ფრაქცია „ქართული ოცნების“ თავმჯდომარის, მამუკა მდინარაძის განცხადებით, სამმა მოსამართლემ, რომელთაც პრეზიდენტის საიმპიჩმენტო წარდგინებაზე განსხვავებული აზრი დააფიქსირეს, საქართველოს პარლამენტის და საკუთარი კომპეტენცია შეგნებულად არ გამიჯნა.

მისივე თქმით, სამი მოსამართლე მსჯელობის დროს საქართველოს პარლამენტის კომპეტენციაში შეიჭრა და იმპიჩმენტის საკითხის მიზანშეწონილობაზე ისაუბრა, რაც მათი საქმე არ არის.

„სამმა მოსამართლემ საქართველოს მთავრობას უთხრა, რომ შესაბამისი უფლებამოსილება თქვენ გეკუთვნითო, მაგრამ არ გეკუთვნითო. ალბათ, გაგახსენდებოდათ ცნობილი ეპიზოდი კინოფილმიდან. მათ ვერ გამიჯნეს, თუ არ გამიჯნეს საქართველოს პარლამენტის და საკუთარი კომპეტენცია, როდესაც ისინი მსჯელობის დროს საქართველოს პარლამენტის კომპეტენციაში შემოიჭრნენ და იმპიჩმენტის საკითხის მიზანშეწონილობაზე ისაუბრეს, რაც მათი საქმე არ არის.

საკონსტიტუციო სასამართლოს უფლებამოსილება არის, დაადგინოს დარღვევის ფაქტი, ხოლო საქართველოს პარლამენტის უფლებამოსილებაა, რომ თუ ფაქტი დადგინდა დარღვევისა, ამის შემდეგ გადაწყვიტოს ამ დარღვევას უნდა მოჰყვეს თუ არა პრეზიდენტის იმპიჩმენტი. ასეთ მარტივ იურიდიულ ჭეშმარიტებაზე რომ გვიწევს მსჯელობა, ეს უკვე არის სირცხვილი, უხერხულია. მე მათ შეურაცხყოფას არ მივაყენებ და არ ვიტყვი, რომ ვერ გამიჯნეს, უფრო არ გამიჯნეს. გუშინ გვარამიამ თქვა, რომ სამი მოსამართლე გვყავსო. ამით უკვე ყველაფერი ნათქვამია,“ – განაცხადა მდინარაძემ.

საქართველოს პრეზიდენტი სალომე ზურაბიშვილი, რომელიც თავის ხალხის მსგავსად სისხლით ხორცამდე ევროპელია, მკაცრად იცავს საქართველოს კონსტიტუციის 78-ე მუხლს, – ამის შესახებ ევროპარლამენტარმა, ვიოლა ფონ კრამონმა ევროპარლამენტში სიტყვით გამოსვლისას განაცხადა.

მისი თქმით, საქართველოს პრეზიდენტი ამ ძალისხმევისთვის ისჯება.

„საქართველოს პრეზიდენტი სალომე ზურაბიშვილი ხუთი თვის წინ აქ მტკიცედ იდგა მისი ქვეყნის ევროპული მომავლის დასაცავად. პრეზიდენტი ზურაბიშვილი აკეთებს იმას, რის გაკეთებაზეც საქართველოს ხელისუფლება უარს ამბობს, აახლოებს თავის ქვეყანას ევროკავშირთან. პრეზიდენტი, რომელიც თავის ხალხის მსგავსად სისხლით ხორცამდე ევროპელია, მკაცრად იცავს საქართველოს კონსტიტუციის 78-ე მუხლს, ვციტირებ – „მიიღოს ყველა ზომა ევროპის კავშირში საქართველოს სრული ინტეგრაციის უზრუნველსაყოფად“. ამ ძალისხმევისთვის ის ახლა ისჯება ოლიგარქისა და მისი ჩინოვნიკების მიერ. ძვირფასო კოლეგებო, განგაშით გამცნობთ, რომ საქართველო, ოდესღაც ევროპული იმედის სხივი, ახლა სწრაფად მიემართება ავტორიტარული, პრო-რუსული მმართველობისკენ. სასამართლო და კანონის უზენაესობა დარღვეულია და ახლა იარაღად არის გამოყენებული იმ ფარსში, რომელსაც იმპიჩმენტს ეძახიან. ჩვენ არ შეგვიძლია და ხელს არ ჩავიქნევთ საქართველოზე, არ დავტოვებთ ქართველების 80%-ზე მეტს მარტოდ ჩრდილოვანი რეჟიმის პირისპირ. საქართველო გახდება ევროპული ოჯახის წევრი“, – განაცხადა ვიოლა ფონ კრამონმა.

