როგორც იქნა, მოხდა ჩვენი აზრების თანხვედრა, – ასე გამოეხმაურა ზურაბ ჩხაიძე სახალხო დამცველის მიერ შექმნილმა სპეციალისტთა ჯგუფის მიერ მიხეილ სააკაშვილის ჯანმრთელობის შესახებ გამოქვეყნებულ ახალ დასკვნას.

„აქ იგულისხმება ლაბორატორიული ანალიზების მაჩვენებლების პერიოდულად გაუარესება, რომ ეს ძირითადად დაკავშირებულია ისევ და ისევ კვების კომპონენტთან. დღევანდელ დასკვნაში კოლეგები აღნიშნავენ, რომ ეს უკავშირდება პროტეინდეფიციტურ მდგომარეობას, ანუ შიმშილს. რაც შეეხება კონკრეტულ დეფიციტს, დიახ, ესეც ალბათ ცოტა საკამათოა. შეიძლება ეს ნევროლოგის შეფასებაა, მაგრამ დინამიკაში ბევრად უფრო გაუმჯობესებულია.

პაციენტი ნაკლებად აქტიურია, თუმცა საჭიროების შემთხვევაში შეუძლია გადაადგილდეს აქტიურად და გადაადგილდება ძირითადად დამხმარე საშუალებების გამოყენების გარეშე“, – აცხადებს ჩხაიძე.

სახალხო დამცველის მიერ შექმნილმა სპეციალისტთა ჯგუფმა მიხეილ სააკაშვილის ჯანმრთელობის მდგომარეობასთან დაკავშირებით დასკვნა გამოაქვეყნა, რომელშიც ნათქვამია, რომ ნარჩუნდება გაუარესებისკენ ნელი დინამიკა. მედიკოსების დასკვნაში კვებით დეფიციტზეც არის საუბარი. ასევე ნათქვამია, რომ „ვივამედში“ მართვასთან დაკავშირებით განსაკუთრებული შენიშვნები არ აქვთ.

შინაგან საქმეთა სამინისტროს იმერეთის რაჭა-ლეჩხუმისა და ქვემო სვანეთის პოლიციის დეპარტამენტის ამბროლაურის რაიონული სამმართველოს საგამოძიებო განყოფილების გამომძიებელი, პოლიციის მაიორი – 1975 წელს დაბადებული მირიან ჭელიძე, რომელიც ონის მუნიციპალიტეტში სამსახურებრივი მოვალეობის შესრულების დროს გარდაიცვალა, სამხედრო პატივით დაიკრძალა. ამის შესახებ ინფორმაციას შინაგან საქმეთა სამინისტრო ავრცელებს.

მათივე ცნობით, სამსახურებრივი მოვალეობის შესრულების დროს დაღუპული პოლიციელი უკანასკნელ გზაზე შსს-ს წარმომადგენლებმა გააცილეს.

„მირიან ჭელიძე სტიქიური უბედურების ზონაში მიმდინარე სამაშველო ღონისძიებების ფარგლებში იცავდა საზოგადოებრივ წესრიგს, რა დროსაც შეუძლოდ გახდა და საავადმყოფოში მიყვანამდე გზაში გარდაიცვალა.

სამსახურებრივი მოვალეობის შესრულების დროს დაღუპული პოლიციელი უკანასკნელ გზაზე გააცილეს შინაგან საქმეთა მინისტრის მოვალეობის შემსრულებელმა – შალვა ბედოიძემ, მინისტრის მოადგილეებმა – გიორგი ბუთხუზმა, იოსებ ჭელიძემ , ალექსანდრე დარახველიძემ, ასევე, სამინისტროს სხვადასხვა დანაყოფის ხელმძღვანელმა პირებმა, პარლამენტის თავმჯდომარემ, ადგილობრივი ხელისუფლების წარმომადგენლებმა, გარდაცვლილი პოლიციელის კოლეგებმა და ახლობლებმა.

საპატიო ყარაულმა გარდაცვლილის ხსოვნას პატივი საგანგებო ზალპით მიაგო, დაკრძალვის შემდეგ კი მის ოჯახის წევრებს საქართველოს სახელმწიფო დროშა გადასცა“, – ნათქვამია ინფორმაციაში.

„მწერალთა სახლში, როგორც იქნა, “დაბრუნდება” საქ სსრ მწერალთა კავშირის სული… “ქართულმა ოცნებამ” ახალი ოფის-შტაბი მიამატა თავის პარტიულ ოფისებს” – ასე ეხმაურება სოციალურ ქსელში  მწერალი ლაშა ბუღაძე  მწერალთა სახლის ხელმძღვანელად ქეთევან დუმბაძის დანიშვნას.

მისი თქმით, “ქართულმა ოცნებამ” ახალი ოფის-შტაბი მიამატა თავის პარტიულ ოფისებს.

“მწერალთა სახლში, როგორც იქნა, “დაბრუნდება” საქ სსრ მწერალთა კავშირის სული… “ქართულმა ოცნებამ” ახალი ოფის-შტაბი მიამატა თავის პარტიულ ოფისებს.

