შოვის სტიქიასთან დაკავშირებით ვახტანგ გომელაურს ინტერპელაციის ფორმატში პარლამენტში 22 სექტემბერს მოუსმენენ, თუკი რაიმე კითხვა არსებობს პარტიებში, მინისტრი უპასუხებს, – ამის შესახებ საქართველოს პარლამენტის თავმჯდომარე, შალვა პაპუაშვილმა ჟურნალისტებს განუცხადა.

მისივე თქმით, პოლიტიკური ჯგუფები ჩასაფრებული არიან ნებისმიერ ტრაგედიაზე და მათი ეს საქციელი ამორალურია.

„მომავალ კვირას პარასკევს ჩვენ გვექნება ინტერპელაცია. თუკი რაიმე კითხვა არსებობს პარტიებში, შინაგან საქმეთა მინისტრი სწორედ იმ კითხვებს გასცემს პასუხს. ეს ერთი, მაგრამ მეორე არის ზნე, რომელიც აქვთ ამ პოლიტიკურ ჯგუფებს. ეს არის სურვილი და უკვე ტრადიციად ჩამოუყალიბდათ, რომ ჩასაფრებული არიან ნებისმიერ ტრაგედიაზე, რაიმენაირად გამოიყენონ ეს ტრაგედია. უკვე იმდენად ამორალურია მათი საქციელი, რომ ამ საქციელზე კომენტირებაც უკვე რთულია. რაც შეეხება შოვის სტიქიას, ყველა საკითხთან დაკავშირებით იყო ამომწურავი პასუხები. რაიმე კითხვები თუ არის, შინაგან საქმეთა მინისტრი პარასკევს უპასუხებს და ვნახოთ შემდეგ, თუ კიდევ ექნებათ რაიმე კითხვა“, – განაცხადა პაპუაშვილმა.

ჩვენი ქვეყნის მტრებს და მოღალატეებს, ამ ფაქტით უნდათ ირაკლი ღარიბაშვილის დაზიანება, – ამის შესახებ საქართველოს განათლებისა და მეცნიერების მინისტრმა, გიორგი ამილახვარმა განაცხადა.

მისი თქმით, პრემიერ-მინისტრის აშშ-ში ვიზიტისთვის სახელმწიფო ბიუჯეტიდან არცერთი თეთრი არ დახარჯულა.

„მგონი, ნათლად ითქვა და კიდევ ერთხელ ხაზგასმით ვამბობთ, რომ არცერთი თეთრი სახელმწიფო ბიუჯეტიდან ამ ვიზიტისთვის ირაკლი ღარიბაშვილს არ დაუხარჯავს. საზოგადოებას მინდა, შევახსენო თუ რა ხდებოდა წინა ხელისუფლების დროს, ალბათ, თქვენც კარგად გახსოვთ. სახელმწიფო ბიუჯეტის ხარჯზე რეისებით, მასაჟისტებთან ერთად მგზავრობა, რომ ვიღაცას არ ჩამოსძინებოდა მგზავრობის დროს, სახელმწიფო ბიუჯეტის სახსრებით სწავლის დაფინანსების გადახდა თავიანთი შვილებისთვის, სახელმწიფო ბიუჯეტის სახსრებით ძალიან ლამაზი კოსტიუმების შეძენა და სხვადასხვა ფუფუნების საგნების გამოყენება. შესაბამისად, ეს არის იმ პროცესის გამოძახილი, როდესაც ჩვენი ქვეყნის მტრებს და მოღალატეებს, ამ ფაქტით უნდათ ირაკლი ღარიბაშვილის დაზიანება და გეტყვით რატომ. ირაკლი ღარიბაშვილის პრემიერ-მინისტრობის პერიოდში თითქმის ორჯერ მოხდა ეკონომიკის ზრდა. ქვეყანა სტაბილურად ვითარდება და აქვს პროგრესი. ქურდს ჯიბე ეწვოდაო – ახლა ქვეყნის მტრებს, იმ მოღალატეებს, ვისაც ასეთი რაღაცები უკეთებიათ ხელისუფლებაში ყოფნის დროს, წარმოუდგენიათ, რომ ჩვენს ხელისუფლებაში პრემიერ-მინისტრი ან ნებისმიერი მინისტრი, თუ სხვა მაღალჩინოსანი რაიმე მსგავს იკადრებს, ან თავში მოუვა სახელმწიფო ბიუჯეტის ხარჯზე. ამიტომ, ტყუილად ცდილობთ ახლა თქვენ რაღაც ღია კარის მტვრევას იქ, სადაც მსგავსი არაფერი არ არსებობს.

ნათლად განიმარტა, რომ არცერთი თეთრი ირაკლი ღარიბაშვილს ბიუჯეტიდან არ გამოუყენებია მისი პირადი ვიზიტისთვის. ბუნებრივია, თავადაც დეკლარაციაში იხილავთ, როცა ამის დრო მოვა, თუ რა წყაროებით დაფინანსდა. გიდასტურებთ, რომ სახელმწიფო ბიუჯეტიდან არცერთი თეთრი ამ მგზავრობისთვის არ დახარჯულა. არცერთი თეთრი“, – აღნიშნა მინისტრმა.

საქართველოს პრემიერ-მინისტრმა ირაკლი ღარიბაშვილმა საქართველოში ნიდერლანდების სამეფოს ახალ საგანგებო და სრულუფლებიან ელჩთან- მელინე არაკელიანთან გაცნობითი შეხვედრა გამართა.

მთავრობის ადმინისტრაციაში გამართულ შეხვედრაზე საქართველოსა და ნიდერლანდების სამეფოს შორის თანამშრომლობის ძირითადი მიმართულებები მიმოიხილეს.

განსახილველ საკითხებს შორის იყო საქართველოსა და ნიდერლანდების სამეფოს შორის არსებული ურთიერთობები, რომელიც მზარდი დინამიკით გამოირჩევა როგორც ორმხრივ დონეზე, ისე საერთაშორისო ორგანიზაციების ფარგლებში.

შეხვედრაზე ყურადღება დაეთმო საქართველოს ევროინტეგრაციის პროცესს. მთავრობის მეთაურმა ელჩს საქართველოს მიერ მიღწეული პროგრესის და 12 რეკომენდაციის შესრულების კუთხით არსებული ვითარების შესახებ მიაწოდა ინფორმაცია. ასევე მან აღნიშნა, რომ წლის ბოლოსთვის საქართველო კანდიდატის სტატუსის მოლოდინშია.

პრემიერ-მინისტრმა ხაზი გაუსვა საქართველოსთვის კანდიდატის სტატუსის მინიჭების მნიშვნელობას და ამ პროცესში ნიდერლანდების სამეფოს მხარდაჭერას.

ირაკლი ღარიბაშვილმა მელინე არაკელიანს საქართველოში დიპლომატიური მისიის დაწყება მიულოცა და მომავალ საქმიანობაში წარმატებები უსურვა.

მთავარია, რომ ბიუჯეტიდან ერთი თეთრი არ არის გადახდილი. მთავარი ეს არის, მემგონი ჩვენს მოსახლეობას ეს აინტერესებს. სახელმწიფომ გაიღო თუ არა ეს ხარჯი. მე შემიძლია ეს დაგიდასტუროთ, რომ არა, – ამის შესახებ მთავრობის ადმინისტრაციის უფროსმა რევაზ ჯაველიძემ ჟურნალისტებს განუცხადა.

მისი თქმით, დამატებითი დეტალებისთვის ჟურნალისტებმა სახელმწიფო დაცვის სპეციალურ სამსახურს უნდა მიმართონ.

