მათ [არასამთავრობო ორგანიზაციებს] რაღაც აღელვებთ, წინააღმდეგ შემთხვევაში, როგორ შეიძლება ფინანსური დეკლარაციის საზოგადოებისთვის წარდგენაზე უარი თქვან, – ამის შესახებ იურიდიულ საკითხთა კომიტეტის თავმჯდომარემ, ანრი ოხანაშვილმა „ქრონიკასთან“ „გამჭვირვალობის შესახებ” კანონპროექტზე საუბრისას განაცხადა.

მისი თქმით, ამ კანონპროექტის ერთადერთი მიზანია, რომ საზოგადოებამ ლეგიტიმურად იცოდეს, რა თანხა შემოდის ჩვენს ქვეყანაში და რა მიზანს ხმარდება ეს თანხა.

„ჩვენ ამ კანონპროექტით ფიზიკურ პირებს არ ვეხებით, ამაზე მანიპულაციას ხშირად აქვს ადგილი, მაშინ როდესაც ეს ეხება ორგანიზაციებს და მაშინ როდესაც ეს კანონპროექტი არის ევროკავშირში წარმართული დისკუსიის ანალოგი (ევროკავშირში აქტიური დისკუსია მიმდინარეობს მსგავსი კანონპროექტის მიღებასთან დაკავშირებით). მათ რაღაც აღელვებთ, წინააღმდეგ შემთხვევაში, როგორ შეიძლება ფინანსური დეკლარაციის საზოგადოებისთვის წარდგენაზე უარი თქვან. ეს ხალხი ამბობს, რომ ისინი მათ ვებგვერდზე ინფორმაციას ათავსებენ, მაგრამ არ სურთ, რომ დეკლარაციის სახით წარედგინონ საზოგადოებას ანგარიში. მათ ვებგვერდებზე განთავსებული ინფორმაცია არის ძალიან ზოგადი და მშრალი ინფორმაცია. ესეც მათ ნება-სურვილზეა დამოკიდებული, ხვალ რომ მათ თქვან რომ აღარ სურთ ამ ზოგადი ინფორმაციის გავრცელებაც კი, არ არსებობს საკანონმდებლო ნორმა, რომელიც მათ დაავალდებულებს, რომ საზოგადოებას ანგარიში წარიდგინონ ფინანსური აქტივების შესახებ. რაც შეეხება იმას, როცა გადაწყვეტენ თავად რა სახის გრანტის დეკლარირება უნდა მოახდინონ შემოსავლების სამსახურში, ესეც არის ფინანსური საიდუმლოება და ამაზე მოქალაქეებს წვდომა ვერ ექნებათ. ცალკე საკითხია კიდევ რა ტიპის ინფორმაციას უგზავნიან შემოსავლების სამსახურს, რადგან აქაც დიდი სივრცეა მათი მხრიდან, რომ გარკვეული ინფორმაცია მიაწოდონ, გარკვეული კი – არა.

ეს კანონპროექტი არ ითვალისწინებს რაიმე ისეთი ტიპის ბიუროკრატიას, რომელიც ამ ორგანიზაციების საქმიანობას შეაფერხებს. რა თანხა მიიღო ორგანიზაციამ, რა მიზნით, რა პერიოდში, რა მიზნით ხარჯავს, რა შედეგი მიიღო და როგორ არის ადმინისტრირებული – ამის შესახებ ინფორმაციის გასაჯაროებას ითვალისწინებს ეს კანონპროექტი. პირდაპირ წერია კანონპროექტის პირველ მუხლში, რომ ამ კანონპროექტის მიზანი არ არის რომელიმე ორგანიზაციის საქმიანობის შეფერხება და მითუმეტეს მათ საქმიანობაში რაიმე ფორმით ჩარევა. ამ კანონპროექტის ერთადერთი მიზანია, რომ საზოგადოებამ ლეგიტიმურად იცოდეს, რა თანხა შემოდის ჩვენს ქვეყანაში, რა მიზანს ხმარდება ეს თანხა და ხომ არ აქვს კონკრეტულ ორგანიზაციას ინტერესი, რომ კონკრეტული თანხები არ გაასაჯაროონ. თუ ეს ორგანიზაციები ამბობენ, რომ ყველაფერი აქვთ გასაჯაროებული, რა არის მაშინ პრობლემა, რომ თავი მოუყარონ ამ ინფორმაციას და საზოგადოებას გააცნონ?“, – განაცხადა ოხანაშვილმა.

ა.

აქ არის ბრძოლა შავი ფულისთვის, რადგან ამ რადიკალების დაფინანსება გახდება საჯარო, ამით კი საზოგადოებაში მათ მიმართ ნდობა კიდევ უფრო გაქრება, – ამის შესახებ პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე გივი მიქანაძემ გამჭვირვალობის კანონპროექტზე საუბრისას „დღის ქრონიკასთან“ განაცხადა.

მისი თქმით, ეს კანონპროექტი ბევრად უფრო ლიბერალურია, ვიდრე სხვა ქვეყნებში მოქმედი მსგავსი კანონები თუ დაინიცირებული კანონპროექტები.

