ევროპული საბჭო ახლო აღმოსავლეთში განვითარებულ სიტუაციასთან დაკავშირებით მიიღეს ევროკავშირის წევრი ქვეყნების ერთობლივ განცხადებას აქვეყნებს. განცხადების ავტორები „ჰამასს“ მძევლების გათავისუფლებისკენ მოუწოდებენ და მშვიდობიანი მოსახლეობის დაცვის აუცილებლობას უსვამენ ხაზს.

„ევროკავშირი უმკაცრესად გმობს „ჰამასს“ და მის სასტიკ და განურჩეველ ტერორისტულ თავდასხმებს ისრაელზე და ღრმა მწუხარებას გამოთქვამს ადამიანების სიცოცხლის დაკარგვის გამო. ტერორს გამართლება არ აქვს. ჩვენ მტკიცედ ვუსვამთ ხაზს ისრაელის უფლებას დაიცვას თავი ჰუმანიტარული და საერთაშორისო სამართლის შესაბამისად ასეთი ძალადობრივი და განურჩეველი თავდასხმების ფონზე. ჩვენ კიდევ ერთხელ ვადასტურებთ, რომ ყველა სამოქალაქო პირი ნებისმიერ დროს დაცული უნდა იყოს საერთაშორისო ჰუმანიტარული სამართლის შესაბამისად.

მოვუწოდებთ „ჰამასს“ დაუყოვნებლივ გაათავისუფლოს ყველა მძევალი ყოველგვარი წინაპირობის გარეშე. ჩვენ ვიმეორებთ გადაუდებელი ჰუმანიტარული დახმარების გაწევის მნიშვნელობას და მზად ვართ გავაგრძელოთ ღაზაში ყველაზე მეტად გაჭირვებული მშვიდობიანი მოსახლეობის მხარდაჭერა პარტნიორებთან კოორდინაციით, რათა არ მოხდეს ასეთი დახმარების ბოროტად გამოყენება ტერორისტული ორგანიზაციების მიერ. მნიშვნელოვანია რეგიონული ესკალაციის თავიდან აცილება“ – აღნიშნულია განცხადებაში.

ისრაელის მთავრობის ინფორმაციით, „ჰამასის“ თავდასხმების შედეგად დაღუპულთა რაოდენობა 1400-მდე გაიზარდა. ინფორმაციას BBC-ი ავრცელებს.

რაც შეეხება ღაზას, პალესტინის ხელისუფლებამ განაცხადა, რომ ღაზას სექტორის წინააღმდეგ ისრაელის მიერ განხორციელებული დაბომბვისას 2300-ზე მეტი ადამიანია დაღუპული.

შეგახსენებთ, ისრაელმა ღაზაზე საპასუხო შეტევა „ჰამასის“ მიერ 7 ოქტომბერს განხორციელებული მოულოდნელი თავდასხმის შემდეგ დაიწყო.

ისრაელის თავდაცვის მინისტრი, იოავ გალანტი აცხადებს, რომ ღაზას სექტორში პალესტინის ტერორისტული დაჯგუფებების წინააღმდეგ ომი სამუდამოდ შეცვლის სიტუაციას ისრაელში.

”ეს ომი არის ომი სინათლისა და სიბნელის შვილებს შორის”, – აღნიშნა მინისტრმა.

მისი თქმით, ისრაელის არმია არ დაასრულებს მისიას, სანამ „ჰამასს“ არ გაანადგურებს.

„ეს არის კულტურა, რომელიც არ ეთანხმება ჩვენს აქ არსებობას, ველურები, მხეცები, რომლებმაც მოკლეს ჩვენი ჯარისკაცები, ჩვენი ბავშვები, ჩვენი მოქალაქეები. ჩვენ მივაღწევთ ყველა გვირაბს, მივაღწევთ „ჰამასის“ ყველა წევრს და არ დავასრულებთ მისიას, სანამ „ჰამასს“ არ გავანადგურებთ“, – განაცხადა ისრაელის თავდაცვის მინისტრმა.

”ეს იქნება ძლიერი ომი, ეს იქნება სასიკვდილო ომი, ეს იქნება ზუსტი ომი და ეს იქნება ომი, რომელიც სამუდამოდ შეცვლის სიტუაციას”, – დასძინა მან.

ისრაელის არმიამ ღაზას სექტორში დაგეგმილი ოპერაცია გადადო, რომელიც შაბათ-კვირას უნდა დაწყებულიყო. ისრაელის არმიის ოფიცრების თქმით, თავდაპირველად დაგეგმილი იყო შეჭრა შაბათ-კვირას, მაგრამ ღრუბლიანობის გამო რამდენიმე დღით გადაიდო. ამის შესახებ უცხოური მედია წერს. 

გამოცემის ცნობით, უამინდობა (ღრუბლიანობა) თვითმფრინავებსა და უპილოტო საფრენ აპარატებს სახმელეთო ძალებისთვის ინტენსიური საცეცხლე მხარდაჭერის გაწევაში ხელს შეუშლის. აღნიშნული ინფორმაცია ამერიკულ გავლენიან გამოცემას ცახალის მაღალჩინოსნებმა მიაწოდეს.

