საქართველოს საელჩო საბერძნეთში განცხადებას ავრცელებს, სადაც ნათქვამია, რომ საელჩო კონტაქტზეა ამიგდალეზას არალეგალთა განთავსების ბანაკში მყოფ საქართველოს მოქალაქეებთან, ისევე როგორც ამიგდალეზას ადმინისტრაციასთან და ბერძენ სამართალდამცავებთან.

მათივე ცნობით, საელჩოს წარმომადგენლები მოქალაქეებს სამშობლოში გამგზავრებაში დაეხმარებიან.

„საქართველოს საელჩო საბერძნეთის რესპუბლიკაში ყოველდღიურ კონტაქტზეა ქ.ათენის ამიგდალეზას არალეგალთა განთავსების ბანაკში მყოფ საქართველოს მოქალაქეებთან, ისევე როგორც ამიგდალეზას ადმინისტრაციასთან და ბერძენ სამართალდამცავებთან.

საელჩოს წარმომადგენლები გუშინაც ესაუბრნენ მოქალაქეებს და კიდევ ერთხელ დააფიქსირეს, რომ ყველანაირად დაეხმარებიან სამშობლოში გამგზავრებაში.

რაც შეეხება არალეგალთა განთავსების ბანაკის დატოვებას (რასაც საქართველოს ზოგიერთი მოქალაქე ითხოვს), აღნიშნული სცილდება საქართველოს საელჩოს უფლებამოსილებას და ამის შესაძლებლობა საქართველოს დიპლომატიურ მისიას არ გააჩნია.

ქ.ათენის ამიგდალეზას არალეგალთა განთავსების ბანაკში, 2023 წლის 26 ივლისს, ღამის 2 საათზე დაიწყო არეულობა.

არეულობის დაწყებისთანავე საელჩოს ცხელი ხაზის მეშვეობით 01:43 საათზე დაუკავშირდა, აღნიშნულ დაწესებულებაში მყოფი საქართველოს მოქალაქე ხ. მ.

კონსულის მოვალეობის შემრულებელი ინფორმაციის მიღებისთანავე დაუკავშირდა აღნიშნულ პირს და მუდმივი კომუნიკაცია ჰქონდა როგორც მასთან, ისე ამიგდალეზას ადმინისტრაციასთან. დაახლოებით ღამის 3 საათზე, როგორც შესაბამისმა სამსახურებმა და ასევე საქართველოს მოქალაქეებმა, მათ შორის ხ.მ-მ საელჩოს დაუდასტურეს, ადგილზე უკვე იყო სიმშვიდე და საქართველოს ყველა მოქალაქე იმყოფებოდა უსაფრთხოდ. საავადმყოფოში გადაყვანილ იქნენ მხოლოდ ის პირები, რომელთაც ცრემლსადენი გაზის გამო შეექმნათ პრობლემა – მათ შორის არ ყოფილან საქართველოს მოქალაქეები.

ინფორმაცია იმის შესახებ, რომ ამიგდალეზას არალეგალთა განთავსების ბანაკში მყოფი საქართველოს მოქალაქეების ჯანმრთელობას საფრთხე არ ემუქრება, 26 ივლისს, დაადასტურა ატიკის პოლიციის უცხოელთა დეპარტამენტმაც.

მორიგი კომუნიკაცია საელჩოსა და მოქალაქე ხ.მ ს-ს შორის შედგა 26 ივლისს დღის საათებში, გადამოწმდა მოქალაქის ჯანმრთელობის მდგომარეობა და მას შეეთავაზა დახმარება საქართველოში დროულად დაბრუნებაში. ხ.მ-მ, რომელსაც აქვს მოთხოვნილი თავშესაფარი საბერძნეთის რესპუბლიკაში უარი განაცხადა საქართველოში დაბრუნებაზე.

შეგახსენებთ, რომ ფორსმაჟორული/გადაუდებელი აუცილებლობის შემთხვევაში, შეგიძლიათ დაუკავშირდეთ საქართველოს საელჩოს ცხელ ხაზს, რომელიც უწყვეტ რეჟიმში ფუნქციონირებს. ცხელი ხაზი +306952220000”,- აღნიშნულია ინფორმაციაში.

თბილისის მერის კახა კალაძის განცხადებით, საქართველოს მოსახლეობის უმრავლესობა კარგად ხედავს, თუ რომელ პოლიტიკურ ძალას რა ზრახვები და მიზნები აქვს.

