რუსეთის პრეზიდენტმა, ვლადიმირ პუტინმა განაცხადა, რომ თუ უკრაინის ხელისუფლებას მოლაპარაკების მაგიდასთან დაბრუნება სურს, „დაე, დაბრუნდეს“.

„მოლაპარაკების მაგიდასთან დაბრუნება შესაძლებელია ფუნდამენტური ხასიათის შეთანხმებების საფუძველზე, რომელიც მიღწეული იყო ბელარუსსა და თურქეთში რთული მოლაპარაკებების დროს და ეფუძნება დღევანდელ რეალობას, რომელიც განვითარდა ადგილზე“, – აღნიშნა რუსეთის პრეზიდენტმა.

მანამდე სააგენტო Reuters-მა ინფორმაცია გაავრცელა, რომ პუტინი მზად არის, შეაჩეროს ომი უკრაინაში ცეცხლის შეწყვეტის შესახებ მოლაპარაკებების გზით, რომელიც აღიარებს ბრძოლის ველზე არსებულ ამჟამინდელ ხაზებს.

წყაროების ინფორმაციით, პუტინი მზად არის, გააგრძელოს ომი, თუ კიევი და დასავლეთი არ უპასუხებენ მის შეთავაზებას.

წყაროები ასევე აცხადებენ, რომ პუტინმა მრჩეველთა მცირე ჯგუფს იმედგაცრუება გამოუხატა იმის გამო, რომ დასავლეთს მოლაპარაკებების შეჩერების მცდელობა აქვს, ხოლო ვოლოდიმირ ზელენსკიმ გამორიცხა მოლაპარაკებები.

საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, ჟოზეფ ბორელმა შეშფოთება გამოთქვა გამჭვირვალობვის შესახებ საქართველოს კანონზე და აღნიშნა, რომ კანონი არ შეესაბამება ქვეყნის ევროპულ გზას.

„ჩვენ ძლიერ შეშფოთებულნი ვართ [კანონით]. მეორე მხრივ, ძალიან ფრთხილად უნდა ვიყოთ, რომ არ შევლახოთ მათი ეროვნული გრძნობები. ჩვენ უნდა გამოვიყენოთ რბილი ენა და ამავე დროს გვქონდეს მკაფიო პოზიცია იმასთან დაკავშირებით, თუ რა შეესაბამება ევროპულ გზას და რა არა“, – აღნიშნა ჟოზეფ ბიორელმა.

ჟოზეფ ბორელმა ასევე განაცხადა, რომ არიან სხვა ქვეყნები, რომლებიც ევროკავშირის საგარეო პოლიტიკასთან შესაბმისობაში არ არიან და მაგალითად სერბეთი მოიყვანა.

მისი თქმით, ევროკავშირის წევრობა ნიშნავს შესაბამისობას კანონის უზენაესობის, თავისუფლებისა და საგარეო პოლიტიკის კუთხით.

ხელისუფლებას არ პატიობენ იმას, რომ ომში არ ჩაერთო, – განაცხადა „ხალხის ძალის“ გენერალურმა მდივანმა დიმიტრი ხუნდაძემ „დღის ქრონიკაში“.

“რეგიონში არის უმძიმესი ვითარება. ვსაუბრობ უკრაინა-რუსეთის დაპირისპირება და ეს არ არის მხოლოდ მათი დაპირისპირება, ეს არის დასავლეთსა და რუსეთს შორის დაპირისპირება და აქ რა თქმა უნდა, თავიდანვე იყო განსაზღვრული საქართველოს როლი, რომ ის უნდა ჩართულიყო ომში და ის ამიერკავკასიაში უნდა ყოფილიყო დამატებითი სისხლის დამცლელი რუსეთისათვის. სამხედრო-სტრატეგიული თვალსაზრისით, რა თქმა უნდა, ეს გამართლებული იყო, მაგრამ საქართველოს შესაძლებლობიდან და რუსეთის აგრესიიდან გამომდინარე, რომელიც ყველაფერზე წამსვლელია, რა თქმა უნდა, ეს იქნებოდა დამღუპველი.