„შეიძლება ითქვას, რომ ეს ორგანიზაციები და მათ უკან მდგარი რადიკალურ ფრთის პარტიები შავი ფულისთვის იბრძვიან, რომ მიიღონ დაფინანსება. სრული ჭეშმარიტებაა, რომ მსგავსი კანონი მოქმედებს აშშ-ში, ისრაელში, ავსტრალიაში, განხილვის პროცესშია ევროპარლამენტში. საფრანგეთის ქვედა პალატამ მიიღო მსგავსი კანონი, სლოვაკეთშია დაინიცირებული, დიდ ბრიტანეთშიც. ეს არის ქვეყნის უსაფრთხოების, საზოგადოების ინტერესებიდან გამომდინარე საკითხი. სრული პასუხისმგებლობით შემიძლია გითხრათ, რომ ის კანონპროექტი, რომელიც დავაინიცირეთ, არის ბევრად უფრო ლიბერალური თავისი კონტექსტიდან, სანქციებიდან გამომდინარე. ის მხოლოდ იურიდიულ პირებს – იმ არასამთავრობო ორგანიზაციებს და მედიასაშუალებებს ეხება, რომელთაც წლის განმავლობაში 20%-ზე მეტი შემოსავალი მიიღეს გარე, არაქართული წყაროებიდან. თუკი ამის დეკლარირება არ გაკეთდება წელიწადში ერთხელ, ერთადერთი სანქციაა ფულადი ჯარიმა, მაშინ როდესაც ის მოქმედები კანონები და კანონპროექტები, რომელსაც ახლა სხვაგან იხილავენ, მათ შორის სისხლისსამართლებრივ პასუხისმგებლობას და თავისუფლების აღკვეთასაც კი ითვალისწინებს. აქ არის ბრძოლა შავი ფულისთვის და იმისთვის, რომ არ გახდეს გამჭვირვალე და ღია [დაფინანსება] რადგან ამ რადიკალების დაფინანსება რომ გახდება საჯარო, ამით საზოგადოებაში მათ მიმართ ნდობა კიდევ უფრო გაქრება“, – განაცხადა დეპუტატმა.

მიქანაძე ასევე გამოეხმაურა ამ კონტექსტში საქართველოსთვის კანდიდატის სტატუსის ჩამორთმევაზე გაკეთებულ განცხადებებს და აღნიშნა, რომ არ არსებობს კონკრეტული მექანიზმი, რომლითაც გადაიხედება სტატუსმინიჭებული ქვეყნისთვის სტატუსის ჩამორთმევა.

„ევროპარლამენტარები, რომლებიც ამ განცხადებას აკეთებენ, ისინი ცნობილი ოდიოზური ფიგურები არიან, რომელთა სახელებიც 2020 წლის საპარლამენტო არჩევნების შემდეგ განსაკუთრებით ცნობილია საზოგადოებისთვის, ჯერ კიდევ იქიდან, როცა სამართლიანმა არჩევნებმა „პივიტის“ შედეგები გააყალბა და რა განცხადებებსაც აკეთებდნენ ამის საფუძველზე, ასევე იღებდნენ სამარცხვინო რეზოლუციებს. არახალია ჩვენი მოქალაქეებისთვის ის გარემოება, რომ ახლა ეს ადამიანები მაქსიმალურად ცდილობენ, რომ ზურგი გაუმაგრონ რადიკალებს საქართველოში და აკეთებენ სუფთა მანიპულაციურ განცხადებებს. არ ყოფილა პრაქტიკაში და არ არსებობს კონკრეტული მექანიზმი, რომლითაც გადაიხედება კანდიდატის სტატუსმინიჭებული ქვეყნისთვის, ამ სტატუსის ჩამორთმევა. ისინი ხედავენ, რომ სიმართლე საზოგადოების, ხელისუფლების მხარესაა, რომელიც ქვეყნის და საზოგადოების ინტერესებით მოქმედებს და ამ სიტუაციაში მათ დარჩენიათ, რომ მოატყუონ საზოგადოება, მაგრამ ეს არ გამოუვათ. სამარცხვინოა, როდესაც ეს ადამიანები აკეთებენ განცხადებებს, რომ თურმე ეს კანონპროექტი ეხება ყველა ფიზიკურ პირს. ჩვენი დიპლომატიური კორპუსი, საპარლამენტო დიპლომატია, მთელი მთავრობა მაქსიმალურად ვართ ჩართული რომ ჩვენს პარტნიორებს სრული ინფორმაცია ჰქონდეთ ამ საკითხებთან დაკავშირებით და ეს კომუნიკაცია მათთან გაგრძელდება“, – განაცხადა მიქანაძემ.

Facebook-ის სხვადასხვა გვერდზე, მათ შორის მედიასაშუალებების ოფიციალურ გვერდებზე დაბლოკეს საინფორმაციო ბანერები, რომელიც წარმოადგენდა „ქართული ოცნების“ პასუხს რადიკალური ოპოზიციისა და არასამთავრობო ორგანიზაციების სიცრუეზე გამჭვირვალობის კანონთან დაკავშირებით.

როგორც „ქართული ოცნების“ მხარდამჭერები ამბობენ, სტილი ზუსტად იგივეა – როგორც „ნაცმოძრაობის“ დროს ვერაფერს უხერხებდნენ სიმართლეს და ერთადერთი გადაწყვეტა იყო საინფორმაციო საშუალების ჩახშობა, ზუსტად იგივე მეთოდი გამოიყენეს ახლაც.

მათივე თქმით, როგორც ჩანს, მთელი ძალისხმევა არა პასუხის გაცემისკენ, არამედ ინფორმაციის წაშლისკენ მიმართეს, რაშიც ისინი მთლად მარტოებიც არ უნდა იყვნენ და რაც არ უნდა უცნაურად ჩანდეს, ამით სოციალურ ქსელებში ტრაბახობენ კიდეც.

როგორც ცნობილია, Facebook-ზე საინფორმაციო ბანერების გაქრობა უკავშირდება რადიკალებისა და მათი მხარდამჭერი არასამთავრობოების წარმომადგენლებს, რომლებსაც ლობისტების მეშვეობით აქვთ მოპოვებული ვერიფიკაცია საერთაშორისო ფაქტჩექერში.