სამარცხვინოა გიორგი გახარიას განცხადებები, ეს კაცი არის ისტერიკაში, – ამის შესახებ პარტია „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა.

კობახიძემ უპასუხა ჟურნალისტის კითხვას, „გიორგი გახარიას განცხადებით, „ქართულ ოცნებაში“ ვინც იმყოფება, ყველა ქურდია და შალვა პაპუაშვილზე განაცხადა, რომ გამოდის და რაღაცას მიედ-მოედება. რას უპასუხებდით, როდესაც კორუფციასა და ქურდობაში გდებთ ბრალს ყოფილი პრემიერ-მინისტრი?“.

„ეკონომიკის ზრდასთან დაკავშირებით გახარიამ აღიარა, რომ ქვეყანას აქვს ეკონომიკური ზრდა. ჩვენი ეკონომიკა მისი პრემიერობის დროს, 2020 წელს იყო 16 მილიარდი დოლარი. ამ წლის ბოლოსთვის გახდა 30 მილიარდი დოლარი. ამ სამ წელიწადში საქართველოს ეკონომიკა გაიზარდა 14 მილიარდი დოლარით. გახარია, ე.წ. ეკონომისტი აცხადებს, რომ ეს 14 მილიარდი დოლარი წავიდა 20-25 ოჯახის ჯიბეებში. როგორც ვიცი, დაასახელა გვარები და მეც მომიხსენია. 25 ოჯახის ჯიბეში თუ წავიდა, ერთი ოცდამეხუთედი სულ მცირე მეკუთვნის, ხომ? სულ მცირე თანაბრად უნდა განაწილებულიყო და სად არის ჩემი 600 მილიონი დოლარი, არ ვიცი. გახარიას შეიძლება, ვკითხოთ და აღმოაჩინოს, სად არის. მისი განცხადებები არასერიოზულია. მან ის მაინც უნდა იცოდეს, რომ აქედან დაახლოებით მეოთხედი მარტო ბიუჯეტში მიდის. ანუ ეს არის ბიუჯეტის თანაფარდობა ეკონომიკასთან, დანარჩენი ნაწილდება უამრავ სექტორში, როგორიცაა სასტუმროები, რესტორნები, წარმოება და ა.შ. რაც იშლება შემდეგ, ეს აისახება საშუალო ხელფასის ზრდაზე, დასაქმების მაჩვენებლის ზრდაზე და ა.შ. როცა ამბობს 20-25 კაცის ჯიბის გასქელებაზე, ელემენტარულად, პატივს არ სცემს საკუთარ ღირსებას, როგორც ეკონომისტის. სამარცხვინოა უბრალოდ მისი განცხადებები. ეს აჩვენებს ისტერიკას. ეს კაცი არის ისტერიკაში, ამიტომ ავრცელებს სიცრუეს და უზრდელობს, მაგალითად, შალვა პაპუაშვილის მიმართ. პაპუაშვილზე გახარიას განცხადებას რაც შეეხება, ის ჩვეულებრივად უზრდელია, მაგაზე რა კომენტარი უნდა გავაკეთო, არ ვიცი“, – განაცხადა ირაკლი კობახიძემ.

ცდილობენ ახლა ე.წ. მესამე ძალა შექმნან – ჩახდილები, „ლუზერები“ და ხელმოცარული რადიკალები გააერთიანონ და სათავეში გვარამია ან სალომე (ზურაბიშვილი) ჩაუყენონ,- აცხადებს საპარლამენტო უმრავლესობის წევრი, ირაკლი ზარქუა.

მისი თქმით „ნაციონალურ მოძრაობას“ არაფერი გამოსდის და ამიტომ ყალიბდება ახალი ძალა.

„მელია, გილოცავ! როგორც იქნა, ჩამოყალიბდი და გაემიჯნე „ხაბეს“, რომელმაც ჩამოგაგდო. ამდენი ხანი კალკულატორებზე და საწერ-კალმებზე დაობდით თუ მეტი სხვა რა იყო? ეს ხუმრობით, მათი შიდა თემაა, მაგრამ კიდევ ერთხელ აჩენს ეს მათ მიდგომებს და ხელწერას. ერთმანეთს მოუწყვეს რევოლუცია, საბოტაჟით, გადაბირებით, ჩანაწერებით ებრძოდნენ ერთმანეთს და ესენი რომ ხელისუფლებაში მოუშვა, ღმერთმა არ დაუშვას. უფრო მეტიც, აგერ, მათი სატელიტი NDI არ უშვებს უკვე, ხაზი გადაუსვა იმით, რა კვლევებიც გამოაქვეყნა, წარმოიდგინეთ, რასთან გვექნება საქმე, დაღუპავენ ქვეყანას! ამიტომაც არიან იქ, სადაც არიან. „ხაბე“, გამაგრდი!

