მოლოდინი გვაქვს, რომ აშშ-სგან ასევე ვიხილავთ მეგობრობას, რომელიც გულისხმობს საქართველოსთან პირდაპირ ფრენას და თავისუფალ ვაჭრობას, – ამის შესახებ საქართველოს პარლამენტის თავმჯდომარემ შალვა პაპუაშვილმა ქართულ-ამერიკულ ურთიერთობებთან დაკავშირებით დასმული კითხვის საპასუხოდ განაცხადა.

„ჩვენი მხრივ, ათწლეულებია ვაჩვენებთ აშშ-ს, რას ნიშნავს პარტნიორობა და მეგობრობა ქართულად. ეს ნიშნავს, რომ ჩვენ გვაქვს მოხსნილი სავიზო ვალდებულებები ამერიკის მოქალაქეებისთვის, შექმნილი გვაქვს ყველანაირი პირობა ამერიკის მოქალაქეებისთვის საქართველოში ბიზნესის წარმოების გასაადვილებლად. ამერიკელი ჯარისკაცების მხარდამხარ ვიბრძოდით სხვადასხვა ცხელ წერტილში, მათ შორის ვიყავით პირველი, ლამის ნატო-ს ქვეყნებს შორისაც. ნატო-ს წევრ 23 ქვეყანაზე მეტი კონტინგენტი გვყავდა ავღანეთში. ავღანეთში ჩვენ რამდენი ჯარისკაციც დავკარგეთ, იმდენი ნატო-ს წევრ ზოგიერთ ქვეყანას არც კი ჰყოლია. ამიტომ, ეს არის მეგობრობა ქართულად. ამ მეგობრობის საპასუხოდ, ჩვენი მოლოდინია, რომ ვნახავთ ასევე მეგობრობას, რომელიც გულისხმობს სავიზო რეჟიმის მოხსნას საქართველოსთვის, პირდაპირ ფრენას საქართველოსთან და თავისუფალ ვაჭრობას საქართველოსთან.

ჩინეთთან სულ ახლახან ჩამოყალიბდა სტრატეგიული პარტნიორობა, სულ ახლახან მოხსნა საქართველომ სავიზო ვალდებულებები ჩინეთის მოქალაქეებისთვის და საპასუხოდ რამდენიმე თვეში ჩინეთმაც მოხსნა სავიზო ვალდებულებები. აშშ-ს უვიზო მიმოსვლა აქვს 40-ზე ცოტა მეტ ქვეყანასთან. 38 ქვეყანასთან აქვს უვიზო მიმოსვლა ჩინეთს და ამ 38-ში ერთი საქართველოა. ასე რომ, ჩვენ გვაქვს სურვილი, ქართულ მეგობრობას და იმ მეგობრობის ქართულ ხედვას, რომელსაც ვაჩვენებთ პარტნიორებს, სხვადასხვა ქვეყანას, შესაბამისი საპასუხო ნაბიჯები მოჰყვეს“, – განაცხადა პაპუაშვილმა

ISFED-ს აქვს ნულოვანი ნდობა ქართველი ხალხის მხრიდან და როდესაც ასეთი ნულოვანი ნდობის ორგანიზაციები არის ძირითადი დასაყრდენი დაკვირვების დროს, ეს არის ძალიან სამწუხარო. თუმცა, სამწუხარო ისიც არის, რომ არათუ ISFED-ი, თავად USAID-ი იყო ჩართული 2020 წელს პარალელური დათვლის მცდარი შედეგების გავრცელებაში და ეს თავად ISFED-მაც აღიარა, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.

„რაც შეეხება არჩევნებს, თავისთავად, როდესაც ხდება ISFED-ის წარმოდგენა, როგორც ობიექტური და მიუკერძოებელი დამკვირვებლისა, უკვე ესეც არის არაკეთილსინდისიერი ქცევა. ამაზე ჩვენ ძალიან ღიად ვსაუბრობთ. ISFED-ს აქვს ნულოვანი ნდობა ქართველი ხალხის მხრიდან და როდესაც ასეთი ნულოვანი ნდობის ორგანიზაციები არის ძირითადი დასაყრდენი დაკვირვების დროს, ეს არის ძალიან სამწუხარო. თუმცა, სამწუხარო ისიც არის, რომ არათუ ISFED-ი, თავად USAID-ი იყო ჩართული 2020 წელს პარალელური დათვლის მცდარი შედეგების გავრცელებაში. ეს თავად ISFED-მაც აღიარა, რომ USAID-მა იცოდა 2020 წლის ჯერ კიდევ ოქტომბერში, მალევე იცოდა, რომ პარალელური დათვლის შედეგები იყო მცდარი და მიუხედავად ამისა, არათუ პროაქტიულად არ უთხრა ხელისუფლებას და ქართველ ხალხს USAID-მა, რომ ეს იყო მცდარი და აქედან გამომდინარე, ამაზე არ უნდა აწყობილიყო რაღაც კამპანიები, არამედ პირდაპირ მალავდა. მათ შორის, უშუალო შემხებლობის დროს არ უთქვამთ ჩვენთვის, რომ იცოდნენ ამის შესახებ, რომ იყო მცდარი“, – აღნიშნა პაპუაშვილმა.

