ნიკა მელია უთავმოყვარეო კაცია, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

როგორც ირაკლი კობახიძემ აღნიშნა, ნიკა მელია ფაქტობრივად გაგდებულია პარტიიდან და ჯიუტად არ ტოვებს „ნაციონალურ მოძრაობას“.

„უთავმოყვარეო კაცია, კიდევ ერთხელ ვიტყვი. ფაქტობრივად გაგდებულია პარტიიდან და მაინც ჯიუტად არ ტოვებს „ნაციონალურ მოძრაობას“. ხაბეიშვილთან რომ წააგებ არჩევნებს და მერე ისევ იმ პარტიაში დარჩები, რა თავმოყვარეობაზე არის საუბარი.  არასერიოზული კაცია და სერიოზული კომენტარები მასზე ვერ გაკეთდება“, – განაცხადა კობახიძემ.

პარტია „ქართული ოცნების“ თავმჯდომარის ირაკლი კობახიძის განცხადებით, სალომე ზურაბიშვილი მმართველი გუნდისთვის უკვე მხოლოდ ფორმალურად არის საქართველოს პრეზიდენტი.

„შესაბამისი კანონდმებლობის, რაღაც პროტოკოლის ფარგლებში, რა თქმა უნდა, შეიძლება, გარკვეულ ღონისძიებებში მიიღოს მონაწილეობა, მაგრამ სალომე ზურაბიშვილი რჩება ფორმალურ პრეზიდენტად და სინამდვილეში, ჩვენთვის ის იქნება „ნაცმოძრაობის“ პრეზიდენტი“, – განაცხადა ირაკლი კობახიძემ.

რაც შეეხება კითხვას, თუ შეიძლება დაიწყოს გამოძიება სამომავლოდ კონსტიტუციის დარღვევასთან დაკავშირებით, კობახიძის თქმით, უმჯობესია, ამ თემასთან დაკავშირებით სისხლის სამართლის სპეციალისტებმა ისაუბრონ.

„ვერ შევალ დეტალებში. თეორიულად შეიძლება, მე არ ვარ სისხლის სამართლის სპეციალისტი და სჯობს, სისხლის სამართლის სპეციალისტებმა ისაუბრონ ამ თემასთან დაკავშირებით. შეიძლება, მქონდეს ზოგადი დასკვნები, მაგრამ ჯობია, სისხლის სამართლის სპეციალისტებმა განმარტონ ეს ყველაფერი. აქედან გამომდინარე, ამაზე საუბარი ნაადრევია. რა თქმა უნდა, არ გამოვრიცხავ, რომ სალომე ზურაბიშვილმა შეიძლება, მომავალშიც უხეშად დაარღვიოს საქართველოს კონსტიტუცია. მას აქვს ასეთი დავალება, რომ სცადოს ქვეყნის გაყვანა კონსტიტუციური ჩარჩოებიდან, რაც, ბუნებრივია, ჩვენი მხრიდან არ იქნება დაშვებული. ნებისმიერ ასეთ ქმედებას ექნება სათანადო რეაგირება“, – აღნიშნა ირაკლი კობახიძემ.

დღეიდან, შემდეგი ერთი წლის განმავლობაში სალომე ზურაბიშვილი მხოლოდ ფორმალურად იქნება საქართველოს პრეზიდენტი, ის იქნება არა საქართველოს, არამედ „ნაცმოძრაობის“ პრეზიდენტი, – ამის შესახებ პარტია „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა.

მისივე თქმით, ხალხის მიერ არჩეულმა პარლამენტის წევრთა უმრავლესობამ დღეს ოფიციალურად დაადასტურა, რომ სალომე ზურაბიშვილს აღარ მიიჩნევს პრეზიდენტობის ღირსად.

