ოთარ ფარცხალაძის სანქცირებულთა სიაში შეყვანაზე მეტი კონკრეტიკა გვჭირდება. ფარცხალაძე 11 წლის წინ იყო გენერალური პროკურორი, მას შემდეგ საჯარო სამსახურში აღარ არის, – ამის შესახებ პარლამენტის საპროცედურო საკითხთა კომიტეტის თავმჯდომარე ირაკლი ქადაგიშვილმა განაცხადა.

ქადაგიშვილის თქმით, ოთარ ფარცხალაძესთან დაკავშირებულ საკითხზე სახელმწიფო უსაფრთხოების სამსახურის მოკვლევის შედეგებს უნდა დაელოდონ.

„11 წელია, რაც ოთარ ფარცხალაძეს საჯარო სამსახურთან, საჯარო პოლიტიკასთან შეხება არ აქვს და ის კერძო პირია. სახელმწიფო უსაფრთხოების სამსახური მოკვლევას იწყებს იმასთან დაკავშირებით, რამ განაპირობა ფარცხალაძის სანქცირებულ პირთა სიაში შეყვანა. აშშ-ის სახელმწიფო დეპარტამენტის პრესსპიკერის განცხადებაში ზოგადი განმარტება იყო, მეტი კონკრეტიკა ცნობილი არ არის. აქედან გამომდინარე, მოკვლევა უნდა განახორციელონ კომპეტენტურმა ორგანოებმა. ჩვენ გვჭირდება კონკრეტიკა. ვიღაცას ვიღაცაზე გავლენა ყოველთვის აქვს, მაგრამ რა შუაშია მთავრობა და „ქართული ოცნება“. ფარცხალაძე 11 წლის წინ იყო რამდენიმე თვით გენერალური პროკურორი, მას შემდეგ საჯარო სამსახურში აღარ არის, არ არის პოლიტიკაში და არის კერძო პირი. ჯერ არავინ იცის, ვინ ვისი აგენტი იყო, როდის და რანაირად იყო. ამიტომ სახელმწიფო უსაფრთხოების სამსახურმა განაცხადა, რომ ოთარ ფარცხალაძესთან დაკავშირებულ საკითხზე მოკვლევას იწყებს, დაველოდოთ მოკვლევას“, – განაცხადა ირაკლი ქადაგიშვილმა.

ამასთან, როგორც ქადაგიშვილმა აღნიშნა, გასაკვირია, როცა დასანქცირებისას კონკრეტული ახსნა-განმარტება არ კეთდება.

„ზოგადად, სანქცირების საკითხს რაც შეეხება, ჩვენთვის გასაკვირია, რომ მოსამართლეები როცა დასანქცირდნენ, არანაირი კონკრეტული ახსნა-განმარტება არ გაკეთებულა, რა მიზეზით მოხდა მათი დასანქცირება. რელევანტური პასუხი არ არის, როცა გვითხრეს, ღია წყაროებში წაივკითხეთო“, – განაცხადა ირაკლი ქადაგიშვილმა.

აშშ რუსეთის მიერ უკრაინაში უკანონო ომის წარმოებასთან დაკავშირებით, 150-ზე მეტ ფიზიკურ და იურიდიულ პირს სანქციებს უწესებს. სანქცირებულ პირთა შორის არის საქართველოს ყოფილი მთავარი პროკურორი ოთარ ფარცხალაძე. აშშ-ის სახელმწიფო დეპარტამენტის მიერ ოთარ ფარცხალაძესთან დაკავშირებით გაკეთებული განცხადების გამო, სახელმწიფო უსაფრთხოების სამსახურმა საკითხის შესწავლა დაიწყო.

საქართველოს პრემიერ-მინისტრი ირაკლი ღარიბაშვილი ბულგარეთის რესპუბლიკის ეროვნული ასამბლეის თავმჯდომარეს როსენ ჟელიაზკოვს შეხვდა.

მთავრობის ადმინისტრაციაში გამართულ შეხვედრაზე საუბარი საქართველოსა და ბულგარეთს შორის არსებულ ორმხრივ ურთიერთობებს და თანამშრომლობის სამომავლო პერსპექტივებს შეეხო. აღინიშნა, რომ საქართველო განიხილავს ბულგარეთს, როგორც მეგობარ ქვეყანას და სანდო პარტნიორს.

