მივესალმები „თავისუფლების მოედნის“ დაფუძნებას – წარმატებას ვუსურვებ ლევანს და მის გუნდს ამ რთულ, მაგრამ ძალიან მნიშვნელოვან ბრძოლაში, – ამის შესახებ „ლელოს“ ლიდერი, მამუკა ხაზარაძე სოციალურ ქსელში წერს.

მისივე თქმით, აღნიშნულ ორგანიზაციაში პროფესიონალი ადამიანები არიან გაერთიანებულები.

„მივესალმები „თავისუფლების მოედნის“ დაფუძნებას. ჩემთვის ბევრი ნაცნობი და პროფესიონალი ადამიანის ერთობაა. თავისუფალი ადამიანები, რომლებიც ასე ძალიან სჭირდება დღეს ქართულ პოლიტიკას. წარმატებას ვუსურვებ ლევანს და მის გუნდს ამ რთულ, მაგრამ ძალიან მნიშვნელოვან ბრძოლაში. არა რუსულ მთავრობას! გამარჯვება ახლოსაა“! – წერს ხაზარაძე.

ცნობისთვის, პოლიტიკური მოძრაობა – „თავისუფლების მოედანი“ დაფუძნდა. ახალი პოლიტიკური მოძრაობის პრეზენტაცია რიყის პარკში გაიმართა, სადაც საზოგადოებას პლატფორმის ხედვები, მიზნები და წევრები გააცნეს.

როგორც „თავისუფლების მოედანი” ერთ-ერთმა დამფუძნებელმა, ლევან ცუცქირიძემ მედიასთან საუბრისას განაცხადა, მოძრაობა შედგება არაპარტიული პროფესიონალი ადამიანებისგან, რომლებმაც საკუთარი საქმე სახელმწიფო დონეზე იციან.

არასამთავრობო სექტორის წარმომადგენლებმა პოლიტიკური მოძრაობა „თავისუფლების მოედანი“ დააფუძნეს, რომლის პრეზიეტნაციაც დღეს გაიმართა.

როგორც „უცხოური გამჭვირვალობის გავლენის შესახებ“ კანონის საწინააღმდეგო აქციების ერთ-ერთმა ორგანიზატორმა, ლევან ცუცქირიძემ პოლიტიკური გაერთიანების პრეზენტაციისას განაცხადა, ხელისუფლების ცვლილება აუცილებლად უნდა მოხდეს 26 ოქტომბრის არჩევნებზე.

„ხელისუფლების ცვლილება აუცილებლად უნდა მოხდეს 2024 წლის 26 ოქტომბერს, მაგრამ ამან აუცილებლად უნდა მოიტანოს ისეთი ცვლილებები, რომელთა შედეგადაც ვერცერთი ხელისუფლება ვეღარ გაბედავს ხალხისთვის მიცემული სიტყვის გატეხვას, როგორც ეს „ქართულმა ოცნებამ“ არაერთხელ გააკეთა. მიგვაჩნია, რომ ამ საქმეში ყველა, ვინც ჩვენი წინააღმდეგი არ არის, არის ჩვენთან. ამიტომ მზად ვართ, ყველა იმ სამოქალაქო თუ  პოლიტიკურ ჯგუფთან თანამშრომლობისთვის, რომლებიც იზიარებენ ჩვენს ხედვას“, – განაცხადა ცუცქირიძემ და აღნიშნა, რომ ასევე მხარს უჭერენ პრეზიდენტის მიერ წარმოდგენილ ქარტიას.

ლევან ცუცქირიძემ ასევე წარადგინა გაერთიანების წევრები, რომელთა შორის არიან სიმონ ჯანაშია, ბაკურ კვაშილავა, ზურაბ ფარჯიანი, დავით გზირიშვილი.

ჩვენ და მრავალმა სხვა ქვეყანამ არამხოლოდ გამოვთქვით შეშფოთება კანონის მიღებასთან დაკავშირებით, ასევე მივიღეთ ზომები ამ შეშფოთების გამოსახატად, ვფიქრობ, კიდევ მეტსაც ნახავთ, – ამის შესახებ აშშ-ის სახელმწიფო მდივანმა, ენტონი ბლინკენმა „უცხოური გავლენის გამჭვირვალობის შესახებ“ საქართველოში მიღებულ კანონთან დაკავშირებით განაცხადა.

ბლინკენმა მონაწილეობა მიიღო ბრუკინგსის ინსტიტუტის დისკუსიაში თემაზე – აშშ-ის საგარეო პოლიტიკა. დისკუსიაზე აშშ-ის სახელმწიფო მდივანს კითხვა დაუსვეს საქართველოზე, კერძოდ, მომავალ საპარლამენტო არჩევნებზე, „უცხოური გავლენის გამჭვირვალობის შესახებ“ კანონზე და, ზოგადად, სამხრეთ კავკასიაზე. ბლინკენს ჰკითხეს, როგორია აშშ-ის ხედვა რეგიონში გლობალური ძალების ინტერესებთან დაკავშირებით.

„თქვენ ძალიან სწორედ აღნიშნეთ უზარმაზარი ძვრების შესახებ რეგიონში. ჩვენ გვაქვს ძალიან სერიოზული შეშფოთებები, თუმცა ასევე გვაქვს რეალური შესაძლებლობები. თქვენ აღნიშნეთ „უცხოური აგენტების შესახებ“ კანონი საქართველოში. ჩვენ და მრავალმა სხვა ქვეყანამ არამხოლოდ გამოვთქვით ჩვენი ღრმა შეშფოთება ამასთან დაკავშირებით, განსაკუთრებით მის მიღებასთან დაკავშირებით, ჩვენ ასევე მივიღეთ ზომები ამ შეშფოთების გამოსახატად. ვფიქრობ, კიდევ უფრო მეტსაც ნახავთ. ეს ცხადია. ვფიქრობ, ეს ეწინააღმდეგება საქართველოს ევროპულ მიმართულებას, რომელიც საქართველოსა და ქართველის ხალხის უმრავლესობას სურს. ასე რომ, ჩვენთვის ცნობილია ეს გამოწვევები, მათ შორის საქართველოში. ასევე ძალიან ფოკუსირებული ვართ გარკვეულ შესაძლებლობებზე და ეს შესაძლებლობები რეალურია“, – განაცხადა ენტონი ბლინკენმა.

საქართველოს პარლამენტის თავმჯდომარის მოადგილე, არჩილ თალაკვაძე ეხმაურება ოპოზიციის მცდელობებს, რომ მომავალი არჩევნების ლეგიტიმურობა ეჭვქვეშ დააყენოს და აცხადებს, რომ მათი მთავარი მიზანია არჩევნები წაართვან მოსახლეობას და ამის ნაცვლად ძალადობრივი აქციებით მოიპოვონ ხელისუფლება.

“ამას აქვს ერთადერთი ახსნა, თუ რატომ მოქმედებს ასე რადიკალური ოპოზიცია. შეგახსენებთ, რომ დღეს საქართველოს აქვს მრავალპარტიული პარლამენტი, თუმცა ეს ოპოზიცია არ დადის სხდომებზე და არ უნდა, რომ იყოს ნამდვილი ოპოზიცია. ასეთი საქციელი დემოკრატიასთან შეუთავსებელია და ანომალიაა.

პოლიტიკურ პარტიებს ჩვენ მივეცით საკმაოდ სოლიდური საბიუჯეტო დაფინანსება, ასევე დავწიეთ ბარიერი, რომ პოლიტიკური პარტიები შესულიყვნენ პარლამენტში და საქართველოს ჰქონოდა მრავალპარტიული პარლამენტი. მას შემდეგ, რაც „ნაციონალური მოძრაობა“ დამარცხდა არაერთ დემოკრატიულ არჩევნებში, მათ რეალურად არ აქვთ იმედი, რომ რაიმე შედეგს აჩვენებენ და ექნებათ წარმატებული მცდელობა როგორმე ხელისუფლებაში დაბრუნდნენ არჩევნებით, ამიტომ აირჩიეს ანტიდემოკრატიული გზა.

ეს არის ძალადობრივი სცენარი, როცა სურთ უმცირესობის ძალადობრივი გეგმით მოხდეს ქვეყანაში ცვლილება, გადაწყვეტილება თავს მოახვიონ მოქალაქეებს, არჩევნები წაართვან და არა არჩევნებით მიიღოს ხალხმა გადაწყვეტილება, არამედ ძალადობრივი აქციებით. პარლამენტზე და ცესკოზე შეტევით.

მას შემდეგ, რაც ჩვენ დავნერგეთ ელექტრონული არჩევნების სისტემა, რომელიც გამორიცხავს ჩარევებს და მანიპულაციას ხმების დათვლის პროცესში, ისინი პირდაპირ გადავიდნენ გეგმაზე და წინასწარ ცდილობენ არჩევნების დისკრედიტაციას. არჩევნები მათთვის ჩაითვლება “გაყალბებულად” თუ მათ ვერ გაიმარჯვეს, ეს არის მათი მიდგომა დემოკრატიაზე” –განაცხადა თალაკვაძემ.

არჩილ თალაკვაძემ ასევე განმარტა, რომ უკვე ჩატარებულ შუალედურ არჩევნებში, სადაც ცესკომ ხმების დათვლის ელექტრონული სისტემა გამოიყენა, დათვლილი ხმები სრული სიზუსტით დაემთხვა რეალური ბიულეტენების რაოდენობას.

“ელექტრონული დათვლის სისტემას წინასწარ აკრიტიკებენ, არა და ამას ითხოვდა ყველა, მაშინ როდესაც არ ჰქონდა საქართველოს ეს სისტემა დანერგილი. 12–მა საერთაშორისო სადამკვირვებლო ორგანიზაციამ დაადასტურა, რომ იმ 5 შუალედურ არჩევნებში, სადაც საქართველომ ეს სისტემა გამოიყენა, ხმები ზუსტად, ერთი–ერთში დაემთხვა რეალური ბიულეტენების რაოდენობას” – აღნიშნა პარლამენტის თავმჯდომარის მოადგილემ.