Home Blog Page 1080

ეროვნული ნაკრები როდესაც გამოვა და იტყვის – „მე ვარ საქართველო“, წარმომიდგენია, როგორი სიამაყის განცდა დაეუფლება მთელ ქვეყანას -კახა კალაძე

ევროპის ჩემპიონატზე საქართველოს ეროვნული საფეხბურთო ნაკრების პირველი თამაშის წინ დედაქალაქის მერმა კახა კალაძემ სოციალურ ქსელში ვიდეომიმართვა გაავრცელა.

კახა კალაძემ ნაკრებს კიდევ ერთხელ უსურვა წარმატება და აღნიშნა, რომ ევროპის ჩემპიონატზე საქართველოს ეროვნული მაისურით გამოსვლა თითოეული ქართველის გამარჯვებაა.

„წარმომიდგენია, რა ხდება ახლა საქართველოს დედაქალაქში, თბილისში“. 1981 წლის 13 მაისს კოტე მახარაძის ეს ცნობილი შეძახილი დღემდე იმ ემოციისა და სიხარულის მატარებელია, რაც ქართული ფეხბურთისთვის ღირსშესანიშნავ თარიღს უკავშირდება.

დღეს, გერმანიის ქალაქ დორტმუნდში, როდესაც საქართველოს ეროვნული ნაკრები ქართული ფეხბურთის ისტორიისთვის ყველაზე დიდ მიღწევად ქცეულ მატჩზე გამოვა და იტყვის – „მე ვარ საქართველო”,  წარმომიდგენია, როგორი სიამაყის განცდა დაეუფლება ჩვენს თბილისს და ჩვენს საქართველოს.

ფეხბურთი არ არის მხოლოდ სპორტი, ის არის გუნდურობის, ერთობის, ბრძოლის, ძალისხმევის, დისციპლინის, ნიჭიერების და უდიდესი შრომის სიმბოლო. ყველა ეს თვისება ჩვენი ხალხისთვის ორგანული და ფასეულია. ფეხბურთი არის სპორტი, რომელიც თავისუფლებასთან და გამარჯვებასთან ასოცირდება. ევროპის ჩემპიონატზე საქართველოს ეროვნული მაისურით გამოსვლა თითოეული ქართველის გამარჯვებაა. დღეს დორტმუნდში ჩვენი ბიჭები მთელი საქართველოს სახელით ითამაშებენ.

მინდა კიდევ ერთხელ წარმატებები და გამარჯვებები ვუსურვო ჩვენს ეროვნულ ნაკრებს. შემართებით, ბრძოლით, ჟინით, დარწმუნებული ვარ, მოვიპოვებთ გამარჯვებას. ბიჭებო, თქვენ უკან მთელი საქართველო დგას. გამარჯვებები თქვენ!“, – განაცხადა კახა კალაძემ.

თამაშის წინ ღირსების ორდენებით მანიპულირება, პოლიტიკოსების რეგიონებში ბოდიალი, ხალხის ქუჩაში უთავბოლოდ ტარება პოლიტიკური პროცესი კი არ არის, პოლიტიკური პროცესის მკვლელობაა – იაგო ხვიჩია

ზედ თამაშის წინ ღირსების ორდენებით მანიპულირება, პოლიტიკოსების რეგიონებში ბოდიალი, ხალხის ქუჩაში უთავბოლოდ და წინ და უკან ტარება სინამდვილეში პოლიტიკური პროცესი კი არ არის, შინაარსით ეს პოლიტიკური პროცესის მკვლელობაა, – ამის შესახებ „გირჩის” წევრმა, იაგო ხვიჩიამ ჟურნალისტებთან განაცხადა.

მისივე თქმით, საქართველოში ასეთი ტიპის დისკუსიები ხელისუფლების გეგმაა, რომლის განსახორციელებლად მათ ხან ერთი პოლიტიკური პარტია ეხმარება, ხან პრეზიდენტი და ზოგჯერ არასამთავრობო სექტორიც.