დღეს ქვეყანაში გვაქვს მშვიდობა, – ამის შესახებ საქართველოს პრემიერ-მინისტრმა ირაკლი ღარიბაშვილმა ვეტერანთა დღისადმი მიძღვნილი ღონისძიების შემდეგ, ჟურნალისტებთან საუბრისას განაცხადა.

პრემიერის თქმით, მთავარი ყურადღება უნდა იყოს მიმართული ქვეყნის მშვიდობის შენარჩუნებაზე, სტაბილურობის განმტკიცებაზე, ეკონომიკურ განვითარებასა და კეთილდღეობაზე.

„მინდა ვთქვა შემდეგი, რომ დღეს ქვეყანაში გვაქვს მშვიდობა, სტაბილურობა, ხედავთ რა ხდება ირგვლივ მსოფლიოში, ურთულესი მდგომარეობაა, უკრაინა, ახლა ისრაელი, ისრაელში მიმდინარე მოვლენები არის ძალიან შემაწუხებელი და ძალიან, ასე ვთქვათ, რთული გამოწვევა, არა მხოლოდ იმ რეგიონისთვის, არამედ ზოგადად მთელი მსოფლიოსთვის ექნება ამას დიდი გავლენა.
ასე რომ, ჩვენ მთავარი ყურადღება უნდა მივმართოთ ჩვენი ქვეყნის აი ამ მშვიდობის შენარჩუნებაზე, სტაბილურობის განმტკიცებაზე, ეკონომიკურ განვითარებაზე, კეთილდღეობაზე, ეს სჭირდება ჩვენს ხალხს”, – განაცხადა პრემიერმა.

ირაკლი ღარიბაშვილმა ასევე უპასუხა კითხვას, იმპიჩმენტის საკითხი იქონიებს თუ არა რაიმე გავლენას კანდიდატის სტატუსზე.

„ყველაფერი კარგად იქნება. არავითარი გავლენა, რას ნიშნავს გავლენა ექნება ამას ?! ეს არის ჩვენი ქვეყნის ღირსების საკითხი, ჩვენ ვალდებული ვართ, რომ დავიცვათ ჩვენი კონსტიტუცია და ჩვენი კანონი”, – განაცხადა პრემიერ-მინისტრმა.

მთავრობის მეთაურმა ასევე უპასუხა კითხვას, პოზიტიურია თუ არა ეს სიგნალი ბრიუსელისთვის.

„პოზიტიური არის იმ კუთხით და იმ თვალსაზრისით, რომ ჩვენ ვართ მაგალითის მიმცემნი კანონის დაცვის და კონსტიტუციის დაცვის”, – განაცხადა პრემიერმა.

საქართველოს ევროინტეგრაციის ამ მნიშვნელოვან მომენტში ჩვენ გავაძლიერეთ დიპლომატიური ურთიერთობები და საგარეო პოლიტიკის პრაქტიკულად ყველა მიმართულება, რამაც კონკრეტული შედეგები გამოიღო, გაკეთდა საქართველოს პირდაპირ მხარდამჭერი განცხადებები, – ამის შესახებ პარლამენტის ვიცე-სპიკერმა,  არჩილ თალაკვაძემ პლენარულ სხდომაზე განაცხადა.

თალაკვაძემ ისაუბრა ბოლო წლის განმავლობაში განხორციელებულ წარმატებულ საერთაშორისო ვიზიტებსა და შეხვედრებზე.

„ძალიან მნიშვნელოვანია რადიკალური ოპოზიციის რეაქციები, ალბათ მოულოდნელი არ იყო, რომ რადიკალურმა ოპოზიციამ ამ ყველაფერს უპასუხა ბრძოლით. ისინი საქართველოს მოწინააღმდეგეებს, საქართველოს არაკეთილმოსურნე ძალებს და მტრებს კი არ ებრძვიან, მათ ბრძოლა გამოუცხადეს საკუთარ ქვეყანას და ამის მტკიცებულება გამოაქვეყნა ამერიკის მთავრობამ ფარა-ს კანონზე დაყრდნობით, როდესაც ფულს იხდიან საქართველოს წინააღმდეგ და მის საზიანოდ.

