დააკვირდით ოპოზიციის განცხადებებსა და ზოგიერთი ევროპარლამენტარის მხრიდან გაკეთებული განცხადებებს ჩვენი ქვეყნის ევროპულ მომავალთან დაკავშირებით. მიზანმიმართულად, ახალი მესიჯი მოიგონეს, რომ ხალხი იმსახურებს და ხელისუფლება არ იმსახურებს ევროპასა და ევროპულ მომავალს, – ამის შესახებ „ქართული ოცნების“ გენერალურმა მდივანმა, თბილისის მერმა კახა კალაძემ განაცხადა.

„აქვთ მცდელობა, რომ ჩვენი ქვეყნის მოსახლეობა და არსებული ხელისუფლება დააშორონ და გაყონ ერთმანეთისგან. თუმცა, დღეს საქართველოს ხელისუფლება წარმოადგენს ჩვენი ქვეყნის მოსახლეობის უმრავლესობას. მოყოლებული 2012 წლიდან, „ქართული ოცნება“ სარგებლობს დიდი ავტორიტეტით და ეს ყველაფერი გამოისახება არჩევნებში, მოსახლეობის მხრიდან მხარდაჭერით, რაც ძალიან მნიშვნელოვანია. ერთი რამ მინდა იცოდეს ყველამ, გუშინ მგონი სააკაშვილის განცხადება იყო სხვა პოლიტიკოსებთან მიმართებაში, რომ მათ ევროპელების მხარდაჭერა არ ექნებათ და არანაირი რესურსი არ გააჩნიათო. როდესაც ქვეყანაში პოლიტიკოსის სტატუსი გაქვს, გაქვს პოლიტიკური პარტია, რა თქმა უნდა, პირველ რიგში პოლიტიკოსმა უნდა იზრუნოს, რომ საკუთარი ქვეყნის მხარდაჭერა მოიპოვოს და ჰქონდეს მხარდაჭერა მოსახლეობის მხრიდან, რომ წარმატებას მიაღწიო. ეს მიუთითებს იმაზე, თუ როგორი დამოკიდებულება აქვთ ამ რადიკალებს ქვეყნის მოსახლეობის მიმართ, არაფრად აგდებენ ჩვენი ქვეყნის მოსახლეობას“, – განმარტა კალაძემ.

ჩვენ გვინდა, საქართველო იყოს სტაბილური, ძლიერი ქვეყანა, ძალიან ძლიერი ინსტიტუტებით, – ამის შესახებ ჟურნალისტებს საქართველოში ევროკავშირის ელჩმა, პაველ ჰერჩინსკიმ პრეზიდენტის იმპიჩმენტის პროცედურასთან დაკავშირებით დასმულ კითხვაზე განუცხადა.

„პრეზიდენტის მიმდინარე იმპიჩმენტზე თუ მკითხავთ, მე უცხოელი დიპლომატი ვარ. ძალიან ფრთხილად უნდა ვიყო, რადგან არ მინდა, საქართველოს საშინაო საქმეებში ჩარევა. რაც ჩვენ გვინდა, არის ის, რომ საქართველო იყოს სტაბილური, ძლიერი ქვეყანა, ძალიან ძლიერი ინსტიტუტებით. ასე რომ, რა თქმა უნდა, იმპიჩმენტის პროცედურა არ არის ის, რაც ეხმარება საქართველოს, გახდეს სტაბილური, ძლიერი, მყარი ქვეყანა ძლიერი სახელმწიფო ინსტიტუტებით. მაგრამ კიდევ ერთხელ, მე ამაზე კომენტარს ვერ გავაკეთებ“, – განაცხადა ჰერჩინსკიმ.

კითხვაზე, რაზე ისაუბრეს გუშინ პრეზიდენტთან შეხვედრაზე, პაველ ჰერჩინსკიმ აღნიშნა, რომ საუბრის მთავრი თემა საქართველოს ევროინტეგრაცია იყო.

„გუშინ პრეზიდენტმა მიგვიწვია ევროკავშირის ყველა სხვა ელჩთან ერთად. ჩვენი შეხვედრის მთავარი თემა კი საქართველოს ევროინტეგრაცია იყო“, – აღნიშნა პაველ ჰერჩინსკიმ.

