უკრაინის თავდაცვის მინისტრი, ოლექსი რეზნიკოვი მიიჩნევს, რომ ევგენი პრიგოჟინის სიკვდილი ცხადყოფს, რომ ვლადიმირ პუტინის ნდობა არ შეიძლება.

„პრიგოჟინის სიკვდილმა დაასუსტა პუტინი. იმიტომ, რომ ამან მსოფლიოს აჩვენა: თუ პუტინი ვინმესთან გარიგებას დადებს და მას არღვევს, ეს ნიშნავს, რომ მისი ნდობა აღარ შეიძლება. ეს უბრალოდ განგსტერების ქცევაა და კრემლი ასეც იქცევა“, – აღნიშნა უკრაინის თავდაცვის უწყების ხელმძღვანელმა.

23 აგვისტოს რუსეთში, ტვერის ოლქში ჩამოვარდა კერძო თვითმფრინავი, რომელიც მოსკოვიდან სანკტ-პეტერბურგში მიფრინავდა. ბორტზე მყოფი ათივე ადამიანი, მათ შორის ეკიპაჟის სამი წევრი დაიღუპა. ოფიციალური ინფორმაციით, რეისზე დარეგისტრირებული მგზავრების სიაში იყვნენ „ვაგნერის“ ხელმძღვანელი ევგენი პრიგოჟინი, მისი მარჯვენა ხელი დმიტრი უტკინი და დაჯგუფების სხვა მეთაურები.

ამერიკელები შეცდომაში შეიყვანეს – უკრაინის მხარდაჭერა აშშ-ის ინტერესებშია, – ამის შესახებ სენატში რესპუბლიკელი უმცირესობის ლიდერმა, მიტჩ მაკკონელმა განაცხადა.

აღნიშნული განცხადება მაკკონელმა ვირტუალური ფორუმის – „ომის მოგება. მშვიდობის მოგება“-ს ფარგლებში გააკეთა, რომელიც CEPA-ს („ევროპული პოლიტიკის ანალიზის ცენტრი“) მიერ იყო ორგანიზებული.

მისი თქმით, თუ რუსეთის ფედერაციის პრეზიდენტი, ვლადიმერ პუტინი ამ ომს მოიგებს, შემდეგი ნატო-ს ერთ-ერთი ქვეყანა გახდება, ამიტომ, სენატში რესპუბლიკელი უმცირესობის ლიდერის აზრით, გაცილებით გონივრული იქნება ნატო-ს ქვეყანაში მოსალოდნელი შეჭრის შეჩერება და უკრაინელები მზად არიან ამაში მონაწილეობა მიიღონ.

„ჩვენ აქ ჩინეთის, რუსეთის, ჩრდილოეთ კორეის და ირანის წინააღმდეგ ვდგავართ. ჩვენ სწორ მხარეს ვართ. მეორე, ჩვენ არც ერთ ამერიკელ სამხედროს ვკარგავთ. უკრაინელები თვითონ იბრძვიან. რაც ეხება ჩვენს მთლიან შიდა პროდუქტს, ეს, ნამდვილად, მცირე წილია, რასაც უკრაინაში ძალისხმევისთვის ვაკეთებთ“, – განაცხადა მაკკონელმა.

მან ასევე აღნიშნა, როდესაც აშშ უკრაინაში იარაღს და საბრძოლო მასალას გზავნის, თავისი აქტივების დიდი ნაწილი უფრო თანამედროვე, მოწინავე მოწყობილობით იცვლება.

უზბეკეთის დედაქალაქ ტაშკენტში, ისლამ კარიმოვის სახელობის საერთაშორისო აეროპორტთან ძლიერი აფეთქება მოხდა.

მედიის ინფორმაციით, აფეთქება საბაჟო საწყობში მოხდა, რის შემდეგაც შემთხვევის ადგილზე ძლიერი ხანძარი გაჩნდა.

თვითმხილველების თქმით, აფეთქების ტალღა იმდენად ძლიერი იყო, რომ მიმდებარე სახლების მინები ჩამსხვრეულია.”ტელეგრამ” არხ Mash-ის ცნობით, კომპანია Inter Logistics-ის საწყობში ელექტრომობილების ბატარეები აფეთქდა და საწყობი დარტყმის ტალღამ გაანადგურა.დაშავებულთა რაოდენობის შესახებ ინფორმაცია ჯერჯერობით არ ვრცელდება.

უზბეკეთის ჯანდაცვის სამინისტროს ცნობით, აფეთქებისა და ხანძრის შედეგად დაშავებულები საავადმყოფოში გადაიყვანეს.

რუსულმა ძალებმა უკრაინას სამხრეთ-აღმოსავლეთიდან Shahed-136/131 ტიპის 44 დრონით შეუტიეს, დრონები ჯგუფურად, პრიმორსკო-ახტარსკისა და ჩაუდას რაიონებიდან გაუშვეს, – ინფორმაციას უკრაინული მედია შეიარაღებული ძალების საჰაერო ძალებზე დაყრდნობით ავრცელებს.

მათივე ინფორმაციით, საჰაერო თავდაცვის ძალებმა 34 დრონი გაანადგურეს.

„შეტევის მოგერიებაში ჩართულია გამანადგურებელი თვითმფრინავები, საზენიტო-სარაკეტო ქვედანაყოფები და მობილური სახანძრო ჯგუფები“, – აცხადებენ შეიარაღებულ ძალებში.

28 სექტემბრის ღამეს რუსეთის საოკუპაციო ძალებმა უკრაინას უპილოტო საფრენი აპარატებით კიდევ ერთხელ შეუტიეს, რის გამოც რამდენიმე ოლქში საჰაერო განგაში იყო გამოცხადებული.

მთიანი ყარაბაღის რეგიონიდან სომხეთში უკვე 50 ათასზე მეტი ეთნიკური სომეხი გადავიდა. ინფორმაციას ამის შესახებ სააგენტო Reuters-ი ავრცელებს.

როგორც სომხეთის პრემიერ-მინისტრის აპარატის ინფორმაციისა და საზოგადოებასთან ურთიერთობის დეპარტამენტში განაცხადეს, მთავრობა უზრუნველყოფს საცხოვრებელს ყველა იმ პირისთვის, ვისაც არ აქვს წინასწარ განსაზღვრული საცხოვრებელი ადგილი.

საცხოვრებლით უზრუნველყოფის მიზნით, სომხეთში საკოორდინაციო ცენტრი მოქმედებს.

რეგისტრაციის გავლის შემდეგ ყარაბაღელ სომხებს სხვადასხვა ქალაქში გზავნიან.

მოსკოვი მზადაა უკრაინის საკითხზე მოლაპარაკებისთვის, მაგრამ ადგილზე არსებული რეალობის და რუსეთის უსაფრთხოების ინტერესების გათვალისწინებით, – ამის შესახებ რუსეთის საგარეო საქმეთა მინისტრმა, სერგეი ლავროვმა გამოცემა TASS-თან ინტერვიუში განაცხადა.

„ჩვენი პოზიცია ძალაში რჩება: მზად ვართ მოლაპარაკებისთვის, მაგრამ მოლაპარაკებისთვის იმ რეალობის გათვალისწინებით, რომელიც შეიქმნა და ჩვენი პოზიციის გათვალისწინებით, რომელიც ყველასთვის კარგად არის ცნობილი, ჩვენი ინტერესების, ჩვენი უსაფრთხოების ინტერესების გათვალისწინებით. რუსეთის საზღვრებზე მტრული ძალების ნაცისტური რეჟიმის შექმნის პრევენციის ინტერესების გათვალისწინებით”, – აღნიშნა ლავროვმა.

გერმანია უკრაინისთვის შორ მანძილზე მოქმედი რაკეტების გადაცემისგან თავს იკავებს. ამის შესახებ The Wall Street Journal-ი წერს.

გამოცემის ცნობით, იმ შემთხვევაში, თუ გერმანია უკრაინას „ტაურუსის“ ტიპის რაკეტებს გადასცემს, სარაკეტო სისტემების ექსპლუატაციის უზრუნველსაყოფად უკრაინაში საკუთარი სპეციალისტების გაგზავნა მოუწევს, რამაც რუსეთს შესაძლოა გერმანიასთან პირდაპირი კონფრონტაციისკენ უბიძგოს.

კოალიციურმა მთავრობამ უკრაინისთვის რაკეტების გადაცემას მხარი უკვე დაუჭირა, თუმცა კანცლერი შოლცი კიევში „ტაურუსების“ გაგზავნისგან თავს იკავებს.

რუსეთის საგარეო საქმეთა მინისტრმა, სერგეი ლავროვმა სომხეთის ხელმძღვანელობას ურჩია, გაიხსენონ შეერთებულ შტატებზე დაყრდნობილი ქვეყნების ბედი. ამის შესახებ მან რუსულ სახელმწიფო სააგენტო „ტასთან“ ინტერვიუში განაცხადა.

კითხვაზე, შეიძლება თუ არა, სომხეთმა დაკარგოს რუსეთი, ლავროვმა განაცხადა, რომ ერევანში რამდენიმე წამყვან პოლიტიკოსს სურს მსგავსი სცენარი და დასავლეთისკენ იყურება.

„ისინი თუ ეყრდნობიან შეერთებულ შტატებს, როგორც პირდაპირ გამომდინარეობს სომხეთის ხელმძღვანელობის მრავალი წარმომადგენლის განცხადებებიდან, მაშინ ალბათ მათთვის კარგი იქნება, გადახედონ უახლეს ისტორიას, როგორ ეპყრობოდა შეერთებული შტატები მათ, ვის მოქცევასაც თავისი ფრთის ქვეშ, თავისი გეოპოლიტიკური ინტერესების პოპულარიზაციას ამერიკის სანაპიროებიდან შორს ცდილობდა. ყველა ამ ხალხის ბედი ძალიან, ძალიან ბუნდოვანია“, – აღნიშნა ლავროვმა.

მისივე თქმით, რუსეთის ფედერაციის გეოპოლიტიკური ინტერესების იგნორირება ამიერკავკასიაში შეუძლებელია.

„ისტორიულად, გეოგრაფიულად, გეოპოლიტიკურად რუსეთის ინტერესების სრული იგნორირება, მისი დაკარგვა ამიერკავკასიაში შეუძლებელია, მაგრამ ზოგიერთ ლიდერს ერევანში აქვს ასეთი იმედები და ამაზე პირდაპირ საუბრობენ“, – განაცხადა ლავროვმა.