ოფიცრების თქმით, ისრაელის თავდასხმის ძალები ქვეითების გარდა ტანკებს, მესაზღვრეებს და სპეცრაზმს შეიცავენ. სახმელეთო ჯარები დაცულნი იქნებიან საბრძოლო თვითმფრინავებით, ვერტმფრენებით, დრონებითა და არტილერიით, რომლებიც სროლას ახორციელებენ როგორც ხმელეთიდან, ასევე ზღვიდან.

რომის პაპმა ფრანცისკემ ღაზაში ჰუმანიტარული დერეფნების გახსნა და „ჰამასის“ მიერ გატაცებული მძევლების გათავისუფლება მოითხოვა. ამის შესახებ CNN-ი იტყობინება.

ტელეარხის ცნობით, შესაბამისი განცხადება კათოლიკური ეკლესიის ლიდერმა დღეს ვატიკანში, წმინდა პეტრეს მოედანზე ტრადიციული მიმართვის დროს გააკეთა.

„ვფიქრობ ბევრ ადამიანზე, რომელიც იტანჯება, ახალგაზრდებსა და მოხუცებზე და კიდევ ერთხელ გთხოვთ მძევლების გათავისუფლებას. და გთხოვთ, პატივი ეცით ჰუმანიტარულ ვითარებას ღაზაში, გახსენით ჰუმანიტარული დერეფნები და დაეხმარეთ მოსახლეობას“, – განაცხადა პონტიფექსმა.

მისივე თქმით, ის დიდი სინანულით აკვირდება ისრაელსა და პალესტინაში მიმდინარე მოვლენებს.

„გთხოვთ, აღარ იყოს მეტი სისხლისღვრა – არც იქ და არც რომელიმე სხვა ადგილას. ომი ყოველთვის მარცხია“, – განაცხადა ფრანცისკემ.

საუდის არაბეთის მემკვიდრე პრინცმა, მოჰამედ ბინ სალმანმა, აშშ-ის სახელმწიფო მდივანთან, ენტონი ბლინკენთან შეხვედრისას ღაზის სექტორის ბლოკადის მოხსნის აუცილებლობაზე ისაუბრა.

საუდის არაბეთის მედიის ინფორმაციით, მემკვიდრე პრინცმა აშშ-ის სახელმწიფო მდივანს უთხრა, რომ პალესტინელი ხალხისთვის უზრუნველყოფილი უნდა იყოს ლეგიტიმური უფლებები.

„სამეფო უარყოფს მშვიდობიანი მოსახლეობის მიზანში ამოღებას, ინფრასტრუქტურისა და სასიცოცხლო მნიშვნელობის სერვისების განადგურებას, რომლებიც გავლენას ახდენს ყოველდღიურ ცხოვრებაზე“, – განაცხადა მუჰამედ ბინ სალმანმა.

რუსეთის პრეზიდენტი ვლადიმერ პუტინი მომავალ კვირას ჩინეთის ლიდერს სი ძინპინს შეხვდება. პუტინი დაესწრება პეკინში „სარტყელისა და გზის ფორუმს“, რომელიც 17-18 ოქტომბერს გაიმართება.

როგორც სააგნტო „როიტერი“ აღნიშნავს, ეს პუტინის პირველი ვიზიტი იქნება ყოფილი სბაჭოთა კავშირის ქვეყნების გარეთ, მას შემდეგ, რაც მარტში ჰააგის სისხლის სამართლის საერთაშორისო სასამართლომ მისი დაკავების ორდერი გასცა.

გასული წლის თებერვალში, უკრაინაში ფართომასშტაბურ ინტერვენციამდე ვლადიმერ პუტინი პეკინში ვიზიტით იმყოფებოდა, რა დროსაც რუსეთმა და ჩინეთმა „უსაზღვრო პარტნიორობის“ შესახებ განაცხადეს.

ისრაელში, ლიბანთან საზღვარზე დღეს დილით განხორციელებულ სამ სარაკეტო თავდასხმაზე პასუხისმგებლობა დაჯგუფება „ჰეზბოლამ“ აიღო, – ინფორმაციას The Times of Israel-ი ავრცელებს.

შეიარაღებული დაჯგუფების მტკიცებით, მათი სამიზნე ისრაელის ტანკი იყო.

ისრაელის თავდაცვის ძალებში აცხადებენ, რომ „ჰეზბოლას“ პოსტებზე საპასუხო დარტყმებს ახორციელებენ.

შეგახსენებთ, მანამდე ცნობილი გახდა, რომ ჩრდილოეთით მდებარე ქალაქ შტულაზე ლიბანიდან თავდასხმა განხორციელდა, რის შედეგადაც დაიღუპა ერთი და დაშავდა სამი ადამიანი. ისრაელის თავდაცვის ძალების ცნობით, თავდასხმა ტანკსაწინააღმდეგო მართვადი რაკეტით განხორციელდა. ამასთან, ლიბანის ტერიტორიიდან ტანკსაწინააღმდეგო მართვადი რაკეტით კიდევ ერთი დარტყმა ჩრდილოეთ საზღვარზე, სამხედრო პოზიციას მიაყენეს.