პარლამენტის თავმჯდომარის თქმით, USAID-ს დღემდე არ გაუკეთებია განმარტება, მათ შორის იმასთან დაკავშირებით, აშშ-ის საელჩოსთვის თუ იყო ცნობილი.

„სამწუხაროდ, ამის შემდეგ, მიუხედავად იმისა, რომ მე პირადად არაერთხელ ამ საკითხს ხაზი გავუსვი და მოვუწოდე, დღემდე არ მოგვისმენია USAID-ის განმარტება, რასთან გვქონდა საქმე 2020 წლის ნოემბერ-დეკემბერში. ის თანამშრომლები, რომლებიც, ზოგი აღარ არის უკვე საქართველოში, რატომ მალავდნენ ამ ინფორმაციას და მეორე – ვინ იცოდა USAID-ის გარდა, იყო თუ არა ეს ცნობილი [აშშ-ის] საელჩოსთვის, ელჩისთვის, რომელიც მაშინ ფასილიტაციაში იყო ჩართული. საინტერესოა, პარალელური დათვლის შედეგები, რომელსაც ძირითად არგუმენტად აყენებდა ოპოზიცია და რომელსაც აფუძნებდა მთელ ამ ყალბ, რევოლუციურ ნარატივს, ამის შესახებ იყო თუ არა ცნობილი საელჩოში, ვისთვის იყო ცნობილი საელჩოში, USAID-ის თანამშრომლებისთვის, საელჩოს თანამშრომლებისთვის, თუ ვისთვის. დღემდე, სამწუხაროდ, USAID-მა ქართველი ხალხი არ ჩათვალა ღირსად, რომ განმარტება გააკეთოს ამასთან დაკავშირებით. რა ვიცი, ბოდიშის მოხდაც არ იქნებოდა ცუდი სხვათა შორის, მაგრამ განმარტება გააკეთო, რასთან გვქონდა საქმე, რამდენად დაინტერესდნენ ამით, შიდა მოკვლევა იყო თუ არა ამასთან დაკავშირებით, ვინ იცოდა და თუ იცოდა ვინმემ. რატომ არ ეუბნებოდნენ ამას ქართველ ხალხს და ერთი თვე რატომ იყო აქ არეულობა, რატომ იყო თავდასხმა ცესკო-ზე, რატომ ტარდებოდა აქციები, როდესაც საფუძველი იყო აბსოლუტურად ყალბი?“, – განაცხადა შალვა პაპუაშვილმა.

დამნაშავე და კრიმინალი სააკაშვილი რომ საუბრობს დანაშაულის სტატისტიკაზე, ეს უკვე თავად არის ოქსიმორონი, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

როგორც შალვა პაპუაშვილმა აღნიშნა, „ნაციონალური მოძრაობის“ ხელისუფლება არა მხოლოდ შიდა სასამართლოების, არამედ საერთაშორისო სასამართლოების მიერ მხილებულია, რომ მათ ჰქონდათ დანაშაულებრივი რეჟიმი.

„რა სტატისტიკაზე საუბრობ, დანაშაულებრივი რეჟიმი იყო თავადაც. ადამიანი ახლა ზის ციხეში, რადგან დამნაშავედ არის ცნობილი სამ საქმეში. თავად დამნაშავე და კრიმინალი რომ საუბრობს დანაშაულის სტატისტიკაზე, ეს უკვე თავად არის ოქსიმორონი. ასე რომ, კომენტარის გაკეთებაც კი შეუძლებელია. ჩვენ გვახსოვს, მათ შორის ადამიანის უფლებათა ევროპულმა სასამართლომაც საკუთარ, ერთ-ერთ ბოლო გადაწყვეტილებაში თქვა, რომ ეს იყო მაშინ დანაშაულებრივი სისტემა ციხეებში შექმნილი, რომელიც იყო ადამიანების წამების სისტემა. „ნაციონალური მოძრაობის“ ხელისუფლება მხილებულია არა მხოლოდ შიდა სასამართლოების, არამედ საერთაშორისო სასამართლოების მიერ იმაში, რომ მას ჰქონდა შექმნილი დანაშაულებრივი რეჟიმი. განაჩენი გამოტანილია, ასე რომ სხვა მხრივ ამას უკვე მნიშვნელობა არ აქვს“, – განაცხადა პაპუაშვილმა.

