„ერთიანი ნაციონალური მოძრაობის“ თავმჯდომარე ლევან ხაბეიშვილი „ტვ პირველის“ ეთერში სტუმრობისას აცხადებს, რომ პარტიაში ნიკა მელიას პარტიიდან გარიცხვის შესახებ საუბარი არ არის.

ხაბეიშვილი, ასევე, აცხადებს, რომ მელიასთან მოლაპარაკებები მიმდინარეობს და დასძენს, რომ მომლაპარაკებლები გიგი უგულავა და კობა ნაყოფიაა.

„ნიკა მელია დაშორდა და გაემიჯნა პარტიას. დღესაც მოსალაპარაკებელ მაგიდაზე უდევს კონკრეტული შეთავაზებები. ამ მოლაპარაკებებში ჩართული იყო და არის გიგი უგულავა და კობა ნაყოფია. ეს ადამიანები არიან მთავარი მედიატორები, რომ მოხდეს ნიკა მელიასთან თანამშრომლობის აწყობა. ჩემი მხრიდან არ არსებობს ნაბიჯი, რომელიც არ გადამიდგამს, მათ შორის, თუ საჭიროა პირად შეხვედრასთან დაკავშირებითაც. მას შეთავაზებები ჰქონდა. უარები მისი მხრიდან და მერე მჭახე განცხადებებიც მოგვისმენია მისი მხრიდან.

არის მოლაპარაკება, არიან ადამიანები, ვინც ჩართულები არიან, მზად ვართ, გახსნილები ვართ, მნიშვნელოვანია ჩვენთვის ერთობა, ოღონდ ეს ვერ გაგრძელდება უსასრულოდ, ამას კონკრეტული დასასრული ექნება, შესაძლოა, ნიკამ დასვას ეს წერტილი“, – აცხადებს „ერთიანი ნაციონალური მოძრაობის“ თავმჯდომარე.

საქართველოში საფრანგეთის საელჩო პრეზიდენტ სალომე ზურაბიშვილის იმპიჩმენტის პროცედურის საკითხთან დაკავშირებით განცხადებას ავრცელებს.

როგორც განცხადებაშია აღნიშნული, საფრანგეთი ელოდება საქართველოს მთავრობისგან, რომ ის მოახდენს პასუხისმგებლობის დემონსტრირებას და თავისი ძალისხმევის კონცენტრირებას ყველა რეფორმის განხორციელებაზე, რომელიც აუცილებელია დემოკრატიისა და კანონის უზენაესობის განმტკიცებისთვის.

„საფრანგეთმა ცნობად მიიღო საქართველოს საკონსტიტუციო სასამართლოს გადაწყვეტილება, მთავრობის მხარდაჭერით, საპარლამენტო უმრავლესობის მიერ საქართველოს პრეზიდენტის, ქალბატონი სალომე ზურაბიშვილის წინააღმდეგ დაწყებული იმპიჩმენტის პროცედურის დადასტურების შესახებ.

ქვეყნის მომავლისთვის გადამწყვეტ მომენტში, როცა ევროპული ღირებულებების ირგვლივ ერთიანობა და თანმიმდევრულობა უნდა ჭარბობდეს, საფრანგეთი ელოდება საქართველოს მთავრობისგან, რომ ის მოახდენს პასუხისმგებლობის დემონსტრირებას და თავისი ძალისხმევის კონცენტრირებას ყველა რეფორმის განხორციელებაზე, რომელიც აუცილებელია დემოკრატიისა და კანონის უზენაესობის განმტკიცებისთვის, რაც დაკავშირებულია, კერძოდ, ევროკომისიის მიერ, საქართველოს ევროკავშირში გაწევრების განაცხადის შესახებ 2022 წლის ივნისის დასკვნაში განსაზღვრულ 12 პრიორიტეტთან“, – აღნიშნულია განცხადებაში.