არ არის შემთხვევითი, რომ მიხეილ სააკაშვილი როგორც ალტერნატივა, ისე არის წარმოჩენილი იმიტომ, რომ უკრაინიდან ჩვენ და მთელ მსოფლიოს გაგვაგონეს, რომ „ქართული ოცნება“ არ იყო ომის დამწყები, ამას დაიწყებდა მიხეილ სააკაშვილი. იმიტომ იყო ასეთი ინტენსიური მცდელობა, ის დესტრუქციის ფლაგმანად წარმოეჩინათ, მან ეს საქმე ძალიან კარგად იცის, ყოფილი ხელისუფლება დაებრუნებინათ სათავეში და ის დაიწყებდა ომს. ხელისუფლებას არ პატიობენ იმას, რომ სწორედ ომში არ ჩაერთო“, – განაცხადა დიმიტრი ხუნდაძემ.

დიმიტრი ხუნდაძემ ასევე აღნიშნა, რომ ბალტიისპირეთის ქვეყნების აქტიურობა შემთხვევითი არ არის.

„არც ის არის შემთხვევითი როცა ბალტიისპირეთის ქვეყნები წინა ხაზზე გამოდიან, მთავრობის საწინააღმდეგო აქციაზე წარმოჩინდებიან და მოუწოდებენ, ააგორონ მუხტი ქუჩაში და არა არჩევნების, არამედ დესტრუქციის გზით შეცვალონ ხელისუფლება. ბალტიისპირეთის ქვეყნები არის შესაძლო მეორე ხაზი ფრონტის და რა თქმა უნდა, მათ ურჩევნიათ, რომ დივერსიფიცირება მოხდეს ამიერკავკასიაში და ამით აიცილონ ზეწოლა“, – განაცხადა დიმიტრი ხუნდაძემ.

მინდა გამოვეხმაურო იმ დიდი დოზის აგრესიას, ბულინგს, შეურაცხყოფას, რაც ბოლო დროს გამოვლინდა, – განაცხადა თბილისის საკრებულოში გამართულ სხდომაზე სახელდებისა და სიმბოლიკის კომისიის თავმჯდომარემ ნინო ვარდოსანიძემ.

მისი თქმით, სამწუხაროა და მიუღებელია ძალადობა ნებისმიერი მხრიდან, ნებისმიერი მიმართულებით და კიდევ უფრო სამწუხაროა, როდესაც ძალადობის წახალისებას ხდება, რადგან, სწორედ ეს არის, რაც რეალურად პროვოცირებას უკეთებს და მწვანე შუქს უნთებს მომდევნო ძალადობას.

„ფაქტებით და მაგალითებით რომ ვისაუბროთ, რაც ხდებოდა მოვლენების საწყის ეტაპზე, ნიკა გვარამია, რომელიც რადიკალური ოპოზიციის სახეა, აჩვენებს, არათუ ორმაგი სტანდარტის მაგალითს, არამედ ეწინააღმდეგება ყველანაირ სტანდარტს. გვარამიას ერთ-ერთ სტატუსში ვკითხულობთ – ,,რომან გოცირიძემ გინების საპასუხოდ პლანშეტი თავზე გადაატეხა დეპუტატს’’, აქვე, მისი შეფასებით, რომან გოცირიძე ქართული პოლიტიკის კოლორიტია. როგორც ჩანს, რომან გოცირიძეს თურმე შეუძლია სხვა ადამიანს ფიზიკურად გაუსწორდეს. თავად ფაქტი ხომ ძალადობრივია, მაგრამ ფაქტის ამგვარი აღწერა ძალადობის წამახალისებელია“, – აღნიშნა ნინო ვარდოსანიძემ.

როგორც საკრებულოს წევრმა აღნიშნა, პოლიციელებზე აგრესიას, სახელმწიფო ორგანოებზე თავდასხმას, სხვადასხვა სახის პროვოკაციებს ამართლებენ და ახალისებენ ძალები, რომლებიც დასავლური ღირებულებების დამცველებად ასაღებენ თავს.

„აქციების პარალელურად პოლიცია დღეების განმავლობაში ისმენდა და ითმენდა მძიმე ფორმის ლანძღვას, გინებას. პოლიციელი არ არის რიგითი მოქალაქე. მსგავსი შეურაცხყოფით, შეურაცხყოფენ სახელმწიფოს, ადამიანებს რომლებიც იცავენ ქვეყანას და ამ ქვეყნის მოქალაქეებს“, – განაცხადა ნინო ვარდოსანიძემ.

სახელდებისა და სიმბოლიკის კომისიის თავმჯდომარემ ალეკო ელისაშვილზეც ისაუბრა და აღნიშნა, რომ მის მიერ ჩადენილი ძალადობის ფაქტი, არამცთუ დაგმეს, არამედ ოვაციებით მიიღეს, რაც ფიზიკური ძალადობის წახალისებაა.