მთავრობის მეთაურმა ბულგარეთის ეროვნული ასამბლეის თავმჯდომარეს საქართველოს სუვერენიტეტისა და ტერიტორიული მთლიანობის, ქვეყნის ევროპული და ევროატლანტიკური ინტეგრაციის მიმართ ბულგარეთის მტკიცე მხარდაჭერისთვის, ასევე – ევროკავშირის სადამკვირვებლო მისიის განხორციელებაში შეტანილი წვლილისთვის მადლობა გადაუხადა.

ხაზი გაესვა მაღალი დონის ვიზიტების გააქტიურების აუცილებლობას. განიხილეს ქვეყნებს შორის არსებული სავაჭრო და ეკონომიკური ურთიერთობები. აღინიშნა, რომ ვაჭრობა და ეკონომიკა ერთ-ერთი მნიშვნელოვანი სფეროა ქვეყნებს შორის ორმხრივ თანამშრომლობაში, რადგან ბულგარეთი მუდმივად რჩება საქართველოს სავაჭრო პარტნიორთა ათეულში. გამოითქვა მზადყოფნა, ერთობლივი ძალისხმევით გაფართოვდეს საინვესტიციო თანამშრომლობა ეკონომიკის სხვადასხვა სექტორში.

აღინიშნა, რომ როგორც შავი ზღვის ქვეყნებმა, საქართველომ და ბულგარეთმა უნდა გააგრძელონ ერთობლივი ძალისხმევა, რათა სრულად იქნას გამოყენებული თანამშრომლობის დიდი პოტენციალი, განსაკუთრებით ტრანსპორტისა და კავშირგაბმულობის სფეროებში.

„პირველი შემთხვევაა, როდესაც ჩვენი ქვეყნის მოქალაქე დასანქცირდა“, – ამის შესახებ თბილისის მერმა, კახა კალაძემ ყოფილი მთავარი პროკურორის, ოთარ ფარცხალაძისთვის ამერიკის შეერთებული შტატების სახელმწიფო დეპარტამენტის მიერ დაწესებულ სანქციებთან დაკავშირებით დასმული შეკითხვის საპასუხოდ განაცხადა.

მისი თქმით, სახელმწიფო უსაფრთხოების სამსახურმა აშშ-ის მიერ ოთარ ფარცხალაძის დასანქცირების საკითხის შესწავლა დაიწყო და გამოძიება ყველაფერს დაადგენს.

„პირველი შემთხვევაა, როდესაც ჩვენი ქვეყნის მოქალაქე დასანქცირდა. აქამდე მსგავსი არაფერი ყოფილა. დღეს მოვისმინეთ განცხადებები მოკვლევასთან დაკავშირებით.  იცით, რომ ჩვენ რუსეთისა და მისი მოქალაქეების წინააღმდეგ დაწესებულ სანქციებს არ ვუერთდებით, თუმცა ყოველთვის ვითვალისწინებთ, რომ ჩვენი ქვეყანა არ იყოს გამოყენებული სანქციების გვერდის ავლისთვის. ამისთვის მნიშვნელოვანი ნაბიჯები იდგმება და იმ შეხვედრებზე, რომლებიც შემდგარა ჩვენი მეგობარი ქვეყნების წარმომადგენლებთან, მადლობებიც კი მიგვიღია. რა თქმა უნდა, ეს დამოკიდებულება გაგრძელდება მომავალშიც“, – განაცხადა კახა კალაძემ.

მისივე თქმით, ოთარ ფარცხალაძე უწყებაში წინა ხელისუფლების დროსაც მუშაობდა, თუმცა ბოლო რამდენიმე წელია საჯარო სექტორში აღარ საქმიანობს.

„ოთარ ფარცხალაძე სისტემაში წინა ხელისუფლების დროსაც მუშაობდა. მე მგონი, ის უკვე 9-10 წელია საჯარო სამსახურში არ საქმიანობს, დაკავებულია კერძო საქმეებითა და ბიზნესებით. აღნიშნულ საკითხთან დაკავშირებით მოკვლევა დაწყებულია და, რა თქმა უნდა, საქართველოს ხელისუფლება ყველაფერს გააკეთებს ყველა შემთხვევაში. პარტნიორებთან თანამშრომლობა მნიშვნელოვანია, ასევე ისიც, რომ ჩვენი ქვეყანა არ იყოს გამოყენებული სანქციებზე გვერდის ავლისთვის. ჩატარდება მოკვლევა და ყველაფერი ობიექტურად გაირკვევა“, – აღნიშნა დედაქალაქის მერმა.