ისრაელი იბრძვის საერთაშორისო ჰუმანიტარული სამართლის დაცვით და ყველაფერს აკეთებს იმისთვის, რომ თავიდან აიცილოს მშვიდობიანი მოსახლეობის დაღუპვა, თუმცა სამწუხაროდ ომს ახლავს მსხვერპლი, – ამის შესახებ საქართველოში ისრაელის ელჩმა, ჰადას მეიცადმა დღეს გამართულ პრესკონფერენციაზე განაცხადა.

მისი თქმით, ახლა მნიშვნელოვანია მსოფლიო ლიდერების მხრიდან პოლიტიკური მხარდაჭერა.

„სისხლიანი შაბათიდან მე-11 დღე გავიდა. ჰამასის ტერორისტული ჯგუფის მიერ ჩადენილი საშინელებები ყოველდღიურად უფრო ცხადდება. მათ მოკლეს და მძევლად აიყვანეს ბავშვები, ქალები და მოხუცებულები. ეს იყო სისხლისღვრა. ჰამასი დაესხა თავს მშვიდობიან დასახლებებს. მართალია ისრაელის თავდაცვის ძალები ძლიერია, მაგრამ მნიშვნელოვანია მსოფლიო ლიდერების მხრიდან პოლიტიკური მხარდაჭერა. საქართველოს ხელისუფლებამ ისრაელს პირველივე დღიდან მტკიცე მხარდაჭერა გამოუცხადა. ჩვენ გვახსოვს როგორ გაერთიანდა აისისის ტერორიზმის წინააღმდეგ მთელი მსოფლიო. ჰამასის ჩადენილსაც უნდა დაერქვას თავისი სახელი. ეს იყო სისხლიანი ტერორიზმი და ამას ვერ ექნება ვერანაირი კონტექსტი. ახლაც უნდა გაერთიანდეს მსოფლიო ტერორიზმის წინააღმდეგ. ისრაელი ჰამასის წინააღმდეგ იბრძვის, ღაზის სექტორში მყოფი ხალხი ჩვენი მტერი არ არის, მტერია ჰამასი. ისრაელი იბრძვის საერთაშორისო ჰუმანიტარული სამართლის დაცვით და ყველაფერს აკეთებს იმისთვის, რომ თავიდან აიცილოს მშვიდობიანი მოსახლეობის დაღუპვა, თუმცა სამწუხაროდ ომს ახლავს მსხვერპლი“, – განაცხადა მეიცადმა.

ყველას კარგად გვახსოვს რომ ცალ-ცალი „კალოშით“ მოვიდა ბატონი კეზერაშვილი და ახლა „მისტერ ოფშორი“ გახდა. ასეთი სწრაფი კარიერული ზრდა შესაშურია. ჯუანშერ ბურჭულაძე მისგან განსხვავებით, რითაც მოვიდა, იმით წავა. ამის გარანტია საზოგადოებას შემიძლია ნამდვილად მივცე, – ამის შესახებ დიასპორისა და კავკასიის საკითხთა კომიტეტის თავმჯდომარე ბექა ოდიშარიამ პარლამენტის პლენარულ სხდომაზე განაცხადა, სადაც „მინისტრის საათის“ ფორმატში თავდაცვის მინისტრს ჯუანშერ ბურჭულაძეს მოუსმინეს.

ბექა ოდიშარიამ თავის გამოსვლაში თავდაცვის მიმართულებით წინა და ახლანდელი მთავრობის მუშაობა შეადარა ერთმანეთს და აღნიშნა, რომ ჯარის მიმართ დამოკიდებულება საგრძნობლად გაუმჯობესებულია.

მისივე თქმით, ქართული ჯარი ნატო-ს სტანდარტებს სრულად აკმაყოფილებს.

„თუ გაგიგიათ ერთი საჩივარი ნატო-ს მაღალჩინოსნებისგან ქართული ჯარის მიმართ? ან კორუფციაში თუ გაგიგიათ დაედოთ ბრალი? ნატო-ს მაღალჩინოსნებისგან მხოლოდ კომპლიმენტები ისმის“, – აღნიშნა ბექა ოდიშარიამ.