როგორც მან ჟურნალისტებს განუცხადა, ის ოპოზიციური პარტიები, რომლებიც ერთიანდებიან, ერთი პატრონაჟის ქვეშ არიან და ერთი მსოფლმხედველობა აქვთ.

„ვერ გეტყვით რა ძალები ექნება ოპოზიციას, ვიღაც ერთიანდება, ვიღაც არა, არ არის ეს საინტერესო. კიდევ ერთხელ ვიმეორებ, ეს პოლიტიკური ძალები არიან ერთი პატრონაჟის ქვეშ, მათ აქვთ ერთი მსოფლმხედველობა. ჩვენი ქვეყნის მოსახლეობის უმრავლესობა კარგად ხედავს, თუ რომელ პოლიტიკურ პარტიას რა ზრახვები აქვს სამშობლოსთან მიმართებით. დარწმუნებული ვარ, 2024 წლის საპარლამენტო არჩევნებზე, როგორც სხვა წინა არჩევნებზე, ჩვენი ქვეყნის მოსახლეობის უმრავლესობამ მიიღო სწორი და გონივრულ გადაწყვეტილება, დარწმუნებული ვარ, 2024 წელსაც ეს დამოკიდებულება იქნება იმიტომ, რომ ხალხი ხედავს. რეალურად, ერთადერთი პოლიტიკური ძალა ქვეყანაში, ვისაც აქვს იმის რესურსი, რომ პირველ რიგში, ამ ქვეყნის, ამ ქვეყანაში მცხოვრები ადამიანის ინტერესი გაატაროს, მიუხედავად ზეწოლის და შანტაჟისა, არის “ქართული ოცნება-დემოკრატიული საქართველო”. ეს გუნდი არის ის, რომელსაც აქვს იმის უნარი, შეინარჩუნოს მშვიდობა, მოახდინოს ქვეყნის ეკონომიკური განვითარება და დემოკრატიულად განავითაროს ქვეყანა”,-განაცხადა კალაძემ.

„ლელოს“ წევრის, ვატო სურგულაძის განცხადებით, მას შემდეგ, რაც მაღალმთიანი აჭარის მუნიციპალიტეტის საავადმყოფოები „ევექსის” დაქვემდებარებაში გადავიდა, შუახევში, ხულოსა და ქედაში სამშობიარო ბლოკები გაუქმდა.

როგორც სურგულაძემ აღნიშნა, „ევექსმა“ აღნიშნული გადაწყვეტილება იმიტომ მიიღო, რომ საქმიანობა წამგებიანი იყო.

„მაღალმთიანი აჭარის მუნიციპალიტეტებში, შუახევში, ხულოსა და ქედაში, სამეანო მომსახურება და გინეკოლოგიური სამსახური გაუქმდა. ეს სრულად მიუღებელია. კარგად ვიცით, რომ ზამთარში გზები იკეტება. რა უნდა ქნას ორსულმა, როდესაც მშობიარობის დღე დადგება? – 1 თვით ადრე ჩამოვიდეს და ბათუმში დასახლდეს?! უცებ რომ დაეწყოს მშობიარობა, ამ შემთხვევაში რას ვშვრებით?!

მინდა მადლობა გადავუხადო ბათუმელ ექიმს, ინდირა ბოლქვაძეს, რომელმაც ეს საკითხი დასვა. ძალიან ბევრი შემოდის გართულებებით, ძალიან ბევრი ბავშვი და დედაა გადარჩენილ სიკვდილს. მოვუწოდებ საქართველოს ჯანდაცვის სამინისტროს, აჭარის ავტონომიური რესპუბლიკის ჯანდაცვის მინისტრს, რა თქმა უნდა, „ევექსის“ ხელმძღვანელებს, სასწრაფოდ გადაწყვიტონ საკითხი, რაც შეიძლება სწრაფად აღდგეს სამეანო და გინეკოლოგიური მომსახურება ამ მუნიციპალიტეტებში. ჩვენ ტრაგედიას მივიღებთ. სანამ ეს ტრაგედია მოხდა, მოდი მივიღოთ შესაბამისი ზომები.