შთაბეჭდილება მრჩება, რომ უხილავი ხელი, რომელიც ამ პროცესებს მართავს ქართული სახელმწიფოს წინააღმდეგ, მათ შორის ის გუნდი, რომელიც ჩვენ მიგვათრევდა ომისკენ, ცდილობს, რომ ეს მელია, ხელმოცარულები და „ლუზერები“ ვინც არიან, ჩახდილებთან ერთად გააერთიანონ და შექმნან თითქოსდა მესამე ძალა. არ გამოვრიცხავ ამას ჩაუყენონ ე.წ. პრეზიდენტი, რომელსაც ნებართვა არ აქვს და მაინც დაფრინავს და დადის, ვის ხვდება, რატომ ხვდება? საზიანო განცხადებებს აკეთებს ჩვენი ქვეყნისთვის. ჩვენ ვთქვით და ბოდიში მოვიხადეთ, რომ ქართველ ხალხს და საზოგადოებას თავს მოვახვიეთ და ავარჩევინეთ ქალბატონი სალომე. სავარაუდოდ, მომავალ წელს გადადგება, ჩაუდგება სათავეში ამ მოძრაობას და ჰგონიათ, რომ მესამე ძალაა იმიტომ, რომ “ნაცები” და “ხაბე” უკვე დაივიწყეს, არ გამოსდით არაფერი – ერთი, ორი, სამი მცდელობა და ისიც დაიღალა ეტყობა უკვე, ვინც აფინანსებდნენ, ჩარეცხილია ის პარტია და ცდილობენ ახლა ე.წ. მესამე ძალა შექმნან – ჩახდილები, “ლუზერები” და ხელმოცარული რადიკალები გააერთიანონ და სათავეში გვარამია ან სალომე ჩაუყენონ. ესაა ამათი სცენარი! მომავალ არჩევნებზე ქართველი ხალხი დამაჯერებლად გაიმარჯვებს, ეს ნიშნავს, რომ გაიმარჯვებს „ქართული ოცნება“, მშვიდობა, ეკონომიკურ კეთილდღეობაზე აქცენტირება, ევროპული პერსპექტივა და დამარცხდებიან ომის პროპაგანდისტები, ანარქისტები, ჩახდილები, ხელმოცარულები, დაე, იყოს ასე!”- განაცხადა ზარქუამ.

„ნაცმოძრაობის“ პრეზიდენტის ღონისძიებაზე ჩვენ არაფერი გვესაქმება, მითუმეტეს, რომ ის აგრძელებს კონსტიტუციის უხეშად დარღვევას – ღონისძიებაზე, რა თქმა უნდა, არ მივალთ, – ამის შესახებ „ქართული ოცნების“ თავმჯდომარემ, ირაკლი კობახიძემ 13 დეკემბერს, ორბელიანების სასახლეში დაგეგმილ ღონისძიებასთან დაკავშირებით განაცხადა.

მისივე თქმით, სალომე ზურაბიშვილი მთელი ამ პერიოდის განმავლობაში ევროკავშირის კანდიდატი ქვეყნის სტატუსის მიღების წინააღმდეგ საბოტაჟს ახორციელებდა.

„ამ დღეებშიც ის კიდევ ერთხელ არღვევს საქართველოს კონსტიტუციას. ასეთი ადამიანის ღონისძიებებზე, რა თქმა უნდა, ჩვენ არ მივალთ, ვერ მივალთ. ეს არ არის ჩვენი საქმე, მისი პოზიციიდან გამომდინარე. გარდა ამისა, მე შეგახსენებთ, რომ მთელი ამ პერიოდის განმავლობაში სალომე ზურაბიშვილი ახორციელებდა საბოტაჟს სწორედ კანდიდატის სტატუსის წინააღმდეგ. დღემდე ვერ ათქმევინა ვერავინ სალომე ზურაბიშვილს, რომ საქართველო იმსახურებს კანდიდატის სტატუსს. რა გვინდა ასეთი ადამიანის ღონისძიებაზე?“, – განაცხადა კობახიძემ.

შეგახსენებთ, რომ საქართველოს პრეზიდენტის სალომე ზურაბიშვილის განცხადებით, 13 დეკემბერს, ევროკავშირის ქვეყნებიდან დიპლომატიური კორპუსის წარმომადგენლებს კამპანიის “ჩვენი ხმა ევროპას” ფარგლებში შეგროვილ ხელმოწერებს გადასცემს.

როგორც პრეზიდენტმა განაცხადა, იმედოვნებს, რომ ამ ღონისძიებას ასევე დაესწრებიან საქართველოს ყველა დროის ხელისუფლების წარმომადგენლები, პრემიერები და საგარეო საქმეთა მინისტრები, რომლებიც მონაწილეობდნენ საქართველოს ევროპისკენ სვლაში.

მზად ვარ, საქართველოს ევროპული სტატუსისთვის ყველაფერი გავაკეთო, მაგრამ პრეზიდენტის ღონისძიებაში მონაწილეობის შინაარსს ვერ ვხედავ. შესაბამისად, მისვლას არ ვაპირებ, – ამის შესახებ პარლამენტის წევრმა, დავით ბაქრაძემ განაცხადა.

ამასთან, ბაქრაძეს შეფასება სთხოვეს, რამდენად შეიძლება იყოს აღნიშნული ღონისძიება დეპოლარიზაციისკენ გადადგმული ნაბიჯი.

ბაქრაძის თქმით, არსებული ფორმატით ეს ღონისძიება დეპოლარიზაციას ვერ მოემსახურება.

„სამწუხაროდ, არსებული ფორმატით ეს ღონისძიება დეპოლარიზაციას ვერანაირად ვერ მოემსახურება, ვინაიდან, ერთი მხრივ, ამ ღონისძიებაში მონაწილეობას არ იღებენ ყოფილი თანამდებობის ძალიან მნიშვნელოვანი პირები, მაგალითად, ყოფილი პრეზიდენტები, პრემიერები, მინისტრები, მეორე მხრივ, ამ ღონისძიებაში არ მონაწილეობს მოქმედი ხელისუფლება. ამიტომ, დეპოლარიზაციის ნაცვლად, ეს ღონისძიება მხოლოდ ხაზს გაუსვამს, როგორი უფსკრული არსებობს დღევანდელ ქართულ პოლიტიკაში. ბუნებრივია, მზად ვარ, საქართველოს ევროპული სტატუსისთვის ყველაფერი გავაკეთო, მაგრამ ამ კონკრეტულ ღონისძიებაში ამ ფორმატით მონაწილეობის შინაარსს ვერ ვხედავ. შესაბამისად, მისვლას არ ვაპირებ“, – განაცხადა დავით ბაქრაძემ.

13 დეკემბერს ათონელის რეზიდენციაში საქართველოს პრეზიდენტი სალომე ზურაბიშვილი ევროკავშირის წევრი ქვეყნების დიპლომატიური კორპუსის წარმომადგენლებთან შეხვედრას გამართავს და ელჩებს „ჩვენი ხმა ევროპას“ კამპანიის ფარგლებში შეგროვებულ ხელმოწერებს გადასცემს. ამასთან, ღონისძიებაზე მიწვეული არიან საქართველოს ხელისუფლების ყველა წარმომადგენელი, პრემიერები, საგარეო საქმეთა მინისტრები. „ეს არის ის კონსენსუსი, დეპოლარიზაცია და ერთობა, რაც ჩვენ გვჭირდება, რათა ჩვენი ევროპული გზა წარმატებული იყოს“, – განაცხადა სალომე ზურაბიშვილმა ღონისძიებაზე სუაბრისას.

„ნაციონალური მოძრაობის“ დამფინანსებლებმა, პატრონებმა, როგორც იქნა გაიგეს ის, რაც ჩვენმა საზოგადოებამ უკვე დიდი ხნის წინ გაიგო, რომ ეს არის დაზიანებული პოლიტიკური პარტია იმ ადამიანებით, რომლებსაც აქვთ უმძიმესი პოლიტიკური ბიოგრაფია, – ამის შესახებ საქართველოს პარლამენტის თავმჯდომარის მოადგილეm არჩილ თალაკვაძემ განაცხადა.

„მათ წააგეს უკვე ცხრა არჩევნები და ახლა ხვდებიან, რომ მომდევნო საპარლამენტო არჩევნებში აქვთ ნულოვანი შანსები, რომ სცადონ ხელისუფლებაში დაბრუნება. არათუ ხელისუფლებაში, ისინი კარგავენ უკვე მთავარი ოპოზიციის ადგილსაც, ამიტომ, დაწყებულია პროცესი, როდესაც დარჩენილი პოლიტიკური კაპიტალის გადაქაჩვა მიმდინარეობს ახალ პოლიტიკურ ბანაკში, რომლის კონტურები, პრინციპში, ცნობილია საზოგადოებისთვის. მე დარწმუნებული ვარ, ჩვენ გვექნება ხალხის მხარდაჭერა და „ქართული ოცნება“ მომავალზეც აიღებს პასუხისმგებლობას საპარლამენტო არჩევნებში. ამასთან, ჩვენ გვჭირდება საქმიანი, შედეგზე ორიენტირებული ოპოზიცია. ეს არის მომენტი იმ ოპოზიციური ჯგუფებისთვის, პარტიებისთვის, რომლებსაც მართლა აინტერესებთ ქვეყნის მომავალი, საქართველოს ევროპული ინტეგრაცია, აინტერესებთ პოლიტიკა, რომელსაც შედეგი მოაქვთ ხალხისთვის, რომ დაიკავონ ის სივრცე, რომელიც დღემდე „ნაციონალურ მოძრაობას“ და მათ სატელიტ პარტიებს უჭირავთ. ასე რომ, ჩვენს საზოგადოებას ვერავინ მოატყუებს, რაც არ უნდა ერთი პარტიიდან მეორეში გადალაგდეს პროცესი“, – განაცხადა არჩილ თალაკვაძემ.

დღეს ყველაზე მნიშვნელოვანია, რომ დაველოდოთ გადაწყვეტილებას, რომელსაც ევროკავშირის წევრი ქვეყნები მიიღებენ გაფართოების პაკეტთან დაკავშირებით, ეს არის მნიშვნელოვანი გადაწყვეტილება, – ამის შესახებ პარლამენტის ევროინტეგრაციის კომიტეტის თავმჯდომარემ, მაკა ბოჭორიშვილმა განაცხადა.

მისი თქმით, საქართველომ და საქართველოს ხელისუფლებამ გააკეთა ყველაფერი კანდიდატის სტატუსის მისაღებად.

„ახლა ჯერი ევროკავშირის წევრ ქვეყნებზეა, რომ მიიღონ ის პოლიტიკური გადაწყვეტილება, რომელსაც არა მარტო ჩვენ, არამედ გაფართოების პაკეტის ძალიან ბევრი ქვეყანა ელოდება. ზოგადად, მსგავსი გადაწყვეტილებები არის საკმაოდ რთულად მისაღები. ევროკავშირის წევრი ქვეყნები ძალიან დიდხანს მსჯელობენ ხოლმე მსგავს გადაწყვეტილებებზე და არც გასაკვირია. ასე რომ, დაველოდოთ. იმედი მაქვს, მოხდება კონსენსუსის მიღწევა ამ საკითხებთან დაკავშირებით“, – განაცხადა ბოჭორიშვილმა.

პიროტექნიკის დღეს მოქმედი რეგულაციები არ მუშაობს და ამ პირობებში გვყავს დაზარალებულები, მათ შორის ბავშვები – პარლამენტში 9 თვეა დევს ჩვენი კანონპროექტი საშიში პიროტექნიკის აკრძალვაზე,- ამის შესახებ „ლელოს“ დეპუტატმა, ანა ნაცვლიშვილმა პარლამენტში გამართულ ბრიფინგზე განაცხადა.

როგორც მან აღნიშნა, „ქართული ოცნება“ ისე ასრულებს საშემოდგომო სესიას, რომ 9 თვის წინ შემოტანილი კანონპროექტის არც ერთი განხილვა არ ყოფილა კომიტეტზე.

როგორც დეპუტატი აცხადებს, მაქსიმუმი გააკეთეს, რომ სამუშაო რეჟიმი წარმართულიყო კონსტრუქციულ რეჟიმში, თუმცა, მიიღეს პასუხი, რომ კანონპროექტი არ იქნება მიღებული. ნაცვლიშვილის თქმით, შესაძლოა, ჩნდებოდეს ეჭვი ბიზნესინტერესებზეც იმდენად, რამდენადაც პიროტექნიკის შემოტანა რამდენიმე მილიონის ღირებულების ბიზნესია.

„უპირველესად, მინდა სრული და სწრაფი გამოჯანმრთელება ვუსურვო მოზარდს, რომელიც გუშინ პიროტექნიკის გამოყენების შედეგად, მძიმედ დაზიანდა და კატასტროფის ბრიგადით გადმოყვანილია თბილისში, რათა მისი ჯანმრთელობა და სიცოცხლე გადარჩეს.

მინდა საზოგადოებას მივაწოდო ინფორმაცია, რომ ამ პარლამენტში ჩვენ მიერ მომზადებულია და 9 თვეა დევს კანონპროექტი საშიში პიროტექნიკის აკრძალვის შესახებ. ის რეგისტრირებულია 28 მარტს და „ქართული ოცნება“ ისე აპირებს დაასრულოს სესია, რომ კომიტეტზე არც ერთი განხილვა არ ყოფილა ამ კანონპროექტის. რამდენიმე სამუშაო შეხვედრა ფორმალურად ჩატარდა, მაგრამ შედეგი არის ის, რომ ბავშვი დაზიანდა და სამწუხაროდ, ახალი წლის პერიოდში საქართველოში მსგავსი დაზიანების ფაქტები იშვიათი არ არის. ეს არის იმ გულგრილობის შედეგი, რომლითაც „ქართული ოცნება“ მოეკიდა ამ თემას და გამზადებული კანონპროექტი შემოდო თაროზე. არც ჩვენი მიიღეს, არც თავისი წარმოადგინეს. მე ხელთ მაქვს გასული წლის ძალიან მძიმე სტატისტიკა, როცა მხოლოდ ერთ თვეში იმდენად დაზიანდნენ ადამიანები, რომ 87 მათგანს, მათ შორის 19 ბავშვს, ჰოსპიტალიზაცია დასჭირდა. კანონპროექტს გასულ კვირას საქართველოს ათასობით მოქალაქემ დაუჭირა მხარი და კიდევ ერთხელ მიმართა პარლამენტს, რომ მიეღოთ“, – განაცხადა ნაცვლიშვილმა.

საქართველოს პარლამენტის თავმჯდომარის, შალვა პაპუაშვილის განცხადებით, აზერბაიჯანში ვიზიტის დროს ყველა შეხვედრაზე, რომელიც შედგა, შინაარსობრივი საუბარი იყო.

მისი თქმით, უმოკლეს ვადებში განხორციელდება საკითხები, რომლებზეც პარლამენტთან თანამშრომლობის კუთხით შეთანხმდნენ.

„უმაღლეს დონეზე ხანგრძლივი, დეტალური და შინაარსობრივი საუბარი გვქონდა როგორც პრეზიდენტთან, ისე პარლამენტის თავმჯდომარესთან და პრემიერ-მინისტრთან. ყველა შეხვედრაზე ხაზგასმული იყო სულისკვეთება, რომელიც ჩვენს ორ ქვეყანას შორის არსებობს. ეს არის არა მხოლოდ მეგობრობა, სტრატეგიული პარტნიორობა, არამედ ეს არის ძმობა, რომელიც ჩვენ ერთმანეთთან გვაკავშირებს, რთულ პერიოდში ერთმანეთის მხარდაჭერა და ერთმანეთის სიხარულის გაზიარება. დარწმუნებული ვარ, უმოკლეს ვადებში განხორციელდება საკითხები, რომლებზეც პარლამენტთან თანამშრომლობის კუთხით შევთანხმდით. გვსურს თანამშრომლობის მემორანდუმის გაფორმება პარლამენტებს შორის, რათა უფრო სტრუქტურული დატვირთვა მივცეთ ჩვენს ურთიერთობებს კომიტეტებს, აპარატებსა და მეგობრობის ჯგუფებს შორის. ასე რომ, ჩვენს ორ ქვეყანას წინ აქვს ძმური და წარმატებული მეგობრობის, განვითარების გზა“, – განაცხადა შალვა პაპუაშვილმა.