ხელმოცარულები ცდილობენ, უცხოელების დაკვეთა შეასრულონ, საიდანაც გრანტს იღებენ, რათა ჩვენს იდენტობას შეუტიონ, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.

ზარქუას თქმით, „ქართული ოცნება“ ხალხთან ერთად დაიცავს ქართულ იდენტობას.

„ჩვენ დავაინიცირეთ საკონსტიტუციო ცვლილება, რომელიც გულისხმობს ოჯახური ღირებულებებისა და მომავალი თაობის დაცვას. ამასთან დაკავშირებით არსებობს კონკრეტული გამოწვევები, რომლებიც ითქვა და მათ შორის, გაიწერა პუნქტებად: ეს არის ქორწინება და ოჯახის შექმნა, მათ შორის არის შვილად აყვანის თემების დარეგულირება, სქესის შეცვლა და ასე შემდეგ. მთელი რიგი ნიუანსებია, რომლებიც მსოფლიო გამოწვევაა. ეს არ არის ჩვენი მოგონილი. ხელმოცარულები ცდილობენ, უცხოელების დაკვეთა შეასრულონ, საიდანაც გრანტს იღებენ, რათა ჩვენს იდენტობას, მართლმადიდებლობას, ეკლესიას, კულტურას, მენტალობას შეუტიონ. თუ გადაგვარდი, სარწმუნოება, ტრადიცია წაგართვეს, არ მოგეცა საშუალება, შვილს დაუძახო ქალიშვილი, ვაჟიშვილი, დედას – დედა, მამას – მამა, რა გვინდა მაშინ ევროკავშირში და სხვა გაერთიანებებში? ამათ ეს არ აინტერესებთ, მთავარია, უცხო ქვეყნის ინტერესები გაატარონ და ფული აიღონ. ჩვენ ამას წინ აღვუდგებით. ქართველ ხალხთან ერთად როგორც აქამდე მოვიგერიეთ არაერთი შემოტევა, ამ ხელმოცარულების და უცხოური დაფინანსების მქონე პირების, მათ შორის მდიდარი „ენჯეოების“, ახლაც გავუძლებთ და გავიტანთ ჩვენს გასატანს, დავიცავთ ჩვენს იდენტობას“, – განაცხადა ირაკლი ზარქუამ.

პარტია „ქართულმა ოცნებამ“ ოჯახურ ღირებულებათა და არასრულწლოვანთა დაცვის შესახებ საკონსტიტუციო ცვლილებები მოამზადა.

ირაკლი ზარქუა „ნაციონალური მოძრაობის“ მიერ ორგანიზებულ მსვლელობას გამოეხმაურა, რა დროსაც პარტიის წევრებმა პრეზიდენტის ადმინისტრაციაში მიხეილ სააკაშვილის გათავისუფლების მოთხოვნით შეგროვილი ხელმოწერები მიიტანეს. რეგიონული პოლიტიკისა და თვითმმართველობის კომიტეტის თავმჯდომარის პირველ მოადგილეს ეჭვი ეპარება იმაში, რომ „ნაცმოძრაობა“ ბარიერს გადალახავს.

„გუშინ ვუყურებდი იმ საცოდაობას, რასაც ადგილი ჰქონდა. რაღაც შვიდკაციანი კოლონა რომ მოდიოდა, იქაც კი დაჩაგრეს ლევან ხაბეიშვილი და სოფო ჯაფარიძე ჩანდა. რა ვუშველო, რა ვუყო არ ვიცი. არც იქანა უნდათ, არც აქანა მიიღეს, აქცია მოაწყო პარტიის თავმჯდომარემ და იქაც უკან მოჩანჩალებდა. შემდეგ „ნაცმოძრაობას“ გაუკვირდება, რატომ ვერ გადალახეს ბარიერი. ვერ გადალახავ ასეთი ლიდერის ხელში.

ჩვენ გვახსოვს 2003 წელი, როდესაც წალენჯიხიდან დაიძრა ავტობუსი, რომელიც იყო იმედის, განვითარების, დემოკრატიის სიმბოლო, ასე ეგონა მთელ მოსახლეობას. აქვე შეგახსენებთ, ჩემი ოჯახის წევრები იქ არ იყვნენ, პირიქით ოპოზიციაში ვიყავით, იმიტომ რომ ვიცოდით, შევარდნაძე და ესენი ერთი კლანი იყვნენ მაშინაც. მაგრამ მოსახლეობის უმრავლესობას სჯეროდა ამ კაცის. ცოტა ხანში გავშიფრეთ და ყველამ საკუთარ ტყავზე ვიწვნიეთ ეს ტირანია და დიქტატურა, რაც „ნაცების“ ხელისუფლებაში მოსვლას მოჰყვა. ახლა სიმბოლური იყო, რომ ხუთი მანქანა მოჰყვებოდა, ავტობუსიც ვერ დაიქირავეს. ხუთი მანქანის მეტი ვერ ნახეთ? მე ვთხოვდი ვინმეს და დაგამატებდით კიდევ ორს, ხაბეს ხათრით. ასეთი სასაცილოები ხართ, იმიტომ რომ თქვენმა არასწორმა, მწვალებლურმა, უსამშობლო პოლიტიკამ, რომელიც გულისხმობს, რომ ქართული სახელმწიფოს და ხალხის ინტერესები ფეხებზე გკიდიათ, მიგიყვანათ აქამდე. ატრიალეთ ახლა დროშა, ის ხუთი მანქანა და აბრიყვეთ ბელადი და შემდეგ თქვენ“, – განაცხადა ზარქუამ.