„ზედ თამაშის წინ ღირსების ორდენებით მანიპულირება, პოლიტიკოსების რეგიონებში ბოდიალი, ხალხის ქუჩაში უთავბოლოდ და წინ და უკან ტარება სინამდვილეში პოლიტიკური პროცესი კი არ არის, შინაარსით ეს პოლიტიკური პროცესის მკვლელობაა. ისევე, როგორც სპორტული პროცესის დაზიანების მცდელობა. ვფიქრობ, რომ ასეთი ტიპის დისკუსიები ამ ქვეყანაში ნაცვლად სერიოზულ თემებზე საუბრისა, ხელისუფლების გეგმაა, რომლის განსახორციელებლად ხან ერთი პოლიტიკური პარტია ეხმარება, ხან პრეზიდენტი, ხან სხვა პარტია ან არასამთავრობო სექტორი. ყველაფერი ეს თავისი შინაარსით არის არა პოლიტიკურად თემის სხვაგან გადატანა, არამედ პოლიტიკის მკვლელობა და სპორტში ვითომ პოლიტიკის ჩანასახის შეტანა. მაგრამ არც სპორტის პოლიტიკა გამოდის და არც ჩვეულებრივი პოლიტიკის გაფუჭება. ეს არის უბრალოდ პოლიტიკური პროცესისა და სპორტის გაფუჭება ქართველი ხალხისთვის”, – განაცხადა ხვიჩიამ.

ჩვენი გუნდის სტრატეგიაა, რომ “ნაცებმა” და “ქოცებმა” ამ არჩევნებზე ჯამში 50%-ზე მეტი არ აიღონ -ანა ბუჩუკური

ახალი ჩვენს პოზიციასა და გიორგი გახარიას განცხადებაში არაფერი არ იყო – „ლელოს“ წარმატებები! ვუსურვებ, რომ ბარიერი ისე გადალახონ, რომ არ „განაცდნენ“, – ამის შესახებ პარტია „გახარია საქართველოსთვის“ დეპუტატმა ანა ბუჩუკურმა მედიასთან საუბრისას განაცხადა.

მისივე თქმით, მათი სტრატეგიაა, რომ „ნაციონალურმა მოძრაობამ“ და „ქართულმა ოცნებამ“ 2024 წლის არჩევნებზე ჯამში 50%-ზე მეტი არ აიღონ.

ბუჩუკურის განმარტებით, ამისთვის მათი გუნდის გაძლიერების გარდა მნიშვნელოვანია, რომ სხვა ისეთი პარტიებიც გაძლიერდნენ, რომლებიც “ნაციონალურ მოძრაობასთან” ან „ქართულ ოცნებასთან“ არ იქნებიან აფილირებული.

„ახალი ჩვენს პოზიციასა და გიორგი გახარიას განცხადებაში არაფერი არ იყო. რამდენიმე დღის წინ, რაც მან ინტერვიუში თქვა, არაერთხელ უთქვამს პერსონალურად. ჩვენი გუნდიც პოზიციაც იცით, რომ „ლელოს“ მუდმივად წარმატებას ვუსურვებთ. ასევე, ვუსურვებთ, რომ გადალახოს ბარიერი ისე, რომ არ „განაცდეს“. ჩვენი გუნდის სტრატეგიაა, რომ „ნაცებმა“ და „ქოცებმა“ ამ არჩევნებზე ჯამში 50%-ზე მეტი არ აიღონ და ამისთვის, რა თქმა უნდა, ჩვენი გუნდის გაძლიერების გარდა მნიშვნელოვანია, რომ სხვა ისეთი პარტიებიც გაძლიერდნენ, რომლებიც „ნაცმოძრაობასთან“ ან „ქართულ ოცნებასთან“ არ იქნებიან აფილირებული. ამიტომ, „ლელოს“ წარმატებები, ვუსურვებ, რომ ბარიერი ისე გადალახონ, რომ არ „განაცდნენ“, – აღნიშნა ანა ბუჩუკურმა.

“საქართველოსთვის” თავმჯდომარემ, გიორგი გახარიამ „პალიტრანიუსთან“ საუბარში განაცხადა, რომ მის პარტიასთან ყველაზე ახლოს „ლელოა“ და, აქედან გამომდინარე, ის ღიაა ნებისმიერი ფორმით თანამშრომლობისთვის.

