Home Blog Page 1638

“ნაციონალური მოძრაობა“ არ ენდობა საკუთარ თავს და საკუთარ ხელებს, ეშინიათ, რომ თითი მიეჭირებათ ღილაკზე” – შალვა პაპუაშვილი

„ნაციონალური მოძრაობა“ იმდენად არ ენდობა საკუთარ თავს, ალბათ, საკუთარ ხელებსაც არ ენდობიან და ეშინიათ, რომ თითი მიეჭირებათ ღილაკზე იმპიჩმენტის საკითხის გადაწყვეტის დროს, – ასე უპასუხა პარლამენტის თავმჯდომარემ შალვა პაპუაშვილმა ჟურნალისტების შეკითხვას, რომელიც „ნაციონალური მოძრაობის“ პოლიტსაბჭოს გადაწყვეტილებას შეეხებოდა, რომლის მიხედვითაც, ფრაქცია პრეზიდენტის იმპიჩმენტის საკითხის განხილვისას სხდომათა დარბაზში შესვლას არ გეგმავს.

როგორც პაპუაშვილმა აღნიშნა, პრეზიდენტისთვის ვერდიქტი არა პარლამენტის გადაწყვეტილება, არამედ საკონსტიტუციო გადაწყვეტილება იქნება.

„ნაციონალური მოძრაობა“ იმდენად არ ენდობა საკუთარ თავს, ალბათ, საკუთარ ხელებსაც არ ენდობიან და ეშინიათ, რომ თითი მიეჭირებათ ღილაკზე იმპიჩმენტის საკითხის გადაწყვეტის დროს. მინდა მივმართო „ნაციონალური მოძრაობის“ ამომრჩეველს, ვის მიეცით მანდატი, ვინ წარმოგადგენთ თქვენ, ადამიანები, რომლებიც ერთმანეთის გვერდში მყოფ ადამიანებს არ ენდობიან? საკუთარ თავს არ ენდობიან, რომ იქ შემთხვევით ხელი არ წაუცდეთ და ღილაკს თითი არ მიაჭირონ? ყველას ვამშვიდებ, არავინ არავის გადაბირებას არ აპირებს. რაც შეეხება პარლამენტის გადაწყვეტილებას, ეს მეასეხარისხოვანია სასამართლოს დასკვნასთან დაკავშირებით. მთავარი ამ საკითხში არის საკონსტიტუციო სასამართლოს დასკვნა. საკონსტიტუციო სასამართლო რასაც იტყვის, ის იქნება ვერდიქტი. და თუ საკონსტიტუციო სასამართლო იტყვის, რომ პრეზიდენტმა დაარღვია კონსტიტუცია, თან უხეშად, განზრახ შეიჭრა სხვა სახელისუფლებო შტოს უფლებამოსილებაში, მიითვისა სხვისი უფლებამოსილება. ამას თუ დაადგენს საკონსტიტუციო სასამართლო, ამაზე დიდი განაჩენი და ვერდიქტი პრეზიდენტისთვის არ არსებობს“, – განაცხადა პაპუაშვილმა.

“დღეს დაიწყო ოფიციალურად სწავლა და მინდა, პირველ რიგში, მივულოცო ჩვენს პატარებს, ჩვენს პირველკლასელებს” – ირაკლი ღარიბაშვილი

მინდა ყველას მივულოცო სასწავლო წლის დაწყება. მოგეხსენებათ, რომ დღეს დაიწყო  ოფიციალურად უკვე სწავლა და მინდა, პირველ რიგში, მივულოცო ჩვენს პატარებს, ჩვენს პირველკლასელებს, მოსწავლეებს, მასწავლებლებს, მშობლებს და მთლიანად საზოგადოებას, – ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.
მთავრობის მეთაურმა ასევე ისაუბრა სკოლებისა და ბაღების რეაბილიტაცია-მშენებლობის პროგრამაზე.
„აქვე, მინდა აღვნიშნო, რომ ჩვენ შარშან დავიწყეთ ძალიან მნიშვნელოვანი პროგრამა, რომელიც გულისხმობს ასეულობით სკოლის, 880 სკოლის რეაბილიტაცია-მშენებლობას და რომელიც უკვე დაწყებულია. დაკონტრაქტებულია და  რამდენიმე ასეული სკოლის რეაბილიტაციის, მშენებლობის პროცესი დაწყებულია, როგორც აღვნიშნეთ. ამ პროგრამის ფარგლებში, დაახლოებით, მილიარდი ლარი დაიხარჯება.
ასევე, ჩვენ დავიწყეთ 1000-ზე მეტი საბავშვო ბაღის მშენებლობა-რეაბილიტაციაც, რომელიც ასევე მილიარდ ლარზე მეტი ღირებულების პროექტია. ეს არის წლების მიხედვით გადანაწილებული. მინდა აღვნიშნო, რომ ჩვენი მთავარი მოტივაცია, მთავარი მიზანი არის, რომ ჩვენი ახალგაზრდები, ჩვენი შვილები, ჩვენი მოსწავლეები სწავლობდნენ ევროპული, თანამედროვე სტანდარტების შესაბამის სკოლებში, ბაღებში. რა თქმა უნდა, ჩვენ ამ პროცესს ბოლომდე მივიყვანთ. იცით, რომ ძალიან მძიმე მდგომარეობა იყო სკოლებში, ბაღებშიც, ყველგან. რაც ჩვენ მოვედით ხელისუფლებაში, ბოლო  10 წელიწადში ძალიან ბევრი სკოლა აშენდა, ასევე ბევრი რეაბილიტირდა, მაგრამ ეს საკმარისი არ იყო. ჩვენ ძალიან მძიმე მემკვიდრეობა  დაგვხვდა, ამიტომ, ეს საკითხი გადაწყვეტილია და მიმდინარეობს ძალიან კარგი ტემპებით”, –  აღნიშნა პრემიერმა.

შოვში ტრაგედიისას დაღუპულთა ოჯახები ერთჯერადი დახმარების სახით 20 ათას ლარს მიიღებენ

შოვში ტრაგედიისას დაღუპულთა ოჯახები ერთჯერადი დახმარების სახით 20 ათას ლარს მიიღებენ.

ამის შესახებ განცხადება მთავრობის სხდომაზე საქართველოს პრემიერ-მინისტრმა, ირაკლი ღარიბაშვილმა გააკეთა.

„კიდევ ერთხელ მინდა, შევეხო შოვში დატრიალებულ ტრაგედიას. 32 ჩვენი მოქალაქის სიცოცხლე შეეწირა ამ დიდ ტრაგედიას, დიდ სტიქიას. ჩვენ გვქონდა მსჯელობა ამის თაობაზე და მივიღეთ გადაწყვეტილება, რომ გაიცეს ერთჯერადი ფულადი დახმარება გარდაცვლილთა ოჯახებისთვის, თითოეულ გარდაცვლილზე 20 ათასი ლარის ოდენობით“, – განაცხადა ღარიბაშვილმა.

მთავრობის გადაწყვეტილებით, სტუდენტებს, რომლებსაც ფინანსური დავალიანების გამო, შეჩერებული აქვთ სტატუსი, დავალიანება გაუნულდებათ

სტუდენტებს, რომლებსაც ფინანსური დავალიანების გამო, შეჩერებული აქვთ სტატუსი, დავალიანება გაუნულდებათ, – ამის შესახებ საქართველოს პრემიერ-მინისტრმა, ირაკლი ღარიბაშვილმა მთავრობის დღევანდელ სხდომაზე განაცხადა.

როგორც ღარიბაშვილმა აღნიშნა, დაახლოებით 30 ათასამდე სტუდენტს 40 მილიონი ლარის დავალიანება აქვს.

„ჩვენთვის, ყველასთვის მნიშვნელოვანია სტუდენტების სწავლა-განათლება. მინდა, შევეხო ერთ პრობლემას, რომელიც ყველას აწუხებს. ეს არის ე.წ. სტატუსშეჩერებული სტუდენტების საკითხი. მოვიკითხე ამის შესახებ და განათლების მინისტრისგან მოვისმინე დეტალური ინფორმაცია. დაახლოებით 30 ათასამდე სტუდენტს ფინანსური დავალიანების გამო, შეჩერებული აქვს სტატუსი. ამიტომ, ჩემი გადაწყვეტილებით, ყველა ამ სტუდენტს, ვისაც შეჩერებული აქვს სტატუსი ფინანსური დავალიანების გამო, გაუნულდება დავალიანება და შეეძლებათ, სურვილის შემთხვევაში, აღიდგინონ სტატუსი და გააგრძელონ სწავლა თავიანთ უნივერსიტეტებში. ეს არის დაახლოებით 40 მილიონი ლარის დავალიანება“, – განაცხადა ღარიბაშვილმა.

“პატიმარ სააკაშვილს და მის ადვოკატებს გამოძიებისთვის პასუხის გაცემა მაინც მოუწევთ” – გურამ მაჭარაშვილი

პატიმარ სააკაშვილს და მის ადვოკატებს გამოძიებისთვის პასუხის გაცემა მაინც მოუწევთ, – ამის შესახებ, „ხალხის ძალის“ ერთ-ერთმა ლიდერმა გურამ მაჭარაშვილმა განაცხადა.

„თურმე საგრანტო ხაზები ჰქონდა სააკაშვილს სამინისტროებში გახსნილი. პირადი ვოიაჟებისთვის, მასაჟისტებისთვის და ა.შ. თუ სამთავრობო სამსახურის ბიუჯეტიდან საკუთარი ოჯახის წევრებს სწავლის ფულს უხდიდა, თავის მასაჟისტებს, თავდაცვის ბიუჯეტიდან მილიონებს იხდიდა. კოლუმბიაში ალბათ ევროინტეგრაციის საკითხებზე ჩადიოდა. პატიმარ სააკაშვილს და მის ადვოკატებს გამოძიებისთვის პასუხის გაცემა მაინც მოუწევთ“, – აღნიშნა მაჭარაშვილმა.

თავდაცვის სამინისტრომ მიხეილ სააკაშვილის საჰაერო ხომალდებით მგზავრობასთან დაკავშირებით დადებული ხელშეკრულებების განსაიდუმლოების პროცესი დაიწყო.

ვოლოდიმირ ზელენსკი ჯო ბაიდენს მომავალ კვირას შეხვდება

უკრაინის პრეზიდენტი ვოლოდიმირ ზელენსკი მომავალ კვირაში ნიუ იორკში, გაერო-ს გენერალურ ასამბლეაზე დასწრებას და აშშ-ის პრეზიდენტ ჯო ბაიდენთან შეხვედრას გეგმავს, – ამის შესახებ ინფორმაციას „ენბისი“ უკრაინელ მაღალჩინოსანზე დაყრდნობით ავრცელებს, რომლის ვინაობასაც მედია არ ასახელებს.

„ენბისის“ ცნობით, ამ დროისთვის უცნობია, სად გაიმართება ბაიდენისა და ზელენსკის შეხვედრა.

მედია წერს, რომ თეთრმა სახლმა კომენტარის გაკეთებაზე უარი თქვა.

შეგახსენებთ, რომ ბაიდენისა და ზელენსკის შეხვედრა ბოლოს ივლისში, ვილნიუსის ნატო-ს სამიტზე გაიმართა.

უკრაინელებმა ანდრეევკა კოორდინირებული თავდასხმის ოპერაციების შედეგად დაიბრუნეს – უკრაინის გენშტაბი

უკრაინელმა ჯარისკაცებმა დონეცკის ოლქის დასახლებული პუნქტი ანდრეევკა გაათავისუფლეს, – ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.

გენშტაბის ცნობით, ანდრეევკა კოორდინირებული თავდასხმის ოპერაციების შედეგად დაიბრუნეს.

„თავდასხმის ოპერაციების დროს დონეცკის ოლქის ანდრეევკას დასახლება აიღეს, მტერს ცოცხალი ძალისა და აღჭურვილობის მნიშვნელოვანი დანაკარგი მიაყენეს და მიღწეულ პოზიციებზე მაგრდებიან“, – აღნიშნულია უკრაინის შეიარაღებული ძალების გენერალური შტაბის ანგარიშში.

უწყების ცნობით, ბახმუტის მიმართულებით, ბოგდანოვკას რაიონში რუსები უკრაინის შეიარაღებული ძალების თავდაცვის ხაზის გარღვევის მცდელობებს არ წყვეტენ. გენშტაბში აცხადებენ, რომ უკრაინის თავდაცვის ძალებმა კლიშევკის რაიონში შეტევითი ოპერაციების დროს ნაწილობრივ წარმატებას მიაღწიეს.

