„ამერიკის შეერთებული შტატების კონგრესის ქვედა სტრუქტურა – წარმომადგენელთა პალატა ისრაელისა და უკრაინის დახმარებას ამ კვირაში ცალ-ცალკე კანონპროექტად განიხილავს. ეს განცხადება პალატის რესპუბლიკელმა სპიკერმა მაიკ ჯონსონმა 16 აპრილს გააკეთა“, – ნათქვამია ბრიტანული საინფორმაციო-ანალიტიკური სააგენტოს „როიტერის“ (Reuters) მიერ გავრცელებულ სტატიაში სათაურით „უკრაინის და ისრაელის დახმარებას აშშ-ის კონგრესის წარმომადგენელთა პალატა ცალ-ცალკე განიხილავს“ (ავტორები – პატრიცია ზენგერლე, რიჩარდ კოენი და დევიდ მორგანი).

პუბლიკაციაში ვკითხულობთ:

როგორც ცნობილია, დემოკრატებით კონტროლირებულმა სენატმა, $95-მილიარდიანი საბიუჯეტო კანონპროექტი ორპარტიული მხარდაჭერით, ორ თვეზე მეტი ხნის წინ დაამტკიცა. პალატა ამ დრომდე აჭიანურებდა მის განხილვას და სანაცვლოდ ქვეყნის შიდა პოლიტიკაში, განსაკუთრებით საიმიგრაციო პოლიტიკის კუთხით, ცვლილებებს ითხოვდა. რუსეთის წინააღმდეგ თავდაცვით ომში მყოფი უკრაინის სამხედრო დახმარებასთან ერთად, სენატის მიერ დამტკიცებულ კანონპროექტში გათვალისწინებული იყო ისრაელის მხარდაჭერა და ტაივანში ამერიკული შეიარაღების გაგზავნის დაფინანსება.

გამოვიდა რა პალატის რესპუბლიკელებთან გამართული შეხვედრიდან, მაიკ ჯონსონმა ჟურნალისტებთან შემდეგი განცხადება გააკეთა: ”ვიცით, რომ მსოფლიო შემოგვყურებს იმის შესატყობად, თუ რა რეაგირება გვექნება… ისინი აკვირდებიან, დადგება თუ არა ამერიკა მთელ მსოფლიოში თავისი მოკავშირეების გვერდით და ჩვენი ინტერესების მხარდასაჭერად”.

მაიკ ჯონსონის თქმით, პალატის ახალი კანონპროექტები ამ ქვეყნებისთვის დაახლოებით იგივე რაოდენობის უცხოურ დახმარებას ითვალისწინებს, როგორიც სენატის კანონპროექტშია მითითებული. თუმცა, წარმომადგენელთა პალატის სპიკერი აცხადებს, რომ აქედან გარკვეული დახმარება სესხის სახით გაიცემა.

საკანონმდებლო პროექტის გამოქვეყნება ხუთშაბათს, 18 აპრილს იგეგმება. კენჭისყრაზე ის სავარაუდოდ, 72-საათიანი განხილვის შემდეგ დადგება. მაიკ ჯონსონის ვარაუდით, კანონპროექტი შესაძლოა პარასკევს გვიან ღამით დამტკიცდეს. საუბარია 4 საკანონმდებლო პროექტზე, რომელთა შორის სახელდება უკრაინის, ისრაელის და ინდოეთ-წყნარი ოკეანის რეგიონის კანონპროექტები. მეოთხეს რაობა ჯერჯერობით დაზუსტებული არ არის.

რესპუბლიკელი კანონმდებლები, რომლებიც მხარს უჭერენ უკრაინის დახმარებას, იმედგაცრუებულნი არიან კანონპროექტის განხილვის გაჭიანურების გამო. ამის მიზეზია ის, რომ რუსეთთან შედარებით, უკრაინის არმიის რესურსები ძალზე მწირია და კიევის თავდაცვა, განსაკუთრებით უკრაინის რაკეტსაწინააღმდეგო შესაძლებლობები, უფრო და უფრო მეტადაა დამოკიდებული ამერიკის მხრიდან საბრძოლო მასალით დახმარებაზე.

გასულ კვირას, უკრაინის ერთ-ერთი უმსხვილესი ელექტროსადგური განადგურდა და რამდენიმე მნიშვნელოვნად დაზიანდა, მოსკოვის მიერ სარაკეტო და დრონებით მიტანილი მასიური თავდასხმის შედეგად.

პარალელურად, იზრდება ულტრაკონსერვატორ რესპუბლიკელთა რიცხვი, რომლებიც ღიად უპირისპირდებიან მაიკ ჯონსონს. ზოგიერთი მათგანი სპიკერის გადაყენებაზეც კი საუბრობს. ისინი ითხოვენ, რომ პალატის სპიკერმა, პრეზიდენტ ჯო ბაიდენის მიერ წარმოდგენილი საბიუჯეტო კანონპროექტი, მათი მოთხოვნების გათვალისწინების გარეშე, კენჭისყრაზე არც კი დააყენოს. რესპუბლიკელთა სავარაუდო საპრეზიდენტო კანდიდატ, ამერიკის ყოფილ პრეზიდენტ დონალდ ტრამპთან მიმდინარე კონსულტაციებით, კონსერვატორ რესპუბლიკელთა მოთხოვნებს შორის არის უკრაინის დახმარების ნაწილის ვალად რესტრუქტურირება და მექსიკასთან, აშშ-ის სამხრეთ საზღვარზე, პოლიტიკის შეცვლა.

წყარო

დასავლეთის ქვეყნების მასობრივი ინფორმაციის საშუალებები – რადიო-ტელევიზია, საინფორმაციო სააგენტოები და პრესა ყურადღებას უთმობს საქართველოში მიმდინარე მოვლენებს – ოპოზიციური პარტიების, არასამთავრობო ორგანიზაციებისა და საზოგადოების გარკვეული ნაწილის მიერ გამოხატულ უკმაყოფილებას კანონპროექტის „უცხოური გავლენის გამჭვირვალობის შესახებ“ პარლამენტში განხილვის გამო (რომელიც „პრორუსული კანონის“ სახელითაა ცნობილი) და ამ ფონზე აქტიურად აშუქებენ საკანონმდებლო ორგანოში მომხდარ ინციდენტს დეპუტატებს შორის.

გერმანული გაზეთი „ფრანკფურტერ რუნდშაუ“ (Frankfurter Rundschau) აქვეყნებს სტატიას სათაურით „ცემა-ტყეპა საქართველოს პარლამენტში: მიზეზი – „პრორუსული კანონპროექტი“ (ავტორი – ფრანცისკა შვარცი).

გთავაზობთ პუბლიკაციის შემოკლებულ ვერსიას:

საქართველოს პარლამენტში დეპუტატები ერთმანეთს დაერივნენ იმ სადაო კანონპროექტის განხილვის დროს, რომელიც, ზოგიერთების აზრით, „უცხოეთის ქვეყნების ინტერესებს გამოხატავს“.

ოპოზიციურმა დეპუტატმა, კანონპროექტისადმი პროტესტის ნიშნად, მუშტი უთავაზა მმართველი პარტიის „ქართული ოცნების“ საპარლამენტო ფრაქციის ლიდერს, რომელიც კანონპროექტისადმი მხარს დასაჭერად ტრიბუნაზე გამოდიოდა. ატეხილი ფიზიკური შეხლა-შემოხლის გამო პლენარული სხდომის პირდაპირი სატელევიზიო ტრანსლაცია შეწყდა.

იმავდროულად კი საკანონმდებლო შენობის წინ თავმოყრილი 10 ათასამდე ადამიანი კანონპროექტს აპროტესტებდა: ევროკავშირის დროშებს აფრიალებდნენ და გაჰყვიროდნენ – „არა – რუსულ კანონმდებლობას“.

„პრორუსული კანონი“ და „სახელმწიფოს მტრები“

საქართველოს მმართველი პარტიის მიერ შემუშავებულ კანონპროექტს ანალოგიური მიზნები აქვს, რაც 2012 წელს მიღებულ რუსეთის კანონს, რომელსაც კრემლი მასმედიაზე ზეგავლენის მოსახდენად, აგრეთვე მთავრობის კრიტიკოსებისა და სხვა ოპოზიციონერების წინააღმდეგ იყენებს. კანონპროექტში დაფიქსირებულია ტერმინი „უცხოეთის გავლენის აგენტი“, რომლის ფესვები საბჭოთა პერიოდში მიდის და იმას ნიშნავს, რომ ასეთი ადამიანები სახელმწიფოს მოღალატეები და მტრები არიან.

კანონპროექტის თანახმად, ის ორგანიზაციები, რომლებიც საზღვარგარეთიდან ფინანსდებიან თავიანთი ბიუჯეტის 20%-ზე მეტი თანხით, სახელმწიფო რეგისტრაცია უნდა გაიარონ. დოკუმენტის ადრინდელ, პირველ ვარიანტში ასეთი ორგანიზაციები „უცხოურ აგენტებს“ წარმოადგენენ, ხოლო ამჟამინდელში – „უცხოეთის სახელმწიფოს ინტერესების გამტარებელ ორგანიზაციებს“.

ევროკავშირ-ნატოსაკენ და რუსეთისაკენ – ერთდროულად?

ქართულ საზოგადოებაში მმართველი პარტიის მიმართ ეჭვი არსებობს, რომ „ქართული ოცნება“ კრემლთან ფარულად თანამშრომლობს.

საქართველოში სამოქალაქო საზოგადოების ბევრი პროექტის განხორციელება დასავლურ ფულზეა დამოკიდებული. კანონპროექტის კრიტიკოსები თვლიან, რომ ქვეყნის მთავრობამ დასავლური განვითარების კურსიდან გადაუხვია, ამიტომ ხელისუფლებას პროდასავლური ძალების დასუსტებისა და პრორუსული ინტერესების გატარების სურვილში ადანაშაულებენ.
საქართველო, რომელიც ექს-საბჭოთა რესპუბლიკას წარმოადგენს, ევროატლანტიკური ინტეგრაციისაკენ ისწრაფვის, ქვეყანა გასული წლის დეკემბერში ოფიციალურად ევროკავშირში მიღების კანდიდატიც გახდა.

ბრიუსელმა ნეგატიურად შეაფასა ზემოთ აღნიშნული კანონპროექტი და თბილისს მისი განხილვის შეჩერება მოსთხოვა. ბოლო დროს ქვეყნის მთავრობის მიერ მიღებული ზომები და გადაწყვეტილებები (ირაკლი ღარიბაშვილის პრემიერობის პერიოდში) იმას მიანიშნებს, რომ საქართველო შეიძლება კვლავ რუსეთისაკენ შებრუნდეს.

მოამზადა სიმონ კილაძემ

წყარო: