევანდელ სხდომაზე 2024 წლის პრიორიტეტებსა და მთავრობის მუშაობის პრინციპებზე ისაუბრეს.

მისივე თქმით, დაიგეგმა ძირითადი სამუშაო მიმართულებები და პრინციპები, რომლებზეც ახალი შემადგენლობით ინტენსიურად იმუშავებენ.

„როგორც იცით, დღეს ახალი მთავრობის პირველი სხდომა გაიმართა, რომელზეც ახალ პრემიერ-მინისტრთან ვისაუბრეთ ზოგადად მთავრობის მუშაობის პრინციპებზე. პირველ რიგში, მინდა, მივულოცო ყველა ჩემს კოლეგას, ბატონ ირაკლი კობახიძეს დაკავებული თანამდებობები. ვფიქრობ, ჩვენ გველოდება ინტენსიური წელი, ძალიან ბევრი ამოცანა გვაქვს შესასრულებელი. გვქონდა საინტერესო, ინტენსიური განხილვები პარლამენტში, სადაც ვსაუბრობდით მიმდინარე წელს შესასრულებელი გეგმების და ამოცანების შესახებ, გავაცანით სამთავრობო პროგრამის ის ნაწილი, რომელიც 2024 წლის პრიორიტეტებს უკავშირდება. შესაბამისად, ძალიან მაღალ დონეზე კოორდინირებული მუშაობაა საჭირო, რათა ყველა ამ მიზანს მივაღწიოთ. ასე რომ, ჩვენ დავგეგმეთ ძირითადი სამუშაო მიმართულებები და პრინციპები, რომლებზეც ვიმუშავებთ ინტენსიურად, ახალი შემადგენლობით. ასევე, ვისაუბრეთ მეტ ანგარიშვალდებულებაზე, რომელიც პრემიერ-მინისტრის ერთ-ერთი მნიშვნელოვანი მესიჯი იყო საზოგადოების მიმართ. ანგარიშვალდებულებასთან ერთად, გამჭვირვალობაზე. ეს თითოეული სამინისტროსთვის აქამდეც იყო მნიშვნელოვანი პრიორიტეტი, მაგრამ დღეს ასევე იქნება მნიშვნელოვანი პრიორიტეტი, მათ შორის მედიასთან ურთიერთობა იქნება მეტი და ინტენსიური“, – აღნიშნა ლევან დავითაშვილმა.

სალომე ზურაბიშვილი ოპოზიციის ლიდერად თუ მოგვევლინება,  ოპოზიცია გაერთიანდება ქვეყნის გაშავებასთან, კონსტიტუციის დარღვევასთან და უფრო ნათელი იქნება, ვის უნდა მისცეს ხმა ქართველმა ხალხმა, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილის თქმით, სალომე ზურაბიშვილს არც პოლიტიკური რესურსი აქვს, არც მხარდაჭერა.

„სალომე ზურაბიშვილს არცერთი ოპოზიციონერი კოლეგისთვის არაფერი კონკრეტული არ უთქვამს, რაც თავად ამ პოლიტიკოსებმა დაამტკიცეს, როცა მათთან შევიდნენ და გამოვიდნენ. როგორც შევიდნენ, ისე გამოვიდნენ. რა თქმა უნდა, სალომე ზურაბიშვილს არც პოლიტიკური რესურსი აქვს, არც მხარდაჭერა და კარგი იქნება, თუ იმის მცდელობა იქნება, რომ სალომე ზურაბიშვილი ოპოზიციას მოევლინოს, როგორც ოპოზიციის ლიდერი. ანუ, ოპოზიცია გაერთიანდება ქვეყნის გაშავებასთან, კონსტიტუციის დარღვევასთან და უფრო ნათელი იქნება, ვის უნდა მისცეს ხმა ქართველმა ხალხმა“, – განაცხადა გურამ მაჭარაშვილმა.