გიორგი ამილახვარი მოსწავლეებს, მასწავლებლებსა და მშობლებს ახალი სასწავლო წლის დაწყებას ულოცავს

საქართველოს განათლებისა და მეცნიერების მინისტრი გიორგი ამილახვარი მოსწავლეებს, მასწავლებლებს, მშობლებსა და სრულიად საზოგადოებას 2023- 2024 სასწავლო წლის დაწყებას ულოცავს.

„დღეს, 15 სექტემბერია და მთელი ქვეყნის მასშტაბით სკოლებში ახალ სასწავლო წელს ვიწყებთ. მინდა, ეს მნიშვნელოვანი თარიღი განსაკუთრებით მივულოცო ჩვენს პირველკლასელებს, რომლებიც წელს პირველად შეაღებენ სკოლის კარებს. ვულოცავ მოსწავლეებს, მშობლებს, ჩვენს მასწავლებლებს და წარმატებულ სასწავლო წელს ვუსურვებ. ყველა პირველკლასელს სკოლაში საინტერესო, დაუვიწყარი და თავგადასავლებით სავსე წლების გატარებას ვუსურვებ.

პირადად მე, როგორც განათლებისა და მეცნიერების მინისტრი, სრულად ვაცნობიერებ ჩემს პასუხისმგებლობას და ყველაფერს გავაკეთებ, რომ სკოლებში უზრუნველყოფილი იყოს ჯანსაღი საგანმანათლებლო გარემო და თითოეულმა მოსწავლემ, ცოდნასთან ერთად, მიიღოს ღირებული ცხოვრებისეული გამოცდილება. მე და ჩემმა გუნდმა ზოგადი განათლების განვითარების კუთხით აქტიურად დავიწყეთ მუშაობა. ჩვენს ერთ-ერთი უმთავრეს პრიორიტეტს სწორედ სკოლების გაუმჯობესებაზე ზრუნვა, მათ შორის, მოსწავლეზე ორიენტირებული სასწავლო პროცესის ხელშეწყობა, მასწავლებლების მხარდაჭერა და მათი დაფასება წარმოადგენს. მჯერა, ერთობლივი ძალისხმევით ყველა გამოწვევას დავძლევთ და ჩვენს შვილებს შევუქმნით კიდევ უფრო უკეთეს საგანმანათლებლო გარემოსა და ინფრასტრუქტურას, სადაც გააგრძელებენ ხარისხიანი განათლების მიღებას“, – ნათქვამია ამილახვარის მილოცვაში.

2023-2024 სასწავლო წელი საქართველოს სკოლებში დღეს, 15 სექტემბერს დაიწყო.

განათლების სამინისტროს ინფორმაციით, ახალი სასწავლო წლისთვის ზოგადსაგანმანათლებლო დაწესებულებებში 55 000-ზე მეტი პირველკლასელი დაიწყებს სწავლას.

15 სექტემბრის ასტროლოგიური პროგნოზი

ვერძი

დღის პირველ ნახევარში შესაძლებლობა გექნებათ, რომ ურთიერთობა დაამყაროთ ადამიანებთან, რომლებიც კარიერულ წინსვლაში დაგეხმარებიან. გირჩევთ, პროფესიული პრობლემები არაფორმალურ გარემოში განიხილოთ – ეს გადაწყვეტილების პოვნას გააადვილებს. დღის მეორე ნახევარი სიფრთხილეს მოითხოვს. ეცადეთ, ილუზიების ტყვედ არ იქცეთ და რეალობა დაინახოთ. უფროსი ნათესავების რჩევები ძალიან დაგეხმარებათ.

კურო

ნაყოფიერი და საინტერესო დღეა. შესაძლებლობა გექნებათ, დაწყებული პროექტი დაასრულოთ და სხვა ადამიანებს დაეხმაროთ. შეგიძლიათ დაიწყოთ საქმე, რომელიც მდიდარი წარმოსახვის უნარს და შემოქმედებით უნარებს მოითხოვს. ადამიანები, რომლებიც კარგად გიცნობენ, თქვენს ღირსებებს კიდევ ერთხელ დააფასებენ.