ვიდრე “ოცნება” იქნება ხელისუფლებაში – ქვეყნის და სახელოვნებო სფეროთა ეროზია-დეგრადაცია გაგრძელდება… თ. წულუკიანი, რომელიც ყველაზე უვარგისი და დესტრუქციული მმართველია, ვინც კი ამ სფეროში ყოფილა, მწერალთაკავშირული რესენტიმენტებით ცდილობს “ბუნებაზე, ყვავილებზე და ჩიტებზე” პოსტების მდებებისა და ლექსების მკეთებელი აპოლიტიკური “კულტურის მუშაკების” გულის მოგებას…

რომელიმე რუსულ კანონ 2-ს ალბათ უკვე ტაშისკვრით მიიღებენ მწერალთა სახლის დარბაზში, როგორც ეს “ძველ და საყვარელ” საბჭოთა მამების და ადრე თუ გვიან-შევარდნაძეულ ეპოქაში ხდებოდა. გილოცავთ, ამხანაგებო!“ – წერს ლაშა ბუღაძე.

მწერალთა სახლს, 4 სექტემბრიდან, ქეთევან დუმბაძე უხელმძღვანელებს.

https://www.facebook.com/sandro.mamaladze.9/posts/pfbid023iTjWxWphydHcDieHG8ZHzxGj8Y8sVg7gD8bzY4FkDrQy4H3n1DDH4DnqPaxULzvl?ref=embed_post

„ფაქტ-მეტრი“ საფუძველს მოკლებულს უწოდებს პარლამენტის თავმჯდომარის შალვა პაპუაშვილის განცხადებას, რომ ბოლო პერიოდში სოციალურ ქსელებში გავრცელებულ ყალბ ციტატებს ე.წ. ფაქტების შემოწმების პროექტები არ გამოეხმაურნენ.

„ფაქტს-მეტრის“ შეფასებით, აღნიშნული განცხადება ფაქტების გადამოწმების ობიექტური საქმიანობის პოლიტიკურად მიკერძოებულად წარმოჩენას ცდილობს.

„ფაქტ-მეტრი“ საქართველოს პარლამენტის თავმჯდომარის შალვა პაპუაშვილის განცხადებას ეხმაურება, სადაც მან აღნიშნა: „განსაკუთრებით თვალსაჩინო იყო ამ პერიოდში სოციალურ ქსელში ორკესტრირებულად გამოქვეყნებული და გაზიარებული ხელისუფლების წარმომადგენლების, მათ შორის – ირაკლი კობახიძის, მამუკა მდინარაძის, ვახტანგ გომელაურის, ყალბი ციტატები, რომლის მიზანი მათ მიმართ მკითხველებში მტრული განწყობის გამოწვევა იყო“. მისივე თქმით, „არცერთ ამ ყალბ ციტატას არ გამოეხმაურა ე.წ. ფაქტების შემოწმების პროექტები, იქნება ეს „ფაქტჩეკი“ თუ „მითების დეტექტორი“ და მხოლოდ მას მერე, რაც ჩვენი მხრიდან მოხდა ამის მხილება, მხოლოდ ამის შემდეგ საკუთარ ვებგვერდზე ამხილეს ეს ყალბი ციტატები“.

აღნიშნული განცხადება საფუძველს მოკლებულია და ფაქტების გადამოწმების ობიექტური საქმიანობის პოლიტიკურად მიკერძოებულად წარმოჩენას ცდილობს.

შალვა პაპუაშვილის მსგავსად, „ფაქტ-მეტრის“ წინააღმდეგ დაუსაბუთებელ ბრალდებებს „ქართული ოცნების“ მიერ შექმნილი ფეისბუქ-გვერდიც ხშირად ავრცელებს ხოლმე, რომელიც ფაქტების გადამოწმების პლატფორმად პოზიციონირებას ცდილობს. როგორც „ქართული ოცნების“ ლიდერების, ასევე აღნიშნული გვერდის მხრიდან ისმის ყალბი ბრალდებები, თითქოს „ფაქტ-მეტრი“ცალკეულ ინფორმაციას მიზანმიმართულად არ ამოწმებს, ან მხოლოდ მას შემდეგ ამოწმებს, რაც საჯაროდ მიგვითითებენ.

ამგვარი შემთხვევები აჩვენებს, რომ პარლამენტის თავმჯდომარის და „ქართული ოცნების“ ზემოაღნიშნული გვერდის მიზანი დეზინფორმაციის წინააღმდეგ ბრძოლა არაა. ასე რომ იყოს, მათთვის პრიორიტეტული ჩვენთან თანამშრომლობა და სავარაუდოდ დეზინფორმაციული ბმულების ჩვენთვის გაზიარება იქნებოდა. „ფაქტ-მეტრი“ დაინტერესებული მკითხველისთვის განმარტავს, რომ ფაქტებზე დაფუძნებული ობიექტური ინფორმაციის საზოგადოებისთვის მიწოდება ჩვენი მთავარი მიზანია და მიმდინარე ტრაგედიის შესახებ „ფაქტ-მეტრის“ მიერ მომზადებული მასალები შეგიძლიათ ჩვენს ვებ-გვერდზე იხილოთ. ეს მასალები, მათ შორის, ხელისუფლების წარმომადგენლების წინააღმდეგ მიმართულ ყალბ ამბებსაც ამხელს. ჩვენ დეზინფორმაციის წინააღმდეგ ბრძოლას კვლავ აქტიურად გავაგრძელებთ“,- აღნიშნულია „ფაქტ-მეტრის“ განცხადებაში.