მათ ბრძოლა გამოუცხადეს საქართველოს ევროპულ მომავალს, ამის მტკიცებულებებიც ვნახეთ, როცა განცხადებები იყო გაკეთებული ადგილობრივ თუ საერთაშორისო მედიაში, რომ საქართველო არ იმსახურებს კანდიდატის სტატუსს და რომ საქართველომ არ უნდა მიიღოს ევროპაში მხარდაჭერა. მათ გამოუცხადეს ბრძოლა საქართველოს მეგობრებსაც და შემთხვევითი არ არის, რომ უნგრეთის პრემიერ-მინისტრისადმი, რომელიც სტუმრად იყო საქართველოში, მადლობა კი არ გამოხატეს მხარდაჭერისთვის, არამედ მისი დისკრედიტაცია და შეურაცხყოფა დაიწყეს, ცდილობდნენ დაერქვათ მისთვის ავტორიტარი, პრორუსი და ა.შ.

რა უნდა ითქვას, ჯორჯ ორუელის „1984“-ში ხართ, მეგობრებს ეძახით მტრებს, ომს ეძახით მშვიდობას და მონობას ეძახით თავისუფლებას“, – განაცხადა არჩილ თალაკვაძემ.

ამ სამარცხვინო რუსული დავალების მასკარადში მონაწილეობას ჩვენ არ ვაპირებთ – ამ საქმეს ბოლომდე ვერ მიიყვანთ, – ამის შესახებ „ლელოს“ დეპუტატმა, პარლამენტის პლენარულ სხდომაზე განაცხადა.

ოპოზიციონერი დეპუტატის პარლამენტში სიტყვით გამოსვლას შეძახილები მოჰყვა.

„ამ სამარცხვინო რუსული დავალების მასკარადში მონაწილეობას ჩვენ პირადად არ ვაპირებთ, ამიტომ შეკითხვები თქვენთან, რა თქმა უნდა, არ გვექნება, არც საქართველოს პრეზიდენტთან, იმიტომ რომ გასაგებია, რასაც აკეთებთ აქ, თუმცა ბოლომდე ამ საქმეს ვერ მიიყვანთ. როგორც მოგიწიათ რუსული კანონის უკან წაღება ასე…“, – განაცხადა სამადაშვილმა, რა დროსაც დეპუტატს მიკროფონი გაუთიშეს, რადგან, თავმჯდომარის განმარტებით, „პროცედურას არ ეხება“, შემდეგ, კი სალომე სამადაშვილმა კითხვები დააზუსტა.

„მე მაინც ვერ გავიგე, როდის გეგმავთ ამ სამარცხვინო რუსული იმპიჩმენტის პროცედურის პარლამენტში გამართვას, ხვალ თუ ზეგ? დაგვიზუსტეთ და საქართველოს პრეზიდენტს აძლევთ თუ არა უფლებას, სიტყვით გამოვიდეს?“ – მიმართა სამადაშვილმა თავმჯდომარეს.

შალვა პაპუაშვილის განმარტებით, თუ სალომე ზურაბიშვილს სურვილი ექნება, მას სხდომაზე დასწრების საშუალება მიეცემა. ამასთან, პარლამენტის თავმჯდომარე განმარტავს, რომ მისი წინადადებაა, რომ პრეზიდენტის იმპიჩმენტის განხილვა, ხვალ, 12:00 საათზე დაიწყოს.

ქვეყნის, სახელმწიფოს მეთაური სალომე ზურაბიშვილი არის დადასტურებულად კონსტიტუციის დამრღვევი, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებს განუცხადა.

მისი თქმით, ნაცვლად იმისა, რომ პრეზიდენტს მაგალითი მიეცა სხვებისთვის, რომ იგი უნდა ყოფილიყო ყოველთვის ქვეყნისა და კონსტიტუციის დაცავის სადარაჯოზე, ამის ნაცვლად, სალომე ზურაბიშვილმა დემონსტრაციულად, არაერთგზის დაარღვია კონსტიტუცია.

„სასამართლოს გადაწყვეტილებას რაც შეეხება, ეს რა თქმა უნდა, არის სამწუხარო ფაქტი, ვინაიდან სამწუხაროდ, დადასტურდა, რომ ქვეყნის, ჩვენი სახელმწიფოს მეთაური, სალომე ზურაბიშვილი არის დადასტურებულად კონსტიტუციის დამრღვევი. როგორც ამ ქვეყნის პრემიერ-მინისტრს და რიგით მოქალაქეს, ეს მე ნამდვილად არ მიხარია. არ მინდა, ჩემი ქვეყნის პრეზიდენტი იყოს კონსტიტუციის დამრღვევი, ან ნებისმიერი კანონის დამრღვევი. რა თქმა უნდა, ეს არის ძალიან სამწუხარო ფაქტი. იმის მაგივრად, პრეზიდენტს ეჩვენებინა და მაგალითი მიეცა სხვებისთვის, სხვა საჯარო მოხელეებისთვის, თუ შემდგომი პრეზიდენტებისთვის, რომ იგი უნდა ყოფილიყო ყოველთვის ქვეყნის, კანონისა და მთავარი კანონის, კონსტიტუციის დაცავის სადარაჯოზე, ამის ნაცვლად, ქალბატონმა სალომემ უხეშად, დემონსტრაციულად არაერთგზის დაარღვია კონსტიტუცია, რაც არა მხოლოდ ჩვენი, პოლიტიკოსების ნათქვამით და წარმოდგენილი მტკიცებულებებით დადასტურდა, არამედ საკონსტიტუციო სასამართლომ დაადგინა და ეს გადაწყვეტილება არ გადაიხედება.