„კიდევ ერთხელ გავიმეორებ, რაც ვთქვი სხდომათა დარბაზში. იმპიჩმენტის პროცედურას ჰქონდა ძალიან მნიშვნელოვანი შედეგი. პირველი, დადგინდა საქართველოს პრეზიდენტის მიერ კონსტიტუციის უხეში, მრავალჯერადი, მძიმე დარღვევა, რასაც ექნება სერიოზული, პრევენციული შედეგი და მეორე, კიდევ ერთხელ ვნახეთ იმ ალიანსის ლუსტრაცია, რომელიც ჩამოყალიბებულია სალომე ზურაბიშვილსა და დანარჩენ რადიკალურ ოპოზიციას შორის. რა თქმა უნდა, ეს ორივე შედეგი იყო ძალიან მნიშვნელოვანი. ხალხის მიერ არჩეულმა პარლამენტის წევრთა უმრავლესობამ დღეს ოფიციალურად დაადასტურა, რომ სალომე ზურაბიშვილს აღარ მიიჩნევს პრეზიდენტობის ღირსად. შესაბამისად, დღეიდან შემდეგი ერთი წლის განმავლობაში სალომე ზურაბიშვილი მხოლოდ ფორმალურად იქნება საქართველოს პრეზიდენტი. ის იქნება არა საქართველოს, არამედ „ნაცმოძრაობის“ პრეზიდენტი.

იცით, რომ სალომე ზურაბიშვილი და რადიკალური ოპოზიცია წინასწარ შეთანხმდნენ ე.წ. კარწინკაზე, როგორც მან უწოდა. რაღაც ძლიერი სურათი ერთად უნდა შეექმნათ. სინამდვილეში, ვერავითარი სურათი, ბუნებრივია, ამით ვერ შეიქმნა. ეს სურათი, რაც იხილა საზოგადოებამ სხდომათა დარბაზში, არის იმ ალიანსის ლუსტრაცია, რომელიც ჩამოყალიბებულია სალომე ზურაბიშვილსა და დანარჩენ რადიკალურ ოპოზიციას შორის. ეს იყო მიზეზი, რატომაც ის ადამიანები, რომლებიც თავის დროზე სალომე ზურაბიშვილს უწოდებდნენ აგენტს, ჯაშუშს და ათას უბედურებას, დღეს მხარს უჭერენ მის მიერ თანამდებობის შენარჩუნებას, რატომ?! იმიტომ, რომ ისინი არიან ალიანსში ერთმანეთთან“, – აღნიშნა კობახიძემ.

საქართველოს პარლამენტის პლენარულ სხდომაზე პრეზიდენტის იმპიჩმენტის საკითხი ჩავარდა. კენჭისყრაზე პრეზიდენტის გადაყენებისთვის საჭირო ხმები ვერ მოგროვდა. სალომე ზურაბიშვილის თანამდებობიდან გადაყენებას 86-მა დეპუტატმა მისცა ხმა, ხოლო ერთი წინააღმდეგ წავიდა. კენჭისყრა ფარული იყო. პრეზიდენტის იმპიჩმენტისთვის პარლამენტის სრული შემადგენლობის ორი მესამედის, 100 დეპუტატის ხმა იყო საჭირო. რეგისტრაცია გაიარა 90-მა დეპუტატმა.

პარლამენტის პირველი ვიცე-სპიკერის, გია ვოლსკის განცხადებით, ოპოზიცია ქვეყანაში დესტაბილიზაციის შექმნისთვის ემზადება.

როგორც მან, პარლამენტის პლენარულ სხდომაზე სიტყვით გამოსვლისას აღნიშნა, ეს არის გუნდი, რომელიც გაერთიანებულია შეთქმულებაში საქართველოს წინააღმდეგ.

“ჩვენ უნდა ვიფიქროთ მსოფლიოს მშვიდობიან არქიტექტურაზე და არა იმაზე, რაც ახლა ხდება. ცეცხლის ალია ჩვენს გარშემო და ეს ოდესმე უნდა დასრულდეს. ჩვენი რესურსით ვერ ჩავერევით, გავლენას ვერ მოვახდენთ ამ სიტუაციაზე, რომ რამე შეიცვალოს რადიკალურად და გადარჩენა გვმართებს.