უკრაინის გლობალური პროპაგანდისტული კამპანია ყრუ კედელს აწყდება: სამიტმა მიზანს ვერ მიაღწია – უცხოური პრესა

„დასავლეთის მცდელობა რუსეთის იზოლირების მიზნით ჩაიშალა, რაც თვალსაჩინოდ აჩვენა შვეიცარიის სამშვიდობო სამიტმა. ჩინეთმა ნათლად მიანიშნა, რომ ამგვარ დიპლომატიაში მონაწილეობას არ მიიღებს და რომ კიევის მცდელობა უშედეგოა. ინდოეთმა, ბრაზილიამ და სამხრეთ აფრიკის რესპუბლიკამ და რიგმა ქვეყნებმა დელეგაციები კი გაგზავნეს, მაგრამ შემაჯამებელ დოკუმენტზე ხელი არ მოაწერეს“, – იუწყება ამერიკული ანალიტიკური გამოცემა „ბლუმბერგი“ (Bloomberg) სტატიაში სათაურით „უკრაინის გლობალური პროპაგანდისტული კამპანია ყრუ კედელს აწყდება: სამიტმა მიზანს ვერ მიაღწია“ (ავტორები – ანდრეა პალაშიანო და ბასტიან ბენრატი).


ვოლოდიმირ ზელენსკიმ ვერ შეძლო „გლობალური სამხრეთის“ რიგი საკვანძო ქვეყნების მხარდაჭერის მიღება, რაც იმას აჩვენებს, რომ რუსეთი შორს არის საერთაშორისო იზოლაციაში მოქცევისაგან. შემაჯამებელი დოკუმენტი – კომუნიკე ფაქტობრივად სამ პუნქტამდე შემცირდა და მასში უკრაინისათვის ფრიად სასურველი პუნქტები ან ამოღებულია, ან „წყალშია გაზავებული“, თანაც 92 დელეგაციიდან ხელი მხოლოდ 80-მა მოაწერა (შენიშვნა: როგორც ბოლო მონაცემებით ირკვევა, კომუნიკეზე ხელმომწერი ქვეყნებიდან სამმა – იორდანიამ ერაყმა და რუანდამ ხელმოწერები უკან გაიწვიეს).


ერთ-ერთი ქვეყანა საუდის არაბეთი აღმოჩნდა, რომელიც თავდაპირველად სამიტის პერსპექტივა არცთუ წარმატებულად მიაჩნდა და მასში მონაწილეობას არ აპირებდა. ვოლოდიმირ ზელენსკიმ გასულ კვირაში არაბულ სამეფოში ბლიც-ვიზიტი განახორციელა და ერ-რიადში მემკვიდრე პრინცს მუჰამედ ბინ სალმანს შეხვდა, რომ მისი მხარდაჭერა მიეღო. პრინცმა, როგორც ჩანს, უკრაინის პრეზიდენტი რაღაცაში დააიმედა და მართლაც, შვეიცარიის კურორტ ბიურგენშტოკში, სადაც სამიტი ტარდებოდა, თავისი საგარეო საქმეთა მინისტრი, პრინცი ფეისალ ბინ ფარჰანი გაგზავნა, მაგრამ… მან პირველ პლენარულ სხდომაზევე განაცხადა, რომ უკრაინა რუსეთთან მიმართებით „რთულ კომპრომისზე წასასვლელად მზად უნდა იყოს, რათა ომი შეწყდესო“. საბოლოო ჯამში კი პრინცს კომუნიკეზე ხელი არ მოუწერია.


ინდოეთის დელეგატმა ფავან კაპურმა – საგარეო საქმეთა სამინისტროს სახელმწიფო მდივანმა და ინდოეთის ყოფილმა ელჩმა რუსეთში – განაცხადა, რომ მშვიდობას მხოლოდ დოკუმენტის ის ვარიანტი მოიტანს, რომელიც ორივე მხარისთვის რუსეთისთვისაც მისაღები იქნება.
და მართალია, ვოლოდიმირ ზელენსკიმ სამიტს „წარმატებული“ უწოდა, მაგრამ არადასავლურმა ქვეყნებმა უკრაინის ლიდერს მკაფიოდ მიანიშნეს, რომ არცერთი ფორუმი, რომელიც სამშვიდობო პირობების შესაქმნელად არის მოწოდებული, არ შეიძლება რუსეთის გარეშე ჩატარდეს. ჩინეთმა და ბრაზილიამ ომის მშვიდობიანად დარეგულირების გეგმა შეიმუშავეს, რომელიც ორივე მეომარი მხარის ჩართვას ითვალისწინებს.


უნდა ითქვას ისიც, რომ კიევის დასავლელი მოკავშირეებისთვისაც მაინცდამაინც საინტერესო არ აღმოჩნდა. ჯო ბაიდენისთვის უფრო პრიორიტეტული ლოს-ანჟელესში დაგეგმილი წინასაარჩევნო შეხვედრა აღმოჩნდა ჰოლივუდის ელიტასთან, ამიტომ მან შვეიცარიაში, ლიუცერნის ტბასთან მდებარე ბიურგენშტოკის სამიტზე ვიცე-პრეზიდენტი კამალა ჰარისი გაგზავნა, რომელიც, თავის მხრივ, ბოლომდე არ დაელოდა შეხვედრის დასრულებას და ამერიკაში ნაადრევად დაბრუნდა. მხოლოდ ორი საათი ესწრებოდა სამიტს იაპონიის პრემიერ-მინისტრი ფუმიო კესიდაც. ბიურგენშტოკი ნაადრევად დატოვეს საფრაგეთის პრეზიდენტმა ემნუელ მაკრონმა და გერმანიის კანცლერმა ოლაფ შოლცმაც.


იტალიის პრემიერ-მინისტრმა ჯორჯა მელონიმ კი, რომელმაც შვეიცარიის სამშვიდობო კონფერენციის წინ, 13 ივნისს, აპულიაში ჩატარებულ „დიდი შვიდეულის“ სამიტზე მხურვალედ მიესალმა ვოლოდიმირ ზელენსკის, ბიურგენშტოკის შეხვედრაზე დააგვიანა – შაბათი გამოტოვა და კვირა დილით ჩავიდა, მაგრამ სწრაფად დაბრუნდა სამშობლოში.


წყარო

ყოველკვირეული განახლება მთავარი ეკონომისტისგან – სავალუტო შემოდინებები გაუმჯობესდა

მაისის წმინდა სავალუტო შემოდინებების მაჩვენებელი, აპრილთან შედარებით, გაიზარდა, რაც ძირითადად სავაჭრო ბალანსის გაუმჯობესების შედეგი იყო. ამასთან, მნიშვნელოვანია, რომ უკვე სეზონური ფაქტორების გამორიცხვითაც, თიბისის არხებით განხორციელებულ ტრანზაქციებზე დაყრდნობით, 14 ივნისის მდგომარეობით, წინა თვესთან შედარებით ტურისტულ შემოსავლებში მნიშვნელოვანი ზრდა ფიქსირდება. თავისთავად, წინა წლის ანალოგიურ პერიოდთან მიმართებით, გასული თვეების მსგავსად, ზრდა კვლავ მაღალია. მიგრაციის ეფექტისა და გზავნილების კუთხით, დინამიკა მოლოდინების შესაბამისია და რაიმე მნიშვნელოვანი გადახრა არ იკვეთება.

აღნიშნული, უფრო მეტი დამაჯერებლობით მიუთითებს ჩვენს ბოლოდროინდელ შეფასებაზე, რომ ლარის კურსზე ზეწოლა სენტიმენტებით იყო გამოწვეული, ვიდრე წმინდა სავალუტო შემოდინებების არასაკმარისი ოდენობით, რაც სავალუტო ბაზარზე იმოქმედებდა. ამ ფონზე, ვფიქრობთ, რომ ლარის კურსის ჩვენი დიდწილად ნეიტრალური მოლოდინის მხრივ, შედარებით უფრო გამყარების არგუმენტები გამოიკვეთა, ისევე როგორც, შეიძლება ითქვას, 2024 წლისათვის ეკონომიკური ზრდის 6.8%-იანი მაჩვენებლის კუთხითაც.

ამასთან, ასევე საყურადღებოა, რომ პირველ კვარტალში პირდაპირი უცხოური ინვესტიციების კლება დაფიქსირდა, რაშიც მნიშვნელოვანი წვლილი გასული წლის ამავე პერიოდში დამამუშავებელ მრეწველობაში განხორციელებულმა დიდი მოცულობის ტრანზაქციამ შეიტანა. ამავდროულად, საქსტატის მიერ გამოქვეყნებული წინასწარი მონაცემებით, 2024 წლის პირველ კვარტალში დაქირავებით დასაქმებულთა საშუალო ნომინალური ხელფასი წლიურად 13.2%-ით, ხოლო, შემცირებული ინფლაციის ფონზე, რეალურ გამოხატულებაში 12.9%-ით გაიზარდა.

