“ნებისმიერი ადამიანი, ვინც მოუწოდებს საქართველოს, დააწესოს ორმხრივი სანქციები რუსეთის წინააღმდეგ, მოგვიწოდებს, შევიდეთ შესაძლო სამხედრო დაპირისპირების რისკში”-პაპუაშვილი

105
spot_img

საქართველოს პარლამენტის თავმჯდომარის, შალვა პაპუაშვილის განცხადებით, საქართველოს გამოყენებით საერთაშორისო სანქციების გვერდის ავლის არც ერთი ფაქტი ეჭვის დონეზეც კი არ დადასტურებულა.

მისივე თქმით, ის, ვინც მოუწოდებს საქართველოს, დააწესოს ორმხრივი სანქცია რუსეთის წინააღმდეგ, მოუწოდებს საქართველოს, გარისკოს ესკალაცია რუსეთის წინააღმდეგ.

„არცერთი კითხვის ნიშანი საქართველოს მიმართ არ არსებობს. რაც შეეხება სანქციებს, ჩვენ უკრაინაში ომის დაწყების პირველივე დღიდან ვთქვით, რა არის ჩვენი პოლიტიკა და ამ პოლიტიკას მივყვებით კეთილსინდისიერად. ჩვენი პოლიტიკაა, რომ საქართველო არ იქნას გამოყენებული საერთაშორისო სანქციების გვერდის ავლისთვის და არც ერთი ფაქტი ეჭვის დონეზეც არ დადასტურებულა. 1 300-მდე საზღვრის კვეთა შეჩერდა, გადაზიდვა შეჩერდა, ვინაიდან იყო ან სანქცირებულ კომპანიასთან დაკავშირებული ან ისეთი საგნები, რაც სანქციის ქვეშ იყო. გამომგზავნები იყვნენ, მათ შორის ევროკავშირის წევრები, მათ შორის აშშ. ამიტომ პრობლემები უნდა ვეძებოთ იქ, საიდანაც იგზავნება სანქცირებული ტვირთები და იქ, სადაც იგზავნება საბოლოო ჯამში. რაც შეეხება საქართველოს, რომელსაც შეიძლება, მხოლოდ ერთადერთი ფუნქცია ჰქონდეს, შუალედური გადაზიდვის არცერთი შემთხვევა არ დადასტურებულა.

საქართველო თავად არ აწესებს ორმხრივ სანქციებს რუსეთის წინაამღდეგ. ამასთან დაკავშირებით ჩვენს პარტნიორებთანაც ხშირად გვქონდა საუბარი და აბსოლუტურად არის გაგება ამ მიმართულებით პარტნიორებისგან. ის, ვინც მოუწოდებს საქართველოს, დააწესოს ორმხრივი სანქცია რუსეთის წინააღმდეგ, მოუწოდებს საქართველოს, გარისკოს ესკალაცია რუსეთის წინააღმდეგ, ანუ გარისკოს ომი რუსეთთან. ეს არის ორჯერ ორი ოთხი. ამიტომ, ნებისმიერი ადამიანი, ვინც მოუწოდებს საქართველოს, რომ დააწესოს ორმხრივი სანქციები რუსეთის წინააღმდეგ, მოგვიწოდებს, რომ შევიდეთ შესაძლო სამხედრო დაპირისპირების რისკში“, – განაცხადა შალვა პაპუაშვილმა.

რაც შეეხება სანქციების საკითხებში ევროკავშირის სპეციალური წარმომადგენელის, დევიდ ო’სალივანის თბილისში ვიზიტს, პაპუაშვილის თქმით, დევიდ ო’სალივანს ექნება შესაძლებლობა, გაეცნოს, რამდენად მომზადებული არიან საქართველოს სახელმწიფო ინსტიტუტები, როგორც ტექნიკური აღჭურვილობის, ისე რისკების გამოვლინების კუთხით, რათა არ იყოს საქართველოს ტერიტორიის გამოყენების და სანქციების გვერდის ავლის შესაძლებლობა.

„სხვათაშორის, ეს არ არის მხოლოდ ჩვენი სახელმწიფო ინსიტუტების მცდელობა, ჩვენ დიდი დახმარება გვქონდა როგორც ევროკავშირის მხრიდან, ასევე შეერთებულო შტატების მხრიდან, რომ გვქონოდა იმ ბაზებთან წვდომა. ჩვენს საბაჟო სამსახურებს ჰყავთ უკვე სპეციალისტები, რომლებიც ამა თუ იმ ბაზაში მუშაობენ. ერთი მხრივ, შეუძლიათ მოკვლევა და ტექნიკური აღჭურვილობა, რომელიც ტვირთის დეტალური შემოწმების შესაძლებლობას იძლევა“, – განაცხადა პაპუაშვილმა.