ტყუპები

მიზნების მისაღწევად ბევრი წინააღმდეგობის გადალახვა მოგიწევთ, განსაკუთრებით დღის პირველ ნახევარში. საბედნიეროდ, ახლოს არიან ადამიანები, რომლებსაც შეგიძლიათ რჩევისა და დახმარებისთვის მიმართოთ. თავი შეიკავეთ უსარგებლო ნივთების შეძენისგან და ეცადეთ ფული უფრო ეკონომიურად ხარჯოთ.

კირჩხიბი

დღის პირველი ნახევარი იმედებს გაგიმართლებთ – მიზნის მიღწევა იმაზე ადვილი აღმოჩნდება, ვიდრე ფიქრობდით. ხშირად ამაში ისეთი ადამიანები დაგეხმარებიან, ვისგანაც მხარდაჭერას ან უბრალოდ, კარგ დამოკიდებულებასაც არ ელოდით. დღის მეორე ნახევარში მოსალოდნელია გაუგებრობები. არ ინერვიულოთ – ყველაფერი კარგად იქნება. ახლა ყველაზე მეტად თავდაჯერება და სიმტკიცე გჭირდებათ.

ლომი

საქმიანი ურთიერთობისთვის ხელსაყრელი დღეა. მხარდაჭერას მათგანაც კი მიიღებთ, ვისაც საკუთარ მოკავშირედ არასოდეს თვლიდით. შესაძლებლობა გექნებათ, რომ კარიერული მდგომარეობა გაიუმჯობესოთ და შემოსავალი მნიშვნელოვნად გაზარდოთ.

გირჩევთ, შემოსული ინფორმაცია გამუდმებით აკონტროლოთ, რათა მხედველობიდან არაფერი გამოგრჩეთ. საყვარელ ადამიანებთან ურთიერთობა უამრავ პოზიტიურ ემოციას მოგიტანთ. შესანიშნავი დღეა გრძნობების აღიარებისთვის.

ქალწული

ამ დღეს იმაზე მეტად მოუთმენელი ხართ, ვიდრე ოდესმე. თქვენი მონდომება და პრინციპულობა წარმატების მიღწევაში დაგეხმარებათ. ბევრი ქალწული კონკურენტების დამარცხებას შეძლებს, მაგრამ მეგობრებთან ურთიერთობა შეიძლება დაიძაბოს.

უფროსი ნათესავები თქვენი ქმედებებითა და სამომავლო გეგმებით უკმაყოფილოები არიან. ეცადეთ ღია კონფლიქტი თავიდან აიცილოთ – წინააღმდეგ შემთხვევაში, ის შეიძლება დიდხანს გაგრძელდეს.

სასწორი

ცდილობთ, ერთდროულად რამდენიმე პრობლემა დაძლიოთ. ეს არასწორი სტრატეგიაა, ამიტომ გირჩევთ, სანამ ახალ საქმეს დაიწყებთ, უკვე დაწყებული საქმეები დაასრულოთ.

ხელსაყრელი დღეა დასვენების გართობის, მოგზაურობისა და ექსკურსიებისთვის. ამ დღეს გაცნობილ ადამიანთან ხანგრძლივი სასიყვარულო ურთიერთობა გელით.

მორიელი

იღბლიანი დღეა. ინტუიცია გიკარნახებთ, რა და როდის უნდა გააკეთოთ. ენდეთ და იმას მიიღებთ, რაზედაც ოცნებობდით. ზოგჯერ მიზნის მისაღწევად რისკზე წასვლა გიწევთ, თუმცა ეს სულაც არ გაშინებთ.

სავარაუდოდ, მომგებიან გარიგებას დადებთ და ფინანსურ შემოსავალს მიიღებთ. როცა საქმე ფულს ეხება, შეცდომებს არ უშვებთ. დღის მეორე ნახევარში სასიამოვნო სიურპრიზები გელით.

მშვილდოსანი

ამ დღეს თქვენი ამოცანა ახლობელი ადამიანის დახმარებაა. თუ ამ ადამიანს პრობლემები აქვს, ეცადეთ, მოთმინებით მოუსმინოთ და პრაქტიკული რჩევებით დაეხმაროთ. მთავარია, მზრუნველობა აკვიატებაში არ გადაიზარდოს და თავი არ მოაბეზროთ.

