გარემოს ეროვნული სააგენტოს ინფორმაციით, 9 სექტემბერს, საქართველოს ტერიტორიის უმეტეს ნაწილზე მოსალოდნელია დროგამოშვებით წვიმა ელჭექით, ზოგან ძლიერი. ასევე, ზოგან შესაძლებელია აღინიშნოს სეტყვა. ხოლო 10 სექტემბერს ხანმოკლე წვიმა ელჭექით შენარჩუნდება მხოლოდ ცალკეულ რაიონში.

რაც შეეხება ქალაქებს, თბილისში 9 სექტემბერს მოსალოდნელია წვიმა ელჭექით. ჰაერის ტემპერატურა დღის საათებში +24, +26 გრადუსი დაფიქსირდება, ხოლო 10 სექტემბერს უნალექო ამინდია მოსალოდნელი.

სანაპირო რაიონებში, ბათუმში, ქობულეთსა და ფოთში 9 სექტემბერს, 10 სექტემბრის დილამდე მოსალოდნელია დროგამოშვებით წვიმა ელჭექით, ხოლო 10 სექტემბერს დღისით გამოდარებით.

9-10 სექტემბერს ზღვაზე შესაძლებელია დაფიქსირდეს ძლიერი ქარი და შტორმი. ჰაერის ტემპერატურა დღისით +23, +25 გრადუსი იქნება.

დასავლეთ საქართველოს ქალაქებში – ქუთაისში, ზუგდიდში, მარტვილში, ოზურგეთსა და ლანჩხუთში 10 სექტემბრის დილამდე ნავარაუდებია დროგამოშვებით ხანმოკლე წვიმა ელჭექით. ჰაერის ტემპერატურა იქნება დღისით +23, +25 გრადუსი.

ხოლო დასავლეთ საქართველოს მთიან რეგიონებში – ამბროლაურში, ონში, ცაგერში, შოვში, ჭიათურაში, საჩხერესა და ხულოში 10 სექტემბრის დილამდე დროგამოშვებით წვიმა ელჭექით. ჰაერის ტემპერატურა დღისით +20, +22 გრადუსი.

რაც შეეხება დასავლეთ საქართველოს მაღალმთიან რეგიონებს – მესტიასა და ბახმაროში 10 სექტემბრის დილამდე ნავარაუდებია დროგამოშვებით წვიმა ელჭექით. ჰაერის ტემპერატურა იქნება დღისით +14, + 16 გრადუსი.
ქალაქებში – რუსთავში, მარნეულში, გარდაბანში, გორსა და ცხინვალში 9 სექტემბერს დროგამოშვებით წვიმა ელჭექით, ხოლო 10 სექტემბერს უნალექო ამინდია მოსალოდნელი. ტემპერატურა იქნება დღისით +23, +25 გრადუსი.

კახეთის რეგიონში, კერძოდ საგარეჯოში, თელავში, გურჯაანში, სიღნაღში, ლაგოდეხში, ყვარელში, ახმეტასა და დედოფლისწყაროში 8-9 სექტემბერს სინოპტიკოსები დროგამოშვებით ხანმოკლე წვიმას ელჭექით ვარაუდობენ, შესაძლებელია სეტყვა. 10 სექტემბერს უნალექო ამინდია მოსალოდნელი. ჰაერის ტემპერატურა დღისით +24, +26 გრადუსი იქნება.

ხოლო აღმოსავლეთ საქართველოს მთიან რეგიონებში – ახალციხეში, ბორჯომში, დუშეთში, თიანეთსა და ფასანაურში 10 სექტემბრის დილამდე მოსალოდნელია დროგამოშვებით ხანმოკლე წვიმა ელჭექით. ჰაერის ტემპერატურა იქნება დღისით +21, +23 გრადუსი.

რაც შეეხება აღმოსავლეთ საქართველოს მაღალმთიან რეგიონს – ახალქალაქში, წალკაში, ბაკურიანში, გუდაურსა და ომალოში მოსალოდნელია დროგამოშვებით ხანმოკლე წვიმა ელჭექით. ჰაერის ტემპერატურა დღისით +13 +15 გრადუსი იქნება.

ასევე, 10 სექტემბერს ღამისა და დილის საათებში საქართველოს მაღალმთიან რეგიონებში შესაძლებელია თოვლჭყაპი აღინიშნოს.

ძლიერმა წვიმამ ჩხოროწყუს მუნიციპალიტეტში პრობლემები შექმნა. მუნიციპალიტეტის მერიის ცნობით, ადიდდა მდინარეები და ღელეები, დატბორილია რამდენიმე საცხოვრებელი სახლის პირველი სართული, ქუჩები, ეზოები, ყანები, თხილნარი.
ჩამორეცხილია შიდა საუბნო გზები.

შემთხვევის ადგილზე მუნიციპალიტეტის მერი დათო გოგუა შესაბამის სამსახურებთან ერთად იმყოფებპდა. შესაბამისი კომისიის მიერ მიმდინარეობს ზარალის დათვლა.

მთავრობა „გურიის ეროვნული პარკის შექმნისა და მართვის შესახებ“ კანონპროექტს პარლამენტს საშემოდგომო სესიაზე წარუდგენს. აღნიშნულის შესახებ მთავრობის კანონშემოქმედებითი საქმიანობის მოკლევადიან გეგმაშია აღნიშნული.

„იქმნება გურიის ეროვნული პარკი. ეროვნული პარკის ფართობი შეადგენს დაახლოებით 20 ჰა-ს და მოიცავს ჩოხატაურისა და ოზურგეთის მუნიციპალიტეტების ტერიტორიებს.

გურიის ეროვნული პარკისთვის განკუთვნილი ტერიტორია წარმოადგენს მნიშვნელოვან ადგილს ბიომრავალფეროვნების კონსერვაციისათვის. ახასიათებს ფლორისა და ფაუნის სახეობების მრავალფეროვნება.

ამ ტერიტორიაზე გავრცელებულია საქართველოს და IUCN წითელი ნუსხის და CITES კონვენციით დაცული, საქართველოს და კავკასიის ენდემურ მცენარეთა 74 სახეობის პოპულაციები. შესაბამისად, მნიშვნელოვანია დაცული ტერიტორიის შექმნა მათი დაცვის და შენარჩუნების მიზნით,“- ვკითხულობთ დოკუმენტში.

დღემდე, ბარიატრიული ოპერაციები იმ სამედიცინო დაწესებულებებშიც კეთდებოდა, სადაც ამის კვალიფიკაცია საერთოდ არ გააჩნდათ. ხშირად ოპერაციებს წონის კორექციის ქირურგიაში ნაკლებად გამოცდილი და ახალბედა ექიმები ატარებდნენ. იყო გართულებული შემთხვევებიც. ჯანდაცვის სამინისტრომ არსებულ რისკებს გადახედა და პროტოკოლი მთლიანად შეცვალა. ახალი სტანდარტის მიხედვით, ექიმის კვალიფიკაციასა და გამოცდილებას გადამწყვეტი მნიშვნელობა ექნება. ქირურგიულ ჩარევას მხოლოდ ის სამედიცინო პერსონალი განახორციელებს, ვისაც ბოლო ერთი წლის განმავლობაში ბარიატრიის, მინიმუმ, 30 ოპერაცია მაინც აქვს ჩატარებული .

ბარიატრიული ოპერაციის გასაკეთებლად მხოლოდ პაციენტის სურვილი საკმარისი აღარ იქნება. ახალი წესის მიხედვით, პაციენტს უნდა ჰქონდეს შესაბამისი წონის ინდექსი და თანმხლები დაავადებები. ლაბორატორიული კვლევებისა და მდგომარეობის შეფასების შემდეგ, ქირურგიული ჩარევის საჭიროებას მულტიდისციპლინური გუნდი გადაწყვეტს. ოპერაციის რეკომენდაცია გაიცემა იმ შემთხვევაში, ვისაც პირველი ხარისხის სიმსუქნე აღენიშნება და ვერ ახერხებს წონის კლებას არაქირურგიული მეთოდებით.

ახალი სტანდარტებისა და რეკომენდაციების შემუშავებაში აქტიურად იყო ჩართული ბარიატრიული ქირურგიის ასოციაცია. საბჭოს წევრები ამბობენ, რომ ახალ პროტოკოლში გაითვალისწინეს სხვა ქვეყნების გამოცდილება და საერთაშორისო სტანდარტები..

მულტიდისციპლინური გუნდი უკვე ჰყავს კლინიკების ნაწილს. “ნიუვიჟენმა” ბოლო ორ თვეში, დაახლოებით, 25 ბარიატრიული ოპერაცია ჩაატარა. დირექტორი მირზა ხინიკაძე ჯანდაცვის ახალ გადაწყვეტილებას იწონებს და ყურადღებას ბარიატრიის პოსტოპერაციულ რისკებზე ამახვილებს .

ახალი პროტოკოლის თანახმად, ბარიატიული ოპერაცია მრავალპროფილურ კლინიკებში უნდა ჩატარდეს. სამედიცინო დაწესებულებებმა სანებართვო პირობები 2023 წლის 1 ოქტომბრამდე უნდა დააკმაყოფილონ და ჯანდაცვის სამინისტროში შესაბამისი დოკუმენტაცია წარადგინონ.

ბორჯღალოსნებმა 2023 წლის მსოფლიო თასის პირველ მატჩი ავსტრალიის წინააღმდეგ ჩაატარეს და ანგარიშით 15:35 დამარცხდნენ. თამაში პარიზში, „სტად დე ფრანსეზე“ გაიმართა.

საქართველოსთვის ეს ზედიზედ მე-6 მსოფლიო თასია. აქამდე ჩვენმა გუნდმა საუკეთესო შედეგი 2015 წელს აჩვენა, როდესაც ორი თამაში მოიგო (ტონგასთან და ნამიბიასთან). სამ შემთხვევაში ბორჯღალოსნებმა ჯგუფში თითო თამაში მოიგეს და მხოლოდ პირველ, 2003 წლის მსოფლიო თასზე ვერ მოახერხეს გამარჯვების მოპოვება.

ავსტრალიას ყველა, 9-ვე მსოფლიო თასი აქვს ნათამაშები და ორჯერ გახდა ჩემპიონი – 1991 და 1999 წელს, 2003 და 2015 წელს ფინალში დამარცხდა, 2011 წელს მესამე, ხოლო 1987 წელს მეოთხე ადგილი დაიკავა. „ვოლაბებმა“ ყველა ჯერზე შეძლეს ჯგუფური ეტაპის გადალახვა და სამჯერ დამარცხდნენ მეოთხედფინალში.

9 მსოფლიო თასიდან ავსტრალიამ ორს უმასპინძლა – პირველ, 1987 წლის მსოფლიოს ახალ ზელანდიასთან ერთად და 2003 წელს დამოუკიდებლად.

საქართველოს ავსტრალიასთან ერთადერთხელ უთამაშია – 2019 წლის მსოფლიო თასზე და მეტოქემ 19 ქულის სხვაობით, 27-8 მოიგო. მას შემდეგ, ავსტრალიას ტიერ2-ის წინააღმდეგ აქამდე არც ერთხელ არ უთამაშია.