დეპუტატმა გამოყო სახალხო დამცველის აპარატის თანამშრომელი, რომელმაც, მისი თქმით, თანამდებობისთვის შეუფერებელი კომენტარები გაავრცელა, რაც მისი თქმით, საზოგადოებაში მანკიერი დამოკიდებულებების გაღვივებას უწყობს ხელს.

„ის იყო ერთ-ერთი პირველი, ვინც ლაშა ტალახაძეს საჯაროდ მიმართა შეურაცხმყოფელი კომენტარით. ასევე, მის პირად გვერდზე ვკითხულობთ შემდეგი შინაარსის სტატუსებს – ,,სამწუხაროდ ჯერ არაფერი ეტყობა ამ ნაკრებს ეროვნულის, ურემი რომ გადაბრუნდება მერე აფრიალეთ ეგ ორსიტყვიანი პოსტები’’. ,,კვარაცხელია ვერ გასცდა მჩხიბაობის დონეს’’. საქართველოს საპატრიარქოს განცხადებაზე წერს, ,,ვაზიარებ რუსეთის აგენტურის საქართველოს ფილიალის განცხადებას’’. შეგახსენებთ ეს ადამიანი უნდა იცავდეს ადამიანის უფლებებს, რომელიც მოიცავს სიტყვის, აზრის, გამოხატვის და რწმენის თავისუფლებებს მათ შორის. როგორც აღმოჩნდა, ცუდი მასწავლებლის კარგი მოსწავლეა, რადგან ყოფილი სახალხო დამცველიც გამოირჩევა სხვათა უფლებების შელახვით“, – განაცხადა საკრებულოს წევრმა.

ნინო ვარდოსანიძემ სხდომაზე შესაძლო სანქციებთან დაკავშირებითაც ისაუბრა.

„როცა რეალურად ძირი ეთხრებოდა საქართველოში დემოკრატიას, ირღვეოდა ადამიანის უფლებები, ყალბდებოდა არჩევნები, უმოწყალოდ ირბეოდა აქციები და არ არსებობდა ობიექტური მედიასაშუალებები, სამწუხაროდ მაშინ არ გვახსოვს სანქციებზე საუბარი და ხალხის ნების გათვალისწინება. დარწმუნებული ვარ, ჩვენს ქვეყანაში იქნება მშვიდობა, გაგრძელდება ქვეყნის განვითარება მისი დამოუკიდებლობის და სუვერენიტეტის დაცვით“, – განაცხადა ნინო ვარდოსანიძემ.

აღნიშნულ განცხადებას საკრებულო ავრცელებს.

თბილისის საკრებულოს დიდუბის მაჟორიტარი, ფრაქცია „ქართული ოცნება-დემოკრატიული საქართველოს“ თავმჯდომარის მოადგილე გივი ჩხარტიშვილი აშშ-ს სახელმწიფო მდივნის მიერ დაანონსებულ სანქციებს და მის განცხადებაზე ოპოზიციის რეაქციას სოციალურ ქსელში ეხმიანება:

“რადიკალების დღევანდელი ბოიკოტი, ჟრიამული იმის გამო, რომ ჩვენს ქვეყანას აშანტაჟებენ სანქციებით არის ერთი, დიდი სცენარის ნაწილი.

ამ სცენარის მიზანია საქართველომ უარი თქვას გამჭვირვალობის კანონზე, სუვერენიტეტზე, მშვიდობაზე, თუ არადა მოგვიწყობენ რევოლუციას.

მოდით ვნახოთ რას აკეთებდა რადიკალური ოპოზიცია, როდესაც იყო ხელისუფლებაში და რა მეთოდებით მართავდა ქვეყანას.

სწორედ ისეთით, როგორც რუს, ავტორიტარ მმართველებს სჩვევიათ;
მიიტაცა და დაარბია ყველა დამოუკიდებელი მედია, იმ ტელევიზიებს კი, რომლებიც ამ ტერორის მიუხედავად მაინც ბედავდნენ მართალი სიტყვის თქმას, ანტენებს და ტექნიკას ართმევდა და უზიანებდა საბაჟოზე, რომ ხელი შეეშალა მათი მაუწყებლობისთვის.

ეს არის ძალა, რომელიც განსხვავებული აზრისა და თავისუფალი სიტყვის გამო ქუჩაში ხვრეტდა, აპატიმრებდა, ჯაშუშობის ცრუ ბრალდებით ასამართლებდა, აწამებდა ადამიანებს.

ამ დროს კი რუსეთს ჩააბარა კოდორი, დაკარგა კონტროლი ორასამდე ქართულ სოფელზე და მთლიანად ახალგორზე.

ამ ხელისუფლების ლიდერმა და წაგებული ომის მთავარსარდალმა კი, აგვისტოს ომიდან 2 წელიწადში მხარი დაუჭირა ვაჭრობის მსოფლიო ორგანიზაციაში რუსეთის გაწევრიანებას, გააუქმა სავიზო რეჟიმი ოკუპანტ ქვეყანასთან და თავად ხვდებოდა რუს ტურისტებს ლარსის გამშვებ პუნქტზე.

ეს იყო ხელისუფლება, რომელმაც ყველა სტრატეგიული ობიექტი გადაულოცა რუსულ კომპანიებს და გვიმტკიცებდა ფულს სუნი არ აქვსო.

მეორე მხარეს არის ქართველი ხალხის უმრავლესობით არჩეული ქართული ოცნების ხელისუფლება, რომელმაც 2012 წლიდან დღემდე, მიღწია ასოცირების და ევროკავშირთან თავისუფალი ვაჭრობის შეთანხმებას, ვიზალიბერალიზაციას, რომლის მმართველობის პერიოდში ქვეყანამ მიიღო ევროკავშირის კანდიდატი ქვეყნის სტატუსი.

იმის მიუხედავად, რომ ეს რუსული ძალა, კოლექტიური ნაციონალური მოძრაობა, არ მოვერიდები ამ სიტყვას – ქვეყნის მტრები, დადიან ევროპარლამენტში, ამერიკაში კაბინეტ-კაბინეტ, ითხოვდნენ საკუთარი სამშობლოსთვის არ მიეცათ კანდიდატის სტატუსი, ითხოვდნენ და ახლაც ითხოვენ უვიზო რეჟიმის შეჩერებას სანქციების დაწესებას, ამისთვის ქირაობენ ლობისტებს, ხარჯავენ მილიონებს. მილიონებს, რომელიც ხელისუფლებაში ყოფნისას ქართველი ხალხის, ქართული ბიზნესის, ინვესტორების ძარცვა-რეკეტით იშოვეს.

ნათლად ჩანს თუ ვინ ატარებს რუსულ ინტერესებს!”, – წერს გივი ჩხარტიშვილი.

ამერიკას აქვს თავისი ინტერესი, მას ჰყავს დიდი მტრები ჩინეთისა და რუსეთის სახით და მისთვის მთავარი ინტერესია ახლა, მის გარშემო შექმნას ცეცხლის რკალი, ჩვენ ვართ მე-17 ხარისხოვანი, – ამის შესახებ პარლამენტის საფინანსო-საბიუჯეტო კომიტეტის თავმჯდომარემ, პაატა კვიჟინაძემ, აშშ-ის სახელმწიფო დეპარტამენტის მდივნის, ენტონი ბლინკენის განცხადებაზე კომენტირებისას ისაუბრა.

კვიჟინაძის თქმით, თუ საქართველოსთვის მას ვინმე სანქციებს დაუწესებს, ეს იქნება საამაყო, ვინაიდან, სამშობლო უპირველესია.

„საქართველოსთვის თუ ვინმე დამასანქცირებს, საქართველოსთვის რომ კარგ საქმეს ვაკეთებ, ეს იქნება ჩემთვის საამაყო. ამერიკას აქვს კანონი და ჩვენ გვეუბნება თუ იგივე კანონს მიიღებ, დაგასანქცირებო, [ჩვენი კანონი] უფრო სუსტია. მე მომზადება არ მჭირდება და არც არავის ვეკითხები, მე მოვდივარ ეროვნული მოძრაობიდან, ნაბრძოლი ვარ; ნუ ისწავლიან ამერიკაში [ჩემი შვილები], სამშობლო უპირველეს ყოვლისა, ეგ თქვენ ხართ დაფეთებულები, ფულებს თუ არ მოგცემენ ენჯეოებიდან გამომდინარე, მე არ მაინტერესებს, ასე გავიზარდე და ჩემს შვილებსაც ასე გავზრდი.” – განაცხადა პაატა კვიჟინაძემ