„არაფერი მიკვირს იმ ადამიანებისგან, ვინც სტიქიური უბედურებით ცდილობს, ხელი მოითბოს“, – ამის შესახებ თბილისის მერმა, კახა კალაძემ შოვის ტრაგედიასთან დაკავშირებით გავრცელებულ მორიგ ბრალდებებს უპასუხა, თითქოს მას შოვთან გარკვეული ბიზნესინტერესები აკავშირებს.

მისი თქმით, ეს ისეთივე ტყუილია, როგორც ტრაგედიის პირველივე დღეებში აგორებული ცილისწამება იმასთან დაკავშირებით, რომ საკუთარი შვილები შოვიდან ვერტმფრენით გამოიყვანა.

„ეს რაღაც ახალი ბოდვაა. შოვში მომხდარი სტიქიის სახით, ძალიან დიდი უბედურება დაატყდა ქვეყანას თავს, რასაც შესაბამისი უწყებების მხრიდან რეაგირება მოჰყვა. სამძებრო-სამაშველო ღონისძიებები დღესაც გრძელდება. სამწუხაროდ, გვყავს გარდაცვლილები. კიდევ ერთხელ ვუსამძიმრებ მათ ოჯახებს, ახლობლებს, ნათესავებს.  არ ვიცი, რა სერიოზული პასუხი უნდა გავცე აღნიშნულ შეკითხვას. არც ის ვიცი, რა ბიზნესინტერესებზეა საუბარი, თუმცა არაფერი მიკვირს თქვენი ტელევიზიებისგან, იმ ადამიანებისგან, ვინც სტიქიური უბედურებით ცდილობს, ხელი მოითბოს, იმიტომ, რომ პირველივე დღეების განმავლობაში მაბრალებდით, თითქოს ვერტმფრენით ვისარგებლე შოვიდან ჩემი შვილების გამოსაყვანად და სხვები მივატოვე“, – განაცხადა კახა კალაძემ.

თბილისის მერის თქმით, საზოგადოება ყველაფერს კარგად ხედავს და არჩევნების გზით, შესაბამის გადაწყვეტილებას მიიღებს.

„მსგავსი სიბინძურითა და ცილისწამებით იყო თქვენი ტელევიზიები დაკავებული, თუმცა საზოგადოება ყველაფერს ძალიან კარგად ხედავს და ყოველთვის მიიღებთ შესაბამის პასუხს, როდესაც ამის დრო მოვა. ახლოვდება 2024 წლის საპარლამენტო არჩევნები და ჩვენი ქვეყნის მოსახლეობა გაგცემთ ყველა იმ ცილისწამებასა და სიბინძურეზე პასუხს, რასაც მთელი ამ წლების განმავლობაში, ყოველდღიურ რეჟიმში ახორციელებდით“, – აღნიშნა დედაქალაქის მერმა.

„თუ ვინმემ რაიმე წარმატებას მიაღწია ევროინტეგრაციისკენ მიმავალ გზაზე, ეს არის  პარტია „ქართული ოცნება – დემოკრატიული საქართველოს“ დამსახურება, ჩვენი ქვეყნის მოსახლეობასთან ერთად“, – ამის შესახებ დედაქალაქის მერმა, კახა კალაძემ მედიასთან ისაუბრა.

როგორც მან აღნიშნა, მიუხედავად იმისა, რომ 2012 წლიდან მოყოლებული საქართველოს ხელისუფლებამ არაერთი რეფორმა განახორციელა და წარმატებას მიაღწია, ევროკავშირის კანდიდატის წევრობის სტატუსი მაინც არ მოგვანიჭეს, რაც იყო პოლიტიკური გადაწყვეტილება.