ჩვენთვის მიუღებელია, რომ მოსამართლეების დანიშვნაზე გადაწყვეტილება მიღებული იყოს ქვეყნის გარეთ, მოსამართლეები შერჩეული უნდა იყვნენ საქართველოში, – ამის შესახებ იუსტიციის მინისტრმა რატი ბრეგაძემ ე.წ. ვეტინგთან დაკავშირებით განაცხადა.

ბრეგაძის თქმით, ევროკავშირის ქვეყნებშიც მოსამართლეების შერჩევასთან დაკავშირებით გადაწყვეტილებას შესაბამისი სახელმწიფოს შესაბამისი ორგანოები იღებენ.

წარმოდგენილი სისტემა, რისი სურვილიც გარკვეულ ძალებს აქვთ, გულისხმობს, რომ საქართველოში მოსამართლეების დანიშვნაზე გადაწყვეტილება მიღებული იყოს ქვეყნის ფარგლებს გარეთ, რაც ჩვენთვის მიუღებელია. ვემხრობი იმ კურსს, რომელიც აქვს საპარლამენტო უმრავლესობას, რომ მოსამართლეები შერჩეული უნდა იყვნენ საქართველოში. ნუ გავაკეთებთ ასეთ ფორმულირებას, რომ ითხოვენ, არის მოთხოვნა და ასე შემდეგ.  არსად წერია, რომ მოსამართლე უნდა იყოს შერჩეული უცხოელის მიერ.

შესაბამისად, სიმართლეს არ შეესაბამება, რომ ევროკავშირში ვერ შეხვალ, თუ მოსამართლეებს ვერ შეარჩევს რომელიმე სხვა ქვეყნის წარმომადგენელი. ევროკავშირის ქვეყნებშიც გადაწყვეტილებას, მათ შორის მოსამართლეების შერჩევასთან დაკავშირებით, იღებენ შესაბამისი სახელმწიფოს შესაბამისი ორგანოები“, – განაცხადა რატი ბრეგაძემ.

საპარლამენტო უმრავლესობის ლიდერმა, მამუკა მდინარაძემ გუშინ გამართულ პრესკონფერენციაზე განაცხადა, რომ „ვეტინგის“ თემას დახურულად აცხადებენ: „ე.წ. ვეტინგის თემას დახურულად ვაცხადებთ, ქვეყნის კონსტიტუციასა და დამოუკიდებლობაზე დარტყმას საკუთარი ხელით ნამდვილად არ ვაპირებთ“.

თავისთავად დადგა დღის წესრიგში ის საკითხი, რომ პოლიტიკურ პარტიად გადავკეთებულიყავით, რათა სტატუსი უფრო აგვემაღლებინა და ჩვენს ბრძოლას უფრო მასშტაბური სახე მიეღო, – ამის შესახებ მედიასთან „ხალხის ძალის“ წევრმა, დეპუტატმა ეკა სეფაშვილმა განაცხადა.

ეკა სეფაშვილმა ისაუბრა „ხალხის ძალის“ პარტიად გარდაქმნის მიზეზებსა და მიზნებზე.

„მოგეხსენებათ, ჩვენი მოძრაობა, „ხალხის ძალა“, დღეს პოლიტიკურ პარტიად დარეგისტრირდა. თავიდანვე, როცა „ქართულ ოცნებას“ გამოვეყავით და ცალკე მოძრაობა დავაარსეთ, ძალიან ხშირი იყო კითხვა იმასთან დაკავშირებით, ვაპირებდით თუ არა პოლიტიკურ პარტიად გარდაქმნას. სხვადასხვა კვლევაშიც, რომელიც NDI-სა და IRI-ის მიერ იყო ჩატარებული, ხშირად პოლიტიკურ პარტიად მოგვიხსენიებდნენ. ანუ, თავისთავად დადგა დღის წესრიგში ის საკითხი, რომ პოლიტიკურ პარტიად გადავკეთებულიყავით, რათა სტატუსი უფრო აგვემაღლებინა და ჩვენს ბრძოლას უფრო მასშტაბური სახე მიეღო.

