თქვენი აზრით, რატომ იბრძვიან საქართველოს მოქალაქეები ამ კანონის წინააღმდეგ? რატომ იღვწიან საქართველოს საერთაშორისო მეგობრები იმისთვის, რომ ეს კანონი არ იქნას მიღებული და რატომ არის, რომ ერთადერთი მეხოტბე და მხარდამჭერი ამ კანონის, ივანიშვილის პარტიის გარდა, არის კრემლი? – ამ კითხვით მიმართა საპარლამენტო ფრაქცია „ერთიანი ნაციონალური მოძრაობის“ თავმჯდომარემ, თინა ბოკუჩავამ “ქართული ოცნების“ თავმჯდომარეს, მამუკა მდინარაძეს

ბოკუჩავას განცხადებით, „ქართული ოცნების“ გადაწყვეტილებით ქვეყნის ეროვნულ და ევროპულ ინტერესებს ღალატობენ.

„ბატონო მამუკა, დღეს თქვენ კიდევ ერთხელ დაადასტურეთ, რომ ამ კანონის ერთ-ერთი მთავარი მიზანი არის დასავლეთის შანტაჟი, რაც ნიშნავს ჩვენი ქვეყნის ევროპული მომავლის საბოტაჟირებას. როცა გერმანიის კანცლერი, ოლაფ შოლცი გეუბნებათ, რომ ამ კანონს არაფერი აქვს საერთო ევროპულ კანონმდებლობასთან, როდესაც აშშ-ს სახელმწიფო დეპარტამენტის მდივნის წარმომადგენელი ამბობს, რომ ამ კანონს არაფერი აქვს საერთო აშშ-ს კანონთან. როცა ნატო-ს გენერალური მდივანი ეწინააღმდეგება ამ კანონს, როდესაც 22 ევროპარლამენტარი ამბობს, რომ შესაძლებელია ამ კანონმა საფრთხის ქვეშ დააყენოს ის ძალიან დიდი მონაპოვარი, რომელიც ქართველი ხალხის ძალისხმევით საქართველომ მიიღო კანდიდატის სტატუსის სახით. როდესაც ევროსაბჭოს ადამიანის უფლებათა კომისარი იმ წერილით, რომელსაც შალვა პაპუაშვილი სამარცხვინოდ მალავდა, ამბობს, რომ არის კონკრეტული მოწოდება თითოეულ თქვენგანზე, რომ ამ კანონს მხარი არ დაუჭიროთ და ერთადერთი მთელს მსოფლიოში, ვინც ამ კანონს იწონებს, არის პუტინის პროპაგანდისტი დუგინი და კრემლის სხვა პროპაგანდისტები, კითხვა მაინც არ გიჩნდებათ საკუთარ თავთან, რომ დღევანდელი გადაწყვეტილებით თქვენ ღალატობთ ჩვენი ქვეყნის ეროვნულ და ევროპულ ინტერესებს. ეს არის მთავარი კითხვა, რომელიც მაქვს მე თქვენთან – რატომ იბრძვიან თქვენი აზრით საქართველოს მოქალაქეები ამ კანონის წინააღმდეგ? რატომ იღვწიან საქართველოს საერთაშორისო მეგობრები იმისთვის, რომ ეს კანონი არ იქნას მიღებული? და რატომ არის, რომ ერთადერთი მეხოტბე და მხარდამჭერი ამ კანონის ივანიშვილის პარტიის გარდა არის კრემლი? “, – განაცხადა ბოკუჩავამ.

რელიგიური ექსტრემიზმი, საქართველოში ეკლესიის წინააღმდეგ ბრძოლა, ისტორიის წინააღმდეგ ბრძოლა, არატრადიციული ცხოვრების წესის პროპაგანდა, ეს საქართველოში არა მხოლოდ აღიქმება, არამედ არის ანტისახელმწიფოებრივი მოქმედებები, რაც ხშირ შემთხვევაში ფინანსდება, – ამის შესახებ „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ პარლამენტის პლენარულ სხდომაზე სიტყვით გამოსვლისას განაცხადა.

„გამჭვირვალობის მიზანი ერთგვარი თვითმიზანი არ არის. არაერთხელ განვაცხადეთ, რომ როდესაც ქვეყნები უზრუნველყოფენ გამჭვირვალობას საკუთარ ქვეყანაში და ამას კანონით არეგულირებენ, აქ მხოლოდ საჯაროობა და გამჭვირვალობა არ არის კანონის მაინცდამაინც განსაკუთრებული მიზანი. საუბარია იმაზე, რომ გარდა კარგი საქმეებისა, რასაც ენჯეო სექტორი აკეთებს, მათ დააზღვიონ და სხვა საკითხების პრევენცია მოახდინონ. საქართველოში ასეთი საკითხების პრევენცია შეიძლება შეეხებოდეს მაგალითად პოლარიზაციას, რადიკალიზაციას, რელიგიური ექსტრემიზმის, სახელმწიფო ინსტიტუტების დასუსტებას, არატრადიციული ცხოვრების წესის პროპაგანდას, პარტიების რადიკალურ-რევოლუციური მიზნების დაფინანსებას. ეს არის ის თანმდევი რისკები, რაც ახლავს ნებისმიერი ქვეყნიდან სამომავლო პერსპექტივაში შემოსული გრანტების დაფინანსებას. ავიღოთ პირობითად, 60-70% თუ ხმარდება კარგ საქმეს, შესაბამისად, დანარჩენი 30% ხმარდება სავარაუდოდ ისეთ საქმეებს, რომლებიც მიმართულია არალეგიტიმური მიზნებისკენ და ანტისახელმწიფოებრივი ქმედებებისკენ. მაგალითად რელიგიური ექსტრემიზმი, საქართველოში ეკლესიის წინააღმდეგ ბრძოლა, ისტორიის წინააღმდეგ ბრძოლა, არატრადიციული ცხოვრების წესის პროპაგანდა, ეს საქართველოში არა მხოლოდ აღიქმება, არამედ არის ანტისახელმწიფოებრივი მოქმედებები, რაც ხშირ შემთხვევაში ფინანსდება. ბევრჯერ მოგვისმენია, გვინახავს მაგალითად „ფრანკლინის კლუბი“, „კანვასი“, ISFED-ის გაყალბებული, პარალელური დათვლის მონაცემები, ისინი ყველა დაფინანსებული გახლდნენ გარე აქტორების მიერ“, – აღნიშნა მდინარაძემ.

ვფიქრობ, გუშინდელმა დღემ ბევრი რამ გამოაჩინა და გამოაჩინა ისიც, რომ ერთი მიზეზი, ერთი საფუძველი იმისა, რომ კანონპროექტი, რომელიც შეეხება უცხოური გავლენის გამჭვირვალობას, უმარტივესი მიზეზის გამო, რომ მასში არაფერია არალეგიტიმური, რაც საქართველოს არ შეუძლია განახორციელოს, არ შეიძლება რამე კრიტიკასაც კი დაექვემდებაროს, თუმცა ამ კანონის სტიგმატიზება უკვე წელიწადზე მეტია დაწყებულია, – ამის შესახებ „ქართული ოცნების“ აღმასრულებელი მდივანმა, საპარლამენტო უმრავლესობის ლიდერმა მამუკა მდინარაძემ პარლამენტში სიტყვით გამოსვლისას განაცხადა.

მისი თქმით, გამჭვირვალობის შესახებ კანონპროექტი ითვალისწინებს გამჭვირვალობას.

„უნდა ვთქვა, ჩვენი მოსახლეობისა და საზოგადოების გასაგონად, რას ითვალისწინებს კანონპროექტი. ძალიან მოკლედ კიდევ ერთხელ. კანონპროექტი ითვალისწინებს გამჭვირვალობას, რომლის ხერხიც არის ის, რომ ორგანიზაციები, მედია ორგანიზაციები და არასამთავრობო ორგანიზაციები, რომლებიც საქართველოს ფარგლებს გარედან, ნებისმიერი ქვეყნიდან მიიღებენ შემოსავალს, წლის განმავლობაში 20 პროცენტზე მეტს, უნდა დარეგისტრირდნენ შესაბამის რეესტრში, როგორც უცხოური ძალის ინტერესების გამტარებელი ორგანიზაციები და ყოველი წლის იანვარში წარადგინონ ფინანსური დეკლარაცია, რომელშიც მითითებული იქნება შემოსავლები და გაწეული ხარჯები დეტალურად წინა წელთან დაკავშირებით. ეს არის ერთადერთი ვალდებულება, რაც აკისრიათ მედია და ენჯეო ორგანიზაციებს. ხაზგასმით ვამბობ, არც ერთი აკრძალვა, რომელზეც ამ დღეებში სამწუხაროდ, მაინც იყო ლაპარაკი, განსხვავებით სხვა ქვეყნებში არსებული კანონებისგან, არც ერთი აკრძალვა ქართულ კანონპროექტში არ არის. განსხვავება სხვა ქვეყნების კანონმდებლობისგან არის ის, რომ რამდენიმე ქვეყანაში არის ფიზიკური პირიც ვალდებული, რომელიც იღებს უცხოეთიდან შესაბამის დაფინანსებას, რომ დარეგისტრირდეს სპეციალურ რეესტრში. საქართველოში ეს არ გავრცელდება ამ კანონის მიღების შემდეგ და არც ერთ ფიზიკურ პირს კანონი არ შეეხება. დანარჩენი არის პრაქტიკულად ტექნიკური მუხლები, რომლებიც შეეხება მონიტორინგს, პროცედურებს, დარეგისტრირების წესს და ა.შ. სხვა შინაარსი, სხვა პრინციპი გარდა გამჭვირვალობისა, სხვა მიზანი კანონმდებლობას არ გააჩნია“, – აღნიშნა მამუკა მდინარაძემ.

პარლამენტმა ირაკლი ბერაიასათვის პარლამენტის წევრის უფლებამოსილების ვადამდე შეწყვეტის თაობაზე დადგენილების პროექტს 85 ხმით მხარი დაუჭირა.

დადგენილების პროექტი პლენარულ სხდომაზე საპროცედურო საკითხთა და წესების კომიტეტის თავმჯდომარემ ირაკლი ქადაგიშვილმა წარადგინა. მისი განმარტებით, საკითხი დღის წესრიგში მას შემდეგ დადგა, რაც ირაკლი ბერაიამ აღმასრულებელ ხელისუფლებაში დაიკავა თანამდებობა, რომელიც პარლამენტის წევრის სტატუსთან შეუთავსებელია.

საქართველოს კონსტიტუციისა და პარლამენტის რეგლამენტის თანახმად, ირაკლი ბერაიას პარლამენტის წევრის უფლებამოსილება ვადამდე შეუწყდა.

ბავშვებს დაშლით?! დედა გეტირებათ! ხომ ჩემზე უკეთ იცით?! – კატასტროფაა! ჩვენ თუ 27 ქვეყანას დავუპირისპირდით, რუსეთის შესაჭმელად ტოვებთ ქვეყანას, კაცო?! ქვეყანას რას უკეთებთ?!, – ასე მიმართა პარტია „კანონი და სამართლის“ დეპუტატმა, თაკო ჩარკვიანმა უმრავლესობის დეპუტატებს პარლამენტის პლენარულ სხდომაზე.

მისივე თქმით, „უცხოური გავლენის გამჭვირვალობის შესახებ: კანონპროექტი შინაარსით უთუოდ, რუსულია და დასავლური სივრცე გამადიდებელი შუშით გვიყურებს. ჩარკვიანი სიტყვით გამოსვლისას ასევე, კომიტეტის სხდომაზე გუშინ მომხდარ ფიზიკურ დაპირისპირებასაც შეეხო.

„გუშინ მართლაც მძიმე დღე იყო. ნუ შევყვებით ჩვენ რა მართლდება, რა არ მართლდება. ცუდი სანახაობაა ყოველთვის ასეთი ცემა-ტყეპა. მე განმიცდია ეს ყველაფერი ქუთაისის აეროპორტში. მე და ჩემი შვილი ვიყავით და მეუღლე გვახლდა. სამარცხვინო თავდასხმა მოგვიწყვეს. ეს იყო 6-კაციანი თავდასხმა. თავდასხმა ნაკლებად მაინტერესებს, მაინტერესებს პასუხი, რომელიც კახი კალაძემ ტელევიზიით გააკეთა. მაშინ პირველად გავოცდი და ჩავფიქრდი, რომ ეს ბიჭი საზიზღრობის ზღვარს გაცდა. ვციტირებ, „რასაც დასთეს იმას მოიმკიო“. ერთი წამით არ მიფიქრია გუშინ, მაგალითად, რომ ეს მეკადრებინა და მეთქვა მდინარაძისთვის, რომელსაც თხემით ტერფამდე არ ვეთანხმები არც ერთ სიტყვაში, არც ერთ ნააზრევში, შეურაცხმყოფელ გამონათქვამებში, რასაც ის აკეთებს ხოლმე. ჯაჭვია და ამ ჯაჭვის ყველას უნდა ეშინოდეს და ზოგადად ადამიანები ერთმანეთს უნდა გაუფრთხილდნენ. რაც შეეხება კანონს – დიახ, ეს კანონი შინაარსით არის უთუოდ რუსული. სულ ვსვამთ კითხვას – რატომ?! რისთვის არის ფინანსთა სამინისტრო, ეკონომიკის სამინისტრო, საშემოსავლო, აუდიტი, ვერ გავიგე, მიტოვებული გაქვთ აბა ისე ქვეყანა? არაფერს ამოწმებთ? ხომ გასაგებია, რომ ეს თითიდან გამოწოვილია და ნაბრძანებია ამ სიტუაციაში. რას შვრებით ხალხო? მოდით ასე დავალაგოთ – ბავშვებს დაშლით? – დედა გეტირებათ! ხომ ჩემზე უკეთ იცით?! კატასტროფაა! ვისთან ტოვებთ ქვეყანას?! ჩვენ თუ 27 ქვეყანას დავუპირისპირდით რუსეთის შესაჭმელად ტოვებთ ქვეყანას, კაცო?! მომგებიანია ახლა ჩვენთვის ამ კანონის მიღება?! აბა რას აკეთებთ?! ქვეყანას რას უკეთებთ?! არ მჯერა, რომ გამყიდველები ხართ, გეფიცებით…,“ – განაცხადა ჩარკვიანმა.