„ევექსი“ ფინანსური ორგანიზაციაა, ნახეს, რომ წამგებიანია ანესთეზიოლოგია და გინეკოლოგია. ჩათვალეს, რომ ამის გაუქმება შესაძლებელია. ამ შემთხვევაში, სამინისტროებმა უნდა გადაწყვიტონ ეს პრობლემა. დამატებითი ფინანსები და მოტივაცია გამოიყოფა. ასე ადგე და გააუქმო, სამივეს მხრიდან დანაშაულია“,- აღნიშნა ვატო სურგულაძემ.

საკრუიზო გემი Astoria Grande დღეს დილით ბათუმში შემოვიდა. გემი 22 ივლისს სოჭიდან ახალი მარშრუტით გაემგზავრა, რომელიც ბათუმში გაჩერებასაც მოიცავს, – ამის შესახებ რეპორტაჟი ტელეკომპანია Россия 1-მა მოამზადა.

გავრცელებული ინფორმაციით, გემზე 850 მგზავრი, მათ შორის რუსი ტურისტები იმყოფებიან.

„მათ ტურისტების მოთხოვნით გადაწყვიტეს დამატებითი გაჩერება შავი ზღვის სანაპიროზე. ორგანიზატორები მიიჩნევენ, რომ საქართველოს კურორტს შეუძლია მნიშვნელოვნად გაზარდოს ინტერესი რეისის მიმართ. უფრო მეტიც, მგზავრს არ სჭირდება დამატებითი დოკუმენტები“, – ნათქვამია ტელეკომპანია Россия 1-ის რეპორტაჟში.

ცნობისთვის, თავად საზღვაო ტრანსპორტის სააგენტომ აღნიშნულ საკრუიზო გემთან დაკავშირებით განცხადება 25 ივლისს გაავრცელა.

მათი ინფორმაციით, საკრუიზო გემი „ASTORIA GRANDE“ პალაუს დროშის ქვეშ ცურავს და მას თურქული საკრუიზო კომპანია “Miray Cruises International”-ი ემსახურება.

საზღვაო ტრანსპორტის სააგენტოს განმარტებით, გემთმფლობელი რეგისტრირებულია სეიშელის კუნძულებზე კომპანია “Goodwin Shipping Limited”-ის სახელით და საერთაშორისო სანქციებში არ ფიქსირდება.

მათივე ცნობით, აღნიშნული საკრუიზო გემის შემოსვლა კომერციული ხასიათისაა.

ათენის ამიგდალეზას არალეგალთა განთავსების ბანაკში მყოფი საქართველოს მოქალაქეები დახმარებას ითხოვენ.

როგორც ემიგრანტები აცხადებენ, ერთ-ერთ ქართველს ჯანმრთელობის პრობლემა აქვს, თუმცა ის საჭირო მედიკამენტებს ვერ იღებს.

ემიგრანტის, ხატია მახარეიშვილის თქმით, მათთან საბერძნეთში საქართველოს საელჩოს წარმომადგენლები ამ დრომდე არ მისულან.

„გოგონა გვყავს ქართველი, რომელსაც ჯანმრთელობასთან დაკავშირებით აქვს პრობლემა. ყურადღება არ გვაქვს წამლის მხრივ, ექიმის მხრივ. რომ რაიმე დასჭირდეს გოგოს, ძალიან რთულად ხდება ექიმთან მიყვანა, საავადმყოფოში გადაყვანა. არც არავინ მოსულა. წესით დღეს დილით აქ უნდა ყოფილიყვნენ საქართველოს საელჩოდან წარმომადგენლები, რომლებსაც უნდა ეკითხათ, რა მდგომარეობა იყო ან ჩვენ რა მდგომარეობაში ვართ, სად ვცხოვრობთ. არავინ მოსულა, არც დაურეკავთ იმის მერე, რაც გაიგეს, რომ ჩვენ გვქონდა კომუნიკაცია ჟურნალისტებთან,“ – აცხადებს ხატია მახარეიშვილი „მთავარ არხთან“ საუბრისას.

შეგახსენებთ, ათენის ამიგდალეზას არალეგალთა განთავსების ბანაკში, სადაც საქართველოს მოქალაქეებიც იმყოფებოდნენ, არეულობა იყო. ემიგრანტების თქმით, ყველაფერი მას შემდეგ დაიწყო, რაც ადგილზე პაკისტანის მოქალაქე გარდაიცვალა. მათივე განცხადებით, არეულობის დროს, სამართალდამცავებმა მათ წინააღმდეგ ცრემლსადენი გაზი გაუშვეს.