რაც შეეხება ზოგადად შემდეგ პროცედურას. მოგეხსენებათ, პარლამენტში გაიმართება შესაბამისი პროცედურა. ჩვენ თავიდანვე ვთქვით, მოლოდინი, რომ საჭირო ხმებს მოაგროვებდა უმრავლესობა, არ გვქონია. არც არავითარი დიდი ილუზიები არ ჰქონდა არავის. თავიდანვე ვთქვით, რომ ჩვენ ვიცოდით, რომ არ გვქონდა საკმარისი ხმები, მაგრამ ქვეყნის ხელისუფალნი, მთავრობის წევრები, პარლამენტის წევრები, კანონის შემოქმედნი, კანონმდებლები, რა თქმა უნდა, ჩვენ უნდა ვიყოთ მაგალითის მიმცემები. უნდა შევახსენოთ სალომე ზურაბიშვილს და ყველას, ამ ქვეყანაში დასრულდა დრო, როცა პრეზიდენტს ეგონა, რომ იდგა კანონსა და კონსტიტუციაზე მაღლა. ეს ძალიან სამწუხაროა. ქალბატონი სალომესგან, ალბათ დამეთანხმებით, რომ ჩვენი მოქალაქეების ნაწილს ჰქონდა იმის მოლოდინი, რომ იგი შემოიტანდა ქართულ პოლიტიკაში ევროპულ სტანდარტს. ევროპული სტანდარტი გულისხმობს, რომ ყველა იცავს კანონს და კონსტიტუციას. ჩვენ, სანაცვლოდ ამის სრულად საპირისპირო სურათი მივიღეთ, როდესაც ქალბატონმა სალომემ გვითხრა, რომ ის არ ცნობს კონსტიტუციას. ეს არის სამარცხვინო ფაქტი. მე კომენტარს არ გავაკეთებ მის გამონათქვამებზე“, – განაცხადა ირაკლი ღარიბაშვილმა.

საკონსტიტუციო სასამართლომ საქართველოს პრეზიდენტის მიერ კონსტიტუციის დარღვევა გუშინ დაადგინა.

[სალომე ზურაბიშვილს] არცერთი არგუმენტი არ უთქვამს, თუ რა არ მოეწონა კონკრეტულად სასამართლოს გადაწყვეტილებაში. უხეში ტერმინები გამოიყენა – „სირცხვილია“ და ასე შემდეგ. უფრო მეტიც, დეპუტატების მიმართ, ამ ქალბატონმა პირდაპირ იუზრდელა,- ამის შესახებ „ქართული ოცნების“ თავმჯდომარემ, ირაკლი კობახიძემ პლენარულ სხდომაზე განაცხადა, რითაც პრეზიდენტის გუშინდელ განცხადებებს გამოეხმაურა საკონსტიტუციო სასამართლოს გადაწყვეტილებასთან დაკავშირებით.

მისივე თქმით, არ შეიძლება საქართველოს პრეზიდენტი, რომელიც კონსტიტუციის მიხედვით ზეპარტიული უნდა იყოს და ნეიტრალური, უზრდელობდეს.

“არაფრის იმედი აღარ გვაქვს სალომე ზურაბიშვილისგან, აქ შეიძლება რაღაც ნაკლები ეკადრა, მაგრამ გამოვიდა და ყოველგვარი არგუმენტების გარეშე პირდაპირ თავს დაესხა საქართველოს საკონსტიტუციო სასამართლოს. არცერთი არგუმენტი არ უთქვამს, თუ რა არ მოეწონა კონკრეტულად გადაწყვეტილებაში, უხეში ტერმინები გამოიყენა „სირცხვილია“ და ასე შემდეგ. უფრო მეტიც, დეპუტატების მიმართ, ამ ქალბატონმა პირდაპირ იუზრდელა. ის არის ჯერ კიდევ საქართველოს პრეზიდენტად წოდებული თანამდებობის პირი და ის უზრდელობს. როგორ შეიძლება საქართველოს პრეზიდენტი, რომელიც კონსტიტუციის მიხედვით ზეპარტიული უნდა იყოს და ნეიტრალური, უზრდელობდეს. ესეც მისი პრობლემაა და საქმე. დადასტურდა, რომ ზურაბიშვილი „ნაცმოძრაობის“ იმედით არღვევდა კონსტიტუციას, რადიკალურ ოპოზიციას და ზურაბიშვილს სრული კოორდინაცია აქვთ“,- აღნიშნა კობახიძემ.