ქართულ საზოგადოებასა და პოლიტიკაზე ფარცხალაძის გავლენა ბუნებაში არ არსებობს და აშკარაა, რომ ვიღაცას ამ ყველაფრის გამოგონება კონკრეტული პოლიტიკური მიზნით დასჭირდა, – აღნიშნულთან დაკავშირებით ინფორმაციას “ხალხის ძალა“ ავრცელებს.

პარტიის ცნობით, ამერიკელები ყოველ ჯერზე ცდილობენ, ქართულ საზოგადოებას ჩაენაცვლონ და მათი სახელით ილაპარაკონ“.

„გუშინ გამოქვეყნდა ამერიკის სახელმწიფო დეპარტამენტის გადაწყვეტილება, სხვა 149 პირთან ერთად, ოთარ ფარცხალაძისთვის სანქციების დაწესების შესახებ. გადაწყვეტილების ტექსტში ვკითხულობთ, რომ ფარცხალაძეს სანქციები უწესდება „საქართველოზე რუსეთის მანკიერი ზეგავლენის საპასუხოდ“. დოკუმენტში ასევე წერია, რომ „რუსეთის უშიშროების ფედერალური სამსახური ფარცხალაძეს ქართულ საზოგადოებასა და პოლიტიკაზე რუსეთის სასიკეთო გავლენის მოხდენისთვის იყენებს“.

სანქციის მიზეზის განმარტება იმდენად არასერიოზულია, რომ გადაწყვეტილების უკან სრულიად სხვა პოლიტიკური მოტივი აშკარად იკითხება. გაუგებარია, სად ნახა ვინმემ ოთარ ფარცხალაძის გავლენა ქართულ პოლიტიკაზე და მითუმეტეს, საზოგადოებაზე. წლებია, ის საჯაროდ არცერთხელ გამოჩენილა. დავით კეზერაშვილისგან განსხვავებით, არც პარტიებს და „ენჯეოებს“ აფინანსებს და არც მედიასაშუალებებს ფლობს. ქართულ საზოგადოებასა და პოლიტიკაზე ფარცხალაძის გავლენა ბუნებაში არ არსებობს და აშკარაა, რომ ვიღაცას ამ ყველაფრის გამოგონება კონკრეტული პოლიტიკური მიზნით დასჭირდა.

ამერიკელები ქართულ საზოგადოებაზე მართლა რომ ზრუნავდნენ, აბსურდული მიზეზით სანქციებს კი არ დააწესებდნენ, საზოგადოებას მათ ხელთ არსებულ ინფორმაციას გაუზიარებდნენ და საზოგადოება თავად განსჯიდა, იყო თუ არა ოთარ ფარცხალაძის საქმიანობა მისთვის რაიმე საფრთხის შემცველი. თუმცა, ვხედავთ, რომ ამერიკელები ყოველ ჯერზე ცდილობენ, ქართულ საზოგადოებას ჩაენაცვლონ და მისი სახელით ილაპარაკონ. ისინი ხშირად მიმართავენ ჰიბრიდული ომის ყველაზე უხეშ მეთოდებს და ცდილობენ, გაავლონ ზღვარი ქართულ საზოგადოებასა და მის მიერ არჩეულ ხელისუფლებას შორის. აცხადებენ, რომ ქართველი ხალხის ნებას გამოხატავს, არა მის მიერ არჩეული საქართველოს ხელისუფლება, არამედ მისგან 9 000 კილომეტრით დაშორებული ამერიკის ხელისუფლება. ხომ არ დაფიქრდებოდა ამერიკის ხელისუფლება, რომ მას ქართულ საზოგადოებაზე ასე უხეშად ზრუნვა არ ევალება? ასეთი ნაბიჯებით, გლობალური ომის პარტიის კარნახით მოქმედი ამერიკული ოფიციალური სტრუქტურები, სამწუხაროდ, კიდევ ერთხელ ამტკიცებენ, რომ ისინი ჩვენს სახელმწიფოებრიობას არ ცნობენ და ქართული საზოგადოების მიმართ უდიერ დამოკიდებულებას ავლენენ. ისინი ცდილობენ, თავს მოგვახვიონ აზრი, რომ ხელისუფლების ლეგიტიმაციას მხოლოდ იმ შემთხვევაში ცნობენ, თუ ძალაუფლებას გლობალური ომის პარტიის აგენტურა, ანუ კოლექტიური „ნაცმოძრაობა“ დაიბრუნებს. ბუნებრივია, თავისუფლების მოყვარე ქართველი ხალხი ამ გზავნილს არასოდეს შეეგუება.

