კარგია, როცა თვითლუსტრაციას მიმართავენ. დაინახეს, რომ ჩრდილიდან პოლიტიკის წარმართვა არაეფექტურია, სრულად გაშიფრულები არიან, მათი არასამთავრობო ორგანიზაციაში ყოფნა იყო ცხვრის ქურქში გახვეული მგელი, – ამის შესახებ „ქართული ოცნების“ წევრმა, ირაკლი ქადაგიშვილმა განაცხადა.

მისი თქმით, სინამდვილეში მათ თავიდან ბოლომდე პოლიტიკური კონტექსტი ჰქონდათ.

„პოლიტიკურ ფლანგზე გამოვიდნენ და ვნახოთ, როგორი შედეგები ექნებათ. მსოფლიოს წამყვანი პროფესიული კვლევითი ორგანიზაციების დასკვნები აიღონ საქართველოს შედეგებზე და იმ ქვეყნებს შეადარონ, რომლებსაც მისტირიან, მათ შორის, მოლდოვას. ნახავენ, სიტყვას ვინ ასრულებს და ვინ – არა. არასამთავრობო ორგანიზაციების უმრავლესობა იყო პოლიტიკური პროცესის ჩვეულებრივი დანამატი და კარგია, რომ ამ პროცესის ოფიციალური მონაწილეები გახდნენ, მაგრამ აქაც ორმაგი სტანდარტია, მათი ნაწილის ხელმძღვანელი პოლიტიკოსია, ხოლო თავად ორგანიზაციები იტყვიან, არასამთავრობოები ვართო“, – განაცხადა ქადაგიშვილმა.

არასამთავრობო სექტორის წარმომადგენლებმა პოლიტიკური მოძრაობა „თავისუფლების მოედანი“ დააფუძნეს.

თქვენ მიგაჩნიათ, რომ მე ცალ ფეხზე უნდა ვიხტუნაო და როდესაც უცხოელი მაღალი რანგის თანამდებობის პირი რაიმეს იტყვის, თავდახრილმა, ქედმოხრილმა ვილაპარაკო – ჩემი და სახელმწიფოს პოზიციაა, რომ “უცხოური გავლენის გამჭვირვალობის შესახებ კანონში“ პრორუსული არაფერია და აღნიშნული კანონის მიღებით ქვეყანა საკუთარ ინტერესებს იცავს, – ეს განცხადება მედიასთან პარლამენტის პირველმა ვიცე-სპიკერმა გია ვოლსკიმ გააკეთა.

როგორც ვოლსკიმ ამ კონტექსტში აღნიშნა, “საქართველომ იმ ორგანიზაციების დაფინანსების გამჭვირვალობა უნდა მოითხოვოს, რომელიც პოლიტიკური ბრძოლის და რადიკალიზაციის წინა ხაზზე არიან“.

“თქვენ რომელიმე უცხოელის განცხადებას უსმენთ – მაგალითად, რუსთაველზე ბალტიისპირეთის ქვეყნების საგარეო საქმეთა მინისტრები იყვნენ, რომელთაც განაცხადეს, რომ შექმნილ ვითარებაში სწორედაც რადიკალიზაცია და დესტაბილიზაციაა მისაღები და საჭირო. ესტონეთის პრემიერ-მინისტრმა განაცხადა, რომ სწორედ ასე იწყებოდა მაიდანი უკრაინაში და ძალიან სწორი და კარგია, როდესაც უცხოელი მაღალჩინოსნები მიტინგებზე გამოდიან და ხალხს დესტაბილიზაციისკენ მოუწოდებენ. თქვენ მათი განცხადებები მოგწონთ და ჩემი განცხადებები არ მოგწონთ. თქვენ მიგაჩნიათ, რომ ისინი არიან სიტუაციის განმკარგველები საქართველოში და მე არაფერს წარმოვადგენ. გინდათ, რომ მე თავი დავხარო, თავზე ნაცარი დავიყარო და ვთქვა, რომ რამეში დამნაშავეები ვართ – არაფერში! საქართველომ უნდა მოითხოვოს იმ ორგანიზაციების დაფინანსების გამჭვირვალობა, რომელიც პოლიტიკური ბრძოლის და რადიკალიზაციის წინა ხაზზე არიან.

“უცხოური გავლენის გამჭვირვალობის შესახებ“ კანონში პრორუსული არაფერია და აღნიშნული კანონის მიღებით ქვეყანა საკუთარ ინტერესებს იცავს!“, – მიმართა ჟურნალისტებს გია ვოლსკიმ.

არ ველოდები აშშ-ის სანქციებს, რადგან სამართლიანობის თემას ვერანაირად ვერ მოვხსნი დღის წესრიგიდან, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

მისი თქმით, გამჭვირვალობა საქართველოში იმაზე ნაკლებად აქტუალური არ არის, ვიდრე არის ევროპასა და აშშ-ში.