საქართველო დღესვე იმსახურებს ნატო-ს წევრობას, ისეთი გაწვრთნილი ჯარი და მაგარი მეომრები გვყავს, – ამის შესახებ ჟურნალისტებს ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.

„ნატო-ს ერთობლივი წვრთნები წლების განმავლობაში მიმდინარეობდა და მიმდინარებს. საქართველოსა და ქართველ სამხედროებს მისიებში კონტრიბუცია იმდენი აქვთ და ისეთი წვლილი აქვთ შეტანილი, ჩვენი გმირი ჯარისკაცები დაღუპულები არიან, რამდენიმე ათეული დაგვეღუპა და რამდენიმე ასეული დაგვეჭრა“, – განაცხადა მამუკა მდინარაძემ.

მისივე თქმით, ქართველი სამხედროები ნატო-ს ჯარებთან ერთად ებრძოდნენ მსოფლიო მშვიდობისთვის.

„ხალხი დაგვეღუპა, მისიებში დაღუპული გვყავს ჯარისკაცები და თქვენ მეკითხებით, ვის მიმართეთო. არავის მივმართეთ, ერთად ვართ ამ საკითხებში და საქართველო იმსახურებს ნატო-ს წევრობას დღესვე, თუ ძალიან გაინტერესებთ. ყველაფრით მზად არის. იმ სფეროში ადამიანი არ გამოჩნდა მსოფლიოში, რომელსაც სიტყვა მოუბრუნდა და რაღაცით საქართველო მზად არ არის ამ მიმართულებითო, რომ ეთქვა. ერიდება ყველა ამ თემაზე ლაპარაკს იმიტომ, რომ დღესვე იმსახურებს საქართველო ნატო-ს წევრობას ისეთი გაწვრთნილი ჯარი და ისეთი მაგარი მეომრები გვყავს“, – აღნიშნა მამუკა მდინარაძემ.

სამწუხაროა, რომ თავდაცვისა და უსაფრთხოების საკითხებზე დეზინფორმაციის მორიგი სერია მოვისმინეთ. სრული პასუხისმგებლობით შემიძლია გითხრათ, რომ ჩვენი პარტნიორების მხრიდან ბაზების გახსნის თაობაზე შემოთავაზება არ მიგვიღია, – ამის შესახებ პარლამენტის თავდაცვის კომიტეტის თავმჯდომარე ირაკლი ბერაიამ განაცხადა.

მისივე თქმით, ასეთი სახის დეზინფორმაცია გამაოგნებელი და შემაშფოთებელია.

„აშშ-ის საელჩომ საქართველოში აშშ-ის სამხედრო ბაზის გახსნის საკითხზე დეზინფორმაციის გამავრცელებელ სუბიექტებს საკუთარი განცხადებით თავზე დაახურა და დაამხო, რისი დამხობაც შეიძლებოდა. ჩვენთვის ამერიკასთან პარტნიორობა ძალიან მნიშვნელოვანია, ის ჩვენი სტრატეგიული პარტნიორია. ჩვენი ამოცანა და პრიორიტეტია, ამ ქვეყანასთან თანამშრომლობის განმტკიცება, შემდგომი გაღრმავება თავდაცვისა და უსაფრთხოების სფეროში. ეს ბევრ დოკუმენტში წერია და პრაქტიკული ნაბიჯებიც ამაზე მეტყველებს. დინამიკა, რაც ამ მიმართულებით არსებობს, ამის ნათელი მაგალითია. ეს ასევე მოიცავს თავდაცვისა და შეკავების გაძლიერების ინიციატივას, რომლის მიზანია, ჩვენი თავდაცვის ძალების უფრო ინსტიტუციური გაძლიერება, ძალთა გენერირების სისტემის დახვეწა და გაძლიერება, ეროვნული წინააღმდეგობის მექანიზმების მხარდაჭერა. ასევე ის შეთანხმება, რასაც ხელი მოეწერა აშშ-ის თავდაცვის მდივნის ოსტინის თბილისში ვიზიტის დროს. დეზინფორმაცია არის გამაოგნებელი და შემაშფოთებელი“, – განაცხადა ირაკლი ბერაიამ.