ყველას გვახსოვს, როგორ დაუწესდა ოთხ ქართველ მოსამართლეს სავიზო შეზღუდვები. ბრალდება მაშინაც არასერიოზული იყო და ამერიკის ელჩს, პრაქტიკულად, იმის აღიარება მოუწია, რომ მოსამართლეებს შეზღუდვები ყოველგვარი მტკიცებულების გარეშე დაუწესდათ. ამგვარი მიდგომა უხეშად ეწინააღმდეგება სამართლის უზენაესობის პრინციპს, რომელმაც, სამწუხაროდ, ამერიკის საერთაშორისო პოლიტიკაში აქტუალობა სრულად დაკარგა.

ვხედავთ, რომ ერთი მხრივ, ყოველგვარი ფაქტებისა და მტკიცებულების გარეშე უწესებენ კონკრეტულ ადამიანებს შეზღუდვებსა და სანქციებს, ხოლო, მეორე მხრივ, რეალურ ქართველ ოლიგარქს, დავით კეზერაშვილს, რომელიც ჯერ საქართველოში ბიზნესმენებსა და ჯარს ძარცვავდა, ხოლო ახლა ევროპელი პენსიონერების გაუბედურებით არის დაკავებული, ევროპაში თავისუფალი მიმოსვლის საშუალებას აძლევენ. ყველას გვახსოვს, როგორ ხვდებოდა კეზერაშვილს ამერიკელი მაღალჩინოსანი, კურტ უოკერი, რაზეც ქართულ საზოგადოებას განმარტებაც კი არ მოუსმენია. საზოგადოების დიდი ნაწილის აღქმაში, კეზერაშვილს ამერიკელები მფარველობენ და მას ნაძარცვი ფულით ქართულ პოლიტიკაში საკუთარი აგენტურის დასაფინანსებლად იყენებენ. სამწუხაროდ, დღემდე არავის უცდია, საზოგადოების ეს ეჭვი გაეფანტა და კრიმინალ ოლიგარქს, თუნდაც, ერთი განცხადებით გამიჯვნოდა.

ამ ყველაფრის მიზანი გასაგებია. გლობალური ომის პარტია საქართველოს მეორე ფრონტის არგახსნას არ პატიობს და ყველანაირად ცდილობს, ქვეყანაში ვითარება რამენაირად არიოს და ხელისუფლება შეცვალოს, რისთვისაც ამერიკის სახელმწიფო დეპარტამენტსაც აქტიურად იყენებს. ბუნებრივია, იმთავითვე ცხადი იყო, რომ ქართული აგენტურა, კოლექტიური „ნაცმოძრაობა“ ფარცხალაძისთვის სანქციების დაწესებას ხელისუფლებაზე თავდასხმისა და ე.წ. პოლარიზაციის შემდგომი გაღვივებისთვის გამოიყენებდა. ფარცხალაძეს მაშინვე გაუხსენეს მის მიერ 10 წლის წინ დაკავებული თანამდებობა და თქვეს, რომ მისი დასანქცირებით, ამერიკამ გაფრთხილება მთელ ხელისუფლებას გაუგზავნა, რაც იოლად პროგნოზირებადი იყო.

გლობალური ომის პარტია და მისი აგენტურა, ანუ კოლექტიური „ნაცმოძრაობა“ ოქტომბერ-ნოემბრისთვის ემზადებიან. მათი გათვლა არის, რომ ოქტომბრის ბოლოს ევროკომისია გამოაქვეყნებს უარყოფით დასკვნას საქართველოსთვის კანდიდატის სტატუსის მინიჭების შესახებ, რასაც ისინი რევოლუციის მოწყობის კიდევ ერთხელ საცდელად გამოიყენებენ.

ბუნებრივია, ეს სცენარიც ზუსტად ისევე ჩაიშლება, როგორც გლობალური ომის პარტიისა და მისი აგენტურის ყველა წინა რევოლუციური სცენარი ჩავარდა. ამის მთავარი გარანტი კი ქართული საზოგადოებაა. საზოგადოება არავის მისცემს იმის საშუალებას, რომ მისი ქვეყანა მეორე ფრონტის არგახსნისთვის, მშვიდობის შენარჩუნებისა და უკრაინიზაციაზე უარის თქმისთვის დაისაჯოს“, – ნათქვამია „ხალხის ძალის“ მიერ გავრცელებულ ინფორმაციაში.