„დავიწყებ იმით, რომ საქართველოსთან მიმართებაში არასამართლიანი გადაწყვეტილება იქნა მიღებული მაშინ, როდესაც სტატუსი არ მოგვანიჭეს და მისცეს უკრაინასა და მოლდოვას. რა თქმა უნდა, გამიხარდა ამ ორი ქვეყნისთვის სტატუსის მინიჭება, მაგრამ საქართველო ამას ნამდვილად იმსახურებდა. ამ სამი ქვეყნიდან თუ ვინმეს რაიმე წარმატებისთვის აქვს მიღწეული, ეს არის ჩვენი ქვეყანა. ეს პერიოდი უკავშირდება 2012 წლის შემდგომ პერიოდს. ამის მიუხედავად, საქართველო და ქართველი ხალხი დაჩაგრეს. სტატუსის არ მოცემა სჭირდებოდათ პოლიტიკური მიზნებისთვის, რომ ქვეყანაში მოეხდინათ არეულობა, ხელისუფლების ცვლილება ყველანაირი მეთოდით და რომ მერე ხალხისთვის ეთქვათ, თქვენ კი კარგები ხართ, ევროპულ მომავალს იმსახურებთ, მაგრამ ხელისუფლება გყავთ ცუდიო.  სამწუხაროდ, მსგავს მესიჯებს დღესაც ვისმენთ, რაც ძალიან მძიმე და დამაზიანებელია.

კიდევ ერთხელ გავიმეორებ, რომ თუ ვინმემ რაიმე წარმატებას მიაღწია ევროინტეგრაციისკენ მიმავალ გზაზე, ეს არის პარტია „ქართული ოცნება – დემოკრატიული საქართველოს“ დამსახურება, ჩვენი ქვეყნის მოსახლეობასთან ერთად. გვაქვს წინ გადადგმული ნაბიჯები – ვიზალიბერალიზაცია, ასოცირების ხელშეკრულება, თავისუფალი ვაჭრობის შეთანხმება და ა.შ.“, – განაცხადა კახა კალაძემ.

მისივე თქმით, ხელისუფლების მთავარი მიზანი არის ევროპული ოჯახის წევრობა და ამ მიმართულებით მუშაობა აქტიურად გრძელდება.

„ჩვენ ევროინტეგრაციის გზაზე სიარულს, რეფორმების განხორციელებას ვაგრძელებთ. ჩვენი მიზანი არის, რომ რაც შეიძლება მალე გავხდეთ ევროპული დიდი ოჯახის წევრი, მივიღოთ სტატუსი, მაგრამ ეს არ ნიშნავს იმას, რომ უარი ვთქვათ ჩვენს ქვეყანაზე და ჩვენი ქვეყნის ინტერესების დაცვაზე“, – აღნიშნა კახა კალაძემ.

მიმდინარე წლის 9 სექტემბერს, ვეტერანების საქმეთა სახელმწიფო სამსახურის ორგანიზებით, ურთიერთთანამშრომლობის მემორანდუმის ფარგლებში, ლაიონსების თვალის დიაბეტურმა კლინიკა-საქართველომ, შუახევში მცხოვრები ომისა და თავდაცვის ძალების ვეტერანებისა და მათი ოჯახის წევრთათვის, უფასო ოფთალმოლოგიური გამოკვლევები ჩაატარა.

საქველმოქმედო სამედიცინო აქციით, რომელშიც მონაწილეობა მიიღო კვალიფიციურ მედიკოსთა 12 კაციანმა ჯგუფმა (ოფთალმოლოგები, ენდოკრინოლოგი) მაღალტექნოლოგიური აპარატურით, ისარგებლა სამსახურის 124-მა ბენეფიციარმა, რომელთაგან 68 ვეტერანი, ხოლო, 56_ვეტერანის ოჯახის წევრი გახლდათ; განხორციელდა 170 სამედიცინო ვიზიტი; აქციის ფარგლებში, სამსახურის ბენეფიციარებს, უსასყიდლოდ გადაეცათ 248 სათვალე.

აქციის მიმდინარეობას, ადგილზე გაეცნენ: ვეტერანების საქმეთა სახელმწიფო სამსახურის დირექტორის მოადგილე, ჯანდრი უბირია, სოციალურ საკითხთა და სააღრიცხვო-ანალიტიკური დეპარტამენტის წარმომადგენელი, ვაჟა დალაქიშვილი, სამსახურის რეგიონული მართვის დეპარტამენტის აჭარის ა/რ სამმართველოს უფროსი, შოთა ყიფიანი, შუახევის მუნიციპალიტეტის მერი, ომარ ტაკიძე.