სადამფუძნებლო ყრილობაზე საქართველოს ყველა რეგიონიდან 500-ზე მეტი ადამიანი იყო. გაცილებით მეტი იყო მოსურნე, რომ დასწრებოდა ყრილობას და პარტიის წევრი გამხდარიყო. თუმცა, რა თქმა უნდა, პარტიის წესდება მათ საშუალებას მისცეს, მომავალში გახდნენ ჩვენი წევრები.

დიახ, ვაპირებთ არჩევნებში მონაწილეობის მიღებას. პოლიტიკური პარტია ვართ და ნებისმიერი პოლიტიკური პარტიის ამბიციაა, პარლამენტში მოხვდეს. თუმცა, ბარიერის დაწევაზე საუბარი არ არის. მაშინაც კი, როცა პოლიტიკური პარტია ჯერ კიდევ არ ვიყავით და არჩევნებისთვის არ ვმუშაობდით, კვლევებში 2% გვქონდა. ასე რომ, არ მიმაჩნია, რომ რესურსი არ გვაქვს, პირიქით, 5%-ზე გაცილებით მეტის ამბიცია გვაქვს. ჩვენი მომავალი მუშაობა წარიმართება ჩვენი პოლიტიკური მოძრაობის მისიიდან გამომდინარე“, – განაცხადა ეკა სეფაშვილმა.

„ვეტინგის“ თემა დახურულია ჩვენთვის. ეს არის შეუსაბამო საქართველოს კონსტიტუციასთან და არა მარტო საქართველოს კონსტიტუციასთან, არამედ, ზოგადად, კონსტიტუციურ, სამართლებრივ პრინციპებთან, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

პრემიერის თქმით, შეიძლება, ასეთი რამ ვენეციის კომისიის მიდგომის თანახმად, განხორციელდეს უკიდურეს გამონაკლის შემთხვევაში, სადაც სახელმწიფო თავად აღიარებს, რომ მას აქვს შეუმდგარი ინსტიტუტები.

„ე.წ. ვეტინგზე განცხადება გაკეთდა გუშინ ჩვენი პოლიტიკური გუნდის ერთ-ერთი ლიდერის მხრიდან. რა თქმა უნდა, „ვეტინგის“ თემა დახურულია ჩვენთვის. ეს არის შეუსაბამო საქართველოს კონსტიტუციასთან და არა მარტო საქართველოს კონსტიტუციასთან, არამედ, ზოგადად, კონსტიტუციურ, სამართლებრივ პრინციპებთან – სახელმწიფო სუვერენიტეტის პრინციპებთან, სასამართლოს დამოუკიდებლობის პრინციპთან. შეიძლება, ასეთი რამ ვენეციის კომისიის მიდგომის თანახმად განხორციელდეს უკიდურეს გამონაკლის შემთხვევაში, სადაც სახელმწიფო თავად აღიარებს, რომ მას აქვს შეუმდგარი ინსტიტუტები. უკრაინისა და მოლდოვის საქმე იყო მაგალითად იმის აღიარება, რომ მას აქვს შეუმდგარი ინსტიტუტები და ამას აქვს მყარი საფუძველიც, რადგან მართლა ძალიან სუსტია ინსტიტუტები როგორც უკრაინაში, ასევე მოლდოვაში, მაგრამ საქართველოში თქვენ იცით, რომ 2012 წლის შემდეგ გვაქვს ფუნდამენტური პროგრესი ყველა მიმართულებით, მათ შორის, განსაკუთრებით სასამართლოს მიმართულებით. თქვენ იცით, რა მდგომარეობა იყო ქართულ სასამართლოში 2012 წლამდე. ქართული სასამართლო გამოიყენებოდა როგორც რეპრესიული მანქანის ერთ-ერთი მთავარი ინსტრუმენტი. ეს ვითარება შეიცვალა. ეს აისახა სასამართლო სტატისტიკაზე, ეს აისახა სტრასბურგის სასამართლოში მიმართვიანობის სტატისტიკაზე და ბევრ სხვა ფაქტორზე. აქედან გამომდინარე, ვერავინ ვერ იტყვის, რომ საქართველოში არ არის შემდგარი სახელმწიფო ინსტიტუტები, პირიქით, თუ სადმე არის ძლიერი ინსტიტუტები, განსაკუთრებით აღმოსავლეთ ევროპის სივრცეში, ეს არის სწორედ საქართველო, მათ შორის, ეს ეხება სასამართლოს“, – განაცხადა პრემიერმა.