დედაქალაქის მერმა, კახა კალაძემ ოპოზიციური პარტიების გაერთიანების შესახებ კიდევ ერთხელ ისაუბრა და აღნიშნა, რომ გაერთიანების თუ დაშლის მიუხედავად, დღევანდელ ოპოზიციას აქვს საერთო სამოქმედო გეგმა, რაც სხვა ქვეყნის ინტერესს ატარებს და მიმართულია საქართველოს მომავლისა და განვითარების წინააღმდეგ.

„ჩვენ არაერთხელ გვინახავს ასეთი პლატფორმები, მათი შეკვრა, დაშლა. სიახლე არაფერია. ჩვენ ვიცით ეს ადამიანები რას წარმოადგენენ, რას ემსახურებიან, რა არის მათი ძირითადი სამოქმედო გეგმა და სამიზნე. ერთი რამ ცხადია, რომ მათ ქმედებებში ქვეყნის ინტერესები ნამდვილად არ არის, სხვა ქვეყნის ინტერესები შეიძლება იყოს. ჩვენ ალბათ კიდევ ბევრჯერ მოგვიწევს იმის ნახვა, რომ ვიღაცები დაიშლებიან, ვიღაცები გაერთიანდებიან. მაგრამ ვინც სხვა ქვეყნის ინტერესს ემსახურებიან, რა თქმა უნდა, მათ პოლიტიკურ პარტიას არანაირი მომავალი არ აქვს.

თავისი შინაარსით ეს ადამიანები ერთნი არიან, არაფრით განსხვავდებიან. დღეს შეიძლება „ნაციონალური მოძრაობა“ ერქვათ, ხვალ „ლელო“ დაირქვან, ზეგ – „ევროპული საქართველო“. ამ ადამიანების სულისკვეთება და მსოფლმხედველობა არის მიმართული ამ ქვეყნის განვითარების და მომავლის წინააღმდეგ. მათ ჰყავთ ერთი პატრონი და საქართველოს ნგრევას ემსახურებიან. როდესაც ხელისუფლებაში იყვნენ, მაშინაც რამდენი უბედურება მოუტანეს ქვეყანას და დღესაც აგრძელებენ. მოსახლეობა რეალობას ძალიან კარგად ხედავს. ასევე, ხედავს ჯერ კიდევ იმ გამოწვევებსა და საფრთხეებს, რაც რეგიონში არსებობს. ერთადერთი პოლიტიკური ძალა, ვისაც რეალურად აქვს შესაძლებლობა, რომ ზეწოლის მიუხედავად, პირველ რიგში, ქვეყნის ინტერესები გაითვალისწინოს, დაიცვას აქ მცხოვრებლები, შეინარჩუნოს მშვიდობა და მოახდინოს ქვეყნის განვითარება, ეს პოლიტიკური გუნდი არის „ქართული ოცნება“, – განაცხადა დედაქალაქის მერმა.

ამასთან, კახა კალაძემ ისაუბრა ყოფილი პრეზიდენტის, მიხეილ სააკაშვილის განცხადების შესახებაც, სადაც ის დღევანდელ ოპოზიციას დასუსტებულს უწოდებს. თბილისის მერის თქმით, ოპოზიცია არის არა დასუსტებული, არამედ დანგრეული.

„დასუსტებულს ვერ დავარქმევდი. უფრო ვიტყოდი, რომ დანგრეული და გაუბედურებული არის დღევანდელი რადიკალური ოპოზიცია. ეს არის რეალობა, რასაც ყველა უნდა შეეგუოს. ბევრჯერ მითქვამს და კიდევ ერთხელ გავიმეორებ, რომ ამ ქვეყანაში რადიკალიზმს არ აქვს მომავალი. რა თქმა უნდა, ქვეყანას, საქართველოს ხელისუფლებას სჭირდება ძლიერი ოპოზიცია, რაც ხელს შეუწყობს ქვეყნის განვითარებას, დემოკრატიულ ზრდას. თუმცა, იმას, რაც დღეს ოპოზიციაში ხდება, ამას არვიცი რა დავარქვა“, – აღნიშნა კახა კალაძემ.