„არაერთი  განცხადება გაკეთდა ამასთან დაკავშირებით. რაც შეეხება ხელშეკრულებას, როდის დაიდო ეს ხელშეკრულება, ვერ გეტყვით, ამის შესახებ უნდა მიმართოთ სახელმწიფო დაცვის სპეციალურ სამსახურს. კონკრეტული დოკუმენტი არ მინახავს, მაგრამ გარკვეული კომუნიკაცია მე დარწმუნებული ვარ, არსებობს, მასსა და იმ ორგანიზაციას შორის, რომელიც უზრუნველყოფს მის ფრენებს. რაც შეეხება ხელშეკრულებას, მე უკვე გიპასუხეთ, რომ უნდა მიმართოთ ბატონი ანზორ ჩუბინიძის უწყებას. ხარჯებთან დაკავშირებული დოკუმენტაცია იქნება წარმოდგენილი ბატონი ანზორ ჩუბინიძის უწყებაში.

პირთა წრე საკმაოდ დიდი შეიძლება იყოს, ოჯახის წევრებმა არ შეიძლება მონაწილეობა მიიღონ პროცესში? მთავარია, რომ ბიუჯეტიდან ერთი თეთრი არ არის გადახდილი. მთავარი ეს არის, მემგონი ჩვენს მოსახლეობას ეს აინტერესებს. სახელმწიფომ გაიღო თუ არა ეს ხარჯი. მე შემიძლია ეს დაგიდასტუროთ, რომ არა. უნდა მიმართოთ ბატონი ანზორ ჩუბინიძის უწყებას და დარწმუნებული ვარ, ის გააკეთებს შესაბამის კომენტარს და განცხადებას”, – განაცხადა რევაზ ჯაველიძემ.

საქართველოს სახალხო დამცველი ლევან იოსელიანი ოფიციალური ვიზიტით ამერიკის შეერთებულ შტატებში იმყოფება და მართავს შეხვედრებს ვაშინგტონში, – ამის შესახებ ინფორმაციას საქართველოს სახალხო დამცველის პრესსამსახური ავრცელებს.

მათივე ინფორმაციით, შეხვედრები გაიმართება აშშ-ს სახელმწიფო დეპარტამენტში, მათ შორის, დემოკრატიის, ადამიანის უფლებებისა და შრომის ბიუროს (DRL) ხელმძღვანელ პირებთან, ასევე ანტინარკოტიკული და სამართალდამცავ ორგანოებთან თანამშრომლობის ბიუროსა (INL) და იუსტიციის დეპარტამენტში სამოქალაქო უფლებების სამმართველოს მაღალი თანამდებობის პირებთან.

საქართველოს ეკონომიკისა და მდგრადი განვითარების მინისტრის, ლევან დავითაშვილის განცხადებით, საქართველოს ამჟამინდელი ხელისუფლება მოსახლეობას „ანგარიშს პირნათლად“ აბარებს.

მისივე თქმით, აშშ-ში ვიზიტთან დაკავშირებით პრემიერი საზოგადოებას დეტალურად მიაწვდის ინფორმაციას.

„თუმცა უფრო დეტალურად ამ ინფორმაციის შესახებ დღესვე მოგახსენებთ მთავრობის ადმინისტრაციის ხელმძღვანელი და დარწმუნებული ვარ, რომ მას უფრო მეტი ინფორმაცია ექნება. მე პირადად არ შემიკვეთავს, არ მისარგებლია ჩარტერული რეისით. ეს ჩემი არჩევანია, მე შეიძლება შესაძლებლობა მქონდეს, შეიძლება შესაძლებლობა არ მქონდეს, შეიძლება საჭიროება ან სურვილი, ეს ბევრ რამეზეა დამოკიდებული. ყოველ შემთხვევაში მე ამისი საჭიროება ან შესაძლებლობა არ მქონია და არ შემიკვეთავს, მაგრამ ეს არ არის არანაირად კავშირში იმასთან, რაზეც თქვენ აპელირებთ და რაზეც საუბარი იყო, კერძოდ, როცა პრემიერის კონკრეტულ შეკვეთაზე საუბარი იყო. ამასთან დაკავშირებით ამომწურავ ინფორმაციას საზოგადოება მიიღებს.

