ნიკა გვარამია, გიგი უგულავა და ოპოზიციის სხვა წარმომადგენლები პრემიერ-მინისტრ ირაკლი კობახიძესთან შეხვედრას ითხოვენ და აცხადებენ, რომ მათი მოთხოვნაა „არა რუსულ მთავრობას“.

ისინი აქციის მონაწილეებთან ერთად მთავრობის ადმინისტრაციასთან იმყოფებიან. მათი განცხადებით, ელოდებიან ირაკლი კობახიძესთან შეხვედრას და დაშლას არ აპირებენ.

ნიკა გვარამიას განცხადებით, დღეს „უცხოური გავლენის გამჭვირვალობის შესახებ“ კანონპროექტის მიღების შემდეგ მოთხოვნა შეიცვალა და გახდა „არა რუსულ მთავრობას“. კითხვაზე, „თუ არ შეგხვდებათ, რას აპირებთ?“, – გვარამიამ უპასუხა: „ამ თუზე იფიქროს კობახიძემ, ჩვენ ვიცით, რაც მოხდება“.

მთავრობის ადმინისტრაციის შესასვლელებთან მობილიზებული არიან სამართალდამცველები.

ქართული არასამთავრობო ორგანიზაციების წარმომადგენლები ევროპარლამენტარ პეტრას აუსტრევიჩუსს შეხვდნენ.

შესაბამის ფოტოს სოციალურ ქსელში თავად ევროპარლამენტარი ავრცელებს.

„ამ დღეებში მედიასა და სოციალურ ქსელებში ჩვენ ვხედავთ მასიური პროტესტის ფოტოებს საქართველოდან, რომლებიც აპროტესტებენ „უცხოური აგენტის“ რუსული კანონის ანალოგს. ჩემთვის, ქართველი ხალხი და სამოქალაქო საზოგადოების ორგანიზაციები ყოველთვის იყვნენ აქტივიზმისა და მოქალაქეობის მაგალითები, ევროკავშირში ინტეგრაციის მისწრაფების დასაცავად. ეს კიდევ ერთხელ დაადასტურა დელეგაციის ვიზიტმა, რომელიც შედგება სხვადასხვა არასამთავრობო ორგანიზაციისგან, შეაფასეს საქართველოს მთავრობის მუშაობა ბრიუსელში გაწევრიანების მოლაპარაკებების დასაწყებად ევროკავშირის მიერ დადგენილი მოთხოვნების შესრულებაში.

მე მოვისმინე მათი შეშფოთება და სურვილი, რომ ევროპულმა პარლამენტმა მკაცრი და კონკრეტული მესიჯი გაუგზავნოს მმართველ პარტიას „ქართულ ოცნებას“. უცხოური აგენტების შესახებ კანონის მიღება, რომლის მიხედვითაც, ევროკავშირის ან ლიეტუვის მხარდაჭერის მქონე ორგანიზაციებიც კი „უცხოური გავლენის აგენტებად“ ჩაითვლება, ხელს შეუშლის საქართველოს ევროკავშირში გაწევრიანების შესახებ მოლაპარაკებების დაწყებას. ვეცდები, ეს მკაფიო მესიჯი გავუგზავნო ოფიციალურ თბილისს მომავალ კვირას სტრასბურგში გამართულ სესიაზე“, – წერს აუსტრევიჩუსი.

როგორც გავრცელებული ფოტოდან ხდება ცნობილი, პეტრას აუსტრევიჩუსთან ერთად შეხვედრაზე იმყოფებოდნენ ფონდ „ღია საზოგადოების“ აღმასრულებელი დირექტორი ქეთი ხუციშვილი, „სასამართლოს გუშაგის“ ხელმძღვანელი ნაზი ჯანეზაშვილი, „სოციალური სამართლიანობის ცენტრის“ თანასწორობის პროგრამის დირექტორი თამთა მიქელაძე, „დემოკრატიის კვლევის ინსტიტუტის“ დირექტორი თამარ ხიდაშელი.

ცნობისთვის, ევროპარლამენტარი პეტრას აუსტრევიჩუსი სოციალურ ქსელში დღეს „უცხოური გავლენის გამჭვირვალობის შესახებ“ კანონპროექტის საწინააღმდეგო აქციას გამოეხმაურა და აღნიშნა, რომ „ვარდების რევოლუციის“ სულისკვეთებას შეუძლია, გადაარჩინოს საქართველოს ევროპული მომავალი“.

აუცილებლად მივაღწევთ ჩვენს საწადელს! ივანიშვილი გაიწვევს “რუსულ კანონს” და გაიგებს თქვენ ხმას, რომელიც ამბობს: “კი, ევროპას, არა რუსულ კანონს!”, – ასე მიმართა ფრაქცია “ერთიანი ნაციონალური მოძრაობის” თავმჯდომარემ, თინა ბოკუჩავამ რუსთაველის გამზირზე შეკრებილ მოქალაქეებს, რომლებიც “უცხოური გავლენის გამჭვირვალობის შესახებ” კანონპროექტს აპროტესტებენ.

მისი თქმით, “ქართული ოცნება” ევროპულ მომავალს ვერ წაგვართმევს და აღნიშნა, რომ “ბიძინა ივანიშვილს ჩვენი ერთიანობის ეშინია”.

“ჩემო ძვირფასებო, ძალიან ამაყი ვარ, რომ მე ერთ-ერთი თქვენგანი ვარ დღეს, რომ თქვენთან ერთად ვდგავარ აქ, რუსთაველზე და თქვენთან ერთად ვიცავ ჩვენი ქვეყნის მომავალს, ჩვენს ევროპულ მომავალს. მე ვხედავ, რომ თქვენ აქ ხართ გამარჯვებისთვის და მხოლოდ გამარჯვებისთვის! ეს ჩანდა გუშინ, ეს ჩანს დღეს, ეს გამოჩნდება ხვალ და ყოველ დღე, სანამ ივანიშვილი არ გაიწვევს “რუსულ კანონს”! ივანიშვილმა მერამდენედ მოატყუა ქართველი ხალხი, მერამდენედ მოგატყუათ თქვენ, იმიტომ, რომ ძალიან ბევრი თქვენგანი აქ იდგა შარშან, აქ ამბობდა: “არა რუსულ კანონს” და სწორედ თქვენი დამსახურებით გაიწვია ივანიშვილმა “რუსული კანონი”. სწორედ თქვენი დამსახურებით მიიღო საქართველომ ევროკავშირის კანდიდატი ქვეყნის სტატუსი. ეს ძალიან დიდი მონაპოვარი, რომლის წართმევასაც ახლა ცდილობს ივანიშვილის პარტია, მაგრამ ვერ წაგვართმევენ! ვერ წაგვართმევენ ევროპულ მომავალს. იცით რატომ? იმიტომ, რომ თქვენ ხართ აქ, იმიტომ, რომ ერთიანი ვართ და ამის ეშინია ყველაზე მეტად ივანიშვილს! ივანიშვილს სწორედ ჩვენი ერთიანობის ეშინია!,” – განაცხადა ბოკუჩავამ.

აქციის – “არა რუსულ კანონს” მონაწილეების მიერ ხელისუფლებისთვის “უცხოური გამჭვირვალობის შესახებ” კანონპროექტისგაწვევისთვის მიცემული 1 – საათიანი ვადა ამოიწურა.

აქციის ერთ-ერთმა წამყვანმა, ლევან ცუცქირიძემ მოუწოდა აქციის მონაწილეებს, რომ მთავრობის ადმინისტრაციასთან გადაინაცვლონ.

„ჩვენ გვინდა შემოგთავაზოთ, რომ ახლა ჩვენთან ერთად, მშვიდობიანად, წყნარად წავიდეთ სახელმწიფო კანცელარიასთან და მოვითხოვოთ, რომ გამოვიდეს პრემიერ – მინისტრი და დაგველაპარაკოს”, – განაცხადა ლევან ცუცქირიძემ.

ლევან ცუცქირიძის განცხადებით, მთავრობის ადმინისტრაციასთან გადანაცვლების შემდეგ,ისინი ხელისუფლებისგან კანონის უკან გაწვევასთან ერთად და დაკავებულების გათავისუფლებას მოითხოვენ.

შეგახსენებთ, რომ „უცხოური გავლენის გამჭვირვალობის შესახებ“ კანონპროექტის გასაპროტესტებლად მოქალაქეები პარლამენტის უკანა შესასვლელთან დღეს, 12:00 საათიდან შეიკრიბნენ, ხოლო 19:00 საათიდან აქცია პარლამენტის წინ გაგრძელდა. კანონპროექტს მოქალაქეები მესამე დღეა აპროტესტებენ.

საქართველოს პარლამენტმა, 83 ხმით „უცხოური გავლენის გამჭვირვალობის შესახებ“ კანონპროექტი დღეს პირველი მოსმენით მიიღო. კანონპროექტის კენჭისყრას სამდღიანი ხმაურიანი საკომიტეტო და სასესიო განხილვა უძღოდა წინ.

პრიმიტიულ, უმეცარ კითხვაზე – სად გინდა შენ, რუსეთში თუ ევროპაში? რა თქმა უნდა ყველა ჩვენგანის პასუხი ერთია, – განაცხადა მედიასთან საუბარში პარტია „ხალხის ძალის“ პოლიტიკურმა მდივანმა მიხეილ ყაველაშვილმა.

მისივე თქმით, აქციების უკან, რომელიც რამდენიმე დღეა იმართება პარლამენტის მიმდებარე ტერიტორიაზე, „კოლექტიური ნაციონალური მოძრაობა“ დგას, რომელშიც სხვადასხვა არასამთავრობო ორგანიზაცია და „ნაციონალური მოძრაობიდან“ ხალხის დასანახად გასული ცნობილი სახეები შედიან.

ყაველაშვილმა ისაუბრა საქართველოს ეროვნულ საფეხბურთო ნაკრების ფეხბურთელებზეც და მოუწოდა მათ დრო დაუთმონ პრემიერ-მინისტრის დღეს გამართულ ბრიფინგს, სადაც ის დეტალურად საუბრობს ქვეყანაში მიმდინარე პროცესებზე.

„განა ფეხბურთელებს თავიანთი პოზიცია არ უნდა ჰქონდეთ პოლიტიკაში მიმდინარე მოვლენებზე, ამას არავინ ამბობს – საქართველო მათი ქვეყანაა და დიახ, ყველა მოვლენაზე თავიანთი აზრი უნდა გააჩნდეთ. უბრალოდ რჩევის სახით ვეტყვი, დღეს ბრიფინგი ჰქონდა საქართველოს პრემიერ-მინისტრს, სხვათა შორის ნაკრების დიდი გულშემატკივარია და დეტალებში განმარტა, თუ რა პროცესებთან გვაქვს დღეს საქმე. ექნებათ ბიჭებს იმის საშუალება, რომ ოცი წუთი გამოყონ და მოუსმინონ რას საუბრობს პრემიერ-მინისტრი გამჭვირვალობის საკითხთან დაკავშირებით. სხვათა შორისს ისინი ევროპაში თამაშობენ და დიახ, ჩვენ გავკვალეთ გზა, რომ მათ დღეს ევროპაში ეთამაშათ. ამ ბიჭებსაც უწევთ გამოწვევების გადალახვა, თქვენ რა გგონიათ, რომ ყველა კეთილად არის განწყობილი მათ მიმართ?

ამ პრიმიტიულ, უმეცარ კითხვაზე – სად გინდა შენ, რუსეთში თუ ევროპაში? რა თქმა უნდა ყველა ჩვენგანის პასუხი ერთია.

მინდა იმ ახალგაზრდებს, რომლებიც დგანან აქციაზე ვუთხრა, იმ ადამიანების უკან, რომლებიც მათ აქციებში ჩართვისკენ მოუწოდებენ, დგას ეკა გიგაური, რომლის ორგანიზაციას გამჭვირვალობა ჰქვია და რომელმაც დღეს გააზიარა პოსტი, სადაც წერია, რომ 83 კუბო უნდა წარმოადგინონ პარლამენტარებისთვის და ჩვენ ამ კუბოში უნდა შევწვეთ. არის მოწოდებები, რომ მოღალატეებს გაგვანადგურებენ და რატომ უნდა გაგვანადგურონ? ჩვენს სახელმწიფოს რომ ვიცავთ და მათი ორგანიზაციების გამჭვირვალობას რომ მოვითხოვთ? იმისთვის, რომ გვინდა საზოგადოებას ჰქონდეს საშუალება ნახოს ის დეკლარაცია, სადაც ასახული იქნება თუ საიდან ფინანსდებიან.

საქართველოს სირცხვილი იქნება თუ გიგაურისა და ლომჯარიას დეკლარაციის გამო ჩვენს ქვეყანას რევოლუციას მოუწყობენ. სულის ამოხდით ემუქრებოდა საქართველოს გივი თარგამაძე, რომელიც აქციაზე გამოჩნდა და პოლიციელებს ამუნათებს. შოთა უტიაშვილი, ბაჩო ახალაია, გვარამია, მელია და მთლიანად „კოლექტიური ნაციონალური მოძრაობა“. ეს ხალხი გვამუნათებს დღეს ჩვენ. ეს ადამიანები დგანან ამ აქციების უკან. ამიტომაც გვსურს, ჩვენ „ნაციონალური მოძრაობის“ პოლიტიკური ველიდან გაქრობა და გასამართლება“, – განაცხადა მიხეილ ყაველაშვილმა.