რაც შეეხება ექსპრეზიდენტის შეწყალებას, ზარქუა ამბობს რომ არაფერია გამორიცხული, თუმცა „მე მაინც მგონია, რომ სალომე ზურაბიშვილი დარჩება თავისი სიტყვების „არა და არასდროს“ ერთგული“.

ქართველი ხალხისთვის შეურაცხმყოფელია იმის თქმა, რომ მთავრობა რომ არ ზრუნავდეს თქვენზე, თქვენ “გაპიდარასტდებით”, – ამის შესახებ პარტია “გირჩის” დეპუტატმა, იაგო ხვიჩიამ ჟურნალისტებთან საუბრისას განაცხადა, რითაც “ოჯახურ ღირებულებათა და არასრულწლოვანთა დაცვის შესახებ“ კონსტიტუციური კანონის პროექტი შეაფასა.

მისივე თქმით, თუ “ქართულ ოცნებას” ლგბტ პროპაგანდით ერთი დაზარალებულიც არ ჰყავს, დანარჩენ საქართველოზე ზრუნვის მორალური უფლება არ გააჩნიათ.

“არავის ამდენი არ უსაუბრია, მათ შორის ბავშვების გასაგონად, ლგბტ პროპაგანდაზე, როგორც თვითონ [“ქართულ ოცნებას”]. დარწმუნებული ვარ, რომ “დაგუგლოთ” ლგბტ პროპაგანდა ქართულად, “ქართული ოცნების” ლიდერები გამოჩნდებიან პირველი საძიებო სიაში. ჩვენ მიგვაჩნია, რომ ქართველი ხალხისთვის შეურაცხმყოფელია იმის თქმა, რომ მთავრობა რომ არ ზრუნავდეს თქვენზე, თქვენ “გაპიდარასტდებით”. აქედან გამომდინარე, ჩვენ არ გვინდა ამ პროცესში მონაწილეობის მიღება, რომელიც შეურაცხმყოფელია ქართველი ხალხისთვის, მინიმუმ მანამ, სანამ ვინმე არ გამოჩნდება “ქართული ოცნებიდან” და არ იტყვის, თუ როგორ გახდა ბავშვობაში ლგბტ პროპაგანდის მსხვერპლი. ამის შემდეგ შეიძლება შეგვეცოდოს რომელიმე მათგანი და სერიოზულად ჩავთვალოთ, რომ საფრთხე რეალურია, მაგრამ თუ ერთი დაზარალებულიც არ ჰყავს “ქართულ ოცნებას” ლგბტ პროპაგანდით, მე მგონი, დანარჩენ საქართველოზე ზრუნვის მორალური უფლება მათ არ გააჩნიათ,” – განაცხადა ხვიჩიამ.

როგორც ოპოზიციონერი პოლიტიკოსი განმარტავს, მისი გუნდი აღნიშნული საკანონმდებლო ინიციატივის განხილვაში მონაწილეობას მიიღებს.

“ჩვენ დავაკვირდებით (იმიტომ, რომ ეს ძალიან გასართობია), რა არგუმენტაცია ექნება “ქართულ ოცნებას” ამ კანონის მისაღებად, მაშინ როდესაც ერთი ადამიანიც კი არ ჰყავს საკუთარ რიგებში, რომელიც დაზარალდა,” – განაცხადა ხვიჩიამ.

ცნობისთვის, პარლამენტში მმართველი უმრავლესობის ინიციატივით ორი – ერთმანეთისაგან დამოუკიდებელი საკონსტიტუციო ინიციატივა დარეგისტრირდება.

“ლგბტ პროპაგანდის საწინააღმდეგოდ“ წარდგენილი იქნება როგორც მოქმედ კონსტიტუციაში ცვლილებების პროექტი, ასევე კონსტიტუციური კანონის პროექტი სახელწოდებით – “ოჯახურ ღირებულებათა და არასრულწლოვანთა დაცვის შესახებ“.