თხის რქა

დღის პირველი ნახევარი ხელსაყრელია საქმიანი შეხვედრების და მოლაპარაკებებისთვის. ამ დღეს საერთო ენას არაკეთილგანწყობილ ადამიანებთანაც კი იპოვით, მაგრამ ამ დღეს მიღებული გადაწყვეტილებები საბოლოო არ იქნება.

დღის მეორე ნახევარში საქმიანი აქტივობა მცირდება, სამაგიეროდ, ძველ მეგობრებთან გაწყვეტილი ურთიერთობის აღდგენის შანსი გექნებათ.

მერწყული

მოულოდნელი სიახლე ძალიან გაგახარებთ. დროულად მიღებული ინფორმაცია საშუალებას მოგცემთ გაურკვეველ სიტუაციაში სწორი გადაწყვეტილება მიიღოთ.

ხელსაყრელი დღეა ფინანსური საკითხების მოსაგვარებლად. ამ დღეს შეძენილი ნივთები იმედებს გაგიმართლებთ და დიდხანს მოგემსახურებათ. დღის მეორე ნახევარში საინტერესო ადამიანებთან სასიამოვნო შეხვედრა გელით. ამიტომ ნუ მოერიდებით ხალხმრავალ შეკრებებს – იქ სასარგებლო კონტაქტების დამყარებას შეძლებთ.

თევზები

გირჩევთ, ყველა მნიშვნელოვანი საქმე დღის პირველ ნახევარში დაგეგმოთ, განსაკუთრებით – თუ ის გავლენიანი ადამიანების მონაწილეობას მოითხოვს. დღის მეორე ნახევარი ხელსაყრელია სამუშაოსთვის, რომელიც სიზუსტეს და დეტალებისადმი ყურადღებას მოითხოვს.

თუ უმიზეზო სევდა მოგეძალათ, მარტო ნუ დარჩებით – ეცადეთ, გვერდით გყავდეთ ადამიანი, ვინც თქვენი განწყობის ამაღლებაზე იზრუნებს.

“თუკი პრეზიდენტი ქართველი ხალხის დადგენილ წესს განზრახ არღვევს, მას არაფრად მიაჩნია ქართველი ხალხი” – შალვა პაპუაშვილი

თუკი პრეზიდენტი ქართველი ხალხის დაწესებულ წესს განზრახ არღვევს, მას არაფრად მიაჩნია ქართველი ხალხი და მათ მიერ დაწესებული წესი, – ამის შესახებ საქართველოს პარლამენტის თავმჯდომარემ, შალვა პაპუაშვილმა გადაცემა „იმედი LIVE“-ში განაცხადა.

„ადამიანი, რომელიც არღვევს კანონსა და კონსტიტუციას, ცდილობს მოიძიოს კეთილშობილი მიზნები და მოტივაციები ამის გასამართლებლად. ასე რომ იყოს აწყობილი ქვეყანა და სამართალი, მაშინ ყველას გემოვნებაზე იქნებოდა მორგებული სამართლებრივი შეფასებები. კანონის უზენაესობა იმას ნიშნავს, რომ უზენაესია კანონი და არა ადამიანი, რომელიც თავისი წესით ცვლის ამ ქცევის წესებს.

ქართველმა ხალხმა, ჩვენ ყველას და მათ შორის საქართველოს პრეზიდენტსაც დაუწესა წესი და ამ წესის პირობით აირჩია ის პრეზიდენტად. ამ წესს, თავად სალომე ზურაბიშვილმა, როგორც პარლამენტის წევრმა 2017 წელს ხმა მისცა“, – განაცხადა შალვა პაპუაშვილმა.

“ჩვენ მიერ ინდივიდუალური პირის მიმართ დაწესებული ვერც ერთი სანქცია ვერ შეცვლის ხედვას აშშ-საქართველოს ურთიერთობებში” – მეთიუ მილერი

უკანასკნელი 30 წელიწადში აშშ და საქართველო ვიქეცით სტრატეგიულ პარტნიორებად, ვმუშაობთ ერთად ისეთი საქართველოსთვის, რომელიც სრულად იქნება ინტეგრირებული ევროატლანტიკურ ოჯახში. ჩვენ მიერ ინდივიდუალური პირის მიმართ დაწესებული ვერც ერთი სანქცია ამ ხედვას ვერ შეცვლის ჩვენს ურთიერთობებში, – ამის შესახებ აშშ-ის სახელმწიფო დეპარტამენტის პრესსპიკერმა, მეთიუ მილერმა ქართველი ჟურნალისტის კითხვის საპასუხოდ განაცხადა, რომელიც აშშ-ის მიერ დღეს გამოცხადებულ სანქციებს ეხებოდა.

