ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე და სამსახურის რეგიონული მართვის დეპარტამენტის უფროსი, ლევან ამირიძე, რეგიონული სამმართველოების წარმომადგენლებთან ერთად, ონის მუნიციპალიტეტის კურორტ შოვში, სტიქიური უბედურების ზონაში იმყოფებიან.

სტიქიის შედეგების სალიკვიდაციო და სამაშველო ღონისძიებებში, უკვე ჩართულია ომისა და თავდაცვის ძალების 30-ზე მეტი ვეტერანი; მობილიზებულია 600-ზე მეტი ვეტერანი და ვ.სანიკიძის სახელობის ომის ვეტერანთა კლინიკური ჰოსპიტლის მედპერსონალი სრული შემადგენლობით, რომლებიც სრულ მზადყოფნაში არიან, შესაბამის სამსახურებთან კოორდინაციით, ნებისმიერ დროს ჩაერთონ სამაშველო და სტიქიის შედეგების სალიკვიდაციო ოპერაციებში.

სტიქიის ზონაში, სამუშაოებში ჩართულია საგანგებო სიტუაციების მართვის სამსახურის მეხანძრე- მაშველები, პოლიციის დანაყოფები, დრონები, სპეცტექნიკა და სასაზღვრო პოლიციის ვერტმფრენი. ასევე, საგანგებო სიტუაციების მართვის სამსახურის კინოლოგთა ჯგუფი; მოწყობილია საველე შტაბი, რომელიც მუდმივ კავშირზეა ონის მუნიციპალიტეტის მერიაში შექმნილ საკოორდინაციო შტაბთან; ადგილზე მუშაობენ გეოლოგებიც. საქართველოს პრემიერ-მინისტრის, ირაკლი ღარიბაშვილის გადაწყვეტილებით, კურორტ შოვში მიმდინარე სამუშაოებში, თავდაცვის ძალები ჩაერთო.

შეგახსენებთ, შოვში, მეწყერი, 3 აგვისტოს ჩამოწვა. სტიქიის ზონიდან, ამ დროისთვის, 210 ადამიანია გამოყვანილი. ბოლო ოფიციალური მონაცემებით, მეწყერს, 16 ადამიანი ემსხვერპლა; 25-მდე დაკარგული მოქალაქის ძებნის სამუშაოები,კი მესამე დღეა, უწყვეტ რეჟიმში გრძელდება.

საქართველოს პრემიერ-მინისტრის გადაწყვეტილებით, 3 აგვისტოს, ონის მუნიციპალიტეტში, კურორტ შოვში წარმოქმნილი სტიქიური უბედურების შედეგად დაღუპულთა ხსოვნის პატივსაცემად, 7 აგვისტო გლოვის დღედ გამოცხადდა.

საქართველოს მთელ ტერიტორიაზე, მიმდინარე წლის 7 აგვისტოს, 00:00 საათიდან 8 აგვისტოს 00:00 საათამდე სახელმწიფო დროშები დაეშვება.

ამასთან, სახელმწიფო დროშები დაეშვება 8 აგვისტოს 00:00 საათიდან 9 აგვისტოს 00:00 საათამდე, საქართველოს აფხაზეთისა და ცხინვალის რეგიონების უკანონო ოკუპაციის მიზნით, რუსეთის ფედერაციის მიერ საქართველოში განხორციელებული ფართომასშტაბიანი სამხედრო ინტერვენციის შედეგად დაღუპულთა ხსოვნის პატივის მისაგებად.

რუსეთის მოქალაქე, პერმელი ქსენია ტრიჩევა, საკურორტო სოფელ შოვში მეწყერის ჩამოწოლის შედეგად დაიღუპა. ინფორმაცია საქართველოში შვეიცარიის საელჩოს რუსეთის ინტერესების განყოფილებაში დაუდასტურეს. ამის შესახებ ინფორმაციას „ეხო კავკაზა“ ავრცელებს.

„დღეს მიღებული ინფორმაციით, ქსენია ტრიჩევა გარდაცვლილი იპოვეს – მისი ერთ-ერთმა ახლო მეგობარმა მორგში ამოიცნო მისი ცხედარი. ღრმა მწუხარებას გამოვთქვამთ ქსენიას ოჯახსა და მეგობრებს“, – ნათქვამია განცხადებაში.

მანამდე რუსულ მედიაში ვრცელდებოდა ინფორმაცია სტიქიის ზონაში გაუჩინარებული რუსეთის მოქალაქის შესახებ. როგორც წერდნენ, გოგონამ რაჭაში მოგზაურობის შესახებ მანამდე მეგობრებს აცნობა.

შოვში, სტიქიის ადგილზე გარემოს დაცვის და სოფლის მეურნეობის სამინისტროს, გარემოს ეროვნული სააგენტოს სპეციალისტთა ექვსი ჯგუფი მუშაობს, სხვადასხვა მიმართულების სპეციალისტები – გეოლოგები, ჰიდროლოგები, გლაციოლოგები, ვმუშაობთ ყველა მიღებულ ინფორმაციაზე, რომელიც ჩვენი სპეციალისტებისგან მოდის, – ამის შესახებ საქართველოს გარემოს დაცვისა და სოფლის მეურნეობის მინისტრის მოადგილე ნინო თანდილაშვილმა განაცხადა. როგორც ნინო თანდილაშვილმა აღნიშნა, ხეობაში განვითარებული პროცესებთან დაკავშირებით ყველა ინფორმაციის გაანალიზება ხდება. „ვმუშაობთ, რათა საზოგადოებას ამ მძიმე დროს, როდესაც ასეთი მაღალი არის ემოციური ფონი, მივაწოდოთ მაქსიმალურად ზუსტი ინფორმაცია. ამ მიმართულებით ჩვენ არც ერთი წუთით მუშაობა არ შეგვიჩერებია. დღეს დილას კიდევ შეფრინდნენ ჩვენი სპეციალისტები ხეობაში, მოხდა ძალიან დეტალურად ხეობის დათვალიერება. ამ ეტაპზე რისი თქმაც შემიძლია, ხვალ უკვე გვექნება ოფიციალური დასკვნა, რომელიც საზოგადოებას გაეცნობა და ეს იქნება დასკვნა, რომელიც ემყარება კონკრეტულ მონაცემებსა და ინფორმაციას. ამ ეტაპისთვის რაც შემიძლია ვთქვა, არის ის, რომ ძალიან უცბად, მყისიერი მოვლენის განვითარებას ჰქონდა ადგილი. ეს არის მყინვარული დნობის პროცესი. მოხდა კლდეზვაური მასის ჩამოშლა და მყინვარის ნაწილის ჩამოშლა. ძალიან სწრაფად განვითარდა პროცესები ხეობაში, რასაც ასევე თან დაერთო ღვარცოფული და თანმდევი მეწყრული პროცესები. რამდენიმე ბუნებრივი მოვლენის თანხვედრასთან გვქონდა ჩვენ საქმე. საბოლოო ჯამში მივიღეთ ის მძიმე სურათი, რასაც ვხედავთ ხეობაში. ამიტომ, მინდა, კიდევ ერთხელ ხაზგასმით მოვუწოდო ყველას და ვთხოვო, რომ როდესაც ასეთი რთული ემოციური ვითარება არის, ჩვენ უნდა მოვუსმინოთ სპეციალისტებს, დავეყრდნოთ მათ მონაცემებს და არ უნდა გავავრცელოთ ისეთი ინფორმაცია, რაც საბოლოოდ საზოგადოებას შეიყვანს შეცდომაში და კიდევ უფრო მეტად დაამძიმებს ამ მძიმე ემოციურ ფონს. ჩემი თხოვნა იქნება ყველას მიმართ, გადაუმოწმებელი ინფორმაციისგან შეიკავონ თავი. სპეციალისტებს დასჭირდებათ დრო, რათა მაქსიმალურად ზუსტი ინფორმაცია მივცეთ საზოგადოებას და ყველა კითხვას გავცეთ ამომწურავი პასუხი“, – განაცხადა ნინო თანდილაშვილმა.

ადგილზე უმძიმესი ვითარებაა, სიარული შეუძლებელია, უჭირს როგორც ტექნიკას, ისე ადამიანს, მაშველების პროფესიონალიზმზე მეტყველებს ის, რომ გარკვეული მაჩვენებლებით საზღვრავენ ზონებს და შემდეგ ეძებენ, – ამის შესახებ საქართველოს პარლამენტის თავმჯდომარე შალვა პაპუაშვილმა საქართველოს პირველ არხს შოვში, სტიქიის ზონაში ყოფნისას განუცხადა. მისივე თქმით, ასეთი მასშტაბის სტიქია იშვიათია. „უმძიმესი სიტუაციაა ადგილზე, რაც უფრო ახლოდან ხედავ, მით უფრო ხდება იმის გააზრება, რა მასშტაბის იყო ეს სტიქია. 50 ჰექტარი ტერიტორიაა, რომელიც, საშუალოდ, 4 მეტრი ქვაღორღიანი მასით არის დაფარული და ყველაფერი მოყოლილი აქვს. ასეთი მასშტაბის სტიქია ზოგადად იშვიათია და რაც უფრო ახლოდან ხედავ, მით უფრო მძიმეა ამის ნახვა. მქონდა შესაძლებლობა, რომ იმ ოჯახის წევრებთან მესაუბრა, ვინც დაკარგულ ნათესავებს ეძებენ. რა თქმა უნდა, რთულია მათი მდგომარეობა და რთულია, მოძებნო სიტყვები, რომელიც მათ დაამშვიდებს. ჩვენ ვგულშემატკივრობთ ჩვენს მაშველებს და ვიმედოვნებთ, თუკი არსებობს რაიმე შანსი, ეს შანსი იქნება სასიკეთოდ და იპოვიან. ძალიან მძიმე სიტუაციაა. გარშემო ტერიტორიას რაც შეეხება, იქ ყველანაირად ყველა ტერიტორია მოიარეს. ვერტმფრენი დღეს ძალიან ინტენსიურად იყო სტიქიის ზონაში, ზემოდანაც ხდებოდა ტერიტორიის დაზვერვა. გუშინდელს შემდეგ, გარე ტერიტორიიდან რომ ვინმე ყოფილიყო გადარჩენილი, ასეთი ინფორმაცია არ არის“, – აღნიშნა პაპუაშვილმა. მისივე თქმით, მაშველების პროფესიონალიზმზე მეტყველებს ის, რომ ზონებს საზღვრავენ გარკვეული მაჩვენებლებით და შემდეგ ამ ზონაში ეძებენ, რაც აჩვენებს მუშაობის ეფექტიანობას. „ეს ქვაღორღი არის წყლით გაჟღენთილი და რბილი მასაა. არის როგორც ჭაობი, მასზე სიარული შეუძლებელია. უჭირს ტექნიკასაც და ადამიანსაც, თუმცა არის ზონები, სადაც რამდენიმე გარდაცვლილი გუშინ იქნა აღმოჩენილი და ინტენსიურად იმ ზონაში ექცეოდა ყურადღება. სწორედ იმ ადგილას აღმოჩნდნენ სხვა გარდაცვლილები. იმ რუკის მიხედვით, სად რა იყო განლაგებული, შეუძლებელია ძებნა, ვინაიდან დაძრულია ყველაფერი მასის მიერ. ჩვენი მაშველების პროფესიონალიზმზე მეტყველებს ის, რომ ისინი ზონებს საზღვრავენ გარკვეული მაჩვენებლებით და შემდეგ ეძებენ ამ ზონაში. ეს აჩვენებს მუშაობის ეფექტიანობას“, – განაცხადა პაპუაშვილმა.

თემურ მღებრიშვილი აცხადებს, რომ გავრცელებული ინფორმაცია, თითქოს მანქანაში აღმოაჩინეს ცხედრები, არ შეესაბამება სიმართლეს.

ამ დროისთვის აღმოაჩინეს ორი მანქანა, მიმდინარეობს ამ მანქანების ამოღება მდინარის კალაპოტიდან, შიგნით არ აღმოჩნდნენ ადამიანები, ერთ ერთი მათგანის მფლობელები ცოცხლები არიან.