თუ ვენეციის კომისია გულისხმობს, რომ იუსტიციის უმაღლეს საბჭოში გადაწყვეტილებები ორმაგი 2/3-ით მიიღებოდეს, ეს ჩიხში შემყვანი ფორმულაა, – ასე ეხმიანება პარლამენტის ვიცე-სპიკერი გია ვოლსკი ვენეციის კომისიის დასკვნას სასამართლო რეფორმაზე.

ვოლსკი მიიჩნევს, რომ გადაწყვეტილების მიღების მსგავსი მექანიზმი “გადაწყვეტილებების ვერ მიღების ფორმულაა”, თუმცა, ამ საკითხზე გუნდში მსჯელობა შედგება და საერთო პოზიციასთან დაკავშირებით განცხადება გაკეთდება.

“უახლოეს პერიოდში შეიძლება განცხადება გაკეთდეს, იურიდიული კომიტეტის თავმჯდომარე და ჩვენი გუნდი ამ საკითხებზე მუშაობს. რაიმე ფაქტი, რომ სასამართლოში არსებობს პოლიტიკური მიკერძოება, ან არ არსებობს ნეიტრალური პოზიცია ან პროფესიონალიზმი, ასეთი მოსაზრება არსად წერია, არავის უთქვამს. კიდევ უფრო მეტიც, საქართველოს სასამართლო, მართლმსაჯულება რეიტინგებში არის მოწინავე პოზიციებზე, ყოველთვის იყო მსოფლიოშიც, ევროპაშიც და ნატოს და ევროკავშირის ბევრ ქვეყანას უსწრებს წინ. შენიშვნები ჯერჯერობით გუნდში არ განხილულა, მაგრამ უნდა ვაღიაროთ, რომ ბევრი რეფორმაა განხორციელებული, კიდევ ინიცირებულია არაერთი, ამ საკითხებთან დაკავშირებით, რას გულისხმობს ვენეციის კომისია, ჩემთვის ამ ეტაპზე უცნობია, მაგრამ თუკი ეს იმას გულისხმობს ისევ, რომ იუსტიციის უმაღლეს საბჭოში იყოს გადაწყვეტილებების მიღების ის მექანიზმი, ფორმულა, როცა ნაწილი 2/3-ით იღებს გადაწყვეტილებას, მეორე ნაწილიც 2/3- ით და ესენი ერთმანეთს უნდა დაემთხვეს, (ორმაგი 2/3 – ით ხდება გადაწყვეტილების მიღება), მე პირადად ჩემი მხრიდან ვაცხადებ, რომ ეს არის იუსტიციის უმაღლესი საბჭოში გადაწყვეტილებების ვერ მიღების ფორმულა, თუ ამაზეა საუბარი. მე ჩემ პოზიციას ვამბობ ამასთან დაკავშირებით, რომ ეს არის ჩიხში შემყვანი ფორმულა, მაგრამ ამ თემაზე იქნება მსჯელობა და ჩვენს პოზიციას დავაფიქსირებთ.

მე მიმაჩნია, რომ ეს ფორმულა არ იმუშავებს, ჩვენ გვინდა ქმედითი სასამართლო და არა ჩიხში შემყვანი ფორმულირებები,”- განაცხადა ვოლსკიმ.

ინფორმაციისთვის, ვენეციის კომისიამ საქართველოს სასამართლო რეფორმის შესახებ დასკვნა გამოაქვეყნა. დოკუმენტში განხილულია ის რეკომენდაციები, რომლებიც შესრულდა, არ შესრულდა ან ნაწილობრივ შესრულდა. ვენეციის კომისია მიესალმება 2023 წლის ივნისში მიღებულ ზოგიერთ შესწორებას, ისევე როგორც 2023 წლის სექტემბრის ცვლილებებს, მაგრამ აღნიშნავს, რომ წინა რეკომენდაციების ნაწილი ჯერ არ შესრულებულა.

ვენეციის კომისიის დასკვნის მიხედვით, აუცილებელია შესრულდეს პირველი ძირითადი რეკომენდაცია, რომელიც იუსტიციის უმაღლესი საბჭოს ყოვლისმომცველ რეფორმას გულისხმობს, რომლის მსგავსი მოთხოვნა აქვს ევროკავშირის კომისიასაც თავის დასკვნაში საქართველოს ევროკავშირში გაწევრიანებაზე განაცხადის შესახებ. კერძოდ, იუსტიციის უმაღლესი საბჭოს ყოვლისმომცველი რეფორმა ნიშნავს იმას, რომ გადაიხედოს მისი ფუნქციები, გადაწყვეტილების მიღების პროცესი და წევრთა არჩევის წესი.

დედაქალაქის მერმა კახა კალაძემ მედიის მიერ დასმული კითხვის საპასუხოდ განაცხადა, რომ,  საქართველო ყოველთვის იყო ებრაელი ხალხის გვერდით მდგომი, ასეა დღესაც და მომავალშიც დარჩება ისრაელის   მხარდამჭერად.

„ჩვენ რაც შეგვიძლია, საქართველოს რა შესაძლებლობებიც აქვს, ყოველთვის გვერდით ვუდგავართ ჩვენს მეგობარ ებრაელ ხალხს და ყველაფერს გავაკეთებთ მომავალშიც მათ მხარდასაჭერად. დამატებით დახმარებასთან დაკავშირებით, თუ რა გადაწყვეტილებაც იქნება   მიღებული, ცნობილი გახდება ყველასთვის“, – განაცხადა თბილისის მერმა.

ევროკავშირის სახელმწიფოების ლიდერები მხარს გვიჭერენ კანდიდატის სტატუსის მიღებაში და ქართული რადიკალური ოპოზიცია და არასამთავრობო სექტორი ხელს გვიშლიან, – ამის შესახებ მედიასთან „ხალხის ძალის“ ერთ-ერთმა ლიდერმა, დეპუტატმა გურამ მაჭარაშვილმა განაცხადა.

მისი თქმით, კანდიდატის სტატუსთან დაკავშირებით დასავლელი პარტნიორების მიერ მიღებულ ისტორიულ გადაწყვეტილებაზე იქნება დამოკიდებული დეპოლარიზაციის პროცესი.

„პრემიერის ბოლოდროინდელმა ვიზიტმა, მათ შორის, მისმა გამოსვლებმა ასევე, ევროპის ლიდერების მესიჯებმა იმასთან დაკავშირებით, რომ საქართველოს ექნება მხარდაჭერა კანდიდატის სტატუსის მიღების დროს, გააღიზიანა რადიკალური ოპოზიცია და მათი პატრონები. სწორედ ამის გამოვლინება იყო სერგი კაპანაძისა და მასთან ასოცირებული ათობით ენჯეოს პირდაპირი გალაშქრება. ამ ღია წერილით მათ პირდაპირ ჰკითხეს ევროკავშირს, რას შვებით, მართლა ხომ არ აძლევთ საქართველოს კანდიდატის სტატუსსო?

იმის გარდა, რომ ობიექტურადაც გვეკუთვნის კანდიდატის სტატუსი, ევროკავშირისათვისაც საჭიროა ეს, რადგან ვხედავთ, რომ მსოფლიოში თავდაყირა დადგა დღის წესრიგი და ის ადგილი, სადაც დემოკრატია, სიმშვიდე და უსაფრთხოებაა, ბუნებრივად ხდება მიზიდულობის ცენტრი. მათ შორის, საქართველოა სამხრეთ კავკასიაში და ზოგადად, რეგიონში. თუმცა, რადგან რადიკალური ოპოზიციის დღის წესრიგში ერთადერთი საკითხია ის, რომ საქართველო კანდიდატის სტატუსს ვერ მიიღებს, როგორც კი გამოჩნდა იმის ნიშნები, რომ ქვეყანას მიენიჭება სტატუსი, ღია წერილი აფრინეს, არ მისცეთო. წარმოიდგინეთ, ვინც ჩამოდიან საქართველოში, ევროკავშირის სახელმწიფოების ლიდერები, მხარს გვიჭერენ კანდიდატის სტატუსის მიღებაში და ქართული რადიკალური ოპოზიცია და არასამთავრობო სექტორი ხელს გვიშლიან, რადგან ისეთ პირობებს აყენებენ, რომ ქვეყანა მათი შესრულების თუ შეუსრულებლობის შემთხვევაშიც კანდიდატის სტატუსს ვერ მიიღებს.

პრემიერმა არაერთხელ გააჟღერა და ჩვენც, „ხალხის ძალაც“ ამას ვამბობთ, რომ კანდიდატის სტატუსის მინიჭება საქართველოში პოლარიზაციას თუ არ დაასრულებს, მინიმუმამდე მაინც დაიყვანს. როცა დასავლელი პარტნიორები გვეუბნებიან, მიხედეთ დეპოლარიზაციის საკითხსო, კი ბატონო, მაგრამ ეს ცალმხრივად არ გამოდის. სწორედ მათ ისტორიულ გადაწყვეტილებაზე იქნება დამოკიდებული დეპოლარიზაციის პროცესი.“, – განაცხადა გურამ მაჭარაშვილმა.