რისთვის იბრძვიან, რას ჭიდაობენ?! რაც იყო გაჟღერებული არაერთხელ დღეს კიდევ აქტუალური გახდა – ემზადებიან იმისათვის, რათა ქვეყანაში დესტაბილიზაცია შექმნან. რა სუს-ს აკრიტიკებთ აქ, რატომ?! იმიტომ, რომ მოიპოვა ზუსტი მასალები იმისა, თუ როგორ ამზადებენ ახალგაზრდებს იმ უბედურებისთვის, რაშიც უნდა გახვიონ ჩვენი ქვეყანა?!. რომელ სიტყვაში შეიძლება შემედავოთ ამ წუთში და რატომ შეიძლება საქართველოს და საქართველოს ხელისუფლებას უწოდო პრორუსული და თქვენ უმრავლესობა, რომელსაც გასვრილი გაქვთ ხელი ადამიანების სისხლში, ეს შავი ლაქა ვერ მოგიშორებიათ და იმის მაგივრად, რომ გაემიჯნოთ ამ დანაშაულს პირიქით, ერთი სული აქვთ მოხვდნენ კოლექტიურად ჩამოყალიბებულ „ნაცმოძრაობის“ რევოლუციურ, თუ საქართველოს წინააღმდეგ შეთქმულთა გუნდში.

რასაკვირველია გაჭირვებაა საქართველოში, რასაკვირველია არის უმუშევრობა, მაგრამ შეხედეთ სიტუაციას, ტენდენციები შეაფასეთ. რამ გაგხეთქათ გულზე, რომ მთლიანი შიდა პროდუქტი უკვე გაორმაგდება იმასთან შედარებით, რაც გვქონდა ჩვენ წინაპანდემიურ პერიოდში.

რაზე ლაპარაკობთ საერთოდ, რა მოიგონეთ. არა, არც ერთს არ აკლია ჭკუა და გონება, ეს შემიძლია ზუსტად ვთქვა და ძალიან ცოტა მოიძებნება ადამიანია, ვინც ამის საპირისპიროს იტყვის ოღონდ გულწრფელად. ეს არის მზადება საქართველოს დესტაბილიზაციისათვის, ეს არის გუნდი, რომელიც გაერთიანებულია შეთქმულებაში საქართველოს წინააღმდეგ სხვა ახსნა იმას, რაც ჩვენ დღეს ვიხილეთ ჩვენი ოპონენტების მხრიდან, არ აქვს“, – განაცხადა ვოლსკიმ.

რუსეთ-უკრაინის ომის დაწყებიდან რამდენიმე დღის შემდეგ სალომე ზურაბიშვილი შეგხვდა მე და შალვა პაპუაშვილს და გვითხრა – აგერ ზელენსკი მსოფლიო გმირი გახდა და თქვენ რას აკეთებთო, აი, რა იყო სალომე ზურაბიშვილის დამოკიდებულება, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ პარლამენტის სხდომაზე განაცხადა, სადა პრეზიდენტის იმპიჩმენტის საკითხს განიხილავენ.

როგორც ირაკლი კობახიძემ აღნიშნა, იქიდან მოყოლებული სალომე ზურაბიშვილი არის იქ, სადაც კოლექტიური „ნაცმოძრაობა“.

„მინდა, გავიხსენო, შალვა პაპუაშვილთან ერთად ვიყავი სტუმრად სალომე ზურაბიშვილთან, თავად ითხოვა შეხვედრა, ეს იყო ომის დაწებიდან რამდენიმე დღის შემდეგ, ალბათ 27-28 თებერვალი იქნებოდა, რუსეთ-უკრაინის ომი იყო რამდენიმე დღის დაწყებული. შეხვედრაზე ასე დაიწყო, რა გინდათო, ზრდილობა არც პირადი შეხვედრების დროს ახასიათებს ქალბატონ სალომეს. ჩვენ ხუმრობით ვუპასუხეთ, თქვენ რა გინდათ, თქვენ გვთხოვეთ შეხვედრა – თქო. მისი შემდეგი წინადადება იყო გამაოგნებელი – აგერ ზელენსკი მსოფლიო გმირი გახდა და თქვენ რას აკეთებთო, აი, რა იყო სალომე ზურაბიშვილის დამოკიდებულება, როდესაც ჩვენ მას ვუკავშირებთ კონკრეტულ ძალებს ეს ხომ შემთხვევით არ არის? იქიდან მოყოლებული სალომე ზურაბიშვილი არის იქ, სადაც კოლექტიური „ნაცმოძრაობა“. პირდაპირი მოწოდება საითკენ? ამაზე თქვენ იმსჯელეთ. მერე როგორ გაგრძელდა ჩვენი საუბარი, აქ დეტალებში აღარ შევალ. მაგრამ თქვენ შეგიძლიათ, იმსჯელოთ, საითკენ ცდილობდა ჩვენი ნაბიჯების მიმართვას სალომე ზურაბიშვილი. თქვენ ერთ წამით წარმოიდგინეთ, ის რომ ყოფილი არა პრეზიდენტი, არამედ პრემიერ-მინისტრი, მის ხელში რომ ყოფილიყო საშინაო და საგარეო პოლიტიკის განხორციელება იმ დღეს, ეს იქნებოდა ბავშვი ასანთით ხელში“, – განაცხადა კობახიძემ.