ურთიერთთანამშრომლობის მემორანდუმი, ვეტერანების საქმეთა სახელმწიფო სამსახურსა და ლაიონსების თვალის დიაბეტურ კლინიკა-საქართველოს შორის, პირველად, 2016 წელს გაფორმდა და ყოველწლიურად განახლდება. მიმდინარე წელს, ლაიონსების თვალის დიაბეტურმა კლინიკა-საქართველომ, მთელი ქვეყნის მასშტაბით, დღეის ჩათვლით, 12 საქველმოქმედო სამედიცინო აქცია ჩაატარა, რომლის ფარგლებშიც, სამსახურის 1317 ბენეფიციარს, კვალიფიციური, ოფთალმოლოგიური მომსახურება, უფასოდ გაეწია; ამასთან, უსასყიდლოდ ჩატარდა სხვადასხვა სახის მიკროქირურგიული ოპერაციებიც; ვეტერანებს და მათი ოჯახის წევრებს, ასევე, უფასოდ გადაეცათ 1812 სათვალე;

სხვადასხვა სამედიცინო დაწესებულებებთან არსებული მემორანდუმების ფარგლებში, ვეტერანებისა და მათი ოჯახის წევრებისათვის, საქველმოქმედო სამედიცინო აქციები, მთელი საქართველოს მასშტაბით, კვლავ ჩატარდება, რომელთა შესახებ, ინფორმაცია, ვეტერანებს, წინასწარ მიეწოდებათ.

პრემიერ-მინისტრის იმპიჩმენტის მოთხოვნა არის უბრალოდ იმ საკითხების გადაფარვის მცდელობა, რომელიც აქტუალურია, მაგალითად, პრეზიდენტის იმპიჩმენტი, რადგან რეალურად გვაქვს დიდი დანაშაული, – ამის შესახებ „ქართული ოცნების“ გენერალურმა მდივანმა, კახა კალაძემ ზუგდიდში განაცხადა.

„მიზანმიმართული ბინძური კამპანიაა პრემიერის და მისი ოჯახის წინააღმდეგ. ძალიან ბევრი განცხადება იქნა გაკეთებული აღნიშნულ ჩარტერთან დაკავშირებით, თუ ვინ გადაიხადა ეს თანხები, პირდაპირ მთავრობის მხრიდან განცხადებაც იყო გაკეთებული, რომ ეს იყო პრემიერ-მინისტრის პირადი ხარჯი, ბიუჯეტიდან არც ერთი თეთრი არ დახარჯულა.

რაც შეეხება პრემიერ-მინისტრის იმპიჩმენტის საკითხს, რეალურად რომ შევხედოთ, ეს არის უბრალოდ იმ საკითხების გადაფარვის მცდელობა, ყოველ შემთხვევაში, რომელიც დღეს აქტუალურია, მაგალითად, როდესაც პრეზიდენტის იმპიჩმენტზეა საუბარი, რადგან რეალურად გვაქვს ძალიან დიდი დანაშაული. როდესაც პრეზიდენტი არღვევს კონსტიტუციას, ეს არის უმძიმესი საკითხი. ქვეყნის მაღალი თანამდებობის პირი, რომელიც პირველი უნდა იცავდეს კონსტიტუციას, კანონს, პატივს უნდა სცემდეს ჩვენს ქვეყანას, ხალხს – არღვევს კონსტიტუციას, ეს ძალიან მძიმეა. რეალურად პოლიტიკური საკითხებით ხდება ასეთი საკითხების გადაფარვის მცდელობა“,- განაცხადა კახა კალაძემ.

პრეზიდენტს აქვს „ნაცმოძრაობის“ იმედი და მათი იმედით არღვევდა კონსტიტუციას, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

მისივე თქმით, მოლოდინი არ აქვთ, რომ „ნაცმოძრაობა“ მხარს დაუჭერს სალომე ზურაბიშვილის იმპიჩმენტს.

პრეზიდენტს აქვს „ნაცმოძრაობის“ იმედი და „ნაცმოძრაობის“ იმედით არღვევდა კონსტიტუციას. რა თქმა უნდა, არავითარი ილუზია არ გვაქვს, რომ კოლექტიური „ნაცმოძრაობა“ მხარს დაუჭერს სალომე ზურაბიშვილის იმპიჩმენტს, მიუხედავად იმისა, რომ ისინი თავის დროზე მოღალატედ აფასებდნენ სალომე ზურაბიშვილს, ანუ სამმილიონიან ამომრჩეველს ატყუებდნენ, რომ სალომე ზურაბიშვილი იყო მოღალატე. შემთხვევით, ახლა ხომ არ ატყუებენ, რომ „ქართული ოცნება“ არის რუსული პარტია და ასე შემდეგ. ანუ, როცა „ნაცმოძრაობა“ არ დაუჭერს მხარს პრეზიდენტის იპიჩმენტს, ამით თვითონვე აღიარებს, რომ თავის დროზე სამმილიონიანი ამომრჩეველი უბრალოდ მოატყუა. ესეც ერთ-ერთი აღიარება, ლუსტრაცია, სალომე ზურაბიშვილისა და რადიკალური ოპოზიციის ერთიანობის გაშიშვლებაა.  ეს არის ძალიან ბევრი პლუსი, რაც თან ახლავს იმპიჩმენტის პროცედურას“, – განაცხადა ირაკლი კობახიძემ.

„ნაციონალური მოძრაობა“ საგამოძიებო ორგანოებს მოუწოდებს, შოვის ტრაგედიასთან დაკავშირებით მაღალი პოლიტიკური თანამდებობის პირების, პრეიერ-მინისტრ ირაკლი ღარიბაშვილის, შს მინისტრის ვახტანგ გომეაურის და ეკონომიკის მინისტრის, ლევან დავითაშვილის დანაშაულებრივ გულგრილობაზე გამოძიება დაიწყონ. შოვში განვითარებულ პროცესებზე პრესკონფერენცია ლევან ხაბეიშვილმა, ლაშა ფარულავამ, გიორგი ვაშაძემ და პაატა მანჯგალაძემ გამართეს.

ხაბეიშვილმა აღნიშნა, რომ შოვის ტრაგედია „ქართული ოცნების“ დანაშაულებრივი უმოქმედობის, გულგრილობის და კორუფციული ინტერესების შედეგია. მთავარი დამნაშავე კი, პრემიერ-მინისტრია. მისი თქმით, განვითარებულ პროცესებში მთავარი დამნაშავეა ასევე შს მინისტრი ვახტანგ გომელაური, რომლის ბრძანებითაც ვერტმფრენმა სამაშველო ღონისძიება 22:00 საათზე შეწყვიტა, რის გამოც სამძებრო-სამაშველო ღონისძიება მთლიანად ჩავარდა.

„საგამოძიებო ორგანოებმა უნდა დაიწყონ გამოძიება ზემოთ ხსენებული მაღალი პოლიტიკური თანამდებობის პირების დანაშაულებრივ გულგრილობაზე, წინააღმდეგ შემთხვევაში, მათი მხრიდან დანაშაულის დაფარვაც იქნება შემდგომში გამოძიების საგანი, როცა ქვეყანაში იქნება დამოუკიდებელი საგამოძიებო სისტემა”, – აღნიშნეს „ნაციონალური მოძრაობის“ წევრებმა.

პრეზიდენტის მხრიდან კონსტიტუციის უხეში დარღვევის ფაქტის რეაგირების გარეშე დატოვება არ შეიძლებოდა, დღეს  ოფიციალურად შედის საკონსტიტუციო სასამართლოში ჩვენი კონსტიტუციური წარდგინება და სასამართლო ამ თემასთან დაკავშირებით ერთი თვის განმავლობაში იმსჯელებს, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, საქართველოს პრეზიდენტის მხრიდან კონსტიტუციის უხეში დარღვევა არის ძალიან მძიმე ფაქტი.

„ამის რეაგირების გარეშე დატოვება მმართველი გუნდის მხრიდან უბრალოდ არ შეიძლებოდა. ეს ჩვენი მხრიდანაც უპატივცემულობა იქნებოდა ქვეყნის ძირითადი კანონის მიმართ. შესაბამისად, დღეს უკვე ოფიციალურად შედის საკონსტიტუციო სასამართლოში ჩვენი კონსტიტუციური წარდგინება და საკონსტიტუციო სასამართლო მომდევნო ერთი თვის განმავლობაში იმსჯელებს ამ თემასთან დაკავშირებით.

პრინციპში, სამსჯელო არც არაფერია. იმდენად უხეშია და თვალნათელი კონსტიტუციის დარღვევა, რომ მარტივად სჭირდება ამას უბრალოდ დადასტურება და მეტი არაფერი. ეს არის პირველი კურსის პირველი ლექციის კაზუსი“, – განაცხადა ირაკლი კობახიძემ.