ეგრე სად არის, ქვეყნის უკან დახევაში მონაწილეობა მიიღე, დამაზიანებელი ნაბიჯები გადადგი და რადგან ბევრი რესურსი გაქვს, აორთქლდე, გადასახლდე და მშვიდად გააგრძელო ცხოვრება – ივანიშვილმა, ისევე როგორც ყველა წარმომადგენელმა ამ ძალის, პასუხისმგებლობა უნდა აიღოს, – ამის შესახებ ჟურნალისტებთან პარტია “საქართველოსთვის” წევრმა ბექა ლილუაშვილმა განაცხადა, რითაც გამოეხმაურა მამუკა ხაზარაძის განცხადებას, რომ არჩევნების შემდეგ ივანიშვილი მოსკოვში წავა.

ლილუაშვილის თქმით, რომელიმე პოლიტიკური ძალის გადასაწყვეტი არ არის, ვინ სად იქნება, ხოლო ივანიშვილს კითხვებზე პასუხი აქვს გასაცემი.

„ლელოს“ საარჩევნო კამპანიის შეფასებაში არ შევდივარ, თუმცა, ერთი რამ უნდა ითქვას, „ოცნება“, განსახიერებული ივანიშვილით, ამ ქვეყნის პოლიტიკური ცხოვრებიდან ვერ გაქრება. ის უნდა გადავიდეს ოპოზიციაში და თავის პასუხისმგებლობა დაიტოვოს. ეგრე, სად არის, ამდენი ხნის განმავლობაში ქვეყნის უკან დახევაში მონაწილეობა მიიღე, დამაზიანებელი ნაბიჯები გადადგი და იმის გამო, რომ ბევრი რესურსი გაქვს, აორთქლდე, გადასახლდე და მშვიდად გააგრძელო პასუხისმგებლობის გარეშე ცხოვრება. არა, მან, ისევე როგორც ყველა წარმომადგენელმა ამ ძალის, პასუხისმგებლობა უნდა აიღოს, პოლიტიკურიც, სამართლებრივიც, ყველანაირი.

არავის გადასაწყვეტი, არც „ლელოსი“ და არც სხვისი არ არის ის, რომ პასუხისმგებლობა ყველამ უნდა აიღოს. „ოცნება“ ოპოზიციაში რომ გადავა 2024 წელს, როგორ გგონიათ, უნდა აორთქლდეს?! ის დარჩება ბუნებრივია, შეიძლება დაიშალოს, ერთ, ორ ან 10 ნაწილად. იგივე ივანიშვილს იმდენ რამეზე აქვს პასუხები გასაცემი, იმდენი პასუხისმგებლობა აქვს ასაღები, მათ შორის, პოლიტიკურიც, შესაძლოა სამართლებრივი, სად უნდა წავიდეს?!“- განაცხადა ლილუაშვილმა.

მე მიმაჩნია, რომ საქართველოს მთავრობა უნდა იყოს მაგალითის მიმცემი ყველასთვის გამჭვირვალობის და ანგარიშვალდებულების თვალსაზრისით. ჩვენი თითოეული გადაწყვეტილება უნდა იყოს მაქსიმალურად ღია მოქალაქეებისთვის და იგივეს მოვითხოვთ ყველა სხვა სახელმწიფო უწყებისგან, – ამის შესახებ პრემიერ-მინისტრმა, ირაკლი კობახიძემ მთავრობის სხდომაზე განაცხადა.

ამასთან, მან აღნიშნა, რომ ქვეყანას სჭირდება სწრაფი ეკონომიკური განვითარება.

„ზოგადად ჩვენი ქვეყანა დგას სერიოზული გამოწვევების წინაშე, გვჭირდება ეკონომიკის სწრაფი განვითარება, დაწყებული მასშტაბური ინფრასტრუქტურული პროექტების ბოლომდე მიყვანა, ქვეყნის თავდაცვისუნარიანობის, უსაფრთხოების კიდევ უფრო მეტად გაძლიერება, გვჭირდება განათლების, ჯანდაცვის, სოციალური დაცვის სისტემების კიდევ უფრო მეტად გაძლიერება, ასევე ზრუნვა კულტურაზე, სპორტზე, ახალგაზრდობის მიმართულებით, ასევე ჩვენი ქვეყნის საგარეო პოლიტიკური პოზიციების კიდევ უფრო მეტად გაძლიერება, ბუნებრივია, არის საჭირო. იმისათვის, რომ მაქსიმალურ შედეგებს მივაღწიოთ ჩვენი საქმიანობა, მთავრობის საქმიანობა უნდა ეფუძნებოდეს ძალიან მყარ პრინციპებს. პირველ რიგში, მე მიმაჩნია, რომ საქართველოს მთავრობა უნდა იყოს მაგალითის მიმცემი ყველასთვის გამჭვირვალობის და ანგარიშვალდებულების თვალსაზრისით. ჩვენი თითოეული გადაწყვეტილება უნდა იყოს მაქსიმალურად ღია მოქალაქეებისთვის და იგივეს მოვითხოვთ ყველა სხვა სახელმწიფო უწყებისგან. ასევე ჩვენ, მუდმივად უნდა ვიზრუნოთ ჩვენ მიერ შესრულებული სამუშაოების მუდმივად გაუმჯობესებაზე, ხარვეზების მინიმუმამდე დასაყვანად უნდა გავაძლიეროთ ხარისხის კონტროლის და ზედამხედველობის ყველა შესაბამისი მექანიზმი. იგივე ეხება საზოგადოებრივი მომსახურების ხარისხს, აქაც მინიმუმამდე უნდა დავიყვანოთ ჩვენი მოქალაქეების პრეტენზიები სერვისების ხარისხთან დაკავშირებით და ზოგადად, გადაწყვეტილებები ყველა თემასთან დაკავშირებით უნდა იყოს მიღებული საზოგადოებასთან, სპეციალისტებთან, დარგის წარმომადგენლებთან ძალიან ფართო კონსულტაციების საფუძველზე. ყოველთვის, როცა ვიღებთ გარკვეულ გადაწყვეტილებას საზოგადოებას მაქსიმალურად ფართოდ უნდა განვუმარტოთ ამ გადაწყვეტილების შინაარსი, მიზეზები, ეს უნდა აიყოს ჩვენი საქმიანობის ერთ-ერთი სახელმძღვანელო პრინციპი. ერთ-ერთი აქტუალური საკითხი არის რესპუბლიკური საავადმყოფოს საკითხი და ამ შემთხვევაშიც, გვჭირდება შესაბამისი დარგის სპეციალისტებთან, ექიმებთან, საავადმყოფოს კოლექტივთან აქტიური კონსულტაციები იმისთვის, რომ საბოლოო ჯამში, სათანადო გადაწყვეტილებები მივიღოთ“, – განაცხადა კობახიძემ.

პრემიერის თქმით, ქვეყანას აქვს ძალიან კარგი შედეგები კორუფციასთან ბრძოლის თვალსაზრისით, კორუფციის სიმცირის თვალსაზრისით, რასაც ძალიან ბევრი საერთაშორისო კვლევაც ადასტურებს.

„თუმცა, აქაც ვფიქრობ, რომ კიდევ უფრო მეტი მაღალი ამბიციები უნდა გვქონდეს და ჩვენ უნდა გვქონდეს იმის ამბიცია, რომ ამ თვალსაზრისით ვიყოთ მსოფლიოს მოწინავე ქვეყნებს შორის, რაც არის აბსოლუტურად რეალისტური ამოცანა, მთავარია, რომ აქტიურად ვიმუშაოთ ამ ყველაფერზე. ზოგადად, ჩვენ გვყავს ძალიან ძლიერი სამთავრობო გუნდი და დარწმუნებული ვარ, რომ ერთად ძალიან მნიშვნელოვან შედეგებს მივაღწევთ. ყველაფერი არის ჩვენი მიზანდასახულობის, პრინციპულობის, თანმიმდევრული საქმიანობის, შრომისმოყვარეობის საქმე, რაც არცერთ თქვენგანს არ აკლია. კიდევ ერთხელ, მინდა გისურვოთ წარმატებები“-განაცხადა კობახიძემ.