იხილეთ პუბლიკაციის სრული ვერსია შემდეგ ბმულზე:https://www.tbccapital.ge/ge/publications/all-publications/singleview/30006368-weekly-update-from-the-chief-economist.R

მაისის წმინდა სავალუტო შემოდინებების მაჩვენებელი, აპრილთან შედარებით, გაიზარდა, რაც ძირითადად სავაჭრო ბალანსის გაუმჯობესების შედეგი იყო. ამასთან, მნიშვნელოვანია, რომ უკვე სეზონური ფაქტორების გამორიცხვითაც, თიბისის არხებით განხორციელებულ ტრანზაქციებზე დაყრდნობით, 14 ივნისის მდგომარეობით, წინა თვესთან შედარებით ტურისტულ შემოსავლებში მნიშვნელოვანი ზრდა ფიქსირდება. თავისთავად, წინა წლის ანალოგიურ პერიოდთან მიმართებით, გასული თვეების მსგავსად, ზრდა კვლავ მაღალია. მიგრაციის ეფექტისა და გზავნილების კუთხით, დინამიკა მოლოდინების შესაბამისია და რაიმე მნიშვნელოვანი გადახრა არ იკვეთება.

აღნიშნული, უფრო მეტი დამაჯერებლობით მიუთითებს ჩვენს ბოლოდროინდელ შეფასებაზე, რომ ლარის კურსზე ზეწოლა სენტიმენტებით იყო გამოწვეული, ვიდრე წმინდა სავალუტო შემოდინებების არასაკმარისი ოდენობით, რაც სავალუტო ბაზარზე იმოქმედებდა. ამ ფონზე, ვფიქრობთ, რომ ლარის კურსის ჩვენი დიდწილად ნეიტრალური მოლოდინის მხრივ, შედარებით უფრო გამყარების არგუმენტები გამოიკვეთა, ისევე როგორც, შეიძლება ითქვას, 2024 წლისათვის ეკონომიკური ზრდის 6.8%-იანი მაჩვენებლის კუთხითაც.

ამასთან, ასევე საყურადღებოა, რომ პირველ კვარტალში პირდაპირი უცხოური ინვესტიციების კლება დაფიქსირდა, რაშიც მნიშვნელოვანი წვლილი გასული წლის ამავე პერიოდში დამამუშავებელ მრეწველობაში განხორციელებულმა დიდი მოცულობის ტრანზაქციამ შეიტანა. ამავდროულად, საქსტატის მიერ გამოქვეყნებული წინასწარი მონაცემებით, 2024 წლის პირველ კვარტალში დაქირავებით დასაქმებულთა საშუალო ნომინალური ხელფასი წლიურად 13.2%-ით, ხოლო, შემცირებული ინფლაციის ფონზე, რეალურ გამოხატულებაში 12.9%-ით გაიზარდა.

იხილეთ პუბლიკაციის სრული ვერსია შემდეგ ბმულზე:https://www.tbccapital.ge/ge/publications/all-publications/singleview/30006368-weekly-update-from-the-chief-economist.

(R)

 მიმდინარეობს მეწყრული ფერდობის დატერასება, რის შემდეგაც ლოკალურად შეკეთდება ქსელის დაზიანებული მონაკვეთი – „ჯივიპი“

სოფელი წიწამურის მიმდებარედ წყალმომარაგების ცენტრალური მაგისტრალური მილსადენის დაზიანების აღსადგენად მეწყრული მიწის ფენის მოხსნის სამუშაოები გუშინ, 17 ივნისს, ღამის 23:00 საათზე დაიწყო,- ამის შესახებ ინფორმაციას „ჯივიპი“ ავრცელებს.

კომპანიის ცნობით, ამ ეტაპზე მიმდინარეობს მეწყრული ფერდობის დატერასება, რის შემდეგაც ლოკალურად შეკეთდება ქსელის დაზიანებული მონაკვეთი.

„ადგილზე 24-საათიან უწყვეტი რეჟიმით მუშაობს 6 ერთეული მძიმე ტექნიკა. ეს არის ამ დროისთვის მაქსიმალური რაოდენობა რისი განთავსებაც შესაძლებელია სამუშაო ტერიტორიაზე.

დასამუშავებელი მიწის არეალის გაფართოებასთან ერთად, დღის განმავლობაში ეტაპობრივად დაემატება მძიმე ტექნიკა.

სამუშაოების მიმდინარეობისა და ხანგრძლივობის შესახებ კომპანია ინფორმაციას დამატებით, დღის განმავლობაში პერმანენტულად გაავრცელებს“,- ნათქვამია ინფორმაციაში.

ივანიშვილის ხელისუფლება მორიგ დეზინფორმაციას ავრცელებს – თინა ბოკუჩავა

ივანიშვილის ხელისუფლება მორიგ დეზინფორმაციას ავრცელებს მაშინ, როდესაც ევროკავშირის ათჯერ უფრო მეტი დახმარება სწორედ სახელმწიფო უწყებებს ხმარდება, – ამის შესახებ „ერთიანი ნაციონალური მოძრაობის“ თავმჯდომარემ, თინა ბოკუჩავამ განაცხადა.

მისი თქმით, არასამთავრობო სექტორს მხოლოდ მცირე ნაწილი ხმარდება.

„ჩვენ ვხედავთ, რომ ივანიშვილის ხელისუფლება მორიგ დეზინფორმაციას და ტყუილს ავრცელებს მაშინ, როდესაც ევროკავშირის, ისე აშშ-ის დახმარების დიდი ნაწილი, ათჯერ უფრო მეტი, სწორედ სახელმწიფო უწყებებს ხმარდება, მათ შორის სამინისტროებს და სხვა უწყებებს, ხოლო არასამთავრობო სექტორს მხოლოდ მცირე ნაწილი იმისთვის ისევ, რომ ემსახურონ საქართველოს მოქალაქეების ინტერესს, დაიცვან შშმ პირების, ძალადობის მსხვერპლი ქალების ინტერესები და ემსახურონ ყველაზე მოწყვლად ჯგუფებს, რომლებიც ივანიშვილის ხელისუფლებას ყოველთვის ავიწყდება“, – განაცხადა თინა ბოკუჩავამ.

უკრაინა ნატოს წევრი მხოლოდ რუსეთთან ომში გამარჯვების შემდეგ გახდება – ჯონ კირბი

უკრაინა ჩრდილოატლანტიკური ალიანსის წევრი მხოლოდ რუსეთთან ომში გამარჯვების შემდეგ გახდება. ამის შესახებ თეთრი სახლის ეროვნული უშიშროების საბჭოს სტრატეგიული კომუნიკაციების კოორდინატორმა ჯონ კირბიმ ბრიფინგზე განაცხადა, იუწყება უკრაინული მედია.

მისივე თქმით, ამერიკის შეერთებული შტატების პრეზიდენტი ჯო ბაიდენი მტკიცედ არის დარწმუნებული, რომ უკრაინის მომავალში ნატო „გარკვეულ ეტაპზე“ არსებობს.

„პირველ რიგში, მათ ეს ომი უნდა მოიგონ და ჩვენ ყველაფერს ვაკეთებთ, რათა მათ ეს შეძლონ“, – თქვა კირბიმ ჟურნალისტის კითხვის საპასუხოდ უკრაინის წევრობის პერსპექტივასთან დაკავშირებით.

ცნობისთვის, ნატოს ლიდერების შემდეგი შეხვედრა ვაშინგტონში 9-11 ივლისს გაიმართება. აპრილის ბოლოს ნატოს გენერალურმა მდივანმა იენს სტოლტენბერგმა განაცხადა, რომ შეხვედრაზე უკრაინის პრეზიდენტი ვოლოდიმირ ზელენსკი მიიწვია.

ჩინეთმა, რუსეთის ომის მხარდაჭერისთვის, ფასი უნდა გადაიხადოს – იენს სტოლტენბერგი

ნატო-ს გენერალური მდივნის, იენს სტოლტენბერგის განცხადებით, ჩინეთისთვის უკრაინის წინააღმდეგ რუსეთის ომის მხარდაჭერას შედეგები უნდა მოჰყვეს, თუ ის თავის ქცევას არ შეცვლის.