თავად კონსტიტუციაში დაგეგმილი ცვლილებით, კორექტირდება კონსტიტუციის 30-ე მუხლი, რომელიც ქორწინების, დედათა და ბავშვთა უფლებებს შეეხება. პროექტის გათვალისწინებით, აღნიშნულ მუხლს ემატება ახალი პუნქტი შემდეგი შინაარსით: – “ოჯახურ ღირებულებათა და არასრულწლოვანთა დაცვა უზრუნველყოფილია საქართველოს კონსტიტუციური კანონით, რომელიც საქართველოს კონსტიტუციის განუყოფელი ნაწილია“.

რაც შეეხება “ოჯახურ ღირებულებათა და არასრულწლოვანთა დაცვის შესახებ“ კონსტიტუციური კანონის პროექტს, ის რვა პუნქტისგან შედგება და მთელი რიგი აკრძალვების დაწესებას ითვალისწინებს.

ჩვენ გვექნება შესაძლებლობა, უზრუნველვყოთ საჯარო განხილვები ჩვენს საზოგადოებასთან, ცხადია, ვნახეთ, ოპოზიცია, რომელიც უპასუხისმგებლოდ მოიქცა მთელი ამ ხნის განმავლობაში, ისინი დაიმალნენ და გაექცნენ კითხვებს, – ამის შესახებ „ქართული ოცნების“ წევრმა, რატი იონათამიშვილმა განაცხადა.

დეპუტატის თქმით, მმართველ გუნდს არ აქვს მოლოდინი, რომ ოპოზიცია პროცესში ჩაერთვება.

„ცხადია, მათგან არ გვაქვს მოლოდინი, რომ ჩაერთვებიან. მაგრამ როგორც ჩანს, ეს დამოკიდებულებაც იქნება ერთ-ერთი მიზეზი იმის, რომ ჩვენი საზოგადოების ის მცირე ნაწილიც კი, რომელიც ჯერ კიდევ დარჩა მათ ამომრჩევლად, უარს იტყვის მათზე და გააძევებს ქართული პოლიტიკიდან“, – განაცხადა იონათამიშვილმა.

პარტია „ქართულმა ოცნებამ“ ოჯახურ ღირებულებათა და არასრულწლოვანთა დაცვის შესახებ საკონსტიტუციო ცვლილებები მოამზადა.

განსაკუთრებით ბოლო წლებია ყველანი თვითმხილველი ვართ იმ ფაქტის, რომ არასამთავრობო ორგანიზაციები ახორციელებენ, ფაქტობრივად შეიძლება ითქვას, სახელმწიფოს მიერ წარმართული პოლიტიკის წინააღმდეგ მიზანმიმართულ კამპანიასა და აქტივობებს, – ამის შესახებ საქართველოს პარლამენტის განათლებისა და მეცნიერების კომიტეტის თავმჯდომარემ გივი მიქანაძემ განაცხადა.

მისი თქმით, არასამთავრობო ორგანიზაციების საქმიანობა ქვეყნისა და მისი შემდგომი წინსვლისთვის დამაზიანებელია.

„მათი საქმიანობა რა თქმა უნდა, ქვეყნისთვის და მისი შემდგომი წინსვლისთვის დამაზიანებელია. ეს არის კიდევ ერთი, ცალსახა განმაპირობებელი იმისა, რატომ ვითხოვთ ჩვენ, რომ მათი დაფინანსებისა და საქმიანობის შესახებ ინფორმაცია საზოგადოებისთვის ხელმისაწვდომი გახდეს“, – აღნიშნა გივი მიქანაძემ.

ოპოზიციონერი დეპუტატი ხატია დეკანოიძე საზღვარგარეთ საარჩევნო უბნების გახსნის თაობაზე საგარეო საქმეთა მინისტრს, ილია დარჩიაშვილს მიმართავს.

როგორც დღეს გამართულ პრესკონფერენციაზე ხატია დეკანოიძემ განაცხადა, საარჩევნო უფლება საქართველოს კონსტიტუციის 24-ე მუხლითაა გარანტირებული. მისი თქმით, სახელმწიფოს ვალდებულებაა, მოქალაქეებისთვის უზრუნველყოს უფლების ხელმისაწვდომობა და ევროპის საბჭოს საპარლამენტო ასამბლეა მოუწოდებს სახელმწიფოებს, მაქსიმალურად უზრუნველყონ საზღვარგარეთ მცხოვრები მოქალაქეებისთვის არჩევნებში ჩართულობა.