ჟურნალისტმა მეთიუ მილერს ჰკითხა – „წელს უკვე მეორე შემთხვევაა, როდესაც საქართველოს მოქალაქეების წინააღმდეგ სანქციები დაწესდა. მანამდე სანქციები შეეხოთ საქართველოს უზენაესი სასამართლოს მოსამართლეებს. ხომ არ იქონიებს ეს გავლენას საქართველო-აშშ-ის ურთიერთობაზე“.

„მე არ მსურს, ასეთი დასკვნის გამოტანა. მე ვიტყვი, რომ ჩვენ სანქციები დავუწესეთ 150-ზე მეტ იურიდიულ და ფიზიკური პირს. არ ვისაუბრებ თითოეული სანქციის დეტალებზე. გადაგამისამართებთ ჩვენს და სახაზინო დეპარტამენტის მიერ გავრცელებულ ინფორმაციასთან, თუმცა 150 პირზე ცალ-ცალკე დეტალურად ვერ ვისაუბრებ. ჩვენ ყოველთვის ვიყავით სოლიდარული ქართველი ხალხისადმი და მათი მისწრაფებისადმი, იყვნენ თავისუფალი, სუვერენული სახელმწიფო საერთაშორისოდ აღიარებულ საზღვრებში. უკანასკნელ 30 წელიწადში ჩვენ ვიქეცით სტრატეგიულ პარტნიორებად, ვმუშაობთ ერთად ისეთი საქართველოსთვის, რომლის ხედვასაც ვიზიარებთ, საქართველოსთვის, რომელიც სრულად იქნება ინტეგრირებულო ევროატლანტიკურ ოჯახში და ჩვენ მიერ ინდივიდუალური პირის მიმართ დაწესებული ვერც ერთი სანქცია ამ ხედვას ვერ შეცვლის ჩვენს ურთიერთობებში“, – განაცხადა მეთიუ მილერმა.

აშშ რუსეთის მიერ უკრაინაში უკანონო ომის წარმოებასთან დაკავშირებით, 150-ზე მეტ ფიზიკურ და იურიდიულ პირს სანქციებს უწესებს. სანქცირებულ პირთა შორის არის საქართველოს ყოფილი მთავარი პროკურორი ოთარ ფარცხალაძე.

“ოთარ ფარცხალაძეს სახელმწიფო სტრუქტურებთან ბოლო ათი წელია, არანაირი კავშირი არ აქვს” – შალვა პაპუაშვილი

ოთარ ფარცხალაძეს სახელმწიფო სტრუქტურებთან ბოლო ათი წელია, არანაირი კავშირი არ აქვს, ის კერძო პირია, ამავე დროს, ის არის საქართველოს პირველი მოქალაქე, რომელიც ამ ტიპის სანქციებში მოხვდა, – ამის შესახებ პარლამენტის თავმჯდომარე შალვა პაპუაშვილმა „იმედის“ ეთერში განაცხადა.

„შესაბამისი უწყებები ამ საკითხს შეისწავლიან და საზოგადოებას ექნება ინფორმაცია, რომ გაერკვეს, რაშია საქმე. ზოგადად, რუსეთის წინააღმდეგ სანქციებს რაც შეეხება, საქართველო ამ სანქციებს მიჰყვება. შესაბამისად, მნიშვნელოვანია, რომ სანქციების გვერდის ავლა არ იყოს დაშვებული“, – განაცხადა პაპუაშვილმა.

აშშ რუსეთის მიერ უკრაინაში უკანონო ომის წარმოებასთან დაკავშირებით, 150-ზე მეტ ფიზიკურ და იურიდიულ პირს სანქციებს უწესებს. სანქცირებულ პირთა შორის არის საქართველოს ყოფილი მთავარი პროკურორი ოთარ ფარცხალაძე.

1...1,6371,6381,639...2,311Page 1,638 of 2,311
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი