ლიეტუვის სეიმმა მიიღო რეზოლუცია, რომელშიც საქართველოს ხელისუფლებას მოუწოდებს, „უცხოური გავლენის გამჭვირვალობის შესახებ“ კანონი გაიწვიოს. დოკუმენტის ტექსტი სოციალურ ქსელში ლიეტუვის სეიმის საგარეო ურთიერთობათა კომიტეტის თავმჯდომარემ, ჟიგიმანტას პავიოლიონისმა გამოაქვეყნა.

რეზოლუციაში ლიეტუველი დეპუტატები შეშფოთებას გამოთქვამენ საქართველოს პარლამენტის მიერ „უცხოური გავლენის გამჭვირვალობის შესახებ“ კანონის მიღების გამო. მათი თქმით, კანონი მიმართულია არასამთავრობო ორგანიზაციებისა და სამოქალაქო საზოგადოების საქმიანობის შეზღუდვისკენ და არსებითად რუსეთის ფედერაციის მიერ მიღებული „უცხოეთის აგენტების შესახებ“ კანონის ეკვივალენტურია. ლიეტუველის დეპუტატების თქმით, საქართველოში მიღებული კანონი არ შეესაბამება ევროპულ ღირებულებებს და დემოკრატიულ პრინციპებს.

დოკუმენტში გამოთქმულია წუხილი, რომ საქართველოს მთავრობის ნაბიჯები არ არის თანხვედრაში საქართველოს მოქალაქეების მისწრაფებებთან და საქართველოს გაცხადებულ მიზნებთან, ქვეყანა ევროკავშირისა და ნატოს წევრი გახდეს. მათვე თქმით, საქართველოს მთავრობის ქმედებებს შესაძლოა, სეროზული გრძელვადიანი შედეგი მოჰყვეს საქართველოს გეოპოლიტიკური ორიენტაციისა და დემოკრატიისთვის.

რეზოლუციაში ლიეტუველი დეპუტატები მხარდაჭერას უცხადებენ ქართველ ხალხს, რომელიც იცავს საკუთარი მოსაზრების გამოხატვის თავისუფლებას და საქართველოს ევროპულ მომავალს. დოკუმენტში მკაცრად არის დაგმობილი მშვიდობიანი დემონსტრანტებისა და ჟურნალისტების მიმართ ძალის გამოყენება, ასევე, ცილისმწამებლური, დაშინების ორგანიზებული კამპანია და სამოქალაქო საზოგადოების წარმომადგენელთა მიმართ ძალადობა. ლიეტუველი დეპუტატების თქმით, მსგავსი ქმედებები, რომლებიც მიმართულია მშვიდობიანია შეკრებების და გამოხატვის თავისუფლების ჩახშობისკენ, მიუღებელია ევროკავშირის წევრობის კანდიდატ ქვეყანაში.რეზოლუციაში ლიეტუვის სეიმის წევრები შეახსენებენ საქართველოს მმართველ პარტიას, რომ მას მოუწევს პასუხისმგებლობის აღება დემოკრატიული საზოგადოებების პრინციპების დარღვევებზე, რომლებიც შეუსაბამოა ევროკავშირის წევრობის კანდიდატი ქვეყნებისთვის დაწესებულ პოლიტიკურ კრიტერიუმებთან.

ლიეტუველი დეპუტატები მოუწოდებენ საქართველოს პარლამენტს გაიწვიოს „უცხოური გავლენის გამჭვირვალობის“ შესახებ კანონი, უზრუნველყოს შეკრებისა და გამოხატვის თავისუფლება, გააძლიეროს სამოქალაქო საზოგადოება, ჩაერთოს მასთან დიალოგში და დაიცვას კონსტიტუციური ვალდებულება, რომელიც გულისხმობს ევროკავშირსა და ნატოში ინტეგრაციასა და საჭირო რეფორმების გაგრძელებას. ამასთან, ლიეტუვის სეიმის წევრები მოუწოდებენ ევროკავშირის ინსტიტუტებს განიხილონ საპასუხო ნაბიჯების გადადგმის შესაძლებლობა, თუ საქართველოს მთავრობა უარყოფს პრეზიდენტ სალომე ზურაბიშვილის ვეტოს, გააგრძელებს კანონის იმპლემენტაციას და სამოქალაქო საზოგადოების დევნას.

სამწუხაროა, მაგრამ რეალობაა, რომ საერთაშორისო აქტორები და „ნაციონალური მოძრაობა“ ერთად დგანან. ვფიქრობ, საზოგადოების უმრავლესობას უჩნდება კითხვა, რა ერთობლივ ინტერესებს ემსახურებიან ისინი. საქართველო არ გახდება ომისა და ბომბების ცვენის ადგილი, – ამის შესახებ პარლამენტის თავმჯდომარის მოადგილემ, ნინო წილოსანმა „დღის ქრონიკაში“ განაცხადა.

„არ ვიცი, თუ არის კიდევ დარჩენილი ადამიანი, რომელიც ფიქრობს, რომ ჩვენს ოპოზიციას აზრი მოეკითხება. ეს ადამიანები მინიმუმ მე-4 მოწვევის პარლამენტში არიან და ის არ იციან, მესამე მოსმენა რას გულისხმობს, არ იციან მესამე მოსმენა როდის დაიწყება და როდის დასრულდება, პარლამენტის წევრებს არ იცნობენ. აღმოჩნდა, რომ ხატია დეკანოიძე გარემოს დაცვისა და ბუნებრივი რესურსების კომიტეტის თავმჯდომარის მოადგილეს, სალომე ქურასბედიანს არ იცნობს და ეს თურმე სალომეს პრობლემაა და არა ხატიასი. ეს არის სამარცხვინო ოპოზიცია. აღარ ვსაუბრობ იმ მავნებლობებზე, რომელსაც ისინი აკეთებენ. ის ფაქტი, რომ რეპუტაციულად სრულად გაცამტვერებული ოპოზიცია რაღაცით უნდა სულდგმულობდეს, ამ ყველაფერს ნამდვილად ეხმარება გარედან გაკეთებული განცხადებები“, – აღნიშნა ნინო წილოსანმა.

ერთ მხარეს დგას ბოროტება, ტყუილი, სიძულვილი, მეორე მხარეს – სიკეთე, სიყვარული, ერთობა, ევროპა და განვითარება, – ამის შესახებ „ერთიანი ნაციონალური მოძრაობის“ თავმჯდომარე ლევან ხაბეიშვილი სოციალურ ქსელში წერს.

„შუაში არის დიდი ორმო. ერთ მხარეს დგას ბოროტება, ტყუილი, სიძულვილი, დაპირისპირება, კრემლის მარიონეტები და ივანიშვილის ინტერესები; მეორე მხარეს დგას სიკეთე, კეთილდღეობა, ხალხი, სახელმწიფო, სიყვარული, ერთობა, ევროპა და განვითარება. რომელი მხარე გაიმარჯვებს, დარწმუნებული ვარ, ხვდებით და ამიტომ არავის ვუსურვებ „ორმოში“ ჩავარდნას. „ბოროტსა სძლია კეთილმან““… – წერს სოციალურ ქსელში ლევან ხაბეიშვილი.

„ნაცებს”, ქვეყნის ასარევად მეტი რომ აღარაფერი დარჩათ, მორიგ უზნეო პროპაგანდაზე გადავიდნენ – ამერიკელებს “ქართული ოცნების” ხალხზე კომპრომატები აქვთო და ამით იმუქრებიან, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, რატი იონათამიშვილი სოციალურ ქსელში წერს.

მისი განცხადებით, “უჩა აბაშიძის მორალის ხალხი, კასრის სინდრომისგან ვერ გათავისუფლდა, რაც დიაგნოზია და ოპონენტების სასოწარკვეთილებაზე მეტყველებს”.

“ნაცებს”, ქვეყნის ასარევად მეტი რომ აღარაფერი დარჩათ, მორიგ უზნეო პროპაგანდაზე გადავიდნენ – ამერიკელებს “ქართული ოცნების” ხალხზე კომპრომატები აქვთო და ამით იმუქრებიან. უჩა აბაშიძის მორალის ხალხი კასრის სინდრომისგან რომ ვერ გათავისუფლდა, ეს უკვე დიაგნოზია, მაგრამ საინფორმაციო გამოშვებებს ამით იწყებენ და სოცქსელებშიც სტატუსს სტატუსზე წერენ.

ანუ, იმედი აქვთ, რომ ვაშინგტონში არსებობს კასრები, სადაც ჩვენზე კომპრომატები ინახება, რომელსაც გამოგვიქვეყნებენ და ჩამოგვშლიან. მე მაინც მგონია, რომ სასოწარკვეთილებისგან გაგიჟდნენ”, – წერს იონათამიშვილი.

ცნობისთვის, „რადიო თავისუფლების“ ინფორმაციით, წყარო „რადიო თავისუფლების“ კორესპონდენტს ვაშინგტონში ეუბნება, რომ შეერთებული შტატები ფლობს ინფორმაციას, რომელსაც “ქართული პოლიტიკური ელიტის წარმომადგენლების რეპუტაციის გაცამტვერება შეუძლია“.

გარდა აღნიშნულისა განმარტავენ, რომ „რადიო თავისუფლების“ ვაშინგტონის ბიუროს ჟურნალისტს კანონპროექტზე მომუშავე გუნდის წევრმა ანონიმურობის პირობით განუცხადა, რომ MEGOBARI Act-ზე მუშაობა რამდენიმე თვეა მიმდინარეობს, რამდენადაც კონგრესში ექსპერტები მოელოდნენ, რომ “ქართული ოცნება” შარშან პროტესტის ფონზე გაწვეული კანონპროექტის ხელახლა მიღებას შეეცდებოდა. „რადიო თავისუფლების“ ცნობით, კანონპროექტი აშშ-ის პრეზიდენტის ადმინისტრაციას ავალდებულებს საქართველოში რუსეთისა და ჩინეთის გავლენის შესწავლას, მათ შორის უსაფრთხოების სფეროში.

„რადიო თავისუფლებაში“ განმარტავენ, რომ კანონპროექტში ჩახედული წყაროს ცნობით, ამ საკითხზე გადაწყვეტილება – მათ შორის სანქციებსა და რუსეთისა და ჩინეთის მავნე გავლენის საკითხებზე – შესაძლოა მალე გამოცხადდეს MEGOBARI Act-ის მიღების შემთხვევაში.

როგორც სტატიაშია ნათქვამი, წყარო ასევე განმარტავს: „ქართულ პოლიტიკურ ელიტაში რუსი აგენტების გამოაშკარავება, ისევე როგორც ჩინეთის გავლენის შემთხვევების გამოვლენა, საფუძველს გამოაცლის „ქართული ოცნების“ ნარატივს, რომლის თანახმად, ის ქვეყნის სუვერენიტეტს იცავს „უცხოური აგენტების“ კანონპროექტით”.