საქართველოს პარლამენტის პლენარულ სხდომაზე პრეზიდენტ სალომე ზურაბიშვილის იმპიჩმენტის საკითხს უყარეს კენჭი.

პრეზიდენტის იმპიჩმენტის საკითხი პარლამენტში ჩავარდა, რადგან კენჭისყრაზე პრეზიდენტის გადაყენებისთვის საჭირო ხმები ვერ მოგროვდა.

სალომე ზურაბიშვილის თანამდებობიდან გადაყენებას 86-მა დეპუტატმა მისცა ხმა, ხოლო ერთი წინააღმდეგ წავიდა. კენჭისყრა ფარული იყო. პრეზიდენტის იმპიჩმენტისთვის პარლამენტის სრული შემადგენლობის ორი მესამედის, 100 დეპუტატის ხმა იყო საჭირო. რეგისტრაცია გაიარა 90-მა დეპუტატმა.

ოპოზიციის ნაწილი, მათ შორის „ნაციონალური მოძრაობის“ წარმომადგენლები, დარბაზში არ იმყოფებოდა.

პრეზიდენტის იმპიჩმენტის საკითხზე მომხსენებელი საპარლამენტო უმრავლესობის ლიდერი ირაკლი კობახიძე იყო, რომელმაც ის არგუმენტები წარმოადგინა, რაც მმართველი პარტიის მხრიდან პრეზიდენტის იმპიჩმენტი პროცედურის დაწყების საფუძველი გახდა. მმართველი პარტიის ლიდერი ასევე გამოეხმაურა საკონსტიტუციო სასამართლოს სამი მოსამართლის მიერ გამოქვეყნებულ განსხვავებულ აზრს. მომხსენებლის სიტყვით გამოსვლის შემდეგ, პროცესი კითხვა-პასუხის რეჟიმში გაგრძელდა. ირაკლი კობახიძემ ოპოზიციის წარმომადგენელთა კითხვებს უპასუხა.

ირაკლი კობახიძის შემდეგ, პარლამენტის წინაშე სიტყვით გამოვიდა საქართველოს პრეზიდენტი სალომე ზურაბიშვილი. გამოსვლის შემდეგ, დეპუტატებმა კითხვებით სალომე ზურაბიშვილსაც მიმართეს, თუმცა პრეზიდენტმა კითხვებზე პასუხი არ გასცა. როგორც პარლამენტის თავმჯდომარე შალვა პაპუაშვილმა სხდომაზე განაცხადა, სალომე ზურაბიშვილმა დაუდასტურა, რომ არ სურს კითხვებზე პასუხის გაცემა და მას ვერ დაავალდებულებდნენ, კითხებზე ეპასუხა.

პრეზიდენტის იმპიჩმენტთან დაკავშირებით სამართლებრივი ნაწილი მას შემდეგ ამოიწურა, რაც საკონსტიტუციო სასამართლომ გამოაცხადა დასკვნა, რომ პრეზიდენტმა საქართველოს კონსტიტუცია დაარღვია. ამის შემდეგ, პროცესმა საკანონმდებლო ორგანოში გადაინაცვლა.

თუ გინდათ პოლიტიკურ ველზე დარჩეთ, გადადექით! გექნებათ ორი გზა: ან შექმნათ პოლიტიკური პარტია, არასამთავრობო ორგანიზაცია ან თუ მიგიღეს „ნაციონალურ მოძრაობაში“, გაწევრიანდით! , – ამის შესახებ „ევროპელი სოციალისტების“ დეპუტატმა ფრიდონ ინჯიამ, პლენარულ სხდომაზე განაცხადა, სადაც პრეზიდენტის იმპიჩმენტის საკითხი განიხილება.

მისივე თქმით, სალომე ზურაბიშვილს ხალხის და ახლა უკვე, მთავრობის სახელით საუბრის უფლება არ აქვს.

„თუ თქვენ, როგორც ქვეყნის ერთ-ერთი კონსტიტუციური ინსტიტუტის წარმომადგენელი, არ მოგწონთ ამ ხელისუფლების პოლიტიკა და ამასთანავე, გინდათ პოლიტიკურ ველზე დარჩეთ, გადადექით! გექნებათ ორი გზა: 1. შექმნათ პოლიტიკური პარტია, არასამთავრობო ორგანიზაცია და ამით იბრძოლოთ იმ იდეალების განსახორციელებლად, რომელიც მიგაჩნიათ სწორად ან 2. თუ მიგიღეს „ნაციონალურ მოძრაობაში“, გაწევრიანდით! ეცადეთ, იქიდან იბრძოლოთ ხელისუფლებისთვის, რადგან ეს უფლებამოსილება, რომელიც თქვენ , როგორც პრეზიდენტს გაგაჩნიათ, ჯერჯერობით, თქვენ არ მიგიღიათ. ამიტომ ხალხის სახელით არ შეგიძლიათ ისაუბროთ. ამას ახლა დაემატა ის, რომ ახლა და მომავალში თქვენ მთავრობის სახელითაც არ გექნებათ საუბრის უფლება“, – განაცხადა ფრიდონ ინჯიამ.

მოვუწოდებ ქალბატონ სალომეს, ხვალ აიღეთ ბილეთი და წადით, იარეთ, იარეთ, როგორც დადიოდით ამათ და მტრის ჯინაზე, – ამის შესახებ ოპოზიციონერმა დეპუტატმა, რომან გოცირიძემ პარლამენტის სხდომაზე განაცხადა, სადაც პრეზიდენტის იმპიჩმენტის საკითხს განიხილავენ.

როგორც რომან გოცირიძემ აღნიშნა, სალომე ზურაბიშვილს ბევრი შეცდომა მოსვლია, მაგრამ დღეს „ქართულ ოცნებასთან“ მიმართებით მართალია.

„დღეს სალომე ზურაბიშვილმა ერთი კარგი რამ გითხრათ თქვენ, რომ ეს სამარცხვინო პროცესი მოაწყო „ქართული ოცნების“ პოლიტიკურმა ხელმძღვანელობამ და რუსეთმა. რაღაც არ იყო მძაფრი რეაგირება. რუსეთს როდესაც იტყვიან, იცით ხოლმე ხელოვნურად თავის გაბრაზება, რაღაც თვითგაბრაზების პროცესში ვერ ჩავარდით დღეს, რატომ? მან არა თქვა მესამე, ვინაიდან, პოლიტიკიდან წასულია ის კაცი. სალომე ზურაბიშვილმა ისევ გადააფარა ფაქტობრივად ხელი ბიძინა ივანიშვილს, ის ხომ არ არის პოლიტიკაში, ის ხომ წავიდა, თურმე რუსეთისა და „ქართული ოცნების“ ლიდერები ყოფილან დამნაშავ. ბიძინა არსად არ არის, ჯანდაბას, დადგება დრო, იტყვის, სადღაც მემუარებში დაწერს 10 წლის შემდეგ ახლა თუ ვერ ბედავს. როგორადაც არ უნდა ვაკრიტიკოთ მისი შეცდომები და ძალიან ბევრი შეცდომა მოსვლია, დღეს სალომე ზურაბიშვილი თქვენთან მიმართებით არის სწორი, ის დგას ევროპის გზაზე, საქართველოს ინტერესებს იცავს, უკრაინის გვერდით არის, ანტირუსულ პოზიციებზეა და მისი გადაყენების მთავარი ამოცანა იყო, გაგეჩერებინათ და მოგეხდინათ მისი პარალიზება, ამიტომ მოვუწოდებ ქალბატონ სალომეს, ხვალ აიღეთ ბილეთი და წადით, იარეთ, იარეთ, როგორც დადიოდით ამათ და მტრის ჯინაზე“, – განაცხადა რომან გოცირიძემ.