„აშშ-ის სახელმწიფო დეპარტამენტის სპიკერის მოადგილის განცხადება მოვისმინეთ, რომ ამ საკითხებზე მსჯელობა მიმდინარეობს, თუმცა ვერაფერს გეტყვით, რა შედეგებზე გავლენ – შემდგომ განცხადებებს დაველოდოთ. არ ველოდები აშშ-ის სანქციებს, რადგან სამართლიანობის თემას ვერანაირად ვერ მოვხსნი დღის წესრიგიდან. კრიტიკა უსამართლოდ მიმაჩნია, ვინაიდან გამჭვირვალობა საქართველოში იმაზე ნაკლებად აქტუალური არ არის, ვიდრე არის ევროპასა და აშშ-ში. პრაქტიკა გვიჩვენებს, რომ არასამთავრობო ორგანიზაციები ასეთი გამჭვირვალობისთვის ვითომ და მზად იყვნენ, შემდეგ კი საკითხი დღის წესრიგიდან მოიხსნა. კანონპროექტის დღის წესრიგში დაბრუნება სწორედ ამან განაპირობა. ყოველდღიურად ველოდებით, რომ ვინმე პარტნიორი ქვეყნებიდან ან არასამთავრობო ორგანიზაციების დამფინანსებლები განაცხადებენ იმის თაობაზე, რომ გამჭვირვალობა ნამდვილად არანაირ პრობლემას არ წარმოადგენს და არასამთავრობო ორგანიზაციები პოლიტიკურ საქმიანობაში არ უნდა იყვნენ ჩართული. ჩვენ არასამთავრობო ორგანიზაციების და კონკრეტული პროგრამების დაფინანსების გამჭვირვალობას ვითხოვთ. ამაში არაფერია ისეთი, რაც რუსულ კანონს ჰგავს და იმ ინტერესს შეესაბამება, რომელიც საქართველოს სახელმწიფოს გააჩნია, რათა არ მოხდეს არასამთავრობო ორგანიზაციების რესურსის დესტაბილიზაციისთვის გამოყენება“, – განაცხადა ვოლსკიმ.

მისივე თქმით, არასამთავრობო ორგანიზაციების ხელმძღვანელები მიტინგზე იდგნენ და ბომბებსაც კი ითხოვდნენ იმის გამო, რომ საქართველო საომარ მოქმედებებში არ ჩაერთო.

„სამწუხაროდ, ვიხილეთ მაგალითი, როდესაც არასამთავრობო ორგანიზაციების ხელმძღვანელები მიტინგზე იდგნენ და მთავრობის გადაყენებასა და ტექნიკური მთავრობის შექმნას ითხოვდნენ. ბომბებსაც კი ითხოვდნენ იმის გამო, რომ საქართველო საომარ მოქმედებებში არ ჩაერთო. გვაქვს მაგალითი, როდესაც არასამთავრობო ორგანიზაციამ ხმების პარალელური დათვლა გააყალბა, რამაც სერიოზული აჟიოტაჟი, დაპირისპირება გამოიწვია და საკმაოდ სერიოზული წინაპირობა შეუქმნა დესტაბილიზაციას. შარლ მიშელის შეთანხმებით არასამთავრობო ორგანიზაციებსაც გარკვეული პასუხისმგებლობა უნდა აეღოთ საკუთარ თავზე, მაგრამ კვლავ პოლიტიკურ ველზე, პოლიტიკური ბრძოლის წინა ხაზზე დარჩნენ. გამომდინარე აქედან, ჩვენ მიერ მიღებული კანონი სავსებით ნორმალური და ევროპული სტანდარტისაა“, – აცხადებს ვოლსკი.

ცნობისთვის, აშშ-ის სახელმწიფო დეპარტამენტის პრესსპიკერის მოადგილემ, ვედანტ პატელმა ბრიფინგზე განაცხადა, რომ მნიშვნელოვანია ჩართულობა საქართველოს მთავრობის შესაბამის მაღალჩინოსნებთან და არსებობს საკითხები, რომლებიც აშშ-ს სურს, პრიორიტეტად აქციოს ორმხრივი ურთიერთობების კონტექსტში.

სანქციები ორი მიმართულებით შეიძლება გაღრმავდეს, პირველი – სავიზო შეზღუდვები დაედოთ იმ ადამიანებს, რომლებსაც ჯერ ასეთი შეზღუდვები არ აქვთ და მეორე, კიდევ უფრო მწვავე – ეს არის ფინანსური. ჩვენი გასაკეთებელი იქნება 26 ოქტომბერს დიდი, მნიშვნელოვანი ცვლილება, იმისათვის, რომ საქართველო ერთხელ და სამუდამოდ გათავისუფლდეს ამ რუსული მარწუხებისგან, – ამის შესახებ „ერთიანი ნაციონალური მოძრაობის“ გენერალურმა მდივანმა, პეტრე ცისკარიშვილმა განაცხადა.

მისივე თქმით, 26 ოქტომბერს საქართველო ერთხელ და სამუდამოდ უნდა გათავისუფლდეს „ქართული ოცნებისგან“ და ბიძინა ივანიშვილის რეჟიმისგან“.

„სანქციები ორი მიმართულებით შეიძლება გაღრმავდეს, პირველი – სავიზო შეზღუდვები დაედოთ იმ ადამიანებს, რომლებსაც ჯერ ასეთი შეზღუდვები არ აქვთ და მეორე კიდევ უფრო მწვავე – ეს არის ფინანსური სანქციები, რომელიც თავისთავად მოიაზრებს ქონებრივ ყადაღას და მათი აქტივების დაყადაღებას, ბიძინა ივანიშვილის და „ოცნების“ სხვა მაღალჩინოსნების.

მაგრამ ჩვენთვის, ქართველებისთვის, ქართული სახელმწიფოსთვის მთელი ამ სანქციების ისტორიაში სხვა რამ უფრო მნიშვნელოვანია და ეს არის ოქტომბრის არჩევნები – ჩვენ გვინდა თუ არა საქართველომ იცხოვროს ისეთი ხელისუფლების, ისეთი მთავრობის პირობებში, რომელიც სანქცირებულია დასავლეთის მხრიდან, რომელიც სანქციების ქვეშ არის შეერთებული შტატების მხრიდან, გვინდა თუ არა ასეთი მთავრობა გვყავდეს?

ჩვენი გასაკეთებელი 26 ოქტომბერს იქნება დიდი, მნიშვნელოვანი ცვლილება, იმისათვის, რომ საქართველო ერთხელ და სამუდამოდ გათავისუფლდეს ამ რუსული მარწუხებისგან, „ქართული ოცნებისგან“ და ბიძინა ივანიშვილის რეჟიმისგან და ძალიან მკაფიოდ აიღოს გეზი დასავლეთისკენ, ევროინტეგრაციისკენ და გააღრმაოს სტრატეგიული ურთიერთობა და პარტნიორობა შეერთებულ შტატებთან“, -განაცხადა პეტრე ცისკარიშვილმა, რომლის განცხადებასაც პარტია „ნაციონალური მოძრაობა“ ავრცელებს.

ექსპერტი ზაალ ანჯაფარიძე სოციალურ ქსელში ვენესუელის მიერ შეერთებულ შტატებთან მოლაპარაკებების განახლებას ეხმიანება და აღნიშნავს, რომ სულ რაღაც 3,5 წლის ვენესუელის საზოგადოებამ და მისმა სახელმწიფო ინსტიტუტებმა გაუძლეს აშშ-ს მიერ არნახულ ზეწოლას, სანქციებს და ქვეყანა არ დაანებეს გარე ძალებს და მათ დიქტატს.

ანჯაფარიძის თქმით, საქართველოში არის “ვენესუელის სცენარის” ნიშნები, თუმცა რა სცენარებიც არ უნდა მოქსოვონ აშშ-ში, ხალხის ნებას წინ ვერ აღუდგებიან.

„ვენესუელა განაახლებს პირდაპირ მოლაპარაკებებს შეერთებულ შტატებთან ორ ქვეყანას შორის ურთიერთობების აღდგენის მიზნით. ამის შესახებ ქვეყნის პრეზიდენტმა ნიკოლას მადურომ განაცხადა.
არადა, სულ რაღაც 3,5 წლის უკან აშშ-მ (და მისი ზეგავლენით ევროპამ) ვენესუელის საპრეზიდენტო არჩევნების შედეგები არ აღიარა და დროებით პრეზიდენტად ოპოზიციის ლიდერი ხუან გუაიდო სცნო. ამერიკელები ერთხანს ეკურკურებოდნენ გუაიდოს როგორც ვენესუელის “გარდამავალ პრეზიდენტს,” უკვე ლიდერად მიიჩნევენ და ქვეყანაში დემოკრატიის დაბრუნებაზე საუბრობდნენ… ანუ დაახლოებით ის რიტორიკა, რაც დღეს მათგან საქართველოს მიმართ ისმის
თუმცა, ვენესუელის საზოგადოება და მისი სახელმწიფო ინსტიტუტები რომ იტყვიან მაგრად დადგნენ, გაუძლეს არნახულ ზეწოლას, სანქციებს და ქვეყანა არ დაანებეს გარე ძალებს და მათ დიქტატს.
“„მე მხარს ვუჭერ დიალოგს, ურთიერთგაგებას, ჩვენი ურთიერთობების მომავალს, ცვლილებას ვენესუელას სუვერენიტეტისა და დამოუკიდებლობის სრული პატივისცემით“, – აღნიშნა მადურომ.
მე ვერ გეტყვით ზუსტად, განმეორდება თუ არა საქართველოში “ვენესუელის სცენარი,” თუმცა არის ამის გარკვეული ნიშნები. არადა, რა სცენარებიც არ უნდა მოქსოვონ “იქ”, ხალხის ნებას წინ ვერ აღუდგებიან. ვენესუელა ამის ძალიან თვალსაჩინო მაგალითია“, – წერს ზაალ ანჯაფარიძე.