ჩვენი ოპონენტებისგან განსხვავებით, დღევანდელი ხელისუფლება თავისი ხალხის მიმართ არის პირნათელი, ანგარიშვალდებული და ჩვენ მოსახლეობას ამ ანგარიშს პირნათლად ვაბარებთ. იქედან გამომდინარე, რომ საზოგადოებაში დაისვა კითხვა, მე დარწმუნებული ვარ, მათ შორის, პრემიერიც ძალიან დეტალურად, ამომწურავად მიაწვდის საზოგადოებას ინფორმაციას. დარწმუნებული ვარ, ის კითხვას საზოგადოებაში არ დატოვებს, არა იმიტომ, რომ ამას ოპონენტები აყენებენ, არამედ იმიტომ, რომ ჩვენ ჩვენს მოსახლეობას და ამომრჩეველს პატივს ვცემთ. განსხვავებით იმისა, რაც ხდებოდა ჩვენი ოპონენტების მხრიდან, რომლებიც დღეს რაღაცებზე აპელირებენ, ისინი სახელმწიფოს ხარჯზე ახდენდნენ თავიანთი ინტერესების დაკმაყოფილებას, მაგრამ ასეთი არცერთი ფაქტი არ ყოფილა ჩვენი ხელისუფლების პირობებში. ესეც ძალიან მკაფიოდ იქნება საზოგადოებისთვის განმარტებული. ამ შემთხვევაში ვფიქრობ, რომ ოპონენტები ალბათ, როგორც წინა ბევრ შემთხვევაში აგორებენ ვითომ სკანდალს, მერე თვითონვე აღმოჩნდებიან ძალიან უხერხულ სიტუაციაში, იმიტომ, რომ მათი მხრიდან ე.წ. სკანდალური ინფორმაცია ეფუძნება უბრალოდ ტყუილს, სიცრუეს, არ არის მართალი. მათი მდგომარეობა მუდმივად უარესდება, იმიტომ, რომ თავს იყენებენ ძალიან არასერიოზულ მდგომარეობაში. დარწმუნებული ვარ, სამთავრობო თვითმფრინავთან დაკავშირებულ შემთხვევაშიც ზუსტად ასე იქნება. უფრო მეტ დეტალს მე არ ვფლობ, შესაბამისად, მე ვერ მოგახსენებთ, მაგრამ შესაბამისი უწყებები, როგორც მთავრობის ადმინისტრაცია, ისე პრემიერი ამაზე საზოგადოებას დეტალურ ინფორმაციას მიაწვდიან“, – აღნიშნა მინისტრმა.

საქმე გვაქვს საქართველოს პრეზიდენტის მიერ ქვეყნის კონსტიტუციაზე მაღლა დადგომასთან. სამწუხაროდ, პრეზიდენტმა გადაწყვიტა, რომ მას უფლება აქვს, თავისი სტატუსიდან გამომდინარე კონსტიტუციაზე მაღლა დადგეს, – ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა.

მისი თქმით, საქართველოში ერთხელ და სამუდამოდ უნდა დასრულდეს პრეზიდენტების მხრიდან კონსტიტუციაზე მაღლა დადგომა, კონსტიტუციის საკუთარ თავზე მორგება და პრეზიდენტის მხრიდან კონსტიტუციის დარღვევა.

„ეს წარსულს უნდა ჩაბარდეს და ერთხელ სამუდამოდ ეს საკითხი საკონსტიტუციო სასამართლოს მიერ უნდა დადასტურდეს. პოლიტიკური და სამართლებრივი პრეტენზია იმასთან დაკავშირებით გვაქვს, რომ პრეზიდენტმა გადაწყვიტა, რომ ის არის ქვეყნის კონსტიტუცია მაშინ, როცა არავის აქვს უფლება კონსტიტუციას გადააბიჯოს. ჩვენი ამოცანაა, ეს ყველაფერი დადასტურდეს ჯერ საკონსტიტუციო სასამართლოში, შემდეგ პროცესმა პარლამენტში გადმოინაცვლოს. პრეტენზია არ გვაქვს, რომ პრეზიდენტი შეიძლება, ჩავიდეს ევროკავშირის ქვეყნებში. გერმანია სტრატეგიული პარტნიორი და მხარდამჭერია და იქ ჩვენი გუნდის წევრები ყოველ თვე არაერთ შეხვედრას მართავენ. ჩვენი პრეტენზია ეხება კონსტიტუციაზე მაღლა დადგომას პრეზიდენტის მხრიდან და ასეთი პრეცედენტები არ უნდა დავუშვათ. ასეთი რამ უნდა ამოიწუროს, წინააღმდეგ შემთხვევაში, საზოგადოება პასუხს მოგვთხოვს, როგორ დაარღვია პრეზიდენტმა კონსტიტუცია და ამაზე რეაგირება არ მოვახდინეთ. თუ საკონსტიტუციო წარდგინებას არ მოვამზადებდით, გამოვიდოდა, რომ კონსტიტუციის დარღვევას ვამართლებთ“, – განაცხადა ოხანაშვილმა.

„ლელომ“ ვერ ისწავლა, რომ არ უნდა იცანცაროს და ცოტა კოლეგიალური იყოს, პრემიერის იმპიჩმენტზე ვსაუბრობთ, ქარხნის საკითხზე ხომ არა, რომ საქმის კურსში არ ჩააყენო კოლეგები, – ამის შესახებ პარტია „მოქალაქეების“ ლიდერმა, ალეკო ელისაშვილმა განაცხადა.

მისივე თქმით, გაუგებარია, რა აზრი აქვს იმპიჩმენტის პროცესის დაწყებას, მაშინ, როცა წინასწარ ცნობილია, რომ ოპოზიციას საკმარისი ხმა არ აქვს.

„ლელომ“ მთელი ამ ხნის განმავლობაში ორი რამ ვერ ისწავლა, ერთი, რომ არ უნდა იცანცაროს და მეორე – ცოტა კოლეგიალური იყოს. გამოვლენ პრესკონფერენციაზე, რაღაცას დააბრეხვებენ და შემდეგ შენ უნდა იდგე ჭკვიანი სახით და რაღაცები ილაპარაკო. პრემიერ-მინისტრის იმპიჩმენტზე ვსაუბრობთ, რაღაც პატარა ქარხნის საკითხზე ხომ არა, როგორც გაიაშვილი იტყოდა. შესაბამისად, რა უდგას წინ, რომ წინასწარ საქმის კურსში ჩააყენო კოლეგები. მეორე – როდესაც იცი, რომ საკმარისი ხმები არ გვაქვს, ძლივს 50 ხმა როცა გვაქვს ოპოზიციაში, ამ პროცესის დაწყებას რა აზრი აქვს. ამ საქმეს სჭირდება 75 ხმა. ვერ ვხვდები, „ქართული ოცნების“ დეპუტატების იმედზე ვართ, რომ საკუთარი პრემიერ-მინისტრის წინააღმდეგ მისცემენ ხმას, თუ რას ემსახურება ეს არასერიოზული რამ. საქმიანი, სერიოზული და სწორი იქნება, ნაცვლად ამისა, დავიბაროთ ღარიბაშვილი პარლამენტში და დავუსვათ ის კითხვები, რაც ხალხს აქვს. კი ბატონო, მხარს დავუჭერ იმპიჩმენტს, მაგრამ ეს იმპიჩმენტი რომ არ გამოვა, მაშინ რა ვქნათ? წინასწარ წაგებულ თამაშში რატომ შევდივართ? ამას ვერ ვხვდები და ესაა ჩემთვის არასერიოზული“, – განაცხადა ალეკო ელისაშვილმა.