ტელეკომპანია „მთავარმა არხმა“ 12 სექტემბერს გაავრცელა ინფორმაცია, თითქოს „ქართულმა ოცნებამ“ 2021 წელს საქართველოში ჩამოსულ შეერთებული შტატების თავდაცვის მდივანს უარი უთხრა ქვეყანაში ამერიკული სამხედრო ბაზის გახსნაზე. საქართველოში აშშ-ის საელჩო მედიაში გავრცელებულ ინფორმაციას გამოეხმაურა და განაცხადა, რომ შეერთებულ შტატებს საქართველოსთვის ამერიკული სამხედრო ბაზის შექმნა არ შეუთავაზებია.

როგორც წესი, რადიკალური ოპოზიცია ისეთ საკითხებს დააყენებს ხოლმე, მერე თვითონ უტრიალდებათ, პრემიერ-მინისტრის იმპიჩმენტზე დაიწყეს ლაპარაკი, სადაც ნათელია ყველაფერი და დეკლარაციაშიც ყველა კარგად დაინახავს, მიიღეს ის, რომ გავიგეთ, თურმე პატიმარ სააკაშვილს თავის დროზე საკრედიტო ხაზები ჰქონია გახსნილი სამინისტროებში, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.

მისი თქმით, მიხეილ სააკაშვილს კომერციულ ბანკებში კი არ ჰქონდა გახსნილი საკრედიტოები, არამედ სამინისტროებში, ოღონდ ისე, რომ არ უნდა დაებრუნებინა.

„მაგალითად, თავდაცვის სამინისტროში 24 მილიონიანი საკრედიტო ხაზი ჰქონია გახსნილი პროცენტებისა და დაბრუნების გარეშე, საიდანაც აითვისა 14 მილიონი. დარწმუნებული ვარ, რომ შესაბამისი უწყებები დაინტერესდებიან ამ ინფორმაციით, რადგან აქ საუბარია საკმაოდ დიდ თანხებზე და საუბარია იმაზე, რომ ხელშეკრულებაც კი არსებობდა. მისი პირადი ვიზიტები ფინანსდებოდა სახელმწიფო ბიუჯეტიდან და ჯარის ბიუჯეტიდან, აქედან გამომდინარე ვფიქრობ, რომ ეს საკითხი უბრალოდ გასატარებელი და ცნობად მისაღები არაა“, – განაცხადა მაჭარაშვილმა.

თავდაცვის სამინისტრომ მიხეილ სააკაშვილის საჰაერო ხომალდებით მგზავრობასთან დაკავშირებით დადებული ხელშეკრულებების განსაიდუმლოების პროცესი დაიწყო.

ამერიკის შეერთებული შტატების საელჩო ვერც ვერაფერს დაადასტურებდა. ესაა დიპლომატიური წარმომადგენლობა საქართველოში, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ აღნიშნა აშშ-ის საელჩოს განცხადებასთან დაკავშირებით, რომლის თანახმადაც, ამერიკის შეერთებულ შტატებს საქართველოსთვის არ შეუთავაზებია ამერიკული სამხედრო ბაზის შექმნა.

ამასთან, ვაშაძის თქმით, საქართველოს ნატო-ში გაწევრიანებამდე უსაფრთხოებას ნამდვილად მოუტანს ამერიკის სამხედრო წარმომადგენლობა და ეს არის საქართველოს ინტერესი.

„ჩემს განცხადებაში საუბარი მქონდა თანამედროვე ტიპის შეიარაღების მოწოდებაზე და სპეციალური, ახალი თაობის სამხედრო თანამშრომლობაზე. სხვათაშორის, გუშინ თემურ იაკობაშვილმაც ამერიკის შეერთებული შტატებიდან დაადასტურა, რომ აქ იყო საუბარი პირველად წარმომადგენლობაზე, რომელიც ჩვენს ინტერესშია, რომ გადაითარგმნოს ამერიკის სამხედრო ბაზაში. მე ვთქვი, რომ ამ თემასთან დაკავშირებით მინიშნებები იყო. კიდევ ერთხელ ვამბობ, დიახ, მაგალითად, სამხრეთ კორეის უსაფრთხოების გარანტი არის ამერიკის სამხედრო ბაზა. იაპონიის უსაფრთხოების გარანტი, რომელიც ნატო-ს წევრი არ არის, არის ამერიკის სამხედრო ბაზა. ჩვენ ნატო-ში გაწევრიანებამდე უსაფრთხოებას ნამდვილად მოგვიტანს ამერიკის სამხედრო წარმომადგენლობა საქართველოში. ეს არის საქართველოს ინტერესი. ვსვამ კითხვას, რატომ გამოხტნენ და კობახიძემ, მდინარაძემ და კალაძემ ერთხმად დაიწყეს მტკიცება, თურმე არაფერი უსაფრთხოება არ მოაქვს ამერიკის სამხედრო ბაზას. 80 ქვეყანაა, სადაც ამერიკის სამხედრო ბაზაა და მათი უმრავლესობა ნატო-ს წევრი არაა, მაგრამ უსაფრთხოება უზრუნველყოფილია სწორედ ამერიკასთან სპეციალური სამხედრო თანამშრომლობის შეთანხმებებით. საქართველოს ეროვნულ ინტერესებშია, რომ არასდროს გაბედოს რუსეთმა საქართველოზე თავდასხმა. ვის ინტერესში შედის, რომ ეს არ იყოს? რუსეთის ინტერესში“, – განაცხადა გიორგი ვაშაძემ.

აშშ-ის სახელმწიფო დეპარტამენტში აცხადებენ, რომ შეერთებულ შტატებს არ შეუთავაზებია ამერიკული სამხედრო ბაზის შექმნა საქართველოში. ამის შესახებ “აქცენტს” სახელმწიფო დეპარტამენტის პრეს–სპიკერმა განუცხადა.

როგორც სახელმწიფო დეპარტამენტში აღნიშნავენ, აშშ-საქართველოს შორის თავდაცვის სფეროში არსებული ურთიერთობა, საქართველოს ეხმარება, უკეთ მომზადდეს NATO–ში წევრობისთვის.

“შეერთებულ შტატებს არ შეუთავაზებია საქართველოში ამერიკული სამხედრო ბაზის შექმნა. აშშ-საქართველოს შორის თავდაცვის სფეროში არსებული ურთიერთობა ეფუძნებოდა და კვლავაც ეფუძნება თავსებადობის გაძლიერებას და საქართველოს უნარიანობის მხარდაჭერას, შეაკავოს შემდგომი აგრესია და დაიცვას თავისი სუვერენული ტერიტორია, რაც საქართველოს ეხმარება უკეთ მომზადდეს NATO–ში წევრობისთვის.

საქართველო NATO–ს მიერ კლასიფიცირდება როგორც “გაძლიერებული შესაძლებლობების პარტნიორი”. ეს არის სპეციალური კატეგორია ალიანსის მხოლოდ ახლო პარტნიორებისთვის, რომლებსაც მნიშვნელოვანი წვლილი შეაქვთ NATO–ს ოპერაციებში და ალიანსის სხვა მიზნებში.

ჩვენ ახლახანს დავასრულეთ ერთობლივი სამხედრო წვრთნები სახელწოდებით “Agile Spirit” საქართველოსთან, რომელიც მიზნად ისახავს თავსებადობის, გამჭვირვალობის გაზრდას და საქართველოსთან სამხედრო თანამშრომლობის გასაძლიერებლად მომზადებას”, – განუცხადა “აქცენტს” სახელმწიფო დეპარტამენტის პრეს–სპიკერმა.

„მთავარმა არხმა“ 12 სექტემბერს გაავრცელა ინფორმაცია, რომ 2021 წელს თბილისში ვიზიტის დროს აშშ-ის თავდაცვის მდივან ლოიდ ოსტინს  ჰქონდა შეთავაზება: „აშშ მზაობას გამოთქვამდა, გაეხსნა სრულფასოვანი სამხედრო ბაზა საქართველოში“.

„მთავარი არხის“ ინფორმაციით, ხელისუფლებამ ამ შეთავაზებაზე უარი თქვა.

თავდაცვის სამინისტრო საქართველოში აშშ-ის ბაზის აშენების შესახებ ინფორმაციას სიცრუეს უწოდებს