მან ომისა და სამხედრო ძალების ვეტერანების სოციალური დახმარების პროგრამაზეც გაამახვილა ყურადღება. მისი თქმით, ვეტერანებს სხვადასხვა მიმართულებით სოციალური ბენეფიტები აქვთ.

ბექა ოდიშარიამ მადლობა გადაუხადა და წარმატებები უსურვა თავდაცვის მინისტრს და სამინისტროს და აღნიშნა, რომ ხელისუფლების პოლიტიკა ჯარის მიმართულებით არის სწორი.

„თქვენ ხართ კერპთაყვანისმცემლების პარტია“ – ასე მიმართა საქართველოს თავდაცვის მინისტრმა ჯუანშერ ბურჭულაძემ პარლამენტის წევრს ანა წითლიძეს „მინისტრის საათის“ ფარგლებში მიმდინარე საპარლამენტო პლენარულ სხდომაზე.

„რა ვუპასუხო აბა, ქალბატონ ანას, შეურაცხყოფის იქით ვერ განვითარდა ეს ხალხი. ქვეყანა განვითარდა, საზოგადოებაც იცვლება, ეს ხალხი ვერ განვითარდა, ჩარჩნენ იგივეში, შეურაცხყოფა, მონები… რა შუაშია მონები? მონები არიან თვითონ! კერპთაყვანისმცემლები, ოკულტისტები არის სწორედ ეს ხალხი. ერთი კულტი ჰყავთ, კულტი ჰქვია, აბა, ამას სხვა რა ჰქვია?

სალომე ზურაბიშვილი საუბრობდა და შეურაცხყოფას აყენებდა საკონსტიტუციო სასამართლოს (ამხელა რანგის ინსტიტუტს) დეპუტატებს და ამ დროს, თან ითხოვდა პატივისცემას მის მიმართ, პრეზიდენტის ინსტიტუტის მიმართ. წარმოიდგინეთ, გუშინ პრეზიდენტის როგორ პარადოქსულ სიტუაციაში იყო, – ამის შესახებ, „ხალხის ძალის“ წევრმა თამარ ჩიბურდანიძემ გადაცემაში „პოლიტიკური პოსტი“ განაცხადა.

როგორც ჩიბურდანიძე აღნიშნავს, არავის არ უნდა დაავიწყდეს, სალომე ზურაბიშვილი ის პრეზიდენტია, რომელსაც ქვეყნის უმაღლესმა სასამართლომ დაუდგინა, რომ მან დაარღვია კონსტიტუცია.

„იცით რა იყო პარადოქსული? სალომე ზურაბიშვილი საუბრობდა და შეურაცხყოფას აყენებდა საკონსტიტუციო სასამართლოს (ამხელა რანგის ინსტიტუტს) დეპუტატებს და ამ დროს, თან ითხოვდა პატივისცემას მისი მიმართ, პრეზიდენტის ინსტიტუტის მიმართ. წარმოიდგინეთ, გუშინ პრეზიდენტის როგორ პარადოქსულ სიტუაციაში იყო. ძალიან დიდი ხანია რაც იგი საქართველოში ჩამოვიდა, მას შემდეგ ვუყურებ, ვიცნობ კიდეც და სიმართლე გითხრათ, მე ასეთი აღელვებული და განერვიულებული პრეზიდენტი არ მინახავს, ის იყო აბსოლუტურად წყობიდან გამოსული, რაც ბუნებრივია.

მაგრამ მე მაქვს კითხვა – არ ელოდა სასამართლოს ამ გადაწყვეტილებას? რა იყო მოულოდნელი ამ ვერდიქტში? როდესაც ვუსმენდით და ვუყურებდით ყველანი საკონსტიტუციო სასამართლოს სხდომებს, რომელიც საჯარო და ღია იყო ყველასთვის, პირველკურსელებისათვისაც მარტივად გასაგები იყო, ის რასაც იქ ამბობდნენ. თავად პრეზიდენტის წარმომადგენლებმა – ჩუგოშვილმა და კოპალეიშვილმა, თავიანთი გამოსვლებით დაადანაშაულეს პრეზიდენტი. მათი გადმოცემით, რასაც ისინი ჰყვებოდნენ და რა ფაქტებიც მოჰყავდათ, პირველ რიგში, თავად გამოუტანეს ვერდიქტი პრეზიდენტს და თავად თქვეს, რომ ფაქტობრივად, პრეზიდენტმა დაარღვია კონსტიტუცია.

სასამართლოს ვერდიქტამდე გამოიტანეს მათ განაჩენი, თავიანთი წამგზავნელისგან, ეს იყო ყველაზე სასაცილო იმ პროცესებში.

ჩემთვის, როგორც ამ ქვეყნის მოქალაქისთვის, იცით რა იყო ყველაზე მნიშვნელოვანი? დამოუკიდებელი საქართველოს ისტორიაში მე მაგალითად, არ მახსოვს, საკონსტიტუციო სასამართლოს ფუნქცია ოდესმე ასეთი მნიშვნელოვანი ყოფილიყო, თავისი სათქმელი ეთქვა, რომ განსაკუთრებული გადაწყვეტილება მიეღო და დაგვენახა, გარდა იმისა, რაც ფურცელზე წერია, რომ ეს არის კონსტიტუციის დამცველი და ყველაზე მაღლა მდგომი სასამართლო. პირველად ვნახეთ, რომ საკონსტიტუციო სასამართლოს თურმე ჰქონია ფუნქცია და მან სახელმწიფო ინტერესებიდან გამომდინარე, კონსტიტუციის დარღვევა არ აპატია თვით კონსტიტუციის დამცველს, კონსტიტუციით ყველაზე მაღალ პირს – პრეზიდენტს და გამოუტანა დადანაშაულების ვერდიქტი.

რა მოხდება ხვალ პარლამენტში? ეყოფათ თუ არა ხმები, დარჩება თუ არა სალომე ზურაბიშვილი პრეზიდენტად, ეს უკვე მეორეხარისხოვანია. მე მაგალითად, მის ადგილზე რომ ვიყო, ძალიან შემრცხვებოდა. თუმცა გავანებოთ თავის სალომე ზურაბიშვილს და შიდა პოლიტიკურ სპექტრს, რომელსაც ნამდვილად არ აქვს თავმოყვარეობა (ამ ოპოზიციის დიდ ნაწილზე ვსაუბრობ და არა ყველაზე). მე მაინტერესებს, საერთაშორისო ორგანიზაციები, უცხოელი დიპლომატები, საერთაშორისო ეს პოლიტიკური ლიდერშიპი, რომელთა დიდი ნაწილი ოპოზიციის ლობისტები არიან, რომელი გაბედავს, რომელს ეყოფა ვაჟკაცობა და ბრალდებულ პრეზიდენტთან ისევ დაიწყებენ პოლიტიკურ ურთიერთობას.

რა თქმა უნდა, მათ ექნებათ მიზეზი და იტყვიან, რომ ის პრეზიდენტია, მას იმპიჩმენტი ვერ მოუწყვეს (თუკი ხვალ ხმები არ ეყოთ პარლამენტში) მაგრამ ეს ის პრეზიდენტია, რომელსაც ქვეყნის უმაღლესმა სასამართლომ დაუდგინა, რომ მან დაარღვია კონსტიტუცია. სხვა რა დანაშაული შეიძლება ჩაიდინოს პრეზიდენტმა? კაცს ხომ არ მოკლავდა? ყველაზე დიდი დანაშაული, რაც შეიძლებოდა ჩაედინა, ჩაიდინა – რაზედაც ფიცი დადო, ის დაარღვია“, – განაცხადა ჩიბურდანიძემ.