ამასთან, კობახიძემ განმარტა, რომ ისევე, როგორც „ნაციონალურ მოძრაობას“, პრეზიდენტსაც აღიზიანებს ჩვენი ქვეყნის ყოველგვარი წარმატება.

„ის ბოლომდე მიყვება იმ დღის წესრიგს, რომელსაც კოლექტიური „ნაცმოძრაობა“ მიყვება. ამ ყველაფრის გათვალისწინებთ, შეიძლება ითქვას, რომ სალომე ზურაბიშვილი მხოლოდ ფორმალურად რჩება საქართველოს პრეზიდენტად შემდეგი 1 წელი. რომც ჩავარდეს იმპიჩმენტი, ის დარჩება არა საქართველოს, არამედ „ნაციონალური მოძრაობის“ პრეზიდენტად. „წარმატებები“ მას ამ საქმეში“, – აღნიშნა კობახიძემ.

როდესაც რამდენიმე დეპუტატი და მათ შორის სამოქალაქო სექტორის წარმომადგენელი ვიყავით შეხვედრაზე პრეზიდენტთან, მაშინ იყო დისკუსია, წარმოდგენილიყო თუ არა პრეზიდენტი პარლამენტში, ჩემი პოზიცია ყოველთვის იყო ის, რომ მისი მოსვლა და აქ სიტყვით გამოსვლა არის ძალიან მნიშვნელოვანი და აუცილებელი, – ამის შესახებ ოპოზიციონერმა დეპუტატმა, ხატია დეკანოიძემ განაცხადა.

დეკანოიძის თქმით, ყველა ოპოზიციონერს, ვინც ფიქრობს, რომ შესაძლებელია ხმა მისცეს პრეზიდენტის იმპიჩმენტს, ეს იქნება ხმის მიცემა საქართველოს ევროატლანტიკური კურსის წინააღმდეგ.

„პრეზიდენტი თუ გრძნობს თავს კომფორტულად ცარიელ დარბაზში, ქართულ ოცნებასთან“ მარტო, რა თქმა უნდა, ჩვენ მის ამ თხოვნას გავითვალისწინებთ. უფრო მეტსაც გეტყვით, ასეთი საუბარი ჩვენ შორის შედგა რამდენიმე კვირის წინ და მაშინაც იყო მისი მოსაზრება, რომ მართლაც მარტო „ქართულ ოცნებასთან“ დარჩენა ალბათ უკეთესი იყო და უკეთესად გამოავლენდა იმ ძალიან მძიმე პოლიტიკურ რეალობას, რომელშიც არის საქართველო. პრეზიდენტი თუ თვლის, რომ მისთვის უკეთესი იქნება მარტო,  პოლიტიკურად, ადამიანურად, მე გავითვალისწინებ მის ამ მოწოდებას და იმას, რომ არც განხილვაზე და არც კენჭისყრაზე ჩვენ არ ვიქნებით. რაც შეეხება ზოგადად პროცესს, მე ისიც არ ვიცი, დადგება თუ არა ეს საკითხი განხილვაზე, ვინაიდან უმრავლესობა ფიქრობდა, რომ მხოლოდ კენჭისყრაზე უნდა გამოტანილიყო. საქართველოს პრეზიდენტის დასწრება საპარლამენტო სესიაზე არის ძალიან მნიშვნელოვანი, განხილვაში მნიშვნელოვანია მონაწილეობა მისი და ძალიან მნიშვნელოვანია, რომ მას მიეცეს საშუალება, მიმართოს საქართველოს საზოგადოებას. გარდა ამისა, ყველა ოპოზიციონერს, ვინც ფიქრობს, რომ შესაძლებელია ხმა მისცეს პრეზიდენტის იმპიჩმენტს, უნდა ესმოდეს და უნდა გავაფრთხილოთ, რომ ეს იქნება ხმის მიცემა საქართველოს ევროატლანტიკური კურსის წინააღმდეგ და ეს იქნება განადგურება პერსონალურად ამ ოპოზიციონერების იმიჯის, პოლიტიკური მომავლის ისევე, როგორც ქვეყნის“, – განაცხადა დეკანოიძემ.