„ამ ფონზე, ემიგრანტებისთვის მნიშვნელოვან გამოწვევას წარმოადგენს არჩევნების დღეს საარჩევნო უბნამდე დიდი მანძილის გავლა, გამოწვევა არის არჩევნებში მონაწილეობისთვის პროცედურულ საკითხებთან დაკავშირებით ინფორმირებულობის დაბალი ხარისხი, ეს ფაქტორები კი უცხოეთში მცხოვრებ საქართველოს მოქალაქეებს ხელს უშლით საარჩევნო უფლების გამოყენებაში. საქართველოს 2020 წლის 31 ოქტომბრის საპარლამენტო არჩევნებზე 37 ქვეყანაში 50 უბანი იყო გახსნილი, არჩევნებში მონაწილეობა მიიღო 12 247-მა ემიგრანტმა, რაც ძალიან დაბალი რიცხვია მაშინ, როცა, სხვადასხვა მონაცემის მიხედვით, ქვეყნიდან მილიონამდე ადამიანია საზღვარგარეთ გასული. აქტივობის ეს რიცხვი ადასტურებს, რომ სახელმწიფო ვერ უზრუნველყოფს საზღვარგარეთ მცხოვრები საქართველოს მოქალაქეებისთვის საარჩევნო უფლების ხელმისაწვდომობას. ემიგრანტებისთვის ხმის მიცემის უფლების შესაძლებლობის გაზრდისთვის საგარეო საქმეთა სამინისტროს აქტიური მუშაობა მმართებს. საქართველოს კონსტიტუციის 43-ე მუხლის პირველი პუნქტით და საქართველოს პარლამენტის რეგლამენტის 148-ე მუხლის პირველი პუნქტით მონიჭებული უფლებამოსილების ფარგლებში, გთხოვთ, მოგვაწოდოთ შემდეგი სახის ინფორმაცია:

უცხოეთის რომელ ქალაქებშია საქართველოს დიპლომატიური წარმომადგენლობები, სადაც, დღეის მდგომარეობით, შეიძლება გაიხსნას საარჩევნო უბნები? საქართველოს რამდენი მოქალაქე იმყოფება საკონსულო აღრიცხვაზე თითოეულ ამ დიპლომატიურ წარმომადგენლობაში. გთხოვთ, წარმოგვიდგინოთ, კონკრეტულად რომელ ქალაქში/ქვეყანაში რამდენი მოქალაქე იმყოფება აღრიცხვაზე? საგარეო საქმეთა სამინისტრო გახსნის თუ არა დიპლომატიურ წარმომადგენლობებს (თუნდაც დროებითი დიპლომატიური წარმომადგენლობა საარჩევნო მიზნებისთვის) იმ ქვეყნებსა და ქალაქებში, სადაც საქართველოს მოქალაქეები, სულ მცირე, 50 მოქალაქე მოითხოვს საარჩევნო უბნის გახსნას? საგარეო საქმეთა სამინისტრო გეგმავს თუ არა ემიგრანტებისთვის საინფორმაციო კამპანიების წარმოებას მათი არჩევნებში მონაწილეობის გაზრდის მიზნით, მათ შორის, საინფორმაციო კამპანიებს საზღვარგარეთ არალეგალურად მცხოვრებ საქართველოს მოქალაქეებთან, ხოლო თუ გეგმავს, რა ტიპის აქტივობებია დაგეგმილი?“ – მიმართავს ხატია დეკანოიძე საგარეო საქმეთა მინისტრს, ილია დარჩიაშვილს.

საკონსტიტუციო ცვლილებებით სერიოზული პრობლემების გადაფარვა ხდება, – ამის შესახებ ოპოზიციონერმა დეპუტატმა, ხატია დეკანოიძემ განაცხადა.

როგორც ხატია დეკანოიძემ აღნიშნა, ამ თემას „ქართული ოცნება“ საკუთარი პროპაგანდისთვის გამოიყენებს.

„ადამიანებს ის გამოგონილი თემა არ აწუხებთ, რომელზეც რეალურად მარტო „ქართული ოცნება“ ლაპარაკობს და მეტი არავინ. ეს არის პროპაგანდის ნაწილი და იმის გაგრძელება, რაც გულისხმობს იმას, რომ ნებისმიერ ფასად ბიძინა ივანიშვილმა შეინარჩუნოს ძალაუფლება. ვფიქრობ, ამას გაგრძელება არ ექნება და ეს, უბრალოდ, ძალიან სერიოზულად ჩავარდნილი პროექტია „ქართული ოცნების“ მხრიდან. დარწმუნებული ვარ, ეს მხოლოდ იმიტომ გამოიგონეს, ვითომ ოპოზიციის დისკრედიტაცია მოახდინონ, რაც არ მოხდება, რადგან საქართველოს მოქალაქეებს სრულიად სხვა პრობლემები აწუხებთ“, – განაცხადა დეკანოიძემ.