“ნუთუ ვერ ხვდებიან ევროპელი ლიდერები, რომ ქართული მართლმსაჯულება დამოუკიდებელია და მიხეილ სააკაშვილი დამსახურებულად იხდის სასჯელს”

23
spot_img

ძალზედ საწყენია ჩვენი მეგობარი სახელმწიფოს მაღალი თანამდებობის პირისგან მსგავსი ქმედება. რაც შეეხება სალომე ზურაბიშვილის გადაწყვეტილებას, ის დღეს ოპოზიციის ლიდერი და სხვისი დამკვეთების შემსრულებელია – ამის შესახებ წერს სოციალურ ქსელში „ხალხის ძალის“ ერთ-ერთი ლიდერი დიმიტრი ხუნდაძე წერს.

მისი თქმით, მიუნხენში პოლონეთის საგარეო საქმეთა მინისტრის მხრიდან სალომე ზურაბიშვილისათვის სააკაშვილის შეწყალების მოთხოვნა საქართველოს შიდა საქმეებში უხეში ჩარევაა.

„დღეს, გავრცელებული ინფორმაციით, პოლონეთის საგარეო საქმეთა მინისტრმა მიუნხენში ჩასულ სალომე ზურაბიშვილს სააკაშვილის შეწყალება მოსთხოვა. ნუთუ ვერ ხვდებიან ევროპელი ლიდერები, რომ საქართველოს შიდა საქმეებში უხეში ჩარევით, ქართული საზოგადოება კიდევ ერთხელ განაწყენდება? ნუთუ ასე რთულია იმის გაგება, რომ ქართული მართლმსაჯულება დამოუკიდებელია და მიხეილ სააკაშვილი დამსახურებულად იხდის სასჯელს? რამდენი მტკიცებულება სჭირდება ჩვენს ევროპელ პარტნიორებს, რომ ამაში დარწმუნდნენ? სინამდვილეში, ყველამ კარგად იცის, რომ სააკაშვილი დამნაშავეა, უბრალოდ, ლიბერალების ლობისტებს უცხოეთში ეს არაფრად მიაჩნიათ. მერე რა, თუ პრეზიდენტი მილიონებს მოჰპარავს საკუთარ ხალხს, ან ქუჩაში ჩაცხრილავს ახალგაზრდებს, ან ქვეყნის ტერიტორიებს აჩუქებს ოკუპანტს და ა.შ. როგორც ჩანს, სააკაშვილის უცხოელი მცველები ასეთ დემოკრატიას აშენებენ. ჩვენ კი, ნამდვილი დემოკრატიული და ევროპული სახელმწიფოს შენება გვინდა და ამიტომ, ყველაზე მეტად სწორედ პრეზიდენტყოფილმა პასუხი უნდა აგოს ჩადენილ დანაშაულებზე. ძალზედ საწყენია ჩვენი მეგობარი სახელმწიფოს მაღალი თანამდებობის პირისგან მსგავსი ქმედება. რაც შეეხება სალომე ზურაბიშვილის გადაწყვეტილებას, ის დღეს ოპოზიციის ლიდერი და სხვისი დამკვეთების შემსრულებელია. ამიტომ, არ გაგვიკვირდება ამ საკითხშიც მისი მორჩილება გარე ძალების მიმართ“, – წერს დიმიტრი ხუნდაძე.

პოლონეთის საგარეო საქმეთა მინისტრმა, რადოსლავ სიკორსკიმ მიუნხენის კონფერენციის ფარგლებში გამართულ პანელურ დისკუსიაზე საქართველოს პრეზიდენტ სალომე ზურაბიშვილს მიმართა: „ვფიქრობთ, მნიშვნელოვანია, სააკაშვილს სამართლიანად ეპყრობოდნენ და შესაძლოა, თქვენ შეძლოთ, წვლილი შეიტანოთ მის გათავისუფლებაში“.