იენს სტოლტენბერგი აცხადებს, რომ პეკინი მხარს უჭერს რუსეთის საომარ ძალისხმევას და ამავდროულად, ცდილობს შეინარჩუნოს ურთიერთობები ევროპელ მოკავშირეებთან.

„ეს გრძელვადიან პერსპექტივაში ვერ იმუშავებს”, – განაცხადა სტოლტენბერგმა BBC -სთან ინტერვიუში.

მისი თქმით, ჩინეთი რუსეთს უზიარებს უამრავ ტექნოლოგიას, როგორიცაა მიკროელექტრონიკა, რაც უმნიშვნელოვანესია რუსეთისთვის რაკეტების, იარაღის შესაქმნელად, რომელსაც ის უკრაინის წინააღმდეგ იყენებს.

“რაღაც ეტაპზე, ჩვენ უნდა განვიხილოთ რაიმე სახის ეკონომიკური ფასი, თუ ჩინეთი არ შეცვლის თავის ქცევას”, – აღნიშნა სტოლტენბერგმა.

შეგახსენებთ, პეკინს უკვე დაწესებული აქვს გარკვეული სანქციები რუსეთის მხარდაჭერისთვის – გასულ თვეში შეერთებულმა შტატებმა გამოაცხადა შეზღუდვები, რომლის სამიზნე დაახლოებით 20 კომპანიაა. ჩინეთი ირწმუნება, რომ რუსეთი მისგან ლეტალურ იარაღს არ ყიდულობს და რომ ის სიფრთხილით ახორციელებს ორმაგი დანიშნულების საქონლის ექსპორტს, კანონებისა და რეგულაციების შესაბამისად.

იაპონიაში ქართული ღვინის მასშტაბური ფესტივალი გაიმართა

იაპონიაში საქართველოს დღეების ფარგლებში, ქართული ღვინის მასშტაბური ფესტივალი ტოკიოს იოიოგის ცენტრალურ პარკში გაიმართა. იაპონიის ბაზარზე ქართული ღვინის იმპორტიორებმა ქართული ღვინის 9 კომპანიის 12-ზე მეტი დასახელების ქართული ღვინო წარადგინეს.

ქართული ღვინის პრეზენტაცია-დეგუსტაციას იაპონელი სომელიე რიუნესკო იოშიჰარა (Ryunosuke Yoshihara) უძღვებოდა.

აღსანიშნავია, რომ იაპონია ქართული ღვინის ერთ-ერთი სტრატეგიული საექსპორტო ბაზარია. ღვინის ეროვნული სააგენტოს მხარდაჭერით, იაპონურ ბაზარზე ქართული ღვინის პირველი მასშტაბური წარდგენა 2014 წელს მოხდა. მას შემდეგ, სახელმწიფოს მხარდაჭერით, ქართული ღვინის კომპანიები მუდმივად მონაწილეობენ პრესტიჟულ საერთაშორისო გამოფენებში Foodex Japan და Wine and Gourmet Japan, ტარდება ქართული ღვინის წარდგენა-დეგუსტაციები იაპონიის სხვადასხვა ქალაქში, იაპონელი ღვინის პროფესიონალებისა და მედიის წარმომადგენლებისთვის ეწყობა ღვინის ტურები საქართველოს ყველა რეგიონში.

იაპონიაში საქართველოს საელჩოს და საქართველოს კულტურისა და სპორტის სამინისტროს ორგანიზებით და ღვინის ეროვნული სააგენტოს ჩართულობით, ქართული ღვინის ფესტივალი ტოკიოში უკვე მეორედ გაიმართა.

ინფორმაციას გარემოს დაცვისა და სოფლის მეურნეობის სამინისტრო ავრცელებს.

63 ათას აბონენტს გრაფიკით მიეწოდება სასმელი წყალი – 24-საათიან რეჟიმში მიმდინარეობს სამუშაოები და მაქსიმუმ 1 კვირა დასჭირდება – თბილისის მერის მოადგილე

დედაქალაქის მერი, კახა კალაძე მოადგილეებთან ერთად კომპანია „ჯორჯიან უოთერ ენდ ფაუერის“ წარმომადგენლებს შეხვდა.

როგორც შეხვედრის დასრულების შემდეგ მედიასთან მერის მოადგილემ, ირაკლი ბენდელიანმა განაცხადა, ამ დროისთვის 63 ათას აბონენტს წყალი გრაფიკით მიეწოდება.

როგორც მან განმარტა, აღდგენით სამუშაოებს მაქსიმუმ ერთი კვირის ვადა დასჭირდება.

ირაკლი ბენდელიანის თქმით, მოსახლეობის მოთხოვნის შემთხვევაში, წყლის მიწოდება რეზერვუარების საშუალებით მოხდება.

„მოსახლეობის გარკვეულ ნაწილს სასმელი წყალი შეფერხებით მიეწოდება. ამის მიზეზი არის საგურამოში წარმოქმნილი ბუნებრივი პროცესები, რამაც სასმელი წყლის მაგისტრალი დააზიანა. ბუნებრივია, თავიდანვე, როცა ეს ფაქტი დადგა, კომპანიის მხრიდან შესაბამისი რეაგირებები მოხდა. შესაბამისი საჭირო ჯგუფები ადგილზე არიან და 24 საათიან რეჟიმში აწარმოებენ აღდგენით სამუშაოებს. დღეის მდგომარეობით, დაახლოებით 63 ათასი აბონენტია, ვისაც გრაფიკით მიეწოდება სასმელი წყალი. გარდა ამისა, მოსახლეობის მოთხოვნის შემთხვევაში, მოხდება შესაბამისი რეზერვუარების საშუალებით წყლის მიწოდება. თვითონ ეს 63 ათასი აბონენტი დაახლოებით მაქსიმუმ ერთი კვირის მანძილზე მიიღებს გრაფიკით სასმელ წყალს. როგორც აღვნიშნე, 24 სთ-იან რეჟიმში მიმდინარეობს სამუშაოები. მაქსიმუმ ერთი კვირის ვადა დასჭირდება ამ სამუშაოებს, რომ არსებული მდგომარეობა სრულად აღდგეს “,-განაცხადა ბენდელიანმა.

მე ძალიან ოპტიმისტურად ვარ განწყობილი და ძალიან დიდი შანსი აქვს ჩვენს ეროვნულ ნაკრებს, რომ გავიდეს ჯგუფიდან -კალაძე

უბედნიერესი ადამიანი ვარ, რომ ჩემმა ეროვნულმა ნაკრებმა მოახერხა ის, რაც ჩვენმა თაობამ ვერ მოახერხა, – ამის შესახებ კახა კალაძემ „იმედის დილის“ ეთერში განაცხადა.

როგორც თბილისის მერმა და ყოფილმა ფეხბურთელმა აღნიშნა, დღეს ყველა ბედნიერი და გახარებულია იმით, რომ საქართველოს ეროვნული ნაკრები ევროპის ჩემპიონატზე თამაშობს.

კალაძემ გუნდის შანსებთან დაკავშირებით თავის მოლოდინებზეც ისაუბრა.

„დარწმუნებული ვარ, რომ ძალიან კარგ შედეგს დადებენ ჩვენი ბიჭები. ძალიან მაგარი განწყობა მაქვს, ისეთივე, როგორიც მქონდა საბერძნეთთან მატჩის წინ. მინდა წარმატება ვუსურვო ჩვენს ეროვნულ ნაკრებს. დღევანდელ ფეხბურთში ზოგადად რთულია წინასწარ გააკეთო პროგნოზი. დღეს ყველაფერი მოსალოდნელია ფეხბურთში, ყველაფერი ხდება, ყველასთან თამაში შეიძლება. მე ძალიან ოპტიმისტურად ვარ განწყობილი და ძალიან დიდი შანსი აქვს ჩვენს ეროვნულ ნაკრებს, რომ გავიდეს ჯგუფიდან“, – განაცხადა კალაძემ.

საქართველოს ეროვნული ნაკრები ევროპის ჩემპიონატზე სადებიუტო შეხვედრას დღეს გამართავს. ქალაქ დორტმუნდში „სიგნალ იდუნა პარკზე“ ქართველების მეტოქე თურქეთის გუნდი იქნება. შეხვედრა თბილისის დროით 20:00 საათზე დაიწყება.

1...1,0791,0801